Oʻzbekiston Respublikasi Vazirlar Mahkamasining “Oʻzbekiston Respublikasida tashqi iqtisodiy faoliyatni muvofiqlashtirishni yaxshilash toʻgʻrisida” 1995-yil 13-iyundagi 219-son qaroriga muvofiq Vazirlar Mahkamasi qaror qiladi:

1. Quyidagilar:

Vazirlar Mahkamasining Tashqi iqtisodiy faoliyatni muvofiqlashtirish departamenti shtatlar jadvali 1-ilovaga muvofiq;

Vazirlar Mahkamasining Tashqi iqtisodiy faoliyatni muvofiqlashtirish departamenti toʻgʻrisidagi Nizom 2-ilovaga muvofiq;

Xalqaro moliya tashkilotlari bilan ishlash Idoralararo doimiy komissiyasining oʻzgartirilgan tarkibi 3-ilovaga* muvofiq tasdiqlansin.

2. Belgilab qoʻyilsinki, Oʻzbekiston Respublikasi vazirliklari va idoralari majburiy tartibda:

tashqi iqtisodiy faoliyatga taalluqli yoʻriqnomalar va nizomlarning loyihalarini Vazirlar Mahkamasining Tashqi iqtisodiy faoliyatni muvofiqlashtirish departamenti bilan kelishib oladilar;

moliyaviy va texnik yordam berish toʻgʻrisida xalqaro tashkilotlarga beriladigan soʻrovlarni faqat Vazirlar Mahkamasining Tashqi iqtisodiy faoliyatni muvofiqlashtirish departamenti orqali yuboradilar;

Vazirlar Mahkamasining Tashqi iqtisodiy faoliyatni muvofiqlashtirish departamenti tomonidan soʻralgan zarur axborotlar oʻz vaqtida taqdim etilishini taʼminlaydilar.

3. Vazirlar Mahkamasining Tashqi iqtisodiy faoliyatni muvofiqlashtirish Butun jahon savdo tashkiloti va Ovropa Ittifoqi Komissiyasi bilan ishlash Idoralararo komissiyalarning kotibiyati funksiyasiga yuklansin.

4. Belgilab qoʻyilsinki, Oʻzbekistonda Ovropa Ittifoqi Komissiyasining texnikaviy yordamni muvofiqlashtirish Byurosi (OʻZOIKBYuRO) va Sarmoyalarga koʻmaklashish xizmati Vazirlar Mahkamasining Tashqi iqtisodiy faoliyatni muvofiqlashtirish departamentining tarkibi boʻlinmalari hisoblanadilar.

Departament oʻn kun muddatda Oʻzbekistonda Ovropa Ittifoqi Komissiyasining texnikaviy yordamni muvofiqlashtirish Byurosi va Sarmoyalarga koʻmaklashish xizmati toʻgʻrisidagi nizomlarga tegishli oʻzgartirishlar kiritsin.

5. Vazirlar Mahkamasining Tashqi iqtisodiy faoliyatni muvofiqlashtirish departamentiga xalqaro moliyaviy va iqtisodiy tashkilotlar missiyalari tomonidan soʻraladigan axborotni, shu jumladan, mutlaqo maxfiy axborotni belgilangan tartibda taqdim etish huquqi berilsin.

6. Vazirlar Mahkamasining Tashqi iqtisodiy faoliyatni muvofiqlashtirish departamenti:

Oʻzbekiston Respublikasi Prezidentining farmonlari va farmoyishlari, Vazirlar Mahkamasining qarorlari va farmoyishlari, Oliy Majlis sessiyalarining materiallari (kelishuv boʻyicha) yuborilishi shart boʻlgan tashkilotlar roʻyxatiga;

“Oʻzistiqbolstat” davlat qoʻmitasi va Davlat soliq qoʻmitasining Bosh bojxona boshqarmasi statistika hisobotlari byulletenlari yuborilishi shart boʻlgan reyestrga kiritilsin.

