“Oʻzbekiston davlat qurilish materiallari ishlab chiqarish (“Oʻzqurilishmateriallari”) konsernini tashkil etish toʻgʻrisida”gi Farmonni bajarish yuzasidan Vazirlar Mahkamasi qaror qiladi:

1. Belgilab qoʻyilsinki, Oʻzbekiston davlat qurilish materiallari ishlab chiqarish (“Oʻzqurilishmateriallari”) konserni:

Oʻzbekiston Respublikasi Prezidenti huzuridagi Vazirlar Mahkamasiga hisob beradi;

Oʻzbekiston Respublikasi Binokorlik materiallari sanoati vazirligi avval tuzgan barcha shartnomalar va u tomonidan qabul qilingan majburiyatlar boʻyicha javob beradi;

oʻziga berilgan huquqlarni hisobga olgan holda ishlab chiqarish-xoʻjalik va ijtimoiy faoliyat masalalarini toʻla xoʻjalik hisobi asosida mustaqil hal qiladi;

konsern tarkibiga 1-ilovaga* muvofiq kiruvchi birlashmalar, korxonalar va tashkilotlar oʻz xoʻjalik mustaqilliklarini hamda yuridik shaxs huquqlarini saqlab qoladilar.

2. “Oʻzqurilishmateriallari” konserni boshqaruvining yuqori organi Kengash hisoblanadi, u boshqaruv va taftish komissiyasini saylaydi, uning xodimlari mehnatiga haq toʻlash shartlari va tizimini belgilaydi. Konsern apparatining tuzilmasi 2-ilovaga* muvofiq tasdiqlansin, xodimlarning eng koʻp soni 45 nafardan (xizmat koʻrsatuvchi xodimlar bunga kirmaydi) iborat qilib belgilansin, ularni saqlash uchun zarur boʻlgan mablagʻlar konsern tarkibiga kiruvchi birlashmalar, korxonalar va tashkilotlarning daromadlaridan mablagʻ ajratish hisobiga hosil boʻladi.

Konsernga raisning 4 nafar oʻrinbosariga, shu jumladan, bitta birinchi oʻrinbosarga ega boʻlish tavsiya qilinsin. Boshqaruv raisi va uning oʻrinbosarlari konsern Kengashi tomonidan saylanadi va Vazirlar Mahkamasi tomonidan tasdiqlanadi.

Konsern raisi va uning oʻrinbosarlariga respublika vazirliklari va idoralarining tegishli xodimlari uchun belgilangan moddiy-maishiy taʼminot va tibbiy xizmat koʻrsatish shart-sharoitlari tatbiq qilinsin.

3. Mulkchilikning yangi shakllariga oʻtish tizimini ishlab chiqish maqsadida Oʻzbekiston Respublikasi davlat mulkini boshqarish va xususiylashtirish qoʻmitasi va “Oʻzqurilishmateriallari” davlat konsernining binokorlik materiallari sanoati birlashmalari, korxonalari va tashkilotlarini davlat tasarrufidan chiqarish va xususiylashtirish boʻyicha choralarni bosqichma-bosqich amalga oshirish toʻgʻrisidagi taklifi qabul qilinsin.

Binokorlik materiallari sanoati davlat korxonalarini 1993-1994-yillarda mulkchilikning boshqa shakllariga aylantirish boʻyicha tashkiliy tadbirlar 3-ilovaga* muvofiq tasdiqlansin.

4. Belgilab qoʻyilsinki, birlashmalar, korxonalar va tashkilotlarni aksionerlik jamiyatlariga aylantirishda bu aksionerlik jamiyatlarining davlatga tegishli ulushi uning kamida yarmini tashkil etishi kerak.

5. Oʻzbekiston Respublikasi Moliya vazirligi huzuridagi Davlat mulki jamgʻarmasi:

davlatga tegishli ulushlar (hissalar, aksiyalar)ga muvofiq aksionerlik jamiyatlari, boshqa jamiyatlar va shirkatlar faoliyatini boshqarish huquqini “Oʻzqurilishmateriallari” konserniga berishni;

davlatga tegishli aksiyalar boʻyicha dividendlarning bir qismini aksionerlik jamiyatlarini rivojlantirish uchun shartnoma asosida ularga berishni amaliyotga kiritsin.

6. Oʻzbekiston davlat qurilish materiallari ishlab chiqarish (“Oʻzqurilishmateriallari”) konserni bir oy muddat ichida:

konsern Ustavini ishlab chiqsin va tasdiqlash uchun Vazirlar Mahkamasiga kiritsin;

qayta aylantirishning mehnat jamoalari tomonidan tanlangan tashkiliy-huquqiy shakllarini koʻrsatgan holda 1993-1994-yillarda davlat tasarrufidan chiqarish va xususiylashtirish moʻljallangan birlashmalar, korxonalar va tashkilotlarning obyektma- obyekt roʻyxatini Oʻzbekiston Respublikasi davlat mulki qoʻmitasiga taqdim etsin.

7. Oʻzbekiston Respublikasi Aloqa vazirligi sobiq Binokorlik materiallari sanoati vazirligi uchun 1992-yilda oʻrnatilgan aloqa va telefonlarning barcha turlarini “Oʻzqurilishmateriallari” konserni uchun saqlab qolsin.

8. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari kompleksga kadrlar bilan butlashda va tarkibiga kiruvchi birlashmalar va tashkilotlarning kompleks rivojlanishini taʼminlashda yordam koʻrsatsinlar.

9. “Oʻzqurilishmateriallari” konserni boshqaruvi va uning ishchi apparati Binokorlik materiallari sanoati egallab turgan Toshkent shahar, Miroqilov koʻchasi, 68-a uydagi binoga joylashtirilsin.

10. Oʻzbekiston SSR Ministrlar Sovetining “Oʻzbekiston SSR Binokorlik materiallari sanoati vazirligini tashkil etish toʻgʻrisida” 1989-yil 12-sentabrdagi 285-son qarori oʻz kuchini yoʻqotgan deb topilsin.

11. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari oʻrtoq K. N. Toʻlaganov zimmasiga yuklatilsin. Qarorning qanday bajarilayotganligi 1993-yil yanvar oyida koʻrib chiqilsin.