Moliya va sanoat kapitalini birlashtirish, iqtisodiy jihatdan samarali boʻlgan xoʻjalik aloqalarini rivojlantirish va iqtisodiyotning turli sektorlarida ishlab chiqarishni integratsiyalash, shuningdek, korxonalarni boshqarishning zamonaviy shakllarini yaratish maqsadida Vazirlar Mahkamasi qaror qiladi:

1. Moliya-sanoat guruhlari toʻgʻrisidagi Nizom tasdiqlansin.

2. Oʻzbekiston Respublikasi Adliya vazirligi moliya-sanoat guruhlarini qonunchilikda belgilangan tartibda davlat roʻyxatidan oʻtkazsin.

3. Oʻzbekiston Respublikasi Moliya vazirligi ikki oy muddatda, monopoliyaga qarshi talablarni hisobga olgan holda, takliflar (loyihalar) ni koʻrib chiqish va moliya-sanoat guruhlarini tashkil etish tartibi toʻgʻrisidagi metodik tavsiyalarni ishlab chiqsin va tasdiqlasin.

4. Mazkur qarorning bajarilishini nazorat qilish bosh vazir oʻrinbosari B.S. Hamidov zimmasiga yuklansin.

1. Moliya-sanoat guruhi oʻz qatnashchilarining moddiy va moliya resurslarini qoʻshish yoʻli bilan kapitallarni birlashtirish asosida foyda (daromad) olish, ishlab chiqarishning raqobat qilish qobiliyatini va samaradorligini oshirish, maqbul texnologiya va kooperatsiya aloqalarini tashkil etish, eksport imkoniyatlarini koʻpaytirish, ilmiy-texnikaviy taraqqiyotini rivojlantirish hamda investitsiyalarni jalb qilish maqsadida faoliyat yurituvchi kredit-moliya muassasalari, investitsiya muassasalari, korxonalar, boshqa muassasalar va tashkilotlarning xoʻjalik uyushmasidir.

2. Moliya-sanoat guruhlarini tashkil etish, ularning faoliyati, qayta tashkil etilishi va tugatilishi “Oʻzbekiston Respublikasidagi korxonalar toʻgʻrisida”, “Xoʻjalik jamiyatlari va shirkatlari toʻgʻrisida” gi Oʻzbekiston Respublikasi qonunlari, mazkur Nizom va Oʻzbekiston Respublikasining boshqa qonunchilik hujjatlari bilan tartibga solinadi.

3. Mulkchilik shakllaridan qatʼi nazar, har qanday tashkiliy-huquqiy shakldagi korxonalar, shuningdek, kredit-moliya va boshqa muassasalar, investitsiya muassasalari, tashkilotlari, shu jumladan, xorijiy muassasalar, investitsiya muassasalari va tashkilotlari moliya-sanoat guruhi qatnashchilari boʻlishlari mumkin.

Tijorat banklari moliya-sanoat guruhlari qatnashchilari boʻlishlari mumkin. Bunda moliya-sanoat guruhi ustav fondidagi tijorat banklarining mol-mulki ulushi shu fondning 10 foizidan ortiq boʻlishi mumkin emas. Moliya-sanoat guruhi qatnashchilari boʻlgan banklar soni cheklanmaydi.

Davlat hokimiyati va boshqaruv organlari moliya-sanoat guruhi qatnashchilari boʻlishlari mumkin emas.

4. Moliya-sanoat guruhi qatnashchilari yuridik shaxs maqomini saqlab qoladilar.

5. Moliya-sanoat guruhlari:

uning qatnashchilari tomonidan ixtiyoriylik tartibida yoki guruhning bir qatnashchisi tomonidan oʻzi sotib oladigan boshqa qatnashchilar aksiyalari paketlarini birlashtirish yoʻli bilan;

Vazirlar Mahkamasining qaroriga koʻra;

hukumatlararo bitimlar asosida tashkil etiladi.

6. Moliya-sanoat guruhlarini ixtiyoriylik tartibida yoki aksiyalar paketlarini birlashtirish asosida tashkil etish quyidagi yoʻsinda amalga oshiriladi:

guruh qatnashchilari tomonidan Oʻzbekiston Respublikasi qonunchiligida nazarda tutilgan tartibda ochiq yoki yopiq turdagi aksionerlik jamiyatini, shuningdek, xoldingni taʼsis etish;

guruh qatnashchilari tomonidan guruh tarkibiga kiruvchi korxonalar va moliya-kredit muassasalarining oʻzlariga tegishli boʻlgan aksiyalar paketlarini guruh qatnashchilaridan biriga vakolatli boshqarishga berish;

guruh qatnashchilaridan biri tomonidan boshqa korxonalar, shuningdek, guruh qatnashchisi boʻlayotgan muassasa va tashkilotlar aksiyalari paketlarini sotib olish.