7. Vazirlar Mahkamasining Tashqi iqtisodiy faoliyatni muvofiqlashtirish departamenti Oʻzbekiston Respublikasi Tashqi iqtisodiy aloqalar vazirligi, “Oʻzistiqbolstat” davlat qoʻmitasi, Moliya vazirligi, Davlat mulki qoʻmitasi, Tashqi ishlar vazirligi, Markaziy bank, Tashqi iqtisodiy faoliyat milliy banki, Davlat soliq qoʻmitasi va Fan va texnika davlat qoʻmitasi bilan birgalikda ikki oy muddatda tashqi iqtisodiy faoliyat masalalari boʻyicha axborot kompyuter tarmoqlari tashkil etish yuzasidan takliflar kiritsin.

8. Oʻzbekiston Respublikasi Moliya vazirligi Vazirlar Mahkamasining Tashqi iqtisodiy faoliyatni muvofiqlashtirish departamentini Kompyuter aloqasi xalqaro tarmoqlariga, uyali telefon aloqasi va sunʼiy yoʻldosh orqali ishlaydigan televideniye tizimiga ulash, chet el va mamlakatimizning davriy matbuot nashrlariga obuna boʻlishni rasmiylashtirish xarajatlarini toʻlash uchun zarur mablagʻlar ajratishni nazarda tutsin.

9. Oʻzbekiston Respublikasi Prezidenti Apparati Ishlar Boshqarmasi bir hafta muddatda Departamentni joylashtirish masalasini hal qilsin, bunda tegishli infrastruktura bilan taʼminlash va ekspertlik guruhlarida ishlash uchun jalb qilinadigan xorijiy mutaxassislarning ishlashlari uchun sharoitlar yaratish zarurligini nazarda tutsin.

10. Vazirlar Mahkamasining Tashqi iqtisodiy faoliyatni muvofiqlashtirish departamentining boshligʻi maqomi va maishiy hamda tibbiy xizmat koʻrsatish sharoitlari boʻyicha Oʻzbekiston Respublikasi vaziriga, Departament boshligʻining oʻrinbosari — Oʻzbekiston Respublikasi vazirining birinchi oʻrinbosariga tenglashtirilsin.

11. Xodimlarning mansab maoshlariga yuksak malakaliligi, chet tillarni bilganligi va kompyuter texnikasi bilan ishlash malakasiga ega ekanligi uchun belgilangan ish haqi fondi doirasida maxsus ustamalar belgilashga ruxsat etilsin.

12. Vazirlar Mahkamasining 1995-yil 10-fevraldagi 45-son qarorining 3-bandi, Vazirlar Mahkamasining 1995-yil 7-martdagi 81-son qarori 2-bandining 3-xatboshi, Vazirlar Mahkamasining 1994-yil 11-oktabrdagi 397-f-son farmoyishi 4-bandining 2-xatboshi va farmoyishga ilova oʻz kuchini yoʻqotgan deb hisoblansin.

13. Mazkur qarorning bajarilishini nazorat qilish Bosh vazir oʻrinbosari Oʻ.T. Sultonov zimmasiga yuklansin.

1. Tashqi iqtisodiy faoliyatni muvofiqlashtirish departamenti (keyingi oʻrinlarda “Departament” deb ataladi) Vazirlar Mahkamasining “Oʻzbekiston Respublikasida tashqi iqtisodiy faoliyatni muvofiqlashtirishni yaxshilash toʻgʻrisida” 1995-yil 13-iyundagi 219-son qaroriga muvofiq tashkil etilgan.

2. Departamentning faoliyati Oʻzbekiston Respublikasi tashqi iqtisodiy aloqalarini rivojlantirishga va uning samaradorligini oshirishga, ushbu maqsadlarda davlat organlari, respublika korxonalari va tashkilotlari ishini muvofiqlashtirishni taʼminlashga, xalqaro moliya va iqtisodiy tashkilotlar bilan hamkorlikni mustahkamlashga, Oʻzbekistonda qulay investitsiya muhiti yaratishga qaratilgan.

3. Departament oʻz faoliyatida Oʻzbekiston Respublikasi qonunlariga, Oʻzbekiston Respublikasi Oliy Majlisining qarorlariga, Vazirlar Mahkamasining qarorlari va farmoyishlariga, Oʻzbekiston Respublikasining boshqa davlatlar bilan tuzgan bitimlariga amal qiladi.

