Xalqaro tiklanish va taraqqiyot banki bilan hamkorlikni yanada kengaytirish, shuningdek Oʻzbekiston Respublikasining ustav kapitalidagi dastlabki ulushini saqlab qolish munosabati bilan uni oshirish maqsadida:

1. Xalqaro tiklanish va taraqqiyot banki boshqaruvchilari Kengashi (keyingi oʻrinlarda ― XTTB) tomonidan XTTB ustav kapitalini koʻpaytirish va XTTB aʼzo davlatlarining XTTB ustav kapitalidagi ulushlarini saqlab qolish maqsadida qoʻshimcha aksiyalarga obuna boʻlishini tashkil etish toʻgʻrisida qaror qabul qilinganligi maʼlumot uchun qabul qilinsin.

2. Oʻzbekiston Respublikasi Investitsiyalar boʻyicha davlat qoʻmitasi, Iqtisodiyot vazirligi, Moliya vazirligi va Markaziy bankining XTTB ustav fondidagi 88 425 455 AQSH dollari qiymatidagi 733 ta aksiyaga Oʻzbekiston Respublikasining qoʻshimcha obunasini oʻtkazish toʻgʻrisidagi taklifi maʼqullansin.

3. Oʻzbekiston Respublikasi Investitsiyalar boʻyicha davlat qoʻmitasining raisi Oʻzbekiston Respublikasining XTTB ustav kapitalidagi qoʻshimcha ulushlarni sotib olish niyati toʻgʻrisidagi yozma majburiyatni Oʻzbekiston Respublikasi nomidan imzolasin.

4. Adliya vazirligi 733 ta aksiyani sotib olish uchun obunaning Oʻzbekiston Respublikasi qonunchiligiga muvofiqligi toʻgʻrisida XTTB tomonidan taqdim etilgan shakl boʻyicha yuridik xulosani belgilangan tartibda yuborsin.

5. XTTBning ustav kapitalidagi 733 ta aksiyaning narxini toʻlash, umumiy qoʻshimcha aksiyalar narxining 6 foizi (5 305 527,3 AQSH dollari) miqdoridagi mablagʻlarni AQSH dollari shaklida Jahon bankining hisob raqamiga oʻtkazish va Oʻzbekiston Respublikasi Markaziy banki tomonidan qoʻshimcha aksiyalarning umumiy narxining 94 foiziga teng boʻlgan summada, milliy valyutada oʻzgartirilmaydigan veksellarning chiqarilishi orqali amalga oshiriladi. Ushbu veksellar MBRRning qimmatli qogʻozlar hisob raqamiga Oʻzbekiston Respublikasi Markaziy bankida joylashtiriladi va XTTBning talabiga binoan belgilangan tartibda toʻlanadi.

6. Oʻzbekiston Respublikasi Moliya vazirligi bir kun muddatda sotib olingan qoʻshimcha aksiyalar uchun 5 305 527,3 AQSH dollari miqdoridagi toʻlovni toʻlash manbasini belgilasin.

7. Oʻzbekiston Respublikasi Markaziy banki Jahon bankiga 5 305 527,3 AQSH dollari toʻlash va milliy valyutada 83 119 927,7 AQSH dollari miqdoridagi ekvivalent summaga oʻtkazilmaydigan foizsiz vekselni obuna toʻgʻrisidagi hujjat yuborilgandan soʻng Jahon Banki tomonidan belgilangan tartibda chiqarish va uni Oʻzbekiston Respublikasi Markaziy bankidagi XTTB qimmatli qogʻozlar hisobvaragʻiga joylashtirish vakolati berilsin.

8. Oʻzbekiston Respublikasi Investitsiyalar boʻyicha davlat qoʻmitasi Jahon banki guruhi bilan hamkorlik doirasida vakolatli ishchi organ sifatida:

Oʻzbekiston Respublikasi nomidan XTTB ustav kapitalidagi qoʻshimcha aksiyalarga obuna boʻyicha hujjat oʻz vaqtida XTTB yuborilishini taʼminlasin;

Oʻzbekiston Respublikasi Markaziy bankidagi qimmatli qogʻozlar hisobvaragʻiga oʻtkazilmaydigan foizsiz vekselni chiqarish va joylashtirish toʻgʻrisida XTTB xabar berilsin.

9. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosari — investitsiyalar boʻyicha davlat qoʻmitasi raisi S.R. Xolmurodov va Oʻzbekiston Respublikasi Bosh vazirining oʻrinbosari — moliya vaziri D.A. Qoʻchqorov zimmasiga yuklansin.