Oʻzbekiston Respublikasi Prezidentining “2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha harakatlar strategiyasini “Ilm, maʼrifat va raqamli iqtisodiyotni rivojlantirish yili”da amalga oshirishga oid davlat dasturi toʻgʻrisida” 2020-yil 2-martdagi PF-5953-son Farmoniga muvofiq, shuningdek, xotin-qizlarning oliy taʼlim muassasalarida tahsil olishi uchun yanada keng imkoniyatlar yaratish maqsadida Vazirlar Mahkamasi qaror qiladi:

1. Quyidagilarni nazarda tutuvchi Oliy taʼlim muassasalariga xotin-qizlarni qoʻshimcha davlat granti asosida qabul qilish koʻrsatkichlari doirasida tanlovda ishtirok etish uchun tavsiyanoma berish va oʻqishga qabul qilishni tashkil etish tartibi toʻgʻrisidagi nizom ilovaga muvofiq tasdiqlansin:

oliy taʼlim muassasalariga xotin-qizlarni qoʻshimcha davlat granti asosida qabul qilish koʻrsatkichlari doirasida tanlovda ishtirok etish uchun tavsiyanoma berish;

oliy maʼlumot olish istagida boʻlgan iqtidorli xotin-qizlarning tanlovda ishtirok etishi uchun tavsiyanoma olishga qoʻyilayotgan mezonlarni belgilash;

qoʻshimcha davlat granti asosida tanlovda ishtirok etish mumkin boʻlgan taʼlim yoʻnalishlari boʻyicha takliflarni ishlab chiqish tartibi;

respublika oliy taʼlim muassasalariga ajratilgan qoʻshimcha qabul koʻrsatkichlari doirasida tanlovda ishtirok etish uchun tavsiyanoma oluvchi talabgorlarni tanlash boʻyicha ishchi guruh faoliyatini tashkil etish va ijtimoiy mezonlar boʻyicha koʻrib chiqish.

2. Vazirlar Mahkamasining 2017-yil 20-iyundagi 393-son qarori (Oʻzbekiston Respublikasi QT, 2017-y., 6-son, 108-modda) bilan tasdiqlangan Oliy taʼlim muassasalarining bakalavriatiga talabalarni oʻqishga qabul qilish tartibi toʻgʻrisidagi nizomga quyidagi mazmundagi 10⁹-band qoʻshilsin:

“10⁹. Respublika oliy taʼlim muassasalariga umumiy belgilangan davlat granti asosidagi qabul koʻrsatkichlariga nisbatan xotin-qizlar uchun qoʻshimcha davlat granti asosida qabul koʻrsatkichlari ajratiladi.

Davlat granti asosidagi qoʻshimcha qabul koʻrsatkichlari boʻyicha talabalikka Oʻzbekiston Respublikasi Mahalla va oilani qoʻllab-quvvatlash vazirligining belgilangan shakldagi tavsiyanomalariga ega boʻlgan abituriyentlar test sinovlari natijalariga muvofiq qabul qilinadi”.

3. Oʻzbekiston Respublikasi Oliy va oʻrta maxsus taʼlim vazirligi, Mahalla va oilani qoʻllab-quvvatlash vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy masalalar boʻyicha oʻrinbosari B.A. Musayev, Oʻzbekiston Respublikasi mahalla va oilani qoʻllab-quvvatlash vaziri R.T. Mamatov va oliy va oʻrta maxsus taʼlim vaziri I.U. Madjidov zimmasiga yuklansin.

1. Ushbu Nizom oliy taʼlim muassasalariga qoʻshimcha davlat granti asosidagi qabul koʻrsatkichlari doirasida xotin-qizlarga tanlovda ishtirok etish uchun tavsiyanoma berish va ularni oʻqishga qabul qilishni tashkil etish tartibini belgilaydi.

