“Oʻzbekiston Respublikasi Oliy Majlisi Qonunchilik palatasining Reglamenti toʻgʻrisida”gi Oʻzbekiston Respublikasi Qonunining 33⁵-moddasi hamda Oʻzbekiston Respublikasi Oliy Majlisi huzuridagi Sud hokimiyati mustaqilligini taʼminlashga koʻmaklashuvchi komissiya yigʻilishining 2018-yil 25-oktabrdagi 3-son bayoniga muvofiq Oʻzbekiston Respublikasi Oliy Majlisi Qonunchilik palatasining Kengashi qaror qiladi:

1. Oʻzbekiston Respublikasi Oliy Majlisi huzuridagi Sud hokimiyati mustaqilligini taʼminlashga koʻmaklashuvchi komissiya yigʻilishining 2018-yil 25-oktabrdagi 3-son bayoni bilan Oʻzbekiston Respublikasi Prezidentining 2017-yil 21-fevraldagi PF-4966-sonli Farmoni 15, 16-bandlari ijrosi boʻyicha amalga oshirilgan ishlar yuzasidan oʻrganishlar oʻtkazishni Qonunchilik va sud-huquq masalalari qoʻmitasi zimmasiga yuklash tavsiya etilganligi maʼlumot uchun qabul qilinsin.

2. Oʻzbekiston Respublikasi Oliy Majlisi Qonunchilik palatasining Qonunchilik va sud-huquq masalalari qoʻmitasi:

Oʻzbekiston Respublikasi Prezidentining 2017-yil 21-fevraldagi PF-4966-sonli Farmoni 15, 16-bandlari ijrosi boʻyicha amalga oshirilgan ishlar yuzasidan oʻrganishlar oʻtkazilishini taʼminlasin;

oʻrganish yakunlarini qoʻmita majlisida koʻrib chiqib, natijasi yuzasidan Oʻzbekiston Respublikasi Oliy Majlisi huzuridagi Sud hokimiyati mustaqilligini taʼminlashga koʻmaklashuvchi komissiyaga 2018-yil 25-dekabrga qadar axborot taqdim qilsin.

3. Ushbu Qaror Oʻzbekiston Respublikasi Vazirlar Mahkamasi, Moliya vazirligi, Oliy sudi hamda Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklariga yuborilsin.

4. Ushbu Qaror qabul qilingan kundan eʼtiboran kuchga kiradi.