4. Departament Bosh vazirning tashqi iqtisodiy majmuiga rahbarlik qiluvchi oʻrinbosari rahbarligi ostida ishlaydi.

5. Departament tarkibiga:

tashqi iqtisodiy faoliyatni muvofiqlashtirish va tashqi savdoni rivojlantirish boʻlimi;

xalqaro moliya va iqtisodiy tashkilotlar bilan hamkorlik qilish boʻlimi;

ustuvor investitsiya loyihalari boʻlimi kiradi.

Departament tuzilmasiga, shuningdek, mustaqil yuridik shaxslar hisoblangan Oʻzbekistonda Ovropa Ittifoqi Komissiyasining texnikaviy yordamni muvofiqlashtirish Byurosi (OʻZOIKBYuRO) va Sarmoyalarga koʻmaklashish xizmati kiradi.

6. Departamentning joriy faoliyatiga maqomi boʻyicha Oʻzbekiston Respublikasi vaziriga tenglashtirilgan Departament boshligʻi rahbarlik qiladi.

7. Departament boshligʻi ayni vaqtda tashqi iqtisodiy faoliyatni muvofiqlashtirish va tashqi savdoni rivojlantirish boʻlimining boshligʻi hisoblanadigan bir nafar oʻrinbosarga ega boʻladi. Departament boshligʻining oʻrinbosari maqomi boʻyicha Oʻzbekiston Respublikasi vazirining birinchi oʻrinbosariga tenglashtiriladi.

8. Boʻlim boshliqlari boʻlim rahbarlari hisoblanadilar, ular maqomi boʻyicha Vazirlar Mahkamasi boʻlimi mudirlariga tenglashtiriladi.

Xalqaro moliyaviy va iqtisodiy tashkilotlar bilan hamkorlik qilish boʻlimining boshligʻi OʻZOIKBYuRO faoliyatiga rahbarlik qiladi.

Ustuvor investitsiya loyihalari boʻlimi boshligʻi Sarmoyalarga koʻmaklashish xizmati faoliyatiga rahbarlik qiladi.

9. Boʻlimlarning boshliqlari maqomi boʻyicha Vazirlar Mahkamasi boʻlim mudirlarining oʻrinbosarlariga tenglashtiriladigan oʻz oʻrinbosarlariga ega boʻladi.

10. Departament apparati maqomi boʻyicha Vazirlar Mahkamasining katta ekspertlariga tenglashtirilgan bosh mutaxassislar va maqomi boʻyicha Vazirlar Mahkamasining ekspertiga tenglashtirilgan yetakchi mutaxassisdan iborat boʻladi.

11. Katta inspektorlar texnik xodimlarni tashkil etadi.

12. Quyidagilar Departamentning asosiy vazifalari hisoblanadi:

Oʻzbekiston Respublikasining tashqi iqtisodiy siyosatiga va tashqi iqtisodiy faoliyatning, normativ bazasini takomillashtirishga doir takliflarni ishlab chiqish;

Oʻzbekiston Respublikasining Prezidenti farmonlari va Hukumat qarorlari bajarilishini taʼminlash ishlarini tashkil etish;

respublika vazirliklari, idoralari, korporatsiyalari, uyushmalari, korxonalarining tashqi savdoni rivojlantirish monitoringining samarali tizimini shakllantirish va respublika iqtisodiyotining ustuvor tarmoqlarida investitsiya loyihalarini amalga oshirish uchun chet el sarmoyasini jalb etish boʻyicha faoliyatini muvofiqlashtirish;

xorijiy mamlakatlar va xalqaro tashkilotlar bilan hamkorlik qilishning ustuvor yoʻnalishlarini belgilash;

respublika vazirliklari, idoralari, korporatsiyalari, uyushmalari, korxonalarining xalqaro moliya va iqtisodiy tashkilotlar bilan hamkorlik boʻyicha faoliyatini muvofiqlashtirish;

Oʻzbekiston Respublikasiga xalqaro iqtisodiy va moliyaviy tashkilotlar, xorijiy tashkilotlar tomonidan koʻrsatilayotgan moliyaviy va texnikaviy koʻmaklashish ustuvorliklarini va ularga boʻlgan ehtiyojlarni aniqlash;

xalqaro moliyaviy va iqtisodiy tashkilotlarning respublikadagi missiyalari faoliyatiga koʻmaklashish;

toʻgʻridan toʻgʻrichet el investitsiyalarining Oʻzbekiston Respublikasi iqtisodiyotiga jalb etilishiga koʻmaklashish.

