Kimyo tarmogʻiga toʻgʻridan-toʻgʻri xorijiy investitsiyalarni keng jalb qilish, yuqori qoʻshilgan qiymatli murakkab va fosforli mineral oʻgʻitlar ishlab chiqarish hajmlarini yanada oshirish maqsadida hamda Oʻzbekiston Respublikasi Soliq kodeksining 75-moddasiga muvofiq:

1. Oʻzbekiston Respublikasi Vazirlar Mahkamasining “Samarqand viloyatida murakkab mineral oʻgʻitlar ishlab chiqarish kimyoviy majmuasini barpo etish” investitsiya loyihasini amalga oshirish doirasida 2023-yil 1-fevralga qadar quyidagi soliq va bojxona imtiyozlarini taqdim etish toʻgʻrisidagi taklifiga rozilik berilsin:

jalb qilinadigan Oʻzbekiston Respublikasi norezidentlari — yuridik shaxslari uchun foyda soligʻi (shu jumladan, toʻlov manbaida ushlab qolinadigan foyda soligʻi) stavkasini hamda Oʻzbekiston Respublikasi norezidenti — jismoniy shaxslar uchun jismoniy shaxslardan olinadigan daromad soligʻi stavkasini 50 foizga kamaytirish;

belgilangan tartibda shakllantiriladigan roʻyxatga muvofiq olib kiriladigan Oʻzbekiston Respublikasida ishlab chiqarilmaydigan asbob-uskunalar, maxsus texnikalar, mashina va mexanizmlar, komplekt buyumlar va uzellar, butlovchi qismlar, xom ashyo va materiallar, texnologik uskunalar, priborlar, dasturiy taʼminot, texnik hujjatlar hamda yoqilgʻi-moylash materiallarini bojxona bojidan ozod qilish hamda ushbu tovarlar uchun aksiz soligʻi stavkasini 50 foizga kamaytirish.

2. Mazkur qaror ijrosini nazorat qilish Oʻzbekiston Respublikasining Bosh vaziri A.N. Aripov zimmasiga yuklansin.