“Parlament nazorati toʻgʻrisida”gi Oʻzbekiston Respublikasi Qonunining 14-moddasiga muvofiq Oʻzbekiston Respublikasi Oliy Majlisining Qonunchilik palatasi qaror qiladi:

1. “Toshkent shahri hamda Navoiy viloyatining Navoiy shahrida aholiga davlat tomonidan kafolatlangan tibbiy yordam koʻrsatishni samarali tashkil etish choralarini koʻrish toʻgʻrisida”gi parlament soʻroviga Oʻzbekiston Respublikasi Bosh vazirining oʻrinbosari A.Abduxakimov tomonidan yuborilgan yozma javob maʼlumot uchun qabul qilinsin. Bunda Oʻzbekiston Respublikasi Prezidentining 2018-yil 7-dekabrdagi “Oʻzbekiston Respublikasi sogʻliqni saqlash tizimini tubdan takomillashtirish boʻyicha kompleks chora-tadbirlar toʻgʻrisida”gi PF-5590-sonli Farmoni bilan tasdiqlangan 2019 — 2021-yillarda Oʻzbekiston Respublikasi sogʻliqni saqlash tizimini rivojlantirish konsepsiyasi doirasida joriy yilning 1-iyuniga qadar Hukumatning tegishli qarori loyihasini ishlab chiqish va unda Oʻzbekiston Respublikasi Davlat budjeti mablagʻlari hisobidan qoplanadigan tibbiy xizmat hajmlarini aniqlash, budjet mablagʻlarini boshqarish amaliyotini hamda rejalashtirish strukturasini belgilash nazarda tutilganligi va buning natijasida Toshkent shahri aholisiga bir xil tarzda xizmat koʻrsatilishiga erishilishi maʼlum qilinganligi inobatga olinsin.

2. Oʻzbekiston Respublikasi Oliy Majlisi Qonunchilik palatasining Fuqarolarning sogʻligʻini saqlash masalalari qoʻmitasi:

yuqorida qayd etilgan Farmonda belgilangan vazifalarning bajarilishi;

Navoiy viloyati Navoiy shahar markaziy shifoxonasi faoliyatini tashkil qilish boʻyicha amalga oshirilishi lozim boʻlgan tadbirlarni oʻz vaqtida ijrosi taʼminlanishi yuzasidan parlament nazoratini amalga oshirsin.

3. Ushbu Qaror qabul qilingan kundan eʼtiboran kuchga kiradi.