13. Departament oʻziga yuklangan vazifalarga muvofiq:

Oʻzbekiston Respublikasi tashqi iqtisodiy siyosatining asosiy prinsiplarini shakllantirishda qatnashadi;

Tashqi iqtisodiy aloqalar vazirligi, Moliya vazirligi, Davlat mulki qoʻmitasi, Tashqi ishlar vazirligi, “Oʻzistiqbolstat” davlat qoʻmitasi, Davlat soliq qoʻmitasi, Tashqi iqtisodiy faoliyat milliy banki hamda respublikaning boshqa vazirliklari va idoralari tomonidan tashqi iqtisodiy siyosat, xalqaro moliyaviy va iqtisodiy tashkilotlar bilan hamkorlik qilish, chet el investitsiyalari va kreditlarini jalb etish sohasida amalga oshirilayotgan kelishilgan tadbirlar oʻtkazilishini taʼminlaydi;

respublika vazirliklari, idoralari, korporatsiyalari, uyushmalari, korxonalarining, Qoraqalpogʻiston Respublikasi Vazirlar Kengashi, mahalliy hokimiyat va boshqaruv organlarining tashqi iqtisodiy aloqalar sohasidagi faoliyati natijalarini oʻrganadi va umumlashtiradi;

Oʻzbekiston Respublikasi vazirliklari, idoralari, korporatsiyalari, uyushmalari, korxonalari bilan birgalikda xorijiy mamlakatlar, xalqaro moliyaviy va iqtisodiy tashkilotlar bilan tashqi iqtisodiy aloqalarni rivojlantirish, shuningdek, chet el investitsiyalari va kreditlarini jalb etish boʻyicha takliflarni tayyorlaydi va Vazirlar Mahkamasining koʻrib chiqishiga kiritadi;

vazirliklar, idoralar, korporatsiyalar, uyushmalar, birlashmalar, korxonalar, Qoraqalpogʻiston Respublikasi Vazirlar Kengashi, mahalliy boshqaruv va hokimiyat organlari tomonidan xorijiy mamlakatlar bilan savdo-iqtisodiy aloqalarni tashkil etish va takomillashtirish boʻyicha kiritiladigan takliflarni Vazirlar Mahkamasi boʻlimlari bilan birgalikda koʻrib chiqadi, ular boʻyicha Vazirlar Mahkamasining tegishli qarorlari loyihalarini tayyorlaydi;

xalqaro moliyaviy va iqtisodiy tashkilotlarning, shuningdek, yirik chet el investorlarining iqtisodiy hamkorlikni rivojlantirishga doir Vazirlar Mahkamasiga kiritilgan takliflarini puxta ishlab chiqilishini taʼminlaydi;

Vazirlar Mahkamasining tasdiqlash uchun kiritiladigan tovarlar (ishlar, xizmatlar) importi va, eksporti prognozi loyihalarini tahlil qiladi, Vazirlar Mahkamasining tegishli qarorlarini tayyorlaydi;

xorijiy davlatlar, xalqaro moliyaviy va iqtisodiy tashkilotlar bilan hamkorlik qilish boʻyicha mavjud takliflar toʻgʻrisidagi, shuningdek, ular tomonidan koʻrsatilayotgan texnikaviy yordam va boshqa koʻmaklashish haqidagi maʼlumotlar bankini tashkil etadi;

Vazirlar Mahkamasining boʻlimlari, Oʻzbekiston Respublikasining, vazirliklari, idoralari, korporatsiyalari, uyushmalari, korxonalari bilan birgalikda tashqi iqtisodiy aloqalarni rivojlantirish dasturlari, investitsiya siyosati, texnikaviy hamkorlik va hamkorlikning boshqa shakllari ishlab chiqilishi va amalga oshirilishini tashkil etadi;

