Oʻzbekiston Respublikasi Vazirlar Mahkamasi tomonidan 2019-yil 17-aprelda kiritilgan “Banklar va bank faoliyati toʻgʻrisida”gi Oʻzbekiston Respublikasi Qonuniga oʻzgartish va qoʻshimchalar kiritish haqida”gi QL-489-sonli Oʻzbekiston Respublikasi qonuni loyihasining Oʻzbekiston Respublikasi Oliy Majlisi Qonunchilik palatasi majlisida birinchi oʻqishdagi muhokamasida ushbu loyihaga bevosita taalluqli boʻlgan tijorat banklari va Oʻzbekiston banklar assotsiatsiyasi vakillarining ishtirok etmaganligi munosabati bilan hamda deputatlar tomonidan bildirilgan fikr-mulohazalarni va tavsiyalarni inobatga olgan holda, shuningdek parlament quyi palatasida mazkur qonun loyihasi muhokamasining xolisligini taʼminlash maqsadida Oʻzbekiston Respublikasi Oliy Majlisining Qonunchilik palatasi qaror qiladi:

1. Oʻzbekiston Respublikasi Vazirlar Mahkamasi tomonidan 2019-yil 17-aprelda kiritilgan “Banklar va bank faoliyati toʻgʻrisida”gi Oʻzbekiston Respublikasi Qonuniga oʻzgartish va qoʻshimchalar kiritish haqida”gi QL-489-sonli Oʻzbekiston Respublikasi qonuni loyihasi kun tartibidan chiqarilsin.

2. Oʻzbekiston Respublikasi Oliy Majlisi Qonunchilik palatasining Budjet va iqtisodiy islohotlar qoʻmitasi mazkur qonun loyihasi muhokama qilinadigan Oʻzbekiston Respublikasi Oliy Majlisi Qonunchilik palatasining navbatdagi majlisiga Oʻzbekiston Respublikasi Vazirlar Mahkamasi vakillari qatorida tijorat banklarining va Oʻzbekiston Banklar assotsiatsiyasi vakillarining ishtirokini taʼminlasin.

3. Ushbu Qaror qabul qilingan kundan eʼtiboran kuchga kiradi.