2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini “Ilm, maʼrifat va raqamli iqtisodiyotni rivojlantirish yili”da amalga oshirishga oid Davlat dasturining 53-bandini ijro etish maqsadida Oʻzbekiston Respublikasi Bosh prokuraturasi tomonidan manfaatdor vazirlik va idoralar bilan birgalikda Oʻzbekiston Respublikasi Prezidentining “Oʻzbekiston Respublikasida korrupsiyaga qarshi kurashish tizimini takomillashtirishga doir qoʻshimcha chora-tadbirlar toʻgʻrisida”gi Farmoni va “Oʻzbekiston Respublikasining Korrupsiyaga qarshi kurashish agentligi faoliyatini tashkil etish toʻgʻrisida”gi qarori loyihalari tayyorlandi. Ushbu loyihalarda korrupsiyaga qarshi kurashish organini tuzish nazarda tutilgan.

Mazkur organning tashkil etilishi:

mamlakatda korrupsiya holatining tizimli tahlil qilinishini taʼminlashga, korrupsiya xavfi ostida qolayotgan sohalarni aniqlashga;

korrupsiyaning oldini olish va unga qarshi kurashish sohasidagi davlat siyosatini shakllantirish hamda amalga oshirishga;

korrupsiyaga oid jinoyatlarni oʻrganish tizimini kompleks tahlil va monitoring qilish orqali korrupsiyaning oldini olish hamda unga qarshi kurashishning huquqiy asoslarini takomillashtirishga;

korrupsiyaning oldini olish va unga qarshi kurashish faoliyatining shaffofligi va ochiqligini taʼminlashga, ushbu maqsadda ommaviy axborot vositalari va fuqarolik jamiyatining boshqa institutlari bilan samarali hamkorlik qilishga koʻmaklashadi.

Yuqorida bayon etilganlarni inobatga olib hamda “Oʻzbekiston Respublikasi Oliy Majlisining Qonunchilik palatasi toʻgʻrisida”gi Oʻzbekiston Respublikasi Konstitutsiyaviy Qonunining 9 va 16-moddalariga hamda “Oʻzbekiston Respublikasi Oliy Majlisining Senati toʻgʻrisida”gi Oʻzbekiston Respublikasi Konstitutsiyaviy Qonunining 9 va 16-moddalariga muvofiq Oʻzbekiston Respublikasi Oliy Majlisi Qonunchilik palatasining Kengashi va Oʻzbekiston Respublikasi Oliy Majlisi Senatining Kengashi qaror qiladilar:

1. Korrupsiyaga qarshi kurashish tizimini takomillashtirish, korrupsiyaga oid huquqbuzarliklar sodir etish sabablari va sharoitlarini aniqlash hamda bartaraf etish, jamiyat va davlat hayoti hamda faoliyatining barcha sohalarida korrupsiyaning oldini olishga va unga qarshi kurashishga qaratilgan davlat siyosatini shakllantirish hamda roʻyobga chiqarish samaradorligini oshirish, shuningdek korrupsiyaga qarshi kurashish sohasidagi xalqaro reytinglarda Oʻzbekiston Respublikasi tutgan oʻrinlarni yaxshilash maqsadida korrupsiyaga qarshi kurashish organi — Oʻzbekiston Respublikasining Korrupsiyaga qarshi kurashish agentligini tuzish va Oʻzbekiston Respublikasi Prezidentining tegishli qarorlarini qabul qilish maqsadga muvofiq deb hisoblansin.

2. Ushbu Qoʻshma qaror Oʻzbekiston Respublikasi Prezidentiga maʼlumot uchun yuborilsin.

3. Mazkur Qoʻshma qaror qabul qilingan kundan eʼtiboran kuchga kiradi.