“Har bir oila — tadbirkor” dasturi doirasida amalga oshiriladigan loyihalarni moliyaviy resurslar bilan taʼminlash, oilaviy tadbirkorlikni rivojlantirish va aholi bandligini oshirish maqsadida:

1. Oʻzbekiston Respublikasi Iqtisodiy taraqqiyot va kambagʻallikni qisqartirish vazirligi, Moliya vazirligi va Markaziy bankining “Har bir oila — tadbirkor” dasturi doirasida Tiklanish va taraqqiyot jamgʻarmasidan (keyingi oʻrinlarda — Jamgʻarma) qoʻshimcha ravishda 100 million AQSH dollari ekvivalentidagi mablagʻlarni quyidagi vakolatli banklarga ajratish haqidagi taklifiga rozilik berilsin:

“Agrobank” ATBga — 40 million AQSH dollari ekvivalentida;

AT Xalq bankiga — 30 million AQSH dollari ekvivalentida;

“Mikrokreditbank” ATBga — 30 million AQSH dollari ekvivalentida.

2. Belgilab qoʻyilsinki, mazkur qarorga asosan qoʻshimcha mablagʻlarni ajratish Oʻzbekiston Respublikasi Prezidentining 2019-yil 24-oktabrdagi “Oilaviy tadbirkorlikni rivojlantirish davlat dasturlari doirasida amalga oshirilayotgan loyihalarni kreditlash tartibini takomillashtirishning qoʻshimcha chora-tadbirlari toʻgʻrisida”gi PQ-4498-son qarorida belgilangan tartib va shartlarda Jamgʻarma hamda vakolatli banklar oʻrtasida tuzilgan kredit shartnomalariga tegishli oʻzgartirish va qoʻshimchalar kiritish orqali amalga oshiriladi.

3. Mazkur qarorning ijrosini nazorat qilish Oʻzbekiston Respublikasi Bosh vazirining oʻrinbosari J.A. Qoʻchqorov va Oʻzbekiston Respublikasi Markaziy banki raisi M.B. Nurmuratov zimmasiga yuklansin.