Oʻzbekiston Respublikasi Prezidentining “Sogʻlom avlod uchun” hukumatga qarashli boʻlmagan xalqaro xayriya jamgʻarmasini tuzish toʻgʻrisida” 1993-yil 23-apreldagi Farmonini bajarish yuzasidan Vazirlar Mahkamasi qaror qiladi:

1. “Sogʻlom avlod uchun” hukumatga qarashli boʻlmagan xalqaro xayriya jamgʻarmasining Nizomi tasdiqlansin (1-ilova).

2. Jamgʻarma tashkilot qoʻmitasining tarkibi 2-ilovaga* muvofiq tasdiqlansin.

Tashkilot qoʻmitasini hafta muddatda:

Jamgʻarma Ustavini ishlab chiqsin va uni Jamgʻarma qatnashchilari konferensiyasida qabul qilsin;

Jamgʻarma boshqaruvi va direksiyasini tuzsin.

3. Quyidagi ishlarga har tomonlama koʻmaklashish “Sogʻlom avlod uchun” jamgʻarmasining asosiy vazifalari deb hisoblansin:

tugʻruqqa koʻmaklashuvchi va bolalar muassasalarining moddiy-texnika negizini mustahkamlash, ularni zamonaviy asboblar bilan jihozlash, yangi samarali muolaja vositalari bilan taʼminlash;

jamoatchilik va davlat tuzilmalarining Oʻzbekiston aholisi kelgusi avlodlari genetik fondini jahon tajribasini hisobga olgan holda yaxshilashga qaratilgan kuch-gʻayratlarini muvofiqlashtirish;

Oʻzbekiston Respublikasida yosh avlodni sogʻlomlashtirish milliy dasturining ona va bola salomatligini muhofaza qilish qismini amalga oshirish;

onalik va bolalikni muhofaza qilish haqida xalqaro hamkorlikni rivojlantirish va chuqurlashtirish.

4. Oʻzbekiston Respublikasi Sogʻliqni saqlash vazirligi “Sogʻlom avlod uchun” jamgʻarmasining ishini tashkil etishda faol ishtirok etsin. Shu yil 1-iyulga qadar Jamgʻarma hamda uning respublika barcha mintaqalaridagi filiallarini tashkil etishda xamda ularning faoliyatida viloyat sogʻliqni saqlash boʻlimlari, pediatriya ilmiy-tadqiqot instituti, akusherlik va ginekologiya ilmiy-tadqiqot institutining ishtirokiga doir takliflarni ishlab chiqsin.

5. “Sogʻlom avlod uchun” xayriya jamgʻarmasiga Vazirlar Mahkamasining zaxira jamgʻarmasidan 1 milliard soʻm ajratilsin. Oʻzbekiston Respublikasi vazirliklari, davlat qoʻmitalari, konsernlari, korxonalari, xoʻjaliklari va tashkilotlari Jamgʻarmaning Ustav vazifalarini bajarishga doir faoliyatiga moliyaviy va amaliy yordam bersinlar. Bu ish har bir rahbar va ijrochining vatanparvarlik burchi deb hisoblansin.

6. Respublikada onalik va bolalikni muhofaza qilish muammolariga muhim ahamiyat berib va Jamgʻarmaning yuksak ijtimoiy maqomini eʼtiborga olib, Jamgʻarma filiallarini tashkil etish va ular faoliyatiga bevosita rahbarlikni amalga oshirish Qoraqalpogʻiston Respublikasi, viloyatlar va Toshkent shahri rahbarlarining fahrli vazifasi deb hisoblansin.

7. Belgilab qoʻyilsinki, Jamgʻarma oʻz Ustav maqsadlari va vazifalariga qatʼiy mos keladigan faoliyat yoʻnalishlari boʻyicha:

tashqi iqtisodiy faoliyat bilan shugʻullanishga haqlidir;

soliqlar, davlat boji, bojxona bojlari hamda davlat budjetiga oʻtkaziladigan boshqa toʻlovlarni toʻlashdan ozod etiladi.