Prezident farmonlari va Oʻzbekiston Respublikasi Hukumati qarorlari shuningdek, Departament mutasaddi boʻlgan masalalar boʻyicha Vazirlar Mahkamasi rahbariyatining topshiriqlari bajarilishi ustidan nazoratni amalga oshiradi;

vazirliklar, idoralar, korporatsiyalar, uyushmalar, korxonalar, mahalliy hokimiyat va boshqaruv organlari tomonidan qarorlar loyihalari va tashqi iqtisodiy faoliyat masalalari boʻyicha boshqa materiallar oʻz vaqtida taqdim etilishi ustidan nazoratni amalga oshiradi;

xorijiy mamlakatlar, xalqaro moliyaviy va iqtisodiy tashkilotlar, chet ellik yirik investorlar bilan hamkorlik qilishning amaldagi dasturlari, bajarilishi ustidan nazoratni amalga oshiradi;

valyuta va boj bilan tartibga solish respublika tizimlarining faoliyat koʻrsatishni tahlil qiladi, ularni takomillashtirishga doir takliflarni vazirliklar va idoralar bilan birgalikda tayyorlaydi va Vazirlar Mahkamasi rahbariyatining koʻrib chiqishi uchun kiritadi;

Tashqi iqtisodiy aloqalar vazirligi va Tashqi iqtisodiy faoliyat milliy bankining faoliyatini, shuningdek, Oʻzbekiston Respublikasi vazirliklari, idoralari, korporatsiyalari, uyushmalari, korxonalarining tashqi iqtisodiy boʻlinmalari faoliyatini tahlil qiladi hamda ularning ishini yaxshilash yuzasidan takliflar tayyorlaydi;

tashqi iqtisodiy faoliyat masalalariga daxldor boʻlgan qonunlar loyihalari va boshqa normativ hujjatlar ekspertiza qilinishini tashkil etadi, tashqi iqtisodiy aloqalarning tashkiliy huquqiy mexanizmini takomillashtirishga doir takliflarni Vazirlar Mahkamasi rahbariyati koʻrib chiqishi uchun kiritadi;

yirik investitsiya loyihalari ekspertizasini, chet el kredit resurslarini jalb etish, texnika bilan qayta qurollantirish dasturlarini mablagʻ bilan taʼminlash, xalq xoʻjaligining u yoki bu tarmoqlarini rivojlantirish boʻyicha takliflarni tashkil etadi;

loyihalarning Oʻzbekiston Respublikasi Investitsiya dasturiga kiritilishiga doir takliflar kiritadi;

xalqaro moliyaviy va iqtisodiy tashkilotlar bilan hamkorlikning ustuvor yoʻnalishlarini tanlash boʻyicha takliflar tayyorlaydi hamda texnikaviy va moliyaviy koʻmaklashish dasturlari amalga oshirilishi ustidan nazoratni amalga oshiradi;

vazirliklar va idoralarning moliyaviy va texnikaviy koʻmaklashishga doir takliflarini umumlashtiradi hamda xalqaro tashkilotlar va chet el agentliklariga soʻrovlar yuboradi;

texnikaviy hamkorlik va hamkorlikning boshqa turlari dasturlari qanday amalga oshirilayotganligini oʻrganadi, ularning samaradorligini oshirishga doir takliflar tayyorlaydi;

xalqaro moliyaviy va iqtisodiy tashkilotlar bilan bitimlar loyihalarini tayyorlaydi va imzolangan bitimlarning bajarilishi ustidan nazoratni tashkil etadi;

xalqaro moliyaviy va iqtisodiy tashkilotlarning respublikadagi missiyalari faoliyatiga koʻmaklashadi, ularga zarur iqtisodiy axborot tayyorlash va taqdim etish ishini muvofiqlashtiradi;

tashqi iqtisodiy hamkorlik masalalari boʻyicha hukumatlararo darajada uchrashuvlar, muzokaralarni tayyorlashda qatnashadi;

xalqaro moliyaviy va iqtisodiy tashkilotlar hamda chet ellik yirik investorlar ishtirokida amalga oshirish uchun taklif etilayotgan investitsiya loyihalarining ustuvorligi boʻyicha takliflar tayyorlaydi;

yirik investitsiya loyihalari va takliflari boʻyicha maʼlumotlar bankini shakllantiradi, shuningdek, ularni roʻyobga chiqarish monitoringini amalga oshiradi;

davlat mulki obyektlari negizida chet el investitsiyasi ishtirokida yirik korxonalar tashkil etish boʻyicha muzokaralar olib borish uchun vaqtinchalik idoralararo guruhlar tashkil etadi;

Vazirlar Mahkamasining boʻlimlari bilan birgalikda vazirliklar, idoralarning respublikada va chet elda tashqi iqtisodiy faoliyat sohasida kadrlar tayyorlash, ularni qayta tayyorlash va ularning malakasini oshirish masalalari boʻyicha takliflarini koʻrib chiqadi.