Davlatga tegishli boʻlgan aksiyalar paketlari, davlatga tegishli boʻlgan aksiyalar paketlarini vakolatli boshqarishga berilishi yoki ularning sotib olinishi mazkur bandga muvofiq moliya-sanoat guruhlarini tashkil etishga olib kelganda ularning miqdori Vazirlar Mahkamasi tomonidan monopoliyaga qarshi qonunchilik talablarini hisobga olgan holda belgilanadi.

7. Guruh qatnashchilarining tarkibi faqat davlat korxonalari, shuningdek, budjetdan mablagʻ bilan taʼminlanadigan muassasalar va tashkilotlardan shakllantirilayotgan hollarda moliya-sanoat guruhlari Vazirlar Mahkamasining qaroriga koʻra tashkil etiladi.

8. Hukumatlararo bitimlar asosida tashkil etilayotgan moliya-sanoat guruhlarining Oʻzbekiston Respublikasi tomonidan boʻlgan qatnashchilari Vazirlar Mahkamasi tomonidan belgilanadi.

9. Moliya-sanoat guruhlarini tashkil etishda:

ustav kapitalida davlat mulki ulushi, shuningdek, jamoatchilik birlashmalari, xayriya yoki boshqa jamoatchilik fondlari va ular korxonalarining mulki 25 foizdan ortiq boʻlgan korxonaga aksiyalarning sotib olinishiga;

moliya-sanoat guruhi qatnashchilari tomonidan davlat mulki ulushi 25 foizdan ortiq boʻlgan kapitalning ixtiyoriy tartibda birlashtirilishiga;

kapital tarkibidagi moddiy aktivlari 50 foizdan kam boʻlgan xoʻjalik uyushmalari, shuningdek, xoldinglarning moliya-sanoat guruhida qatnashishlariga;

moliya-sanoat guruhi qatnashchilari tomonidan aksiyalarga ikki yoqlama egalik qilishga;

guruhga kiruvchi kredit-moliya muassasasiga yoki investitsiya muassasasiga moliya-sanoat guruhining har qanday qatnashchisi boʻlgan korxonaning 10 foizdan ortiq aksiyalariga egalik qilishiga, shuningdek, shu guruhga kiruvchi korxonalar aksiyalariga koʻrsatib oʻtilgan muassasalar aktivlarining 10 foizidan ortigʻi qoʻshilishiga yoʻl qoʻyilmaydi.

10. Moliya-sanoat guruhlarini tashkil etishda monopoliyaga qarshi kurash organi bilan oldindan kelishmasdan:

moliya-sanoat guruhi qatnashchilari tarkibiga monopol korxonalar roʻyxatiga kiritilgan korxonalarning kirishlariga;

moliya-sanoat guruhi tomonidan boshqa moliya-sanoat guruhi qatnashchilari boʻlgan korxonalar aksiyalarining sotib olinishiga yoʻl qoʻyilmaydi.

11. Davlat bilan tuzilgan shartnomaga koʻra ishlab chiqarilayotgan yoki markazlashtirilgan tartibda eksport qilinayotgan mahsulot ulushi korxona tomonidan oldingi yilda ishlab chiqarilgan barcha mahsulotning 30 foizidan ortiq boʻlganda korxona moliya-sanoat guruhi qatnashchisi boʻlishi uchun “Oʻzistiqbolstat” davlat qoʻmitasining roziligi talab etiladi.

12. Davlat mulki ulushi 25 foizdan ortiq boʻlgan davlat korxonalari, shirkat (jamoa) korxonalari, shuningdek, davlat budjetidan mablagʻ bilan taʼminlanadigan tashkilot va muassasalar moliya-sanoat guruhlari qatnashchilari uchun davlat mulkini tasarruf etish vakolati berilgan organ roziligi talab qilinadi.

13. Moliya-sanoat guruhi qatnashchilari yoki ularning vakili ularni moliya-sanoat guruhi sifatida roʻyxatga olish uchun Adliya vazirligiga buyurtmanoma beradilar.

Buyurtmanomalar Adliya vazirligi tomonidan bir oydan ortiq boʻlmagan muddatda koʻrib chiqiladi.

Moliya-sanoat guruhining maqomi Oʻzbekiston Respublikasi Moliya-sanoat guruhlari reyestriga tegishli yozuv yozish bilan Adliya vazirligi tomonidan tasdiqlanadi.

Korxona, muassasa, tashkilot nomida “moliya-sanoat guruhi” soʻz birikmasidan foydalanishga shu guruh maqomi Oʻzbekiston Respublikasi Moliya-sanoat guruhlari reyestrida tegishli yozuv bilan tasdiqlangan hollardagina yoʻl qoʻyiladi.