Ta’lim-tarbiya jarayoniga bolalarning har tomonlama intellektual, ma’naviy-estetik va jismoniy rivojlanishini ta’minlovchi zamonaviy ta’lim dasturlari va texnologiyalarini joriy etish, maktabga tayyorgarlik darajasini tubdan oshirish maqsadida ularning atrofdagi dunyoni bilish, zamonaviy axborot texnologiyalarini hamda xorijiy tillarni o‘rganishga bo‘lgan qiziqishlarini rag‘batlantirish, shuningdek, mavjud bolalar auditoriyasiga mo‘ljallangan teleuzatish infratuzilmasini jadal texnologik va texnikaviy rivojlantirishga zamonaviy yechimlarni jalb etish, budjet mablag‘laridan foydalanish samaradorligini oshirish, bolalar uchun ta’lim kontentini ishlab chiqish va amaliyotga tatbiq etish ehtiyojini hisobga olgan holda sohadagi eng ilg‘or jahon tajribalarining qo‘llanishini ta’minlash maqsadida Vazirlar Mahkamasi qaror qiladi:

1. O‘zbekiston Respublikasi Maktabgacha ta’lim vazirligi, O‘zbekiston milliy teleradiokompaniyasi va O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligining Ixtisoslashgan bolalar ko‘ngilochar-ma’rifiy “Aqlvoy” telekanalini (keyingi o‘rinlarda — bolalar telekanali) tashkil etish to‘g‘risidagi taklifiga rozilik berilsin.

2. Quyidagilar bolalar telekanalining asosiy vazifalari va faoliyat yo‘nalishlari etib belgilansin:

ma’lumotni qiziqarli va tushunarli shaklda taqdim etish orqali bolalarning bilim olish faolligini rag‘batlantirish, intellektual va ijodiy ko‘nikmalarini rivojlantirish (edutainment);

teleko‘rsatuvlarni tashkil qilish tizimiga zamonaviy texnik yechimlarni va ilg‘or xorijiy tajribani tatbiq etish, raqamli va multimedia texnologiyalarini rivojlantirish;

bolalar teleko‘rsatuvlari infratuzilmasini kengaytirish, milliy ma’naviyat, madaniy-ahloqiy an’analar va zamonaviy innovatsiyalar uyg‘unlashgan, bilim beruvchi va ko‘ngilochar bolalar kontenti rivojlanishini rag‘batlantirish;

O‘zbekiston Respublikasida tasdiqlangan talablar, standartlar va o‘quv-ta’lim dasturlariga muvofiq bolalarning yosh xususiyatlaridan kelib chiqqan holda ta’lim beruvchi, rivojlantiruvchi va o‘yin elementlarini o‘zida mujassam etgan teleko‘rsatuvlar va multimedia kontentini yaratish;

bolalarda Vatanga muhabbat tuyg‘usini shakllantirish, ularni jonajon o‘lka madaniyati va tarixi, qadriyatlari, an’ana va urf-odatlari bilan tanishtirish;

bolalarda kreativ-ijodiy fikrlashni rivojlantirish hamda ularda badiiy va estetik didni tarbiyalash;

bolalarda sog‘lom turmush tarziga oid bilimlarni shakllantirish, sport bilan shug‘ullanishga qiziqishni oshirish, zarur sanitar-gigiyenik ko‘nikmalarni shakllantirish, ularni xavfsizlik qoidalariga qat’iy rioya etishga o‘rgatish;

bolalarda tabiatga bo‘lgan qiziqish va mehrni, atrof-muhitga g‘amxo‘rlik bilan munosabatda bo‘lishni shakllantirish, ularni ekologik ruhda tarbiyalash;

ijtimoiy-hissiy ko‘nikmalarni rivojlantirish, tashabbuskorlik va mustaqil fikrlashni rag‘batlantirish hamda ma’naviy jihatdan tarbiyalash;

jahon madaniyatidan bahramand bo‘lishlarini ta’minlash va jahon madaniy merosi bilan tanishtirish;

barcha bolalar uchun turar joyidan va oilasining daromadlari darajasidan qat’iy nazar o‘quv-ta’lim va rivojlantiruvchi kontentdan foydalanish imkoniyatini yaratish;

turli platformalar orqali joriy etish uchun ta’limga oid milliy kontent, shu jumladan mobil dasturlar, videodarslar, interfaol o‘qituvchi dasturlar va boshqa turdagi, qonunchilik hujjatlariga zid bo‘lmagan rivojlantiruvchi mahsulotlarni yaratish;

bolalar kontentini shakllantirishga yuqori malakali mutaxassislar, pedagoglar va psixologlarni keng jalb qilish.

3. O‘zbekiston Respublikasi Maktabgacha ta’lim vazirligi qoshida “Axborot va pedagogika texnologiyalari innovatsion markazi” mas’uliyati cheklangan jamiyatining (keyingi o‘rinlarda — Innovatsion markaz) ulushi ishtirokida “Edumedia Corporation” MChJ ta’sis etilganligi ma’lumot uchun qabul qilinsin.