8. Oʻzbekiston Respublikasi Tashqi ishlar vazirligi xalqaro aloqalarni amalga oshirishda, xorijdagi shunday jamgʻarmalar va boshqa turdosh tashkilotlar bilan aloqa oʻrnatishda, YUNISEF, Qizil Xoch, BMT missiyasi va boshqa xalqaro vakolatxonalar bilan bitimlar tuzishda “Sogʻlom avlod uchun” jamgʻarmasiga har tomonlama yordam bersin.

9. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 1 oy muddatda Jamgʻarma mintaqa filiallarining normal faoliyatini taʼminlash uchun shart-sharoit yaratib bersinlar. Toshkent shahar hokimligi shu muddatda “Sogʻlom avlod uchun” jamgʻarmasi boshqaruvini joylashtirish uchun bino ajratsin.

10. “Toshkentshahartranskorxona” uyushmasi Jamgʻarma maʼmuriyatini shartnoma asosida xizmat avtotransporti bilan taʼminlasin. Oʻzbekiston Respublikasi Aloqa vazirligi esa Jamgʻarmani uning buyurtmanomasiga binoan shahar va hukumat aloqa vositasi bilan taʼminlasin.

11. “Oʻzshartnomasavdo” va respublikaning boshqa ixtisoslashtirilgan savdo-taʼminot tashkilotlari “Sogʻlom avlod uchun” jamgʻarmasiga zarur inventar va mebel ajratish masalasini belgilangan tartibda koʻrib chiqsinlar.

12. Ommaviy axborot vositalari “Sogʻlom avlod uchun” hukumatga qarashli boʻlmagan xalqaro xayriya Jamgʻarmasi faoliyatini keng yoritsin, onalik va bolalikni muhofaza qilish sohasidagi ijobiy tajribani targʻib qilsin.

13. Mazkur qarorning bajarilishini nazorat qilish Bosh vazirning oʻrinbosari M.Q. Qoraboyev zimmasiga yuklatilsin.

1. “Sogʻlom avlod uchun” hukumatga qarashli boʻlmagan xalqaro xayriya jamgʻarmasi, keyingi oʻrinlarda “Jamgʻarma” deb yuritiladi, kelajak avlodning salomatligini taʼminlash, onalik va bolalikni muhofaza qilish, bolalarning jismoniy, intellektual va maʼnaviy rivojlanishi uchun qulay shart-sharoitlar yaratish maqsadida Oʻzbekiston Respublikasi Prezidentining 1993-yil 23-apreldagi Farmoni bilan tashkil etilgan.

2. Jamgʻarma davlat roʻyxatiga olingan vaqtdan boshlab hukumatga qarashli boʻlmagan xalqaro jamoat tashkiloti sifatida yuridik shaxs huquqiga ega boʻladi. Toʻla xoʻjalik hisobi asosida faoliyat koʻrsatadi, oʻz mol-mulkiga, mustaqil balansga, banklarda, shu jumladan xorijiy banklarda schyotlarga, mulkiy va mulkiy boʻlmagan huquqlarga oʻz nomidan ega boʻladi, tegishli majburiyatlarni bajaradi.

3. Jamgʻarma oʻz faoliyatini Oʻzbekiston Respublikasining Qonun hujjatlariga, Oʻzbekiston Respublikasi Prezidentining jamgʻarmani taʼsis etish toʻgʻrisidagi Farmoniga hamda Jamgʻarma Ustaviga asos qilib olingan qoidalarga amal qiladi.

4. Jamgʻarma unga kirish uchun yoki unga istalgan shaklda baholi qudrat ulush qoʻshish uchun ham yuridik, ham jismoniy shaxslar, shu jumladan xorijiy yuridik va jismoniy shaxslar uchun ochiqdir.