2. Respublika oliy taʼlim muassasalariga ajratilgan qoʻshimcha davlat granti asosidagi qabul koʻrsatkichlari doirasida oliy maʼlumot olish istagida boʻlgan iqtidorli xotin-qizlarning tanlovda ishtirok etishi uchun tavsiyanoma quyidagi mezonlardan biri asosida beriladi:

kam taʼminlangan oiladan chiqqan xotin-qizlar;

toʻliqsiz oilada tarbiyalanayotgan, yaʼni ota yoki onasi vafot etgan xotin-qizlar;

14 yoshgacha boʻlgan ikki va undan ortiq farzandlarni tarbiyalayotgan, boshqa qarindoshlaridan alohida yashayotgan yolgʻiz ayol (erkak)larning qizlari;

shaxsiy uy-joyga ega boʻlmagan, ijarada yashayotgan oilalar;

ota-onalardan biri yoki har ikkisi ishsiz boʻlgan va ish qidiruvchi shaxs sifatida aholi bandligiga koʻmaklashish markazlarida hisobda turganlar;

nogironligi boʻlgan farzandi bor oilalardan chiqqan xotin-qizlar;

oliy maʼlumotli xotin-qizlar bilan qamrab olish darajasi respublikaning oʻrtacha koʻrsatkichlaridan ikki yoki undan ortiq marotaba past boʻlgan tumanlar, shuningdek, olis va borish qiyin hududlarda yashovchi oilalardagi qiz farzandlar (ularni oʻz hududida 3 yil ishlash sharti bilan).

3. Xotin-qizlarning respublika oliy taʼlim muassasalariga ajratilgan qoʻshimcha davlat granti asosidagi qabul koʻrsatkichlari doirasida tanlovda ishtirok etish uchun tavsiyanoma mazkur Nizomga 1-ilovadagi shaklga muvofiq beriladi.

4. Tavsiyanoma blankalari “Davlat belgisi” davlat unitar korxonasida tayyorlangan qatʼiy hisobda turuvchi hujjat hisoblanadi, hisob seriyasi, raqami va himoyalanganlik darajasiga ega boʻladi.

5. Tavsiyanoma mazkur Nizomga 2-ilovadagi sxema boʻyicha oliy maʼlumot olish istagida boʻlgan xotin-qizlarga uch yildan koʻp boʻlmagan muddatga beriladi.

6. Tavsiyanoma ajratilgan qoʻshimcha toʻrt foizli davlat granti asosidagi qabul koʻrsatkichlari doirasida abituriyent sifatida roʻyxatdan oʻtishida tanlagan birinchi taʼlim yoʻnalishi boʻyicha tanlovda ishtirok etish huquqini beradi, ikkinchi va undan keyingi oliy taʼlim olish uchun tanlovda ishtirok etishga nisbatan tatbiq etilmaydi.

7. Respublika oliy taʼlim muassasalariga kunduzgi taʼlim shakli boʻyicha umumiy belgilangan davlat granti asosidagi qabul koʻrsatkichlariga nisbatan xotin-qizlar uchun qoʻshimcha toʻrt foizli davlat granti asosidagi qabul koʻrsatkichlari (keyingi oʻrinlarda — qoʻshimcha qabul koʻrsatkichlari) har yili Oʻzbekiston Respublikasi Prezidentining oliy taʼlim muassasalariga oʻqishga qabul qilishning davlat buyurtmasi parametrlari toʻgʻrisidagi tegishli qarori qabul qilinganidan soʻng ikki hafta muddatda Oʻzbekiston Respublikasi taʼlim muassasalariga oʻqishga qabul qilish boʻyicha davlat komissiyasi (keyingi oʻrinlarda — Davlat komissiyasi) tomonidan respublika hududlari kesimida tasdiqlanadi.

8. Qoʻshimcha qabul koʻrsatkichlari doirasida tanlovda ishtirok etuvchilar toifasiga umumiy oʻrta taʼlim (11-sinf negizida) yoki oʻrta maxsus, kasb-hunar taʼlimi muassasasini tugatganligi haqidagi hujjatga va Oʻzbekiston Respublikasi Mahalla va oilani qoʻllab-quvvatlash vazirligi tomonidan ushbu Nizomga muvofiq berilgan tavsiyanomaga ega xotin-qizlar (keyingi oʻrinlarda — tavsiyanomaga ega boʻlgan xotin-qizlar) kiradi.

9. Tavsiyanoma berish masalasini koʻrib chiqish uchun Oʻzbekiston Respublikasi Mahalla va oilani qoʻllab-quvvatlash vazirligi, Oliy va oʻrta maxsus taʼlim vazirligi, Moliya vazirligi, Iqtisodiy taraqqiyot va kambagʻallikni qisqartirish vazirligi, Xalq taʼlimi vazirligi, Maktabgacha taʼlim vazirligi, Sogʻliqni saqlash vazirligi va Oʻzbekiston yoshlar ittifoqi rahbarlarining tegishli masalalar boʻyicha oʻrinbosaridan iborat tarkibda har yili fevral oyida Xotin-qizlarga tavsiyanoma berish boʻyicha ishchi guruh (keyingi oʻrinlarda — Ishchi guruh) tuziladi.