4. Belgilansinki, bolalar telekanali:

“Edumedia Corporation” MChJ qoshida yuridik shaxs tashkil etmasdan ta’sis etiladi;

respublikaning barcha hududlarida yetkaziladigan umumfoydalanishdagi ijtimoiy raqamli teleeshittirishlar paketi tarkibiga kiritiladi;

budjetga tushadigan yukni kamaytirish va raqobat muhitini shakllantirish maqsadida o‘zini-o‘zi moliyalash prinsiplari asosida, shu jumladan homiylik tushumlari hisobiga va efirda voyaga yetmaganlar tomonidan sotib olinishi yoki iste’mol qilinishi taqiqlanmagan tovar va xizmatlarning pullik reklamasini joylashtirish orqali faoliyat yuritadi;

mehnatga haq to‘lash miqdorini, ko‘rsatiladigan xizmatlar uchun tariflarni, ishlab chiqariladigan mahsulot uchun narxlarni mustaqil belgilaydi;

o‘ziga yuklatilgan vazifalarni bajarish uchun xorijiy mutaxassislar va maslahatchilarni jalb etish huquqiga ega.

5. O‘zbekiston Respublikasi Maktabgacha ta’lim vazirligi:

bolalar telekanalini joylashtirish uchun berilayotgan xonalar va binolarning Innovatsion markaz mablag‘lari hisobidan ta’mirlanishini tashkil qilsin hamda keyinchalik Innovatsion markazning “Edumedia Corporation” MChJ ustav fondidagi ulushini qilingan xarajatlar summasi miqdorida oshirsin;

bolalar telekanalini yuqori malakali, ijodiy fikrlovchi va tashabbuskor mutaxassislar, shu jumladan bolalar pedagogikasi va psixologiyasi sohalarida amaliy tajribaga ega, xorijiy tillarni mukammal egallagan mutaxassislar bilan butlashda ko‘maklashsin.

5¹. O‘zbekiston Respublikasi Prezidenti huzuridagi Ijtimoiy himoya milliy agentligi Toshkent shahrining Mirobod tumani Yangi Zamon 3-tor ko‘chasidagi 1-uy manzilida joylashgan binoning muayyan qismini Innovatsion markazga hamda telekanalga tekin foydalanish huquqi asosida 2024-yil 1-iyulga qadar belgilangan tartibda joylashtirishni ta’minlasin.

Telekanal Ijtimoiy himoya milliy agentligining buyurtmasiga ko‘ra oylik efir vaqtining 7 foiz qismiga ijtimoiy himoya sohasidagi hamda telekanal yo‘nalishiga zid bo‘lmagan boshqa ijtimoiy axborot hisoblanadigan roliklarni bepul joylashtirilishini ta’minlasin.

6. O‘zbekiston Respublikasi Adliya vazirligi O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligi bilan birgalikda ikki oy muddatda barcha mahalliy telekanallar orqali efirga uzatilayotgan kontentda O‘zbekiston Respublikasining qonun hujjatlariga zid keladigan holatlarni aniqlash va oldini olish bo‘yicha muntazam monitoring qilish yuzasidan Vazirlar Mahkamasiga taklif kiritsin.

7. O‘zbekiston Respublikasi Monopoliyaga qarshi kurashish qo‘mitasi 2020-yil 1-sentabrgacha ilg‘or xalqaro tajribani hisobga olgan holda bolalar auditoriyasiga mo‘ljallangan ko‘rsatuvlarda reklama joylashtirishga oid cheklovlarni tizimli o‘rganish asosida ularni yumshatish, bolalar teleko‘rsatuvlarida voyaga yetmagan shaxslar tomonidan sotib olish yoki iste’mol qilish taqiqlanmagan tovar va xizmatlar reklamasini joylashtirishga ruxsat berish bo‘yicha Vazirlar Mahkamasiga takliflar kiritsin.

8. O‘zbekiston Respublikasi Axborot texnologiyalari va kommunikatsiyalarini rivojlantirish vazirligi “Edumedia Corporation” MChJga belgilangan tartibda teledasturlarni tarqatish (translatsiya qilish) tarmoqlari xizmatlarini ko‘rsatishga litsenziya berish bo‘yicha zarur choralarni ta’minlasin.

9. O‘zbekiston milliy teleradiokompaniyasi va O‘zbekiston Respublikasi Axborot texnologiyalari va kommunikatsiyalarni rivojlantirish vazirligi bolalar telekanaliga berilgan Innovatsion markazning bino va xonalarida qurilish-montaj ishlari olib borilayotgan davrda bolalar telekanali vaqtincha faoliyatini boshlab, televizion dasturlarni uzatishi va translatsiya qilishi uchun markazni zarur texnik jihozlar bilan ta’minlash choralarini ko‘rsin.

10. O‘zbekiston Respublikasi Maktabgacha ta’lim vazirligi, Adliya vazirligi manfaatdor vazirlik va idoralar bilan birgalikda ikki oy muddatda qonun hujjatlariga mazkur qarordan kelib chiqadigan o‘zgartirish va qo‘shimchalar to‘g‘risida Vazirlar Mahkamasiga takliflar kiritsin.

11. Mazkur qarorning ijrosini nazorat qilish O‘zbekiston Respublikasi Bosh vazirining ijtimoiy rivojlantirish masalalari bo‘yicha o‘rinbosari B.A. Musayev va O‘zbekiston Respublikasi maktabgacha ta’lim vaziri A.V. Shin zimmasiga yuklansin.