5. Jamgʻarmaning faoliyati xayriya tusidadir. Uning mablagʻlari, ularning tushish manbalaridan qatʼi nazar, ustav vazifalari va maqsadlarini bajarish uchun sarflanadi.

6. Jamgʻarma Oʻzbekiston Respublikasining butun hududida va uning tashqarisida yagona tashkilot sifatida faoliyat koʻrsatadi.

7. Jamgʻarmaning yuridik manzili: Oʻzbekiston Respublikasi, Toshkent shahri.

8. Quyidagilar Jamgʻarmaning asosiy vazifalari hisoblanadi:

tugʻruqqa koʻmaklashuvchi va bolalar muassasalarining moddiy-texnika negizini mustahkamlashga koʻmaklashish, ularni zamonaviy asboblar bilan jihozlash, yangi samarali muolaja vositalari bilan taʼminlash;

jamoatchilik va davlat tuzilmalarining Oʻzbekiston aholisi kelgusi avlodlari genetik fondini jahon tajribasini hisobga olgan xolda yaxshilashga qaratilgan kuch-gʻayratlarini muvofiqlashtirish;

respublikaning butun hududida va ayniqsa ekologik tenglik buzilgan mintaqalarda onalik va bolalikni tubdan sogʻlomlashtirish va ularni muhofaza qilishning barqaror asoslarini yaratishga qaratilgan ilmiy, texnik ishlab chiqarish, tashviqot-targʻibot va boshqa dasturlar kompleksi ishlab chiqilishi va roʻyobga chiqarilishini tashkil etishga koʻmaklashish.

Qayd etib oʻtilgan vazifalarga erishish uchun Jamgʻarma quyidagi yoʻnalishlar boʻyicha faoliyat koʻrsatadi:

tibbiyot, ovqatlanish, ekologiya sohalarida hamda onalik va bolalikning hayotiy ehtiyojlarini qondirish boʻyicha boshqa yoʻnalishlar sohasida yangi texnologiyalar, texnika va asbob-uskunalar joriy etilishini tashkil etish;

ona va bola hayot faoliyatining huquqiy, axloqiy-etik, ijtimoiy-ruhiy shart-sharoitlarini takomillashtirishga koʻmaklashish;

respublikada bolalar oziq-ovqatini yaxshilash, uning sanoat yoʻli bilan ishlab chiqarilishini koʻpaytirish;

tugʻruqxonalarga, feldsherlik-akusherlik punktlariga, bolalar uylariga, ayollar maslahatxonalariga va onalik bilan bogʻliq boʻlgan boshqa muassasalarga vasiylik va gʻamxoʻrlik qilishni amalga oshirish;

onalik va bolalikni muhofaza qilishning eng dolzarb muammolarini hal etish uchun Jamgʻarma huzurida ixtisoslashtirilgan korxonalar va tashkilotlar tashkil etish;

Oʻzbekiston Respublikasining butun hududida, zarurat boʻlganda esa chet ellarda, Jamgʻarmaning filiallarini va vakolatxonalarini tashkil etish;

onalikni muhofaza qilish muammolarini oʻrganish, genetik fondni mustahkamlash sohasida xalqaro hamkorlikni rivojlantirish va chuqurlashtirishga koʻmaklashish.

9. Jamgʻarma qayd etib oʻtilgan vazifalarni va faoliyat yoʻnalishlarini taʼminlash uchun Oʻzbekiston Respublikasida qonun hujjatlariga muvofiq quyidagi huquq va majburiyatlarga ega boʻladi:

oʻz vakolati doirasida yuridik va jismoniy shaxslar bilan huquqiy aktlarni mustaqil amalga oshirish;

