Elektr energiyasi isteʼmolini hisobga olish va nazorat qilish tizimini yanada takomillashtirish, shuningdek, yoʻqotishlarni kamaytirish, iqtisodiyot tarmoqlari va respublika hududlari aholisi tomonidan isteʼmol qilingan elektr energiyasini hisobga olishning aniqligi va toʻliqligini oshirish maqsadida:

1. 2011-yil 19 sentbrda Osiyo taraqqiyot banki (OTB) Direktorlar kengashi “Elektr energiyasi isteʼmolini hisobga olish va nazorat qilishning avtomatlashtirilgan tizimini joriy etish. Oʻzbekiston Respublikasining Buxoro, Jizzax va Samarqand viloyatlaridagi 0,4 kV isteʼmolchilarining elektr energiyasi isteʼmolini hisobga olish tizimi” loyihasini amalga oshirish uchun toʻlov muddati 25 yil, shu jumladan 5 yillik imtiyozli davr bilan oddiy kapital mablagʻlari hisobidan OTBning Oʻzbekiston Respublikasiga 150,0 million AQSh dollari miqdorida kredit ajratishni maʼqullanganligi;

loyihani amalga oshirish muddati 3 yil (2012 — 2014-yil) etib belgilanganligi maʼlumot uchun qabul qilinsin.

2. Belgilansinki:

OTB krediti Oʻzbekiston Respublikasiga Oʻzbekiston Respublikasi va OTB oʻrtasidagi kredit shartnomasi asosida beriladi;

qarz mablagʻlaridan maqsadli va samarali foydalanish, shuningdek koʻrsatilgan loyihani amalga oshirish uchun masʼul ijro etuvchi organ “Hududiy elektr tarmoqlari” AJ hisoblanadi;

OTB kreditini toʻlash bilan bogʻliq xarajatlar, shuningdek, foizlar, komissiyalar va u boʻyicha boshqa harajatlar “Hududiy elektr tarmoqlari” AJning oʻz mablagʻlari hisobidan qoplanadi.

3. “Oʻzbekenergo” davlat aksiyadorlik kompaniyasi ikki oy muddatda loyihaning texnik-iqtisodiy asoslanuvini vakolatli vazirlik va idoralar bilan ekspertiza xulosalarini olib, Oʻzbekiston Respublikasi Vazirlar Mahkamasiga tasdiqlash uchun belgilangan tartibda kiritilishini taʼminlasin.

4. “Elektr energiyasi isteʼmolini hisobga olish va nazorat qilishning avtomatlashtirilgan tizimini joriy etish. Oʻzbekiston Respublikasi Buxoro, Jizzax va Samarqand viloyatlari 0,4 kV isteʼmolchilarining elektr energiyasi isteʼmolini hisobga olish tizimi” loyihasini amalga oshirish uchun OTB kreditini toʻlash hamda u boʻyicha foizlar va komissiyalarni toʻlash jadvali ilovaga muvofiq tasdiqlansin.

5. Oʻzbekiston Respublikasi Moliya vaziri Oʻzbekiston Respublikasi nomidan OTB bilan kredit shartnomasini hamda Oʻzbekiston Respublikasi va “Oʻzbekenergo” davlat aksiyadorlik kompaniyasi oʻrtasida OTB kreditini qayta moliyalashtirish toʻgʻrisidagi bitimni imzolasin:

“Oʻzbekenergo” davlat aksiyadorlik kompaniyasi boshqaruvi raisi OTB bilan loyiha shartnomasini imzolasin.

6. Oʻzbekiston Respublikasi Adliya vazirligi Oʻzbekiston Respublikasi bilan OTB oʻrtasidagi kredit shartnomasi hamda “Oʻzbekenergo” davlat aksiyadorlik kompaniyasi bilan OTB oʻrtasidagi loyiha shartnomasi boʻyicha belgilangan tartibda huquqiy xulosalar bersin.

7. Oʻzbekiston Respublikasi Vazirlar Mahkamasi huzuridagi Xalqaro moliya institutlari, tashkilotlari va donor-davlatlar bilan hamkorlik qilish, yirik va strategik ahamiyatga ega investitsiya loyihalarini amalga oshirish boʻyicha idoralararo kengash (R.S. Azimov) mazkur loyihani amalga oshirishning borishini muntazam koʻrib chiqilishini taʼminlasin. Zarur hollarda Oʻzbekiston Respublikasi Vazirlar Mahkamasiga uning oʻz vaqtida va samarali amalga oshirilishini taʼminlash masalalari yuzasidan takliflar kiritsin.