Oʻzbekiston sportchilarining 2020-yilda Tokio shahri (Yaponiya)da boʻlib oʻtadigan XXXII yozgi Olimpiya va XVI Paralimpiya oʻyinlariga, nufuzli jahon va qitʼa sport musobaqalariga puxta tayyorgarlik koʻrishi uchun zarur shart-sharoitlar yaratish, sport sohasida ilmiy-tadqiqot ishlarini tashkil qilish hamda ilgʻor texnologiyalarni sport tayyorgarlik jarayoniga keng tatbiq qilish ishlarini takomillashtirish maqsadida Vazirlar Mahkamasi qaror qiladi:

1. Oʻzbekiston Milliy olimpiya qoʻmitasi, Jismoniy tarbiya va sport vazirligi hamda Moliya vazirligining Oʻzbekiston Milliy olimpiya qoʻmitasi huzurida yuridik shaxs maqomiga ega boʻlgan Ilmiy-tadqiqot va innovatsiya markazini (keyingi oʻrinlarda Markaz deb ataladi) tashkil etish toʻgʻrisidagi taklifi maʼqullansin.

Belgilansinki, Markaz Oʻzbekiston Respublikasi sportchilarini olimpiya va paralimpiya oʻyinlarida hamda boshqa nufuzli xalqaro musobaqalarda muvaffaqiyatli ishtirok etishi uchun tayyorlashga koʻmaklashuvchi, ularning sport mahoratini oshirish va jismoniy holatini qayta tiklash ishlarini ilmiy-uslubiy va axborot-tahliliy taʼminlash hamda ilmiy-uslubiy kuzatib borish faoliyatini amalga oshiruvchi ixtisoslashtirilgan ilmiy-tadqiqot muassasasi hisoblanadi.

2. Quyidagilar Markazning asosiy vazifalari etib belgilansin:

Oʻzbekiston Respublikasi sport terma jamoalarining musobaqa va mashgʻulotlarni rejalashtirishni hisobga olgan holda sportchining individual sport jismoniy yuklamasini tekshirish va maqbullashtirish;

sportning tegishli turi boʻyicha respublika sport federatsiya (uyushma)lari sportchilarining xalqaro musobaqalarda qatnashishga psixologik tayyorgarligini, shuningdek, zarur psixologik korreksiyasini taʼminlash;

Oʻzbekiston Respublikasining sport terma jamoalari sporchilarining mashgʻulot yuklamalarini tahlil qilish, kutilayotgan sport natijalariga erishishga qaratilgan sport tayyorgarligini rejalashtirish va dasturlash;

sport terma jamoalari aʼzolarini sport musobaqalariga, xususan olimpiya oʻyinlariga tayyorgarlik koʻrish amaliyotiga mashq va musobaqalar samaradorligi hamda sportchilarda sport mahoratining oʻsishiga xizmat qiluvchi zamonaviy innovatsiya texnologiyalari va uslublarini joriy etish;

sport tayyorgarligi davomida sportchilarning funksional holatini uzluksiz monitoring qilish hamda sport musobaqalarida ishtirok etish natijalarini jamoaviy va shaxsiy jihatdan baholash tizimini yaratish boʻyicha yagona yondashuvni ishlab chiqish;

sportchilarning texnik-taktik, psixofiziologik holatini va ularning jismoniy tayyorgarligini oʻrganish, sport sohasida fundamental va amaliy tadqiqotlar olib borish;

sport sohasidagi dolzarb ilmiy muammolarga bagʻishlangan ilmiy, ilmiy-amaliy konferensiyalar, seminarlar, yigʻilishlar tashkil etish.

3. Quyidagilar Markaz faoliyatini moliyalashtirish manbalari etib belgilanishi maʼlumot uchun qabul qilinsin:

xoʻjalik faoliyatidan va shartnoma asosida koʻrsatiladigan xizmatlardan olinadigan daromadlar;

Oʻzbekiston Respublikasi Innovatsion rivojlanish vazirligi tomonidan oʻtkaziladigan tanlovlar natijalari boʻyicha ajratiladigan grantlar;

xalqaro moliya va boshqa institutlar kreditlari, xorijiy tashkilotlarning grantlari;

jismoniy va yuridik shaxslar, shu jumladan Oʻzbekiston Respublikasi norezidentlarining homiylik xayriyalari;

qonunchilik hujjatlarida taqiqlanmagan boshqa manbalar.

4. Markaz quyidagi chora-tadbirlarni moliyalashtirish uchun oʻz mablagʻlaridan foydalanish huquqiga ega ekanligi inobatga olinsin:

Markaz xodimlarining ish haqi va ularni moddiy ragʻbatlantirish, malakali xorijiy mutaxassislar va maslahatchilarni jalb etish, shu jumladan, fuqarolik-huquqiy shartnomalar asosida jalb etish, Markaz rahbariyati va xodimlarini xorijga xizmat safarlariga yuborish xarajatlarini qoplash;

Markaz xodimlarini tayyorlash, qayta tayyorlash va ularning malakasini oshirish;

zamonaviy axborot va innovatsion texnologiyalarni joriy etish, Markazning moddiy-texnik bazasini modernizatsiya qilish va mustahkamlash;

qonunchilik hujjatlariga muvofiq Markazga yuklangan vazifalarni hal etish va uning faoliyatini rivojlantirish bilan bogʻliq boshqa tadbirlarni amalga oshirish.

5. Oʻzbekiston Respublikasi Innovatsion rivojlanish vazirligi Markazning fan, texnologiya va innovatsiya orqali sportda yuksak natijalarga erishish, sportchilarning texnik-taktik, psixofiziologik holatini va ularning jismoniy tayyorgarligini oʻrganish, sport sohasida fundamental va amaliy tadqiqotlar olib borish uchun har yili davlat buyurtmasini tasdiqlashda ushbu loyihalarga ajratiladigan budjet mablagʻlari hisobidan grantlar ajratilishini nazarda tutsin.

6. Oʻzbekiston Respublikasi Davlat aktivlarini boshqarish agentligi Toshkent shahar hokimligi bilan birgalikda Markazni joylashtirish boʻyicha bir oy muddatda Vazirlar Mahkamasiga taklif kiritsin.

7. Oʻzbekiston Milliy olimpiya qoʻmitasiga mustaqil ekspertlarni jalb etish orqali ishchi guruh tuzgan holda ikki oy muddatda belgilangan tartibda:

Markaz ustavini ishlab chiqish va tasdiqlash;

Markaz tarkibida sportchilarni sport musobaqalariga tayyorlash, ularning sport mahoratini oshirish, sportchilarning tayyorgarligini (jismoniy, texnik-taktik, funksional, psixologik) oʻrganish boʻyicha ilmiy-kompleks laboratoriyalar va axborot-tahliliy boʻlimlarni nazarda tutgan holda uning tuzilmasi hamda shtatlar jadvalini tasdiqlash;

Markazni yuklangan vazifalarni bajarish uchun zarur nazariy bilim va amaliy koʻnikmalarga ega boʻlgan yuqori malakali mutaxassislar bilan toʻldirish;

Markazni xalqaro talablarga javob beradigan zamonaviy sport asbob-uskunalari va anjomlari, axborot-kommunikatsiya texnologiyalari, shuningdek, mebel va boshqa texnik vositalar bilan jihozlash tavsiya etilsin.

8. Oʻzbekiston Respublikasi Jismoniy tarbiya va sport vazirligi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — Oʻzbekiston Respublikasi Turizmni rivojlantirish davlat qoʻmitasi raisi A.A. Abduxakimov zimmasiga yuklansin.