10. Ishchi guruh aʼzolari jamoatchilik asosida ishlaydi.

11. Ishchi guruh uning vakolatlariga tegishli masalalarni Ishchi guruh rahbari boshchiligida oʻtkaziladigan yigʻilishlarda koʻrib chiqadi.

12. Ishchi guruh rahbari:

ishchi guruhning umumiy faoliyatiga rahbarlik qiladi va faoliyati ustidan doimiy nazoratini taʼminlaydi;

ishchi guruhning yigʻilishlarini chaqiradi va ularda rahbarlik qiladi;

ishchi guruh vakolatiga tegishli boʻlgan masalalarni uning yigʻilishida koʻrib chiqish uchun kiritadi;

ishchi guruh bayonlarini tasdiqlaydi.

13. Ishchi guruhning barcha yigʻilishlari bayonnoma bilan rasmiylashtiriladi.

14. Ishchi guruh ishining tashkiliy shakli yigʻilish hisoblanadi. Ishchi guruh yigʻilishlari ishchi guruh aʼzolari roʻyxatdagi tarkibining kamida uchdan ikki qismi qatnashgan taqdirda vakolatli hisoblanadi.

15. Tuman (shahar) mahalla va oilani qoʻllab-quvvatlash boʻlimlari ajratilgan qoʻshimcha qabul koʻrsatkichlari doirasida tanlovda ishtirok etish uchun tavsiyanoma olish maqsadida murojaat etgan xotin-qizlarning hujjatlarini mazkur Nizomning 2-bandi asosida har yili 10-mayga qadar Qoraqalpogʻiston Respublikasi Mahalla va oilani qoʻllab-quvvatlash vazirligi, viloyatlar va Toshkent shahar mahalla va oilani qoʻllab-quvvatlash boshqarmalariga taqdim etadi.

Qoʻshimcha qabul koʻrsatkichlari doirasida tanlovda ishtirok etishga tavsiyanoma olish maqsadida murojaat etish uchun ariza shakli Oʻzbekiston Respublikasi Mahalla va oilani qoʻllab-quvvatlash vazirligi tomonidan ishlab chiqiladi va tasdiqlanadi.

16. Qoraqalpogʻiston Respublikasi Mahalla va oilani qoʻllab-quvvatlash vazirligi, viloyatlar va Toshkent shahar mahalla va oilani qoʻllab-quvvatlash boshqarmalari qoʻshimcha qabul koʻrsatkichlari uchun tanlovda ishtirok etishga tavsiya etilgan xotin-qizlar toʻgʻrisidagi hujjatlarni har yili 20-mayga qadar Ishchi guruhga taqdim etadi.

17. Ishchi guruh qoʻshimcha qabul koʻrsatkichlari uchun tanlovda ishtirok etishga tavsiya etilgan xotin-qizlar toʻgʻrisidagi hujjatlarni mazkur Nizomning 2-bandida nazarda tutilgan mezonlarga muvofiqligini koʻrib chiqadi.

18. Ishchi guruh tomonidan qoʻshimcha qabul koʻrsatkichlari uchun tanlovda ishtirok etishga tavsiya etiladigan nomzodlardan quyidagi hujjatlar talab etiladi:

mazkur Nizomning 2-bandida koʻrsatilgan mezonlardan birini tasdiqlovchi hujjatlar (ilovasi bilan);

maʼlumotnoma-obyektivka;

umumiy oʻrta taʼlim yoki oʻrta maxsus, kasb-hunar taʼlimi muassasasidan maʼlumotnoma;

pasport yoki tugʻilganlik haqidagi guvohnoma nusxalari.

Mazkur bandda nazarda tutilmagan boshqa hujjatlarni taqdim etishni talab qilish taqiqlanadi.

19. Ishchi guruh taqdim etilgan hujjatlarni har yili 5-iyunga qadar koʻrib chiqadi.

Ishchi guruh yigʻilishining yakunlari boʻyicha bayonnoma tuziladi, ishchi guruh rahbari va aʼzolari tomonidan imzolanadi hamda Oʻzbekiston Respublikasi Mahalla va oilani qoʻllab-quvvatlash vazirligining muhri bilan tasdiqlanadi.

