Oʻzbekiston Respublikasi Hukumati bilan Singapur Respublikasi Hukumati 2008-yil 24-iyulda Singapurda imzolangan Ikki yoqlama soliq solishga yoʻl qoʻymaslik hamda daromad soliqlarini toʻlashdan boʻyin tovlashning oldini olish toʻgʻrisidagi bitimga (bundan buyon matnda “Bitim” deb yuritiladi) oʻzgartishlar kiritishni istab,

quyidagilar toʻgʻrisida kelishib oldilar:

Bitimning 25-moddasi olib tashlansin va quyidagicha oʻzgartirilsin:

“25-modda — Axborot almashish

1. Ahdlashuvchi Davlatlarning vakolatli organlari ushbu Bitim qoidalarini bajarish yoki maʼmuriy boshqarish yoxud Ahdlashuvchi Davlatlar yoki ularning siyosiy boʻlinmalari yoki mahalliy hokimiyat organlari nomidan ushbu Bitimga zid boʻlmagan darajada undiriladigan har qanday turdagi va koʻrinishdagi soliqlarga taalluqli milliy qonun hujjatlarini qoʻllash uchun oldindan muhim boʻlgan axborotni almashadilar. Axborot almashish 1 va 2-moddalar bilan cheklanmaydi.

2. Ahdlashuvchi Davlatlarning biri tomonidan 1-bandga muvofiq olingan har qanday axborot shu Davlat ichki qonun hujjatlariga muvofiq olingan axborot qanchalik maxfiy boʻlsa shunchalik maxfiy hisoblanadi va faqat baholash yoki soliqlarni yigʻish yoxud majburiy undirish yoki sud orqali taʼqib etish yoki 1-bandda aytib oʻtilgan soliqlarga nisbatan apellatsiyalarni koʻrib chiqish bilan shugʻullanuvchi hamda yuqorida koʻrsatib oʻtilganlarning barchasi ustidan nazorat qiluvchi shaxslar yoki organlarga (shu jumladan sudlar va maʼmuriy organlar) maʼlum qilinadi. Bunday shaxslar yoki organlar bu axborotdan faqat koʻrsatib oʻtilgan maqsadlarda foydalanishlari lozim. Ular ushbu axborotni ochiq sud majlisi vaqtida yoki sud qarorlarida oshkor qilishlari mumkin.

3. Hech qanday holatda 1 va 2-bandlar qoidalari Ahdlashuvchi Davlat zimmasiga quyidagi majburiyatlarni yuklovchi qoidalar sifatida talqin qilinmaydi:

(a) shu yoki boshqa Ahdlashuvchi Davlatning qonunlariga va maʼmuriy amaliyotiga zid boʻlgan maʼmuriy tadbirlarni oʻtkazish;

(b) shu yoki boshqa Ahdlashuvchi Davlatning qonunlariga binoan yoki odatdagi maʼmuriy boshqarish jarayonida olish mumkin boʻlmagan axborotni taqdim etish;

(s) savdo, tadbirkorlik, sanoat, tijorat yoki kasbga oid sirni yoxud savdo jarayonini oshkor qilishi mumkin boʻlgan yoki oshkor qilinishi davlat siyosatiga (ordre public) zid kelishi mumkin boʻlgan axborotni taqdim etish.

4. Agar axborot bir Ahdlashuvchi Davlat tomonidan mazkur moddaga muvofiq soʻralgan boʻlsa, boshqa Ahdlashuvchi Davlat soʻralgan axborotni olish uchun, hatto bunday axborot ushbu boshqa Davlatga oʻz soliq maqsadlari uchun talab qilinmasa-da, maʼlumot toʻplash boʻyicha oʻz chora-tadbirlarini koʻrishi lozim. Avvalgi ganda boʻlgan majburiyat 3-bandning qoidalari bilan cheklangan, biroq bunday cheklovlar hech qanday holda Ahdlashuvchi Davlatga faqat undan ichki manfaatdorlikning yoʻqligi sababli axborot taqdim etishdan voz kechishga ruxsat beruvchi sifatida talqin qilinishi mumkin emas.

5. 3-bandning qoidasi hech qanday holatda Ahdlashuvchi Davlatga faqat bank, boshqa moliya muassasasi yoki nominal ega yoki agent yoxud ishonchli vakil sifatida qatnashuvchi shaxs maʼlumot egasi boʻlgani sababli yoki axborot shaxsning mulk huquqlariga kirishi sababli axborot taqdim etishdan voz kechishga ruxsat beruvchi sifatida talqin qilinmaydi.”

1. Ahdlashuvchi Davlatlarning har biri ushbu Protokolning kuchga kirishi uchun uning qonunchiligiga binoan zarur boʻlgan protseduralar yakunlangani haqida boshqa Davlatni xabardor qiladi.

2. Protokol bunday xabarnomalarning oxirgisi olingan sanadan keyingi oyning birinchi kunida kuchga kiradi va uning qoidalari:

a) Oʻzbekistonga nisbatan qoʻllanilganda:

(i) Protokol kuchga kiradigan yildan keyin keluvchi kalendar yilning 1-yanvaridan yoki undan soʻng olinadigan daromadlardan manbalardan undiriluvchi soliqlarga nisbatan.

(ii) boshqa daromad soliqlariga nisbatan, Protokol kuchga kirgan yildan keyin keluvchi kalendar yilning 1-yanvaridan boshlab yoki 1-yanvardan soʻng har bir kalendar yil uchun hisoblanadigan daromadlardan soliqlarga nisbatan.

b) Singapurga nisbatan qoʻllanilganda:

har bir yil uchun hisoblanadigan soliqlarga nisbatan Protokol kuchga kirgan yildan keyin keluvchi ikkinchi kalendar yilning 1-yanvaridan boshlab yoki undan keyin amal qiladi.

Bitimning ajralmas qismi hisoblangan mazkur Protokol Bitim qancha amal qilsa shuncha muddat amal qiladi hamda Bitim qancha muddat qoʻllanilsa, shuncha muddat qoʻllaniladi.

Barchasini tasdiqlash uchun, tegishli tarzda bunga vakolat berilgan quyida qoʻl qoʻyuvchilar, mazkur Bayonnomani imzoladilar.

Toshkent shahrida 2011-yil 14-iyunda ikki nusxada, oʻzbek va ingliz tillarida tuzildi.

Ikki matn orasida tafovutlar vujudga kelgudek boʻlsa, ingliz tilidagi matn asos qilib olinadi.