“Ilm, maʼrifat va raqamli iqtisodiyotni rivojlantirish yili” Davlat dasturining 2020-yil birinchi yarim yilligida bajarilishi yuzasidan Oʻzbekiston Respublikasi Vazirlar Mahkamasining hisobotini koʻrib chiqib, Oʻzbekiston Respublikasi Oliy Majlisi Qonunchilik palatasi taʼkidlaydiki, koronavirus infeksiyasi tarqalishiga qarshi kurashish, makroiqtisodiy barqarorlikni va iqtisodiyot tarmoqlarining uzluksiz ishlashini taʼminlash, tadbirkorlik uchun qulay muhit yaratish, aholini ijtimoiy qoʻllab-quvvatlash borasida Hukumat tomonidan keng koʻlamli ishlar amalga oshirildi.

Amalga oshirilgan chora-tadbirlar natijasida joriy yilning birinchi yarmida oʻtgan yilning shu davriga nisbatan yalpi ichki mahsulotning oʻsishi 100,2 foizni, uning tarkibida sanoat — 98,1 foizni, xizmatlar — 99,3 foizni, qishloq xoʻjaligi — 102,8 foizni tashkil qildi.

Hisobot davrida investitsiya muhitini yanada yaxshilash, xorijiy investorlar uchun qulay shart-sharoitlar yaratish boʻyicha amalga oshirilgan ishlar natijasida iqtisodiyotning turli tarmoqlariga kiritilgan 3 mlrd. 860 mln. AQSh dollari miqdoridagi xorijiy investitsiya va kreditlar oʻzlashtirildi hamda respublika boʻyicha jami eksport hajmi 6 mlrd. 285 mln. AQSh dollarini tashkil etdi.

Oʻtgan davrda mamlakatimiz Prezidenti tomonidan koronavirus pandemiyasi munosabati bilan qabul qilingan farmon va qarorlarda belgilangan vazifalarni oʻz vaqtida hamda sifatli amalga oshirishga ustuvor ahamiyat berildi.

Koronavirus pandemiyasi davrida iqtisodiy barqarorlikni taʼminlash, investitsiyaviy faollikni ragʻbatlantirish, hududlarning ishlab chiqarish imkoniyatlarini kengaytirish, soliq yukini kamaytirish, aholi bandligini oshirish hamda tadbirkorlik subyektlarini qoʻllab-quvvatlashga Hukumat tomonidan alohida eʼtibor qaratildi.

Shular natijasida joriy yilning birinchi yarim yilligida Davlat dasturidagi bajarilishi belgilangan 118 ta banddan 64 tasi toʻliq bajarildi, 15 tasining bajarish muddati uzaytirildi, 39 tasining ijrosini toʻliq taʼminlash yuzasidan zarur chora-tadbirlar koʻrilmoqda.

Deputatlar taʼkidlaganidek, Davlat dasturidagi tadbirlarning ijrosini taʼminlash borasida amalga oshirilgan ijobiy ishlar bilan bir qatorda, koronavirus pandemiyasi sababli yuzaga kelgan ayrim qiyinchiliklar tufayli baʼzi bandlarning bajarilishi kechikmoqda, qator vazifalarning ijrosi bugungi kunga qadar taʼminlanmasdan qolmoqda.

Shundan kelib chiqib, quyi palatadagi siyosiy partiyalar fraksiyalari Davlat dasturining ijrosini taʼminlashda Hukumat aʼzolari qator masalalarda alohida eʼtibor qaratishi lozimligini qayd etdilar.

Jumladan, OʻzLiDeP fraksiyasi tomonidan jozibador investitsiya muhitini yaratish, hududlarni jadal ijtimoiy-iqtisodiy rivojlantirish, foydalanilmayotgan binolardan samarali foydalanish, koronavirus pandemiyasi davrida tadbirkorlik subyektlarini qoʻllab-quvvatlash borasidagi ishlarni jadallashtirish zarurligi aytib oʻtildi.

Oʻzbekiston “Milliy tiklanish” DP fraksiyasi tomonidan koronavirus pandemiyasining turizm sohasiga salbiy taʼsirini kamaytirish, oliy taʼlim sohasida oʻz yechimini kutib turgan masalalarni hal etish, maktablarning qurilish-montaj ishlarini tahlil qilgan holda, bu boradagi ishlarni jadallashtirish, taʼlim sohasiga zamonaviy axborot-kommunikatsiya texnologiyalarini yanada keng joriy etish, tashqi reklama bilan bogʻliq munosabatlarni tartibga soluvchi huquqiy asoslarni yanada mustahkamlash lozimligi qayd etildi.

Oʻzbekiston XDP fraksiyasi tomonidan pandemiyaga qarshi kurashish va aholini ijtimoiy qoʻllab-quvvatlashga ajratilgan mablagʻlardan maqsadli hamda samarali foydalanish tizimini takomillashtirish, “Davlat moliyaviy nazorati toʻgʻrisida”gi qonunni keng muhokamalar asosida tezroq qabul qilish, isteʼmol mahsulotlari va dori vositalari narxlari asossiz oshib ketishining oldini olish, kambagʻallik darajasini aniqlash mezonlarini qonun hujjatlarida belgilash zarurligi taʼkidlandi.

“Adolat” SDP fraksiyasi tomonidan aholi bandligini taʼminlash va yangi ish oʻrinlarini tashkil etishga doir dasturni tez kunlarda qabul qilish, davlat xizmatlarini koʻrsatish, iqtisodiyotning real sektori tarmoqlariga, sogʻliqni saqlash sohasiga hamda boshqa sohalarga raqamli texnologiyalarni keng joriy etish, bu borada “Raqamli Oʻzbekiston — 2030” dasturi ishlab chiqilishini jadallashtirishga urgʻu berildi.

Oʻzbekiston Ekologik partiyasi fraksiyasi tomonidan qishloq xoʻjaligida suvni tejovchi texnologiyalarini joriy etish koʻlamini kengaytirish, aholiga ichimlik suvi yetkazib berish sifati va xavfsizligini taʼminlash, qayta tiklanuvchi energiya manbalarini keng tatbiq etish orqali yangi ish oʻrinlarini yaratish, shaharlardagi oqava suvlarni tozalash inshootlarining faoliyati samaradorligini oshirish, oziq-ovqat mahsulotlari xavfsizligini taʼminlashga oid normativ-huquqiy hujjatlarni yangilash muhimligi taʼkidlandi.

Deputatlar tomonidan bugungi murakkab sharoitda koronavirus infeksiyasining tarqalishiga qarshi kurashish, aholining sogʻligʻini muhofaza qilish va sanitariya-epidemiologik osoyishtalikni taʼminlash, shoshilinch tibbiy yordam xizmati va call-markazlari ishini tubdan qayta koʻrib chiqish hamda samarali tashkil etish, koronavirus infeksiyasini yuqtirgan bemorlar bilan ishlayotgan tibbiyot xodimlarini qoʻllab-quvvatlash yuzasidan qoʻshimcha chora-tadbirlar koʻrish zarurligi taʼkidlab oʻtildi.

Koronavirus pandemiyasi davrida aholining ijtimoiy himoyaga muhtoj katlamlarini va tadbirkorlik subyektlarini qoʻllab-quvvatlash, oziq-ovqat xavfsizligi hamda aholi bandligini taʼminlash, raqamli iqtisodiyotni jadal rivojlantirish ustuvor vazifa boʻlib qolayotganligi qayd etildi.

Yuqoridagilardan kelib chiqib, “Oʻzbekiston Respublikasi Oliy Majlisi Qonunchilik palatasining Reglamenti toʻgʻrisida”gi Oʻzbekiston Respublikasi Qonunining 32²-moddasiga hamda “Parlament nazorati toʻgʻrisida”gi Oʻzbekiston Respublikasi Qonunining 8¹-moddasiga muvofiq Oʻzbekiston Respublikasi Oliy Majlisining Qonunchilik palatasi qaror qiladi:

1. Oʻzbekiston Respublikasi Vazirlar Mahkamasining “Ilm, maʼrifat va raqamli iqtisodiyotni rivojlantirish yili” Davlat dasturining 2020-yil birinchi yarim yilligida bajarilishi yuzasidan hisoboti maʼlumot uchun qabul qilinsin.

