Tashqi iqtisodiy faoliyatning markazlashtirilishiga barham berish va uning asosan nodavlat tuzilmalari tomonidan tijorat asoslarida amalga oshirilishiga o‘tish maqsadida Vazirlar Mahkamasi qaror qiladi:

1. Vazirlar Mahkamasining “Respublikada tashqi iqtisodiy faoliyatni takomillashtirish va Tashqi iqtisodiy aloqalar vazirligini (qayta tashkil etish to‘g‘risida” 1994-yil 17-noyabrdagi 558-son qarorining 2-bandiga qisman o‘zgartirish kiritilib, “O‘zoziqovqatimpeks” respublika xo‘jalik hisobidagi tashqi savdo birlashmasini, “Interaloqa” respublika xo‘jalik hisobidagi tashqi savdo birlashmasini, “O‘zdonimpeks” respublika xo‘jalik hisobidagi tashqi savdo birlashmasini, “O‘zagroimpeks” respublika xo‘jalik hisobidagi tashqi savdo birlashmasini tugatish maqsadga muvofiq deb hisoblansin.

O‘zbekiston Respublikasi Tashqi iqtisodiy aloqalar vazirligi bir hafta muddatda belgilangan tartibda tugatish komissiyasini tuzsin.

2. O‘zbekiston Respublikasi Tashqi iqtisodiy aloqalar vazirligi Moliya vazirligi, Tashqi iqtisodiy faoliyat milliy banki va boshqa manfaatdor tashkilotlar ishtirokida bir hafta muddatda ishchi komissiyasini tuzsin va oziq-ovqat tovarlari importi bo‘yicha 1995-yil uchun tuzilgan kontraktlar va bitimlarning, shuningdek, ularga aloqador hujjatlarning:

qand-shakar, choy, o‘simlik moyi bo‘yicha – “O‘zbeksavdo” uyushmasining “Baqqollik” respublika aksionerlik birlashmasiga;

go‘sht-sut mahsulotlari bo‘yicha – “O‘zbeksavdo” uyushmasining “Go‘shtsutsavdo” respublika savdo-ishlab chiqarish birlashmasiga;

oziq-ovqatbop va embop don bo‘yicha – “O‘zdonmahsulot” korporatsiyasi tizimiga belgilangan tartibda berilishini ta’minlasin.

3. “O‘zdonmahsulot” davlat-aksionerlik korporatsiyasi 10 kun muddatda korporatsiya tarkibida “O‘zdon” tashqi savdo firmasini tashkil etsin, uning zimmasiga don mahsulotlarining markazlashtirilgan importini ta’minlash vazifasini yuklasin, “O‘zdon” firmasi Ustavini tasdiqlasin, O‘zbekiston Respublikasi Tashqi iqtisodiy aloqalar vazirligi esa firmaga tashqi iqtisodiy faoliyat bilan shug‘ullanish huquqini beruvchi zarur hujjatlarning rasmiylashtirilishini tezlashtirsin.

4. O‘zbekiston Respublikasi Tashqi iqtisodiy aloqalar vazirligi tizimida tovarlar va xizmatlarni markazlashtirilgan tartibda eksport va import qilish bo‘yicha davlat tashqi savdo birlashmasi tashkil etilsin.

O‘zbekiston Respublikasi Tashqi iqtisodiy aloqalar vazirligi tashkil etilayotgan birlashma Ustavini bir hafta muddatda ishlab chiqsin va tasdiqlasin.

5. O‘zbekiston Respublikasi Tashqi iqtisodiy faoliyat milliy banki, Moliya vazirligi, Tashqi iqtisodiy aloqalar vazirligi, “O‘zbeksavdo” uyushmasi va “O‘zdonmahsulot” korporatsiyasi bir oy muddatda xalqaro normalarga muvofiq, ilgari qabul qilingan majburiyatlarning so‘zsiz bajarilishini nazarda tutgan holda, kreditor banklar va xorijiy firmalar bilan qarz bitimlari va kontraktlarini qayta rasmiylashtirsinlar.

6. “O‘zistiqbolstat” davlat qo‘mitasi, O‘zbekiston Respublikasi Tashqi iqtisodiy aloqalar vazirligi, “O‘zbeksavdo” davlat uyushmasi, “O‘zdonmahsulot” davlat korporatsiyasi eng zarur mahsulotlar importi va markazlashtirilgan eksport bo‘yicha mahsulot yetkazib berishlarning bajarilishiga doir muntazam hisobotni joriy etsinlar va har oyda Vazirlar Mahkamasiga axborot taqdim qilsinlar.

7. O‘zbekiston Respublikasi Moliya vazirligi davlat ehtiyojlari uchun oziq-ovqat tovarlari importini o‘z vaqtida mablag‘ bilan ta’minlash ustidan, O‘zbekiston Respublikasi Davlat soliq qo‘mitasi esa markazlashtirilgan eksportdan valyuta mablag‘larining o‘z vaqtida va to‘liq tushishi ustidan nazorat o‘rnatsinlar.

8. O‘zbekiston Respublikasi Tashqi iqtisodiy aloqalar vazirligi, amaldagi qonunchilikka muvofiq, ishdan bo‘shab qoladigan xodimlarni ishga joylashtirishni ta’minlasin.

9. Mazkur qarorning bajarilishini nazorat qilish O‘zbekiston Respublikasining Bosh vaziri A. Mutalov zimmasiga yuklansin.