Soʻnggi yillarda mamlakatimizda yoshlarga oid davlat siyosatining huquqiy asoslari mustahkamlanib, yoshlarni har tomonlama qoʻllab-quvvatlash, ularning huquq va qonuniy manfaatlarini himoya qilish borasida tizimli ishlar olib borilmoqda.

Yoshlarni vatanparvarlik ruhida tarbiyalash, ular oʻrtasida jinoyatchilik va huquqbuzarliklarning oldini olish, yosh oilalar mustahkamligini taʼminlash, yoshlarning huquq va manfaatlarini himoya qilishga alohida eʼtibor qaratilmoqda.

Jumladan, yoshlarni madaniyat, sanʼat va sportga keng jalb etish, ularda zamonaviy axborot texnologiyalaridan toʻgʻri foydalanish koʻnikmasini shakllantirish, kitobxonlik madaniyatini yuksaltirish, xotin-qizlar bandligini taʼminlash boʻyicha kechiktirib boʻlmaydigan vazifalarni oʻz ichiga olgan besh muhim tashabbus amalga oshirilmoqda.

Qonun ijodkorligi va parlament nazoratini amalga oshirish jarayonida yoshlarning faol ishtirok etishini yanada kengaytirish, ularning Oʻzbekiston Respublikasi Oliy Majlisi Qonunchilik palatasida qonunlar qabul qilinishi jarayonini hamda fraksiyalararo raqobat va tortishuvlar asosida oʻtadigan majlislarni oʻz koʻzi bilan koʻrishi, deputatlar bilan muloqot qilishi uchun keng imkoniyatlar yaratilmoqda.

Yoshlarning jamiyat va davlat ishlarini boshqarishdagi oʻrni va taʼsirini amalda taʼminlash, ularning ijtimoiy-iqtisodiy va siyosiy faolligini qoʻllab-quvvatlash, zamonaviy dunyoqarash, bilim va koʻnikmaga ega yoshlarning bilimlarini va demokratik koʻnikmalarini yanada oshirish uchun keng imkoniyatlar yaratish maqsadida Oʻzbekiston Respublikasi Oliy Majlisi Qonunchilik palatasida Yoshlar masalalari boʻyicha komissiya tashkil etilib, uning faoliyat yoʻnalishlari belgilab olindi.

Shu bilan birga, bugungi kunda yoshlarning bandligini taʼminlash, ularni tadbirkorlikka keng jalb etish, yoshlar oʻrtasida jinoyatchilik va huquqbuzarliklarning oldini olish, ularning huquqiy immunitetini mustahkamlash masalalari dolzarb boʻlib qolmoqda.

Yuqoridagilardan kelib chiqib, yoshlarning huquqiy madaniyatini yuksaltirish hamda ular oʻrtasida huquqbuzarlik va jinoyatchilikning oldini olish boʻyicha olib borilayotgan ishlar ustidan taʼsirchan parlament nazoratini amalga oshirish maqsadida Oʻzbekiston Respublikasi Oliy Majlisi Qonunchilik palatasining Kengashi qaror qiladi:

1. Oʻzbekiston Respublikasi Oliy Majlisi Qonunchilik palatasining Mudofaa va xavfsizlik masalalari qoʻmitasi raisi E. Salixov hamda Yoshlar masalalari boʻyicha komissiyasi raisi A. Aslonovning “Oʻzbekiston Respublikasi Prezidenti rahbarligida 2019-yil 27-dekabr kuni mamlakat yoshlari bilan videoselektor tarzida oʻtkazilgan yigʻilish Bayonida Oliy Majlis Qonunchilik palatasiga tavsiya etilgan masalalar yuzasidan amalga oshirilayotgan ishlar toʻgʻrisida”gi axboroti maʼlumot uchun qabul qilinsin.

2. Yoshlar oʻrtasida huquqbuzarlik va jinoyatchilikning oldini olish, ularning huquqiy madaniyatini yuksaltirish hamda vatanparvarlik ruhida tarbiyalashga qaratilgan tadbirlarni amalga oshirish yuzasidan Chora-tadbirlar rejasi ilovaga muvofiq tasdiqlansin.

3. Oʻzbekiston Respublikasi Oliy Majlisi Qonunchilik palatasining Mudofaa va xavfsizlik masalalari qoʻmitasi raisi E. Salixov hamda Yoshlar masalalari boʻyicha komissiyasi raisi A. Aslonov zimmasiga:

Oʻzbekiston Respublikasida 2020-yilda yoshlarga oid davlat siyosatini yangi bosqichga olib chiqishga qaratilgan Chora-tadbirlar dasturida belgilangan tegishli vazifalarning ijrosi ustidan parlament nazoratini amalga oshirish;

yoshlar oʻrtasida huquqbuzarlik va jinoyatchilikning oldini olish, ularni vatanparvarlik ruhida tarbiyalashga qaratilgan vazifalar ijrosini qatʼiy nazoratga olish;

yoshlarning huquqiy madaniyatini yuksaltirish borasidagi ishlarni tizimli yoʻlga qoʻyish va amalga oshiriladigan chora-tadbirlarni mavofiqlashtirish;

Oʻzbekiston Respublikasi Oliy Majlisi Qonunchilik palatasining Kengashiga bu borada amalga oshirilayotgan ishlar yuzasidan maʼlumot kiritib borish vazifalari yuklatilsin.

4. Oʻzbekiston Respublikasi Oliy Majlisi Qonunchilik palatasidagi siyosiy partiyalar fraksiyalari va qoʻmitalar Chora-tadbirlar rejasida nazarda tutilgan tadbirlarning oʻz vaqtida hamda sifatli bajarilishini taʼminlash tavsiya etilsin.

5. Oʻzbekiston Respublikasi Oliy Majlisi Qonunchilik palatasining Yoshlar masalalari boʻyicha komissiyasi raisi A. Aslonov zimmasiga:

yoshlar masalalariga oid qonun hujjatlarining ijro etilishi holatini oʻrganish davomida sohaga oid qonun hujjatlarida aniqlangan boʻshliq, kamchilik va muammolarni bartaraf etish yuzasidan takliflar tayyorlash;

yoshlar oʻrtasida huquqbuzarlik va jinoyatchilikning oldini olish boʻyicha samarali mexanizmlarni joriy etish boʻyicha takliflar ishlab chiqish;

besh tashabbus doirasida yoshlarning boʻsh vaqtlaridan unumli foydalanishi uchun koʻrilayotgan chora tadbirlarga koʻmaklashish;

yoshlar masalalariga oid qonun hujjatlarini takomillashtirish yuzasidan takliflar ishlab chiqish hamda bu sohadagi Oʻzbekiston Respublikasi xalqaro shartnomalarining bajarilishini taʼminlashga koʻmaklashish vazifalari yuklatilsin.

6. Ushbu Qarorning ijrosini nazorat qilish Oʻzbekiston Respublikasi Oliy Majlisi Qonunchilik palatasi Spikerining oʻrinbosari A. Xaitov zimmasiga yuklatilsin.

7. Ushbu qaror qabul qilingan kundan eʼtiboran kuchga kiradi.