Iqtisodiyot va moliya-bank sohasidagi islohotlarni yanada chuqurlashtirish, sanoat va kooperatsiya aloqalarini kengaytirish, respublikani iqtisodiy rivojlantirishning ustuvor vazifalarini amalga oshirish ishlari samaradorligi va natijadorligini yanada yuksaltirish, aholi farovonligini taʼminlash, xususiy tadbirkorlikni qoʻllab-quvvatlash hamda kambagʻallikni qisqartirishga doir faoliyatni muvofiqlashtirish, Oʻzbekiston Respublikasi qishloq xoʻjaligini rivojlantirishning 2020 — 2030-yillarga moʻljallangan strategiyasida belgilangan islohotlarni samarali amalga oshirish, yer va suv resurslaridan oqilona foydalanishni taʼminlash, shuningdek, Oʻzbekiston Respublikasi Vazirlar Mahkamasining (keyingi oʻrinlarda — Vazirlar Mahkamasi) ijro etuvchi tuzilmasini yanada takomillashtirish maqsadida:

1. Vazirlar Mahkamasi ijro etuvchi tuzilmasida:

a) quyidagilar:

Oʻzbekiston Respublikasi Bosh vaziri oʻrinbosari — Oʻzbekiston Respublikasi moliya vaziri lavozimi;

Oʻzbekiston Respublikasi Bosh vazirining yoqilgʻi-energetika va kimyo sanoatini rivojlantirish masalalari boʻyicha maslahatchisi lavozimi;

Oʻzbekiston Respublikasi Bosh vazirining agrar va oziq-ovqat sohalarini rivojlantirish masalalari boʻyicha maslahatchisi lavozimi;

Oʻzbekiston Respublikasi Bosh vaziri maslahatchisi — “Oʻzagrotexsanoatxolding” AJ boshqaruvi raisi lavozimi;

Davlat aktivlarini boshqarish, sanoatni va raqobatni rivojlantirish masalalari kotibiyati;

Yoqilgʻi-energetika va kimyo sanoatini rivojlantirish masalalari kotibiyati;

Qishloq xoʻjaligi mashinasozligini rivojlantirish masalalari kotibiyati;

Xotin-qizlar va oilani qoʻllab-quvvatlash, FHDY organlari bilan ishlash masalalari kotibiyati tugatilsin;

b) quyidagilar:

Oʻzbekiston Respublikasi Bosh vazirining moliya-iqtisodiyot va kambagʻallikni qisqartirish masalalari boʻyicha oʻrinbosari — iqtisodiyot va sanoat vaziri;

Oʻzbekiston Respublikasi Bosh vazirining agrar va oziq-ovqat sohalarini rivojlantirish masalalari boʻyicha oʻrinbosari;

Oʻzbekiston Respublikasi Bosh vazirining sanoatni va kooperatsiya aloqalarini rivojlantirish masalalari boʻyicha maslahatchisi lavozimlari kiritilsin;

v) quyidagilar:

Yoshlar siyosati, madaniyat, maʼnaviyat, ommaviy axborot vositalari, ijodiy va jamoat tashkilotlari masalalari kotibiyati Mahalla, oila va yoshlarni qoʻllab-quvvatlash, madaniyat, maʼnaviyat va jamoat tashkilotlari masalalari kotibiyati etib qayta tashkil qilinsin va uning tarkibida Mahalla va oilani qoʻllab-quvvatlash masalalari shuʼbasi tashkil etilsin;

Makroiqtisodiy tahlil, tarkibiy oʻzgartirishlar, moliya-bank tizimi va xususiy tadbirkorlik masalalari kotibiyati Makroiqtisodiy tahlil, tarkibiy oʻzgartirishlar, moliya-bank tizimi, davlat aktivlarini boshqarish, raqobatni rivojlantirish, tadbirkorlikni qoʻllab-quvvatlash va kambagʻallikni qisqartirish masalalari kotibiyati etib qayta tashkil qilinsin va uning tarkibida Kambagʻallikni qisqartirish va aholining daromadlarini oshirish boʻlimi tashkil etilsin;

Sanoatni va kooperatsiya aloqalarini rivojlantirish masalalari kotibiyati tashkil etilsin.

2. Belgilansinki, Vazirlar Mahkamasi ijro etuvchi tuzilmasida yangi boʻlinmalarni tashkil etish boshqaruv xodimlarining amaldagi umumiy cheklangan soni doirasida amalga oshiriladi.