keng tushuntirish ishlari yordamida vatandoshlar va xorijiy fuqarolarning, jamoat tashkilotlarining, muassasalarning, banklarning, korxonalar va firmalarning ham pul mablagʻlari koʻrinishida, ham adabiyot va sanʼat asarlari, ilmiy va loyiha ishlanmalari, mashinalar, asbob-uskunalar, inshootlar va boshqa moddiy boyliklar koʻrinishidagi koʻngilli ulushlarini jalb etish;

davlat tashkilotlari bilan hamda boshqa tashkilotlar, korxonalar, muassasalar va firmalar bilan oʻz loyiha va dasturlarini amalga oshirish;

soʻmlarda va erkin almashtiriladigan valyutada kreditlar olish va berish, oʻz nomidan shartnomalar va bitimlar tuzish, mulkiy huquqlarga ega boʻlish, xalq sudida, xoʻjalik va xolislik sudida daʼvogar va javobgar boʻlish;

oʻz ustav vazifalarini bajarish uchun ishlab chiqarish, ilmiy va boshqa korxonalar, tashkilotlar va firmalar, investitsiya banklari, sugʻurta kompaniyalari, shu jumladan xorijiy sheriklar bilan aralash va qoʻshma sugʻurta kompaniyalar, vaqtinchalik tarkibiy boʻlinmalar tashkil etish;

innovatsiya loyihalarini ishlab chiqish va joriy etish;

yuridik va jismoniy shaxslarga injiniring, maslahat, axborot xizmatlari va xizmatlarning boshqa turlarini koʻrsatish;

noshirlik, axborot, madaniy-maʼrifiy faoliyatni amalga oshirish;

koʻrgazmalar, savdo-sotiq yarmarkalari, tovarlar, mahsulotlar (ishlar, xizmatlar), sanʼat asarlari auksionlari, telemarafonlar, konsertlar va boshqa tomosha tadbirlari oʻtkazish;

lotereyalar chiqarishni amalga oshirish;

jamgʻarma vazifalariga muvofiq tanlovlar oʻtkazish hamda mukofotlar taʼsis etish;

oʻz maqsadlari va vazifalariga muvofiq tashqi iqtisodiy faoliyatni amalga oshirish, respublikada valyuta schyotiga ega boʻlish;

Jamgʻarma maqsadlarini taʼminlash uchun tibbiyot asbob-uskunalari, anjomlar, dori-darmonlar, bolalar ovqati va boshqa mahsulotlarni ishlab chiqarishni mablagʻ bilan taʼminlash va kredit berish;

belgilangan tartibda xalqaro jamoat va ixtisoslashtirilgan tashkilotlarga kirish, shuningdek amaliy aloqalarga kirishish;

oʻziga qarashli korxonalar va tashkilotlarning faoliyati hamda oʻtkazilayotgan barcha tadbirlar ustidan maqsadga qaratilgan rahbarlikni va muntazam nazoratni amalga oshirishni taʼminlash.

10. Davlat, jamoat, ilmiy va ijodiy tashkilotlar, birjalar, banklar, aksionerlik jamiyatlari va uyushmalar, boshqa jamgʻarmalar, shu jumladan xorijiy jamgʻarmalar, shuningdek Jamgʻarmaning asosiy vazifalarini roʻyobga chiqarishda ixtiyoriy asosda qatnashuvchi boshqa jismoniy shaxslar Jamgʻarmaning qatnashchilari hisoblanadilar.

11. Jamgʻarma boshqaruvining yuqori organi Jamgʻarma qatnashchilarining konferensiyasi hisoblanadi. Konferensiya Jamgʻarma Ustaviga muvofiq faoliyatning asosiy yoʻnalishlarini belgilaydi. Konferensiyada Jamgʻarma boshqaruvi, boshqaruv raisi va uning oʻrinbosarlari, taftish komissiyasi saylanadi, ijroiya organ (direksiya) bosh direktori tasdiqlanadi.

