Joylardagi ahvolni oʻrganib chiqish Oʻzbekiston Respublikasi Prezidentining “Ekinlarni payhon qilishga qarshi kurashni kuchaytirish toʻgʻrisida” 1994-yil 21-noyabrdagi Farmonini va ushbu masala boʻyicha Vazirlar Mahkamasining 1995-yil 6-noyabrdagi 423-son qarorini bajarish yuzasidan Qoraqalpogʻiston Respublikasi Vazirlar Kengashi, viloyatlar va tumanlar hokimliklari, vazirliklar va idoralarning tashkilotchilik ishlari aytib oʻtilgan hujjatlar talablariga javob bermasligini koʻrsatmoqda. Koʻpgina xoʻjalik rahbarlarining beparvoligi va masʼuliyatsizligi, ijro intizomining pastligi va Qoraqalpogʻiston Respublikasi Vazirlar Kengashi, viloyatlar va tumanlar hokimliklari, Qishloq va suv xoʻjaligi vazirligi, Ichki ishlar vazirligi va Oʻzbekiston Respublikasi Prokuraturasi tomonidan amaliy choralar koʻrilmaganligi natijasida chorva mollari payhon qilishi tufayli gʻalla, paxta, meva-sabzavot va boshqa qishloq xoʻjaligi mahsulotlari nobudgarchiligi kamaymayapti.

Vazirlar Mahkamasi qaror qiladi:

1. Qoraqalpogʻiston Respublikasi Vazirlar Kengashi Raisi, viloyatlar va tumanlar hokimlari, oʻzini oʻzi boshqarish organlari, mulkchilikning barcha shakllaridagi xoʻjaliklarning rahbarlari eʼtibori qishloq xoʻjaligi ekinlari, mevali daraxtlar, uzumzorlar va ihota daraxtzorlari zonalari payhon qilinishiga qarshi kurash qoniqarsiz tashkil etilganligiga, chorva mollari payhon qilishi natijasida ekinlarga, daraxtlarga zarar yetkazayotgan shaxslarga nisbatan yetarlicha talabchanlik koʻrsatilmayotganligiga qaratilsin. Shu maqsadlarda:

qishloq xoʻjaligi ekinzorlarida mol boqish, mollarning, avtotransport yoki qishloq xoʻjaligi texnikasining ekinzorlar orqali oʻtishi hamda ekinlarning payhon boʻlishiga olib keluvchi boshqa qonun buzishlarga qarshi kurash kuchaytirilsin;

xoʻjaliklarning rahbarlariga ichki ishlar organlari va fuqarolarning oʻzini oʻzi boshqarish organlari vakillari bilan birgalikda ekinlarning payhon boʻlishi hollarini aniqlash va bunday qonun buzishlarning oldini olish yuzasidan muntazam reydlar oʻtkazish topshirilsin. Ekinlar koʻp payhon boʻlgan joylarda kuzatish punktlari oʻrnatilsin va dala qorovullari belgilansin;

ekinlarni payhon qilish hollari aniqlangan taqdirda payhon qilgan chorva mollari, avtotransport, qishloq xoʻjaligi texnikasi yoki boshqa payhon qilish vositasining egasini aniqlashga doir operativ chora-tadbirlar koʻrilsin, materiallar aybdorlarni qonun hujjatlarida belgilangan javobgarlikka tortish uchun tegishli organlarga berilsin;

belgilab qoʻyilsinki, mulkchilik shakllaridan qatʼi nazar, korxonalarga, tashkilotlarga, shuningdek fuqarolarga qarashli payhon qilish vositalari tutib qolinadi va uning egalari hamda mulkdorlar tomonidan payhon qilish tufayli yetkazilgan zarar toʻliq qoplangan taqdirda qaytarib beriladi.

2. Qoraqalpogʻiston Respublikasi Vazirlar Kengashi va viloyatlar hokimliklari Oʻzbekiston Respublikasi Ichki ishlar vazirligining qishloq xoʻjaligi ekinlarini qoʻriqlash uchun masʼul boʻlgan boʻlinmalariga minish uchun otlar ajratsinlar. Otlarni saqlash xarajatlari xoʻjaliklar hisobiga amalga oshirilsin.

3. Oʻzbekiston Respublikasi Prokuraturasi (Mustafoyev), Ichki ishlar vazirligi (Almatov), mulkchilik shakllaridan qatʼi nazar, xoʻjaliklarning hamda ular tarkibiy boʻlinmalarining ekinlarning saqlanishini taʼminlamagan va ularning payhon boʻlishiga yoʻl qoʻygan rahbarlariga nisbatan egallab turgan vazifasidan boʻshatish, qonunchilikka muvofiq javobgarlikka tortish masalasini majburiy tartibda qoʻysinlar.

4. Oʻzbekiston Respublikasi Prokuraturasi (Mustafoyev) Oʻzbekiston Respublikasi Prezidentining “Ekinlarni payhon qilishga qarshi kurashni kuchaytirish toʻgʻrisida”gi Farmonining bajarilishi ustidan nazoratni kuchaytirish yuzasidan qoʻshimcha chora-tadbirlar koʻrsin, Oʻzbekiston Respublikasi Oliy sudi (Mingboyev) ekinlarni payhon qilishning har bir holati boʻyicha jazolashning muqarrarligini va yetkazilgan zararning toʻliq undirib olinishini taʼminlasin.

Oʻzbekiston Respublikasi Adliya vazirligi (Mirsafoyev) ekinlarni payhon qilganlik uchun javobgarlik toʻgʻrisidagi masala yuzasidan qonunchilikni targʻib qilish ishlarini kuchaytirsin.

5. “Oʻzteleradio” kompaniyasi (Hakimov) hamda Oʻzbekiston Milliy axborot agentligi (Hazratqulov) mollarning ekinlarni payhon qilishi oqibatida xalq xoʻjaligiga yetkaziladigan zarar toʻgʻrisida matbuot, radio va televideniye orqali tushuntirish ishlarini muntazam olib borsinlar.

6. Oʻzbekiston Respublikasi Qishloq va suv xoʻjaligi vazirligi “Oʻzmevasabzavotuzumsanoat” uyushmasi, Oʻzbekiston Qishloq xoʻjaligi fanlari akademiyasi hamda Davlat oʻrmon qoʻmitasi bilan birgalikda shu yilning dekabr oyida ekinlar va daraxt koʻchatlarini payhon qilishga qarshi kurashish ishlarining ahvolini har tomonlama koʻrib chiqsin, ushbu ishlarni yanada yaxshilash va ularning samaradorligini oshirish boʻyicha aniq chora-tadbirlarni belgilasin va amalga oshirsin hamda har oyda Vazirlar Mahkamasiga axborot berib tursin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari Q.Gʻ. Obidov zimmasiga yuklansin.