3. Oʻzbekiston Respublikasi Bosh vazirining moliya-iqtisodiyot va kambagʻallikni qisqartirish masalalari boʻyicha oʻrinbosari — iqtisodiyot va sanoat vaziri zimmasiga mavjud vazifalar bilan bir qatorda quyidagi chora-tadbirlarni amalga oshirish yuklansin:

respublikada kambagʻallikka oid real ahvolni oʻrganish, xalqaro tashkilotlar, jumladan moliya institutlari bilan hamkorlikda kambagʻallikni bartaraf etishning oʻrta va uzoq muddatli strategiyalari hamda dasturlarini ishlab chiqish va amalga oshirilishini taʼminlash;

aholida, ayniqsa, yoshlar va ayollarda biznes yuritish va tadbirkorlikning zamonaviy koʻnikmalarini shakllantirish boʻyicha kompleks chora-tadbirlarni amalga oshirish, band boʻlmagan aholini kasbga oʻqitish va qayta tayyorlash tizimini isloh qilish.

4. Oʻzbekiston Respublikasi Vazirlar Mahkamasining boshqaruv xodimlari cheklangan soni 241 nafar shtat birligidan iborat boʻlgan yangilangan ijro etuvchi tuzilmasi ilovaga muvofiq tasdiqlansin.

Oʻzbekiston Respublikasining Bosh vaziriga oʻrta va uzoq muddatga moʻljallangan ustuvor vazifalarni hal qilishning muhimligi va natijadorligini hisobga olgan holda, zarurat boʻlganda, Vazirlar Mahkamasi xodimlarining umumiy shtatlari soni doirasida uning ijro etuvchi tuzilmasiga oʻzgartirishlar kiritish huquqi berilsin.

5. Viloyatlar, Toshkent shahar, tuman va shahar hokimliklarining boshqaruv apparatida hokimning iqtisodiyot va tadbirkorlik masalalari boʻyicha birinchi oʻrinbosari (Toshkent viloyati hokimligi boshqaruvi apparatida — hokimning sanoatni rivojlantirish, iqtisodiyot va tadbirkorlik masalalari boʻyicha birinchi oʻrinbosari) lavozimi hokimning moliya-iqtisodiyot va kambagʻallikni qisqartirish masalalari boʻyicha birinchi oʻrinbosari (Toshkent viloyati hokimligi boshqaruvi apparatida — hokimning sanoatni rivojlantirish, moliya-iqtisodiyot va kambagʻallikni qisqartirish masalalari boʻyicha birinchi oʻrinbosari) lavozimiga oʻzgartirilsin.

6. Oʻzbekiston Respublikasi Vazirlar Mahkamasi:

a) quyidagilarni:

bir hafta muddatda — Vazirlar Mahkamasi apparati boʻlinmalarining tuzilmalarini va yangilangan shtat jadvalini;

oʻn besh kun muddatda — Oʻzbekiston Respublikasi Bosh vazirining oʻrinbosarlari va maslahatchilarining funksional vazifalarini;

bir oy muddatda — Oʻzbekiston Respublikasi Vazirlar Mahkamasi apparatining tarkibiy boʻlinmalari toʻgʻrisidagi nizomlarni tasdiqlash haqida Hukumat qarorlarini qabul qilsin;

b) bir oy muddatda Vazirlar Mahkamasi apparatining yangidan tashkil etilgan tarkibiy boʻlinmalarini zamonaviy talablarni hisobga olgan holda, qoʻyilgan vazifalar samarali bajarilishini yuksak professional darajada taʼminlashga qodir boʻlgan malakali mutaxassislar bilan toʻldirsin.

7. Oʻzbekiston Respublikasi Prezidentining 2020-yil 22-yanvardagi PQ-4569-son “Oʻzbekiston Respublikasi Vazirlar Mahkamasining ijro etuvchi tuzilmasini takomillashtirishga doir qoʻshimcha chora-tadbirlar toʻgʻrisida”gi qarorining 3-bandi, shuningdek, qarorga 1-ilova oʻz kuchini yoʻqotgan deb hisoblansin.

8. Oʻzbekiston Respublikasi Adliya vazirligi manfaatdor vazirlik va idoralar bilan birgalikda bir oy muddatda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga belgilangan tartibda takliflar kiritsin.

9. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov va Oʻzbekiston Respublikasi Prezidenti Administratsiyasi rahbari Z.Sh. Nizomiddinov zimmasiga yuklansin.