12. Jamgʻarmaning tashkiliy tuzilmasi ilovaga muvofiq belgilanadi.

13. Jamgʻarma raisi va boshqaruv aʼzolari Jamgʻarma qatnashchilari konferensiyasi tomonidan saylanadi. Jamgʻarma raisi va boshqaruv aʼzolari jamoatchilik asosida ishlaydilar.

Boshqaruv rais rahbarligida quyidagilarni amalga oshiradi:

asosiy yoʻnalishlar boʻyicha Jamgʻarma faoliyatini muvofiqlashtirish;

direksiya, jamgʻarma filiallari, vakolatxonalari faoliyatiga umumiy rahbarlik qilish;

maqsadli dasturlarni ishlab chiqish va roʻyobga chiqarishni tashkil etish;

turli tashkilotlarda, shu jumladan xorijiy tashkilotlarda, jamgʻarma manfaatlarini ifodalash.

14. Taftish komissiyasi jamgʻarma va unga qarashli korxonalar va tashkilotlarning moliyaviy va xoʻjalik faoliyati ustidan nazoratni amalga oshiradi.

15. Jamgʻarmaning bosh direktori jamgʻarmaga rahbarlikni amalga oshiradi hamda uning joriy faoliyati uchun javob beradi, ishonchnomasiz jamgʻarma nomidan ish koʻradi, boshqa yuridik shaxslar bilan munosabatlarda uning nomidan ish koʻradi, oʻz vakolati doirasida buyruqlar chiqaradi, mehnat haqidagi qonunlarga binoan xodimlarni ishga qabul qiladi va ishdan boʻshatadi, belgilangan tartibda Jamgʻarma mablagʻlarini tasarruf etadi, yuridik va jismoniy shaxslar bilan shartnomalar tuzadi.

16. Direksiya shtat xodimlarining soni 7 nafardan iborat qilib belgilanadi, ularning mehnatiga haq toʻlash Jamgʻarma mablagʻlari hisobidan amalga oshiriladi.

17. Jamgʻarmaning asosiy vositalari hamda muassislar va qatnashchilarning ulushlari Jamgʻarmaning mol-mulki hisoblanadi.

18. Quyidagilar Jamgʻarmani mablagʻ bilan taʼminlash manbalari hisoblanadi:

Jamgʻarma muassislari va qatnashchilarining pul badallari;

korxonalar, jamoat tashkilotlari va fuqarolarning, shu jumladan xorijiy, tekin badallari;

Jamgʻarma va uning korxonalari faoliyatidan olingan daromadlar;

qonunchilik bilan taqiqlanmagan boshqa manbalar.

19. Jamgʻarma soliqlar, davlat boji va bojxona bojlari hamda budjetga undiriladigan boshqa toʻlovlarni toʻlashdan ozod qilinadi. Jamgʻarmaning korxonalari va tashkilotlari, shuningdek boshqa korxonalar va tashkilotlar foydasining Jamgʻarmaga beriladigan qismi amaldagi qonun hujjatlariga muvofiq davlat budjetiga soliq toʻlashdan ozod qilinadilar.

20. Jamgʻarma oʻz majburiyatlari boʻyicha oʻziga tegishli butun mol-mulk bilan javob beradi.

Davlat Jamgʻarma majburiyatlari boʻyicha javob bermaydi, Jamgʻarma esa davlat majburiyatlari boʻyicha javob bermaydi.

21. Jamgʻarmaning mulkiy huquqlari Oʻzbekistonning jamoat tashkilotlari uchun belgilangan amaldagi qonunchiligiga muvofiq himoya qilinadi.

22. Jamgʻarma faoliyati Jamgʻarmaning umumiy yigʻilishi (konferensiyasi)ning qaroriga koʻra yoki qonunchilikda belgilangan hollarda toʻxtatiladi.

23. Tugatilgan Jamgʻarmaning mol-mulki xodimlar mehnatiga haq toʻlash boʻyicha hisob-kitoblardan keyin muassislar tasarrufiga beriladi.