14. Departament quyidagi huquqlarga ega boʻladi:

Departament vakolatiga kiruvchi masalalar boʻyicha materiallarni Vazirlar Mahkamasi boʻlimlaridan, vazirliklar, idoralar, korporatsiyalar, uyushmalar, birlashmalar, korxonalardan, shuningdek, mahalliy boshqaruv va hokimiyat organlaridan soʻrab olish;

vazirliklar, idoralar, tashkilotlar, mahalliy hokimiyat va boshqaruv organlari rahbarlarining, tashqi iqtisodiy faoliyat qatnashchilarining tashqi iqtisodiy aloqalar masalalari boʻyicha hisobotlarini eshitish;

tashqi iqtisodiy aloqalar sohasidagi eng muhim muammolar boʻyicha maslahatlashish, ularni oʻrganish va hal etish, ushbu sohada takliflar tayyorlash maqsadida vaqtinchalik ishchi guruhlar tashkil etish uchun Oʻzbekiston Respublikasining olimlari va mutaxassislarini, shuningdek, xorijiy ekspertlarni jalb etish;

xalqaro hamkorlik masalalari boʻyicha xalqaro konferensiyalar, kongresslar, simpoziumlar va kengashlar ishida, shuningdek, davlatlararo va hukumatlararo hamkorlik masalalari hamda ustuvor loyihalarni tayyorlash boʻyicha muzokaralarda qatnashish va amalga oshirish;

vazirliklar, idoralar rahbarlari ishtirokida kengashlar oʻtkazish, ularning hayʼatlari ishida, Vazirlar Mahkamasi majlislarida ijro etuvchi hokimiyat mahalliy organlari majlislarida, korporatsiyalar, uyushmalar, korxonalarning kengashlarida qatnashish;

vazirliklar va idoralarning nizomlari va yoʻriqnomalarining tashqi iqtisodiy faoliyatga tegishli qismiga oʻzgartirish va qoʻshimchalar kiritishga doir takliflar kiritish;

vazirliklar va idoralar rahbariyatiga tashqi iqtisodiy faoliyat, xalqaro moliyaviy va iqtisodiy tashkilotlar bilan hamkorlik qilish, shuningdek, chet el sarmoyasini respublika iqtisodiyotiga jalb etish masalalari boʻyicha oʻz vakolatlari doirasida topshiriqlar berish;

oʻzaro hamkorlik masalalari boʻyicha Oʻzbekiston Respublikasi vazirliklari va idoralari bilan, shuningdek, xalqaro, xorijiy moliyaviy va iqtisodiy tashkilotlar, chet el hukumat muassasalari bilan yozishmalarni, mustaqil yuritish;

Oʻzbekiston Respublikasi vazirliklari va idoralarining axboroti va maʼlumotlar elektron bazalaridan oʻz vakolati doirasida foydalanish.

15. Departamentning burchlari:

tovarlar va xizmat eksporti va importi prognozlarining yillik va uzoq muddatli loyihalarini, investitsiya dasturlarini, shuningdek, Vazirlar Mahkamasining tegishli qarorlari va Oʻzbekiston Respublikasi Prezidentining Farmonlari ijro etilishi yuzasidan hisobotlarni Vazirlar Mahkamasi rahbariyatining koʻrib chiqishi uchun taqdim etish;

vazirliklar va idoralar tomonidan Oʻzbekiston Respublikasi Prezidentining farmonlari, Vazirlar Mahkamasining qarorlari hamda tashqi iqtisodiy aloqalar sohasida ularga yuklangan funksiyalarning bajarilishi ustidan amaliy nazoratni taʼminlash;

xalqaro moliyaviy va iqtisodiy tashkilotlarning, chet el hukumat muassasalarining va yirik investorlarning oʻzaro hamkorlik toʻgʻrisidagi takliflarini ishlab chiqish.