Chorvachilik mahsulotlari etishtiruvchilarni ragʻbatlantirish, goʻsht-sut sanoatida iqtisodiy islohotlarni, xususiylashtirish va aksionerlashtirish jarayonlarini chuqurlashtirish uchun zarur shart-sharoitlar yaratish maqsadida Vazirlar Mahkamasi qaror qiladi:

1. “Oʻzgoʻshtsutsanoat” Oʻzbekiston davlat-aksionerlik uyushmasi tarkibiga kiruvchi xoʻjalik yurituvchi subyektlarning roʻyxatiga va uning ijro etuvchi apparati tarkibiga 1, 1a va 2-ilovalarga* muvofiq rozilik berilsin.

Mintaqalardagi xoʻjalik yurituvchi subyektlarning faoliyatini muvofiqlashtirish goʻshtni qayta ishlovchi bosh korxonalarga yuklansin.

2. Goʻsht-sut sanoati korxonalarini xususiylashtirish va aksionerlashtirish jarayonlarini chuqurlashtirish dasturi 3-ilovaga* muvofiq maʼqullansin.

3. Oʻzbekiston Respublikasi Davlat mulki qoʻmitasi;

aksiyalarning davlat paketini (4-ilovaga muvofiq*) aksionerlik jamiyatlarining asosiy fondlarini qayta hisoblashni hisobga olib ularning nominal qiymati boʻyicha “Oʻzgoʻshtsutsanoat” uyushmasining ustav fondini shakllantirish uchun toʻla xoʻjalik yuritishga bersin. Belgilab qoʻyilsinki, aksiyalarning uyushma ustav fondiga oʻtkazilgan ulushi uyushma tomonidan besh yil mobaynida mutanosib ulushlarda sotib olinadi;

“Oʻzgoʻshtsutsanoat” davlat uyushmasiga uning oʻz aksiyalarini emissiya prospektlari tomonidan belgilangan muddatlarda yuridik va jismoniy shaxslar, shu jumladan, chet el investorlari oʻrtasida tarqatish va sotish boʻyicha yordam koʻrsatsin. Nazarda tutilgan aksiyalarning sotilishidan tushadigan mablagʻlarning bir qismi aylanma mablagʻlarni toʻldirishga va uyushma korxonalarini texnik qayta jihozlashga yoʻnaltiriladi.

4. Oʻzbekiston Respublikasi Davlat mulki qoʻmitasi “Oʻzgoʻshtsutsanoat” uyushmasi bilan birgalikda:

“Oʻzgoʻshtsutsanoat” uyushmasi aksionerlik jamiyatlari aksiyalarini sotish prognozini 4-ilovaga* muvofiq bajarishni taʼminlasin. Shu maqsadda emissiyaning ilgari belgilangan tartibini qayta koʻrib chiqish maqsadga muvofiq deb hisoblansin va xususiylashtirishdan tushadigan mablagʻlar hisobiga yangi aksiyalar chiqarish taʼminlansin;

korxonalar va tashkilotlarni 5-ilovaga* muvofiq shaxsiy mulkka aylantirish (sotish)ni taʼminlasin.

5. “Oʻzgoʻshtsutsanoat” uyushmasining xorijiy investitsiyalar ishtirokidagi qoʻshma korxonalarni tashkil etish, yuqori samarali asbob-uskunalarni qoʻllagan holda tarmoqning qayta ishlovchi korxonalarini rekonstruksiya qilish va texnik qayta jihozlash toʻgʻrisidagi taklifi 6-ilovaga* muvofiq qabul qilinsin.

Yuqorida aytib oʻtilgan ilovaning bajarilishini taʼminlash maqsadida:

“Oʻzsanoatqurilishbank”, “Paxta-bank”ka rekonstruksiya qilish va texnika bilan qayta jihozlash uchun “Oʻzgoʻshtsutsanoat” uyushmasi korxonalariga milliy valyutada uzoq muddatli kredit ajratishni nazarda tutish;

Oʻzbekiston Respublikasi Tashqi iqtisodiy faoliyat milliy bankiga loyihalarning samaradorligini va xarajatni qoplay olishini tasdiqlovchi ekspertizalar asosida uyushma korxonalariga ishlab chiqarishni modernizatsiyalash maqsadida texnologik asbob-uskunalar sotib olish uchun xorijiy valyutada kredit ajratish;

Xorijiy investitsiyalar boʻyicha agentlikka va “Oʻzinvestloyiha” kompaniyasiga xorijiy firmalar oʻrtasida “Oʻzgoʻshtsutsanoat” uyushmasi obyektlarini rekonstruksiyalