Mamlakatimizda 2017 — 2021-yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasi doirasida qonun ustuvorligini ta’minlash, korrupsiyaga qarshi kurashish, uning oldini olish borasida keng ko‘lamli islohotlar amalga oshirilmoqda.

Bu yo‘nalishdagi sa’y-harakatlarning huquqiy asoslarini yaratish maqsadida “Korrupsiyaga qarshi kurashish to‘g‘risida”gi O‘zbekiston Respublikasi Qonuni qabul qilinganligi va uning ijrosini ta’minlash maqsadida 2017-2018-yillarga mo‘ljallangan korrupsiyaga qarshi kurashish bo‘yicha Davlat dasturining ishlab chiqilishi kelgusidagi keng qamrovli rejalar uchun dasturilamal bo‘ldi.

Davlat dasturida belgilangan vazifalarning ijrosini ta’minlash ustidan parlament va jamoatchilik nazoratining ta’sirchan mexanizmlarini o‘rnatish, korrupsiyaga qarshi kurashish borasida O‘zbekiston Respublikasi Oliy Majlisi Qonunchilik palatasi tomonidan qator tashkiliy-huquqiy, amaliy tadbirlar amalga oshirilmoqda.

Xususan, o‘tgan davrda Davlat dasturi doirasida “Huquqiy axborotni tarqatish va undan foydalanishni ta’minlash to‘g‘risida”gi, “Jamoat nazorati to‘g‘risida”gi qonunlar qabul qilindi. O‘zbekiston Respublikasi Oliy Majlisi Qonunchilik palatasi va uning qo‘mitalari tomonidan o‘tkazib kelinayotgan nazorat-tahlil tadbirlarida aholining huquqiy madaniyatini oshirish va korrupsiyaga qarshi kurashish masalalariga alohida e’tibor qaratilmoqda.

2017-2018-yillarga mo‘ljallangan korrupsiyaga qarshi kurashish bo‘yicha Davlat dasturining ijrosini ta’minlash borasida parlament quyi palatasi tomonidan amalga oshirilayotgan ishlar samaradorligini yanada oshirish maqsadida O‘zbekiston Respublikasi Oliy Majlisining Qonunchilik palatasi qaror qiladi:

1. O‘zbekiston Respublikasi Oliy Majlisi Qonunchilik palatasining Qonunchilik va sud-huquq masalalari qo‘mitasi a’zosi Sh. Polvanovning “2017-2018-yillarga mo‘ljallangan korrupsiyaga qarshi kurashish bo‘yicha Davlat dasturining ijrosini ta’minlash borasida O‘zbekiston Respublikasi Oliy Majlisi Qonunchilik palatasi tomonidan amalga oshirilayotgan ishlar to‘g‘risida”gi axboroti ma’lumot uchun qabul qilinsin.

2. O‘zbekiston Respublikasi Oliy Majlisi Qonunchilik palatasidagi deputatlar birlashmalariga mamlakatimizda korrupsiyaga qarshi kurashish borasida amalga oshirilayotgan islohotlarning mazmun-mohiyatini keng jamoatchilikka yetkazish bo‘yicha olib borilayotgan targ‘ibot-tashviqot tadbirlarini yanada kuchaytirish tavsiya etilsin.

3. O‘zbekiston Respublikasi Oliy Majlisi Qonunchilik palatasining qo‘mitalari o‘z faoliyat yo‘nalishlari doirasida parlament nazorati tartibida korrupsiyaga qarshi kurashish to‘g‘risidagi qonun hujjatlarining ijrosini ta’minlashga qaratilgan aniq maqsadli choralar ko‘rib borilishiga hamda 2017-2018-yillarga mo‘ljallangan korrupsiyaga qarshi kurashish bo‘yicha Davlat dasturining ijrosini nazorat-tahlil tartibida o‘rganishlarni tashkil etishga alohida e’tibor qaratsin.

4. O‘zbekiston Respublikasi Oliy Majlisi Qonunchilik palatasining Oila va ayollar masalalari bo‘yicha komissiyasi (D. Fayziyeva) hamda Yoshlar masalalari bo‘yicha komissiyasi (K. Tojiyev) mamlakatimizda korrupsiyaga qarshi kurashish, aholining huquqiy ongi va madaniyatini yuksaltirish, jamiyatda huquqbuzarlik va jinoyatlarga qarshi murosasiz bo‘lishni ta’minlash yuzasidan targ‘ibot-tashviqot tadbirlarini muntazam o‘tkazib borsin.

5. Ushbu Qarorning ijrosini nazorat qilish O‘zbekiston Respublikasi Oliy Majlisi Qonunchilik palatasi Spikerining o‘rinbosarlari zimmasiga yuklatilsin.

6. Ushbu Qaror qabul qilingan kundan e’tiboran kuchga kiradi.