2. Oʻzbekiston Respublikasi Vazirlar Mahkamasiga:

Oʻzbekiston Respublikasi Prezidentining 2020-yil 2-martdagi PF-5953-sonli Farmonida belgilangan ustuvor yoʻnalishlarni oʻz vaqtida va sifatli amalga oshirish;

siyosiy partiyalar fraksiyalari tomonidan koʻtarilgan masalalarni hal etish yuzasidan Hukumatning taʼsirchan hamda samarali nazoratini oʻrnatish;

vazirliklar, idoralar va hududlar kesimida Davlat dasturining bajarilishi holatini Vazirlar Mahkamasi majlislarida doimiy ravishda tanqidiy muhokama qilib borish;

Davlat dasturidagi bajarilmagan, muddati oʻtgan bandlarning ijrosini yakuniga yetkazish yuzasidan zarur chora-tadbirlarni belgilash;

Davlat dasturida nazarda tutilgan tadbirlarning amalga oshirilishini tizimli monitoring qilish, ularning sifatli va oʻz vaqtida bajarilishini taʼminlash choralarini koʻrish;

Davlat dasturida koʻzda tutilgan qonun loyihalari belgilangan muddatlarda tayyorlanishi barobarida ularning sifatli va puxta huquqiy ekspertizadan oʻtkazilishini taʼminlash;

Vazirlar Mahkamasi tarkibiga kirmaydigan davlat organlari va tashkilotlari asosiy ijrochi boʻlgan bandlarning bajarilishi yuzasidan hamkorlikni kuchaytirish;

koronavirus pandemiyasi jiddiy taʼsir koʻrsatayotgan iqtisodiyot tarmoqlari hamda mamlakatning tashqi iqtisodiy faoliyatiga alohida eʼtibor qaratish;

aholining sogʻligʻini muhofaza qilish va sanitariya-epidemiologik osoyishtalikni taʼminlash, shoshilinch tibbiy yordam xizmati va call-markazlari ishini samarali tashkil etish, koronavirus infeksiyasini yuqtirgan bemorlar bilan ishlayotgan tibbiyot xodimlarini qoʻllab-quvvatlash boʻyicha zarur choralar koʻrib borish;

Davlat dasturida ijro muddati uzaytirilgan 15 ta bandda belgilangan vazifalarni oʻz vaqtida amalga oshirish yuzasidan mutasaddi vazirlik va idoralarning masʼuliyatini oshirish choralarini koʻrish;

Davlat dasturida belgilangan har bir tadbirning bajarilishi qanday natijadorlikka erishilganligini tahlil qilib borish tavsiya etilsin.

3. Oʻzbekiston Respublikasi Oliy Majlisi Qonunchilik palatasidagi siyosiy partiyalar fraksiyalariga:

Davlat dasturi doirasida amalga oshirilayotgan islohotlarning mohiyati va ahamiyatini keng jamoatchilik eʼtiboriga yetkazish;

keng jamoatchilik orasida pandemiya sharoitida virus tarqalishining oldini olish murakkabliklari, bu borada amalga oshirilayotgan choralar, sanitariya-gigiyena qoidalari borasidagi targʻibot ishlarni tashkil etish;

Davlat dasturida belgilangan ustuvor yoʻnalishlarning samarali ijro etilishi ustidan oʻz partiyaviy maqsad va vazifalaridan kelib chiqib, taʼsirchan parlament nazoratini amalga oshirish tavsiya etilsin.

4. Ushbu Qaror Oʻzbekiston Respublikasi Vazirlar Mahkamasiga yuborilsin.

5. Mazkur Qarorning ijrosini nazorat qilish Oʻzbekiston Respublikasi Oliy Majlisi Qonunchilik palatasi Spikerining oʻrinbosari A. Xaitov zimmasiga yuklatilsin.

6. Ushbu Qaror qabul qilingan kundan eʼtiboran kuchga kiradi.