Jahon standartlariga mos quyuv mahsulotlari ishlab chiqarish quvvatlarini yanada kengaytirish, neftgazkimyo uskunalari eksporti hajmlarini oshirish hamda respublikaning neft va gazni qayta ishlash sanoati infratuzilmasini rivojlantirishning maqsadli dasturlarini amalga oshirishni jadallashtirish maqsadida:

1. Maʼlumot uchun qabul qilinsinki:

“Oʻzbekneftgaz” AJ tomonidan ““Oʻzbekximmash zavodi” AJ negizida yangi quyuv sexi qurish bilan quyuv ishlab chiqarishini modernizatsiyalash” investitsiya loyihasi (keyingi oʻrinlarda — loyiha)ni amalga oshirish hisobiga neftgazkimyo uskunalari uchun yiliga 4 000 tonna quyma chiqarish quvvatiga ega boʻlgan quyuv mahsulotlarini oʻzlashtirish masalasi puxta ishlab chiqildi;

“Oʻzbekximmash zavodi” AJning oʻz mablagʻlari va “Oʻzsanoatqurilishbank” ATB kreditlari loyihani moliyalashtirish manbalari boʻlib, ularning summasi “tayyor holda topshirish” sharti bilan yangi quyuv sexi qurilishiga pudratchini tayinlash hamda investitsiya loyihasining texnik-iqtisodiy asoslanishini ishlab chiqish boʻyicha tanlov asosida belgilanadi.

2. Quyidagilar:

“Oʻzsanoatqurilishbank” ATBning krediti boʻyicha “Oʻzbekximmash zavodi” AJ qarz oluvchi, “Oʻzbekneftgaz” AJ esa birgalikda qarz oluvchi hisoblanadi;

loyihani amalga oshirish doirasida jalb etiladigan kreditni soʻndirish va unga xizmat koʻrsatish bilan bogʻliq sarf-xarajatlar “Oʻzbekximmash zavodi” AJ va “Oʻzbekneftgaz” AJning shaxsiy mablagʻlari hisobidan amalga oshiriladi.

3. Loyihani amalga oshirish doirasida “Oʻzbekximmash zavodi” AJga, istisno tariqasida:

“tayyor holda topshirish” shartlarida yangi quyuv sexi qurilishi pudratchisi hamda Oʻzbekiston Respublikasining “Davlat xaridlari toʻgʻrisida”gi Qonuniga muvofiq tanlov asosida loyihaning texnik-iqtisodiy asoslanishini ishlab chiquvchisi bilan shartnomalar tuzishga;

2019-yilning 1-iyuliga qadar muddatda ish hujjatlarini ishlab chiqish bilan bir vaqtda qurilish-montaj ishlarini amalga oshirishga;

“Oʻzbekiston Respublikasi Prezidenti huzuridagi Loyiha boshqaruvi milliy agentligi qoshidagi Loyihalar va import shartnomalarini kompleks ekspertizadan oʻtkazish markazi” DUKda ekspertizani oʻtkazmasdan loyihaning texnik-iqtisodiy asoslanishini ishlab chiqishga va tasdiqlash uchun Oʻzbekiston Respublikasi Vazirlar Mahkamasiga taqdim etishga ruxsat berilsin.

4. “Oʻzbekneftgaz” AJ 2018-yilning 30-noyabriga qadar muddatda yangi quyuv sexining 2019-yil 1-dekabrgacha qurib bitkazilishini va foydalanishga topshirilishini nazarda tutgan holda loyihaning texnik-iqtisodiy asoslanishi ishlab chiqilishini va tasdiqlash uchun Oʻzbekiston Respublikasi Vazirlar Mahkamasiga kiritilishini taʼminlasin.

5. “Oʻzbekiston Respublikasi Prezidenti huzuridagi Loyiha boshqaruvi milliy agentligi qoshidagi Loyihalar va import shartnomalarini kompleks ekspertizadan oʻtkazish markazi” DUK “tayyor holda topshirish” sharti bilan yangi quyuv sexi qurilishiga pudratchini belgilash boʻyicha tanlov oʻtkazishning texnik topshirigʻini ekspertizadan oʻtkazishni, shuningdek, tuzilgan shartnoma ekspertizadan oʻtkazilishi va qayd etilishini belgilangan tartibda taʼminlasin.

