Xalqaro standartlarga, energiya samarador va ekologik talablarga javob beradigan yangi kon-metallurgiya kompleksini zamonaviy uskuna va texnologiyalarni qo‘llagan holda qurish hamda “Yoshlik I” konini o‘zlashtirish orqali “Olmaliq kon-metallurgiya kombinati” aksiyadorlik jamiyatining ishlab chiqarish quvvatlarini kengaytirish maqsadida:

1. Quyidagilar:

O‘zbekiston Respublikasi Prezidentining 2017-yil 1-martdagi ““Yoshlik I” koni negizida “Olmaliq KMK” AJning ishlab chiqarish quvvatlarini kengaytirish chora-tadbirlari to‘g‘risida”gi PQ-2807-son qaroriga muvofiq “Olmaliq kon-metallurgiya kombinati” aksiyadorlik jamiyati (keyingi o‘rinlarda — “Olmaliq KMK” AJ) tomonidan rangli va qimmatbaho metallar ishlab chiqarish hajmini oshirishga qaratilgan “Yoshlik I” konini o‘zlashtirish” investitsiya loyihasi (keyingi o‘rinlarda — investitsiya loyihasi) amalga oshirilishi belgilanganligi;

investitsiya loyihasi doirasida 3-son Mis boyitish fabrikasini (keyingi o‘rinlarda — 3-MBF), fabrikada ma’danlarni boyitish jarayonida hosil bo‘ladigan qoldiqlarni saqlash obyektini, uning infratuzilma va sanitar zonalarini (keyingi o‘rinlarda — qoldiqlarni saqlash obyekti), shuningdek, 3-MBF suv va tashqi elektr ta’minoti obyektlarini (keyingi o‘rinlarda — infratuzilma obyektlari) qurish nazarda tutilganligi;

3-MBF, qoldiqlarni saqlash obyekti va infratuzilma obyektlarini qurish uchun Toshkent viloyatida umumiy maydoni 3 768,8 gektarga teng hudud zarurligi aniqlangan bo‘lib, shundan 1 616 gektari Toshkent viloyati hokimligining va 25 gektari Piskent tumani hokimligining tegishli qarorlari bilan ajratib berilganligi;

qoldiqlarni saqlash obyektini qurish uchun Piskent tumanida umumiy maydoni 1 415,8 gektar hamda infratuzilma obyektlarini qurish uchun Piskent va Ohangaron tumanlarida umumiy maydoni 712 gektarga teng hududlar ajratib berilishi zarurligi ma’lumot uchun qabul qilinsin.

2. Toshkent viloyati hokimligi:

a) bir oy muddatda:

O‘zbekiston Respublikasi Yer resurslari, geodeziya, kartografiya va davlat kadastri davlat qo‘mitasi bilan birgalikda qoldiqlarni saqlash obyekti hamda infratuzilma obyektlari hududlarining aniq chegaralarini belgilasin;

qoldiqlarni saqlash obyekti hamda infratuzilma obyektlari hududlarida joylashgan turar joy, ishlab chiqarish hamda boshqa inshootlar, qurilmalar va ekinlarni xatlovdan o‘tkazsin;

b) “Olmaliq KMK” AJ bilan birgalikda:

qoldiqlarni saqlash obyekti hamda infratuzilma obyektlarini qurish doirasida olinishi rejalashtirilayotgan yer uchastkalari mulkdorlari, egalari, foydalanuvchilari va ijarachilari bilan ochiq muloqot o‘tkazsin, shuningdek, foyda va xarajatlarni baholasin;

o‘tkazilgan xatlov va ochiq muloqot natijalariga ko‘ra, qoldiqlarni saqlash obyekti hamda infratuzilma obyektlarini qurish doirasida yer uchastkalarining olinishi munosabati bilan jismoniy va yuridik shaxslarga yetkazilgan zararlarni “Olmaliq KMK” AJ mablag‘lari hisobidan qoplash ishlarini qonunchilikda belgilangan tartibda amalga oshirsin;

v) qoldiqlarni saqlash obyekti hamda infratuzilma obyektlarini qurish doirasida yer uchastkalarining olinishi munosabati bilan jismoniy va yuridik shaxslarga yetkazilgan zararlarni qoplash masalasi hal etilgandan so‘ng, yer uchastkalarining kelishilgan tartibda olinishi va “Olmaliq KMK” AJ sanoat obyektlari qurilishi uchun ajratib berilishini ta’minlasin.

3. “Olmaliq KMK” AJning qoldiqlarni saqlash obyekti hamda infratuzilma obyektlarini qurish doirasida:

yer uchastkalari mulkdorlari, egalari, foydalanuvchilari va ijarachilarining ko‘rgan zararlarini, shuningdek, qishloq xo‘jaligi va o‘rmon xo‘jaligi ishlab chiqarishi nobudgarchiliklarining o‘rnini;

yer uchastkalari mulkdorlari, egalari, foydalanuvchilari va ijarachilarining ko‘rgan zararlarini baholash xarajatlarini;

yer uchastkalarining davlat va jamoat ehtiyojlari uchun olinishi natijasida turar joylari buzilishi nazarda tutilgan jismoniy shaxslarning yangi qurilayotgan yakka tartibdagi turarjoy va boshqa inshootlarini tegishli muhandislik-kommunikatsiya tarmoqlari bilan ta’minlash xarajatlarini “Olmaliq KMK” AJ mablag‘lari hisobidan qoplash to‘g‘risidagi takliflariga rozilik berilsin.

4. “Olmaliq KMK” AJ investitsiya loyihasini amalga oshirish doirasida qishloq xo‘jaligidan boshqa maqsadlarda foydalanishga olinadigan sug‘oriladigan yerlarni o‘zlashtirish, shuningdek, lalmi yerlar, pichanzorlar, yaylovlar holatini tubdan yaxshilash uchun talab etiladigan kompensatsiya to‘lovlaridan, istisno tariqasida, ozod qilinsin.

5. O‘zbekiston Respublikasi Ekologiya va atrof muhitni muhofaza qilish davlat qo‘mitasi loyiha hujjatlarining davlat ekologik ekspertizadan belgilangan tartibda o‘tkazilishini va loyihani amalga oshirish doirasida tabiatni muhofaza qilishga qaratilgan qonun hujjatlariga rioya etilishi yuzasidan davlat nazorati o‘rnatilishini ta’minlasin.

6. Mazkur qarorning ijrosini nazorat qilish O‘zbekiston Respublikasining Bosh vaziri A.N. Aripov zimmasiga yuklansin.