Oʻzbekiston Respublikasi Bosh vazirining moliya-iqtisodiyot va kambagʻallikni qisqartirish masalalari boʻyicha oʻrinbosari — iqtisodiyot taraqqiyot va kambagʻallikni qisqartirish vaziri, tashki ishlar vaziri hamda axborot texnologiyalari va kommunikatsiyalarini rivojlantirish vazirining “Oʻzbekistonning Yevroosiyo iqtisodiy ittifoqi bilan hamkorligining ayrim muhim jihatlari toʻgʻrisida”gi axborotlarini eshitib, Oʻzbekiston Respublikasi Oliy Majlis Qonunchilik palatasi taʼkidlaydiki, mamlakatimizning iqtisodiyotdagi raqobatbardoshligini va eksport salohiyatini oshirish, xalqaro iqtisodiy hamkorlikni kengaytirish maqsadida qator ishlar olib borilmoqda.

Oʻzbekistonning Yevroosiyo iqtisodiy ittifoqi (EOII) bilan hamkorligi barqaror iqtisodiy oʻsishni taʼminlashi, pirovard natijada mavjud iqtisodiy va ijtimoiy nomutanosibliklarni bartaraf etishga xizmat qilishi uchun hozirdan chuqur iqtisodiy tahlillar asosida kelingan xulosalarga asoalanib yoʻl tutish zarur boʻladi. Shuningdek, ushbu hamkorlik yurtimizda barcha sohalarda rivojlanish jarayonlarini jadallashtirish va globallashuv talablariga tezroq moslashish imkonini yaratadi.

Bugungi kunda mamlakatlar oʻrtasidagi savdo-iqtisodiy munosabatlarning zamonaviy tamoyillari xalqaro mehnat taqsimoti va ixtisoslashuv imkoniyatlaridan samarali foydalanish masalalarini chuqur tadqiq qilish lozimligini taqozo etmoqda.

Shundan kelib chiqib, mamlakatimizning EOII bilan hamkorligi masalalarini oʻrganish jadallashib borayotganligini hisobga olib, iqtisodiyotning yirik sohalarning, jumladan tashqi raqobatdan nisbatan himoyalangan sanoat tarmoqlarining oʻrta va uzoq muddatdagi rivojlanishi ssenariylari hamda ularning oqibatlarini baholash muhim ahamiyat kasb etadi.

Bunda, barcha sohalarda sogʻlom raqobatga keng yoʻl ochilishi munosabati bilan Oʻzbekistonning ishlab chiqarish va xizmat koʻrsatish segmentlari EOIIning boshqa aʼzo davlatlari korxonalari tomonidan egallab olinishi xavfi yuqoriligi taʼkidlab oʻtildi.

EOII bilan hamkorlik qilish jarayonida sanoat korxonalarining raqobatbardoshlikligini taʼminlash uchun sanoatning 13 ta yetakchi tarmoqlari, jumladan qisqa muddatli davrda — qora metallurgiya, neft va gaz, koʻmir, farmatsevtika yogʻ-moy, oziq-ovqat sanoati korxonalari, oʻrta muddatli davrda — toʻqimachilik va tikuv trikotaj, charm-poyabzal, elektrotexnika, kimyo, elektr energetika sanoati korxonalari, uzoq muddatli davrda esa — avtomobilsozlik, qishloq xoʻjaligi mashinasozligi korxonalari boʻyicha muayyan chora-tadbirlaning oʻz vaqtida qoʻrilishi ahamiyatga egadir.

Shu munosabat bilan ushbu sohalarga oid qonun hujjatlarini yangi sharoitlarda ishlashga uygʻunlashtirishimiz, jumladan axborot texnologiyalari va kommunikatsiyalarini rivojlantirish sohasidagi munosabatlarni tartibga soluvchi normativ-huquqiy hujjatlar va texnik reglamentlarni chuqur oʻrganish maqsadga muvofiqdir.

Ushbu xalqaro tashkilotga aʼzo davlatlar tomonidan elektron raqamli imzodan foydalangan holda davlatlararo hujjatlar almashinuvi, xalqaro elektron savdo, hujjatlarni elektron ravishda tasdiqlash va xalqaro bank operatsiyalarini yanada rivojlantirish imkoniyatlari mavjud.

Yuqoridagilardan kelib chiqib, Oʻzbekiston Respublikalari “Parlament nazorati toʻgʻrisida”gi Qonunining 10-moddasiga muvofiq, Oʻzbekiston Respublikasi Oliy Majlisi Qonunchilik palatasi qaror qiladi:

1. Oʻzbekiston Respublikasi Bosh vazirining moliya-iqtisodiyot va kambagʻallikni qisqartirish masalalari boʻyicha oʻrinbosari – iqtisodiyot taraqqiyot va kambagʻallikni qisqartirish vaziri J. Kuchkarov, tashki ishlar vaziri A. Kamilov hamda axborot texnologiyalari va kommunikatsiyalarini rivojlantirish vaziri Sh. Sadikovning “Oʻzbekistonning Yevroosiyo iqtisodiy ittifoqi bilan hamkorligining ayrim muhim jihatlari toʻgʻrisida”gi axborotlari maʼlumot uchun qabul qilinsin.

2. Oʻzbekiston Respublikasining Yevroosiyo iqtisodiy ittifoqi bilan hamkorligini yoʻlga qoʻyish masalasini oʻrganishni tashkil etish boʻyicha ishchi guruhi:

Oʻzbekistonning EOII bilan hamkorligini yoʻlga qoʻyish masalasi yuzasidan parlamentdagi siyosiy partiyalar fraksiyalari va qoʻmitalarning xulosalarini olsin hamda umumlashtirsin;

axborotda keltirilgan maʼlumotlarni Oʻzbekistonning EOII bilan hamkorligini yoʻlga qoʻyish masalasi yuzasidan Oʻzbekiston Respublikasi Oliy Majlisi Qonunchilik palatasining xulosasini tayyorlashda inobatga olsin.

3. Ushbu Qarorning ijrosini nazorat qilish Oʻzbekiston Respublikasi Oliy Majlisi Qonunchilik palatasi Spikerining birinchi oʻrinbosari A. Saidov zimmasiga yuklatilsin.

4. Ushbu qaror qabul qilingan kundan eʼtiboran kuchga kiradi.