6. Oʻzbekiston Respublikasi Qurilish vazirligi loyiha-smeta hujjatlari kelishish uchun taqdim etilgan sanadan boshlab ikki hafta muddatda uning davlat ekspertizasini, shuningdek, loyihani amalga oshirish doirasida qurilish-montaj ishlarining sifatli bajarilishi ustidan tegishli davlat arxitektura-qurilish nazoratini taʼminlasin.

7. Loyihani amalga oshirish doirasida:

a) “Oʻzbekximmash zavodi” AJ:

Oʻzbekiston Respublikasida ishlab chiqarilmaydigan, belgilangan tartibda shakllantiriladigan roʻyxatlar boʻyicha chetdan olib kelinadigan qurilish materiallari, uskunalar, texnologik jihozlar va ularning ehtiyot qismlari, shuningdek, butlovchi buyumlar 2019-yilning 1-dekabriga qadar muddatda bojxona toʻlovlari (bojxona rasmiylashtiruvi uchun yigʻimlardan tashqari) toʻlashdan;

Oʻzbekiston Respublikasining norezidentlari tomonidan bajariladigan ishlar (xizmatlar) boʻyicha qoʻshilgan qiymat soligʻi toʻlashdan;

b) yuridik shaxslar — Oʻzbekiston Respublikasining norezidentlari — Oʻzbekiston Respublikasida doimiy muassasa orqali ham, toʻlov manbaidan ham olingan daromadlar boʻyicha foyda soligʻi toʻlashdan;

v) xorijiy jismoniy shaxslar — Oʻzbekiston Respublikasining norezidentlari — loyihani amalga oshirish doirasida olingan jismoniy shaxslarning daromad soligʻi toʻlashdan ozod qilinsin.

8. Oʻzbekiston Respublikasi Iqtisodiyot vazirligi qora metallar chiqindilari, temir-tersaklarni tayyorlash va foydalanish balansini ishlab chiqishda “Oʻzneftgazmash” AJ korxonalarining ishlab chiqarish va xoʻjalik faoliyati jarayonida hosil boʻladigan qora metall chiqindilari va temir-tersaklardan “Oʻzbekximmash zavodi” AJning oʻz ehtiyojlari uchun toʻla hajmda foydalanishini nazarda tutsin.

9. Oʻzbekiston Respublikasi Tashqi ishlar vazirligi “Oʻzbekneftgaz” AJning buyurtmanomalariga binoan, loyihani amalga oshirishda ishtirok etayotgan xorijiy mutaxassislarga kirish vizalari konsullik va boshqa yigʻimlar undirilmagan holda rasmiylashtirilishini belgilangan tartibda taʼminlasin.

10. Oʻzbekiston Respublikasi Ichki ishlar vazirligi “Oʻzbekneftgaz” AJning buyurtmanomalariga binoan, loyihani amalga oshirishda qatnashayotgan xorijiy mutaxassislarga koʻp martalik vizalar berilishi va muddati uzaytirilishini, shuningdek, ularning vaqtinchalik yashash joyida vaqtincha roʻyxatga olinishi va uning muddati uzaytirilishini belgilangan tartibda davlat boji undirmasdan taʼminlasin.

11. Oʻzbekiston Respublikasi Bandlik va mehnat munosabatlari vazirligi “Oʻzbekneftgaz” AJning buyurtmanomalariga binoan, loyihani amalga oshirishda qatnashuvchi yuqori malakali xorijiy mutaxassislarni Oʻzbekiston Respublikasiga jalb etishga ruxsatnomalar berilishi (muddati uzaytirilishi)ni, shuningdek, mazkur xorijiy fuqarolarga Oʻzbekiston Respublikasi hududida mehnat faoliyati bilan shugʻullanish huquqiga tasdiqnomalar berilishini (muddati uzaytirilishini) belgilangan tartibda taʼminlasin.

12. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosari A.S. Sultonov va “Oʻzbekneftgaz” AJ boshqaruvi raisi vazifasini bajaruvchisi B.B. Ashrafxonov zimmasiga yuklansin.