20. Ishchi guruh tomonidan saralab olinib, qoʻshimcha qabul koʻrsatkichlari uchun tanlovda ishtirok etishga tavsiya etilgan xotin-qizlarning roʻyxati har yili 15-iyunga qadar Oʻzbekiston Respublikasi Vazirlar Mahkamasi huzuridagi Davlat test markaziga taqdim etiladi hamda Oʻzbekiston Respublikasi Mahalla va oilani qoʻllab-quvvatlash vazirligining rasmiy veb-saytida eʼlon qilinadi.

21. Ishchi guruh qoʻshimcha qabul koʻrsatkichlari uchun tanlovda ishtirok etadigan xotin-qizlarga tavsiyanomani har yili 10-iyunga qadar Qoraqalpogʻiston Respublikasi Mahalla va oilani qoʻllab-quvvatlash vazirligi, viloyatlar va Toshkent shahar mahalla va oilani qoʻllab-quvvatlash boshqarmalariga yetkazib beradi, oʻz navbatida, hududiy boshqarmalar har yili 15-iyunga qadar tavsiyanomaning talabgorlarga yetkazilishini taʼminlaydi.

22. Tavsiyanomaga ega boʻlgan xotin-qizlar oliy taʼlim muassasasining qabul komissiyasiga taqdim etishi lozim boʻlgan hujjatlarga qoʻshimcha ravishda Oʻzbekiston Respublikasi Mahalla va oilani qoʻllab-quvvatlash vazirligi tomonidan beriladigan tavsiyanomani taqdim etishi talab etiladi.

23. Tavsiyanomaga ega boʻlgan xotin-qizlar toʻgʻrisidagi maʼlumotlar har yili 15-iyulga qadar Oʻzbekiston Respublikasi Vazirlar Mahkamasi huzuridagi Davlat test markazining (keyingi oʻrinlarda — Davlat test markazi) abituriyentlar bazasiga kiritiladi.

24. Oʻrganish natijalariga koʻra, tavsiyanomaga ega boʻlgan xotin-qizlar toifasiga kirishi tasdiqlanmagan shaxslar qoʻshimcha qabul koʻrsatkichlari doirasida oʻqishga qabul qilish boʻyicha oʻtkaziladigan kirish imtihonlariga (test sinovlari, kasbiy (ijodiy) imtihon, yozma imtihon) qoʻyilmaydi.

25. Tavsiyanomaga ega boʻlgan abituriyentlarni qoʻshimcha qabul koʻrsatkichlari doirasida oʻqishga qabul qilish kirish imtihonlari (test sinovlari, kasbiy (ijodiy) imtihon, yozma imtihon) natijalariga muvofiq qabul qilinadi.

26. Tavsiyanomaga ega boʻlgan xotin-qizlar uchun kirish imtihonlari (test sinovlari, kasbiy (ijodiy) imtihon, yozma imtihon) oliy taʼlim muassasalarining bakalavriatiga qabul qilish boʻyicha belgilangan tartibga muvofiq amalga oshiriladi.

Kirish imtihonlarida toʻplash mumkin boʻlgan eng yuqori ballning 30 foizidan kam boʻlmagan ball toʻplagan tavsiyanomaga ega boʻlgan xotin-qizlar ballar ketma-ketligiga qatʼiy rioya etilgan holda, qoʻshimcha toʻrt foizli davlat granti asosidagi qabul koʻrsatkichlari doirasida talabalikka tavsiya etiladi.

27. Qoʻshimcha qabul koʻrsatkichlari doirasida talabalikka qabul qilinmagan tavsiyanomaga ega boʻlgan xotin-qizlar toʻplagan ballari bilan abituriyent sifatida roʻyxatdan oʻtish davrida tanlagan taʼlim yoʻnalishlarida umumiy tartibda tanlovda ishtirok etadi.

28. Ushbu Nizomni qoʻllashda yuzaga keladigan nizolar qonun hujjatlarida belgilangan tartibda hal etiladi.

29. Mazkur Nizom talablari buzilishida aybdor boʻlgan shaxslar qonun hujjatlariga muvofiq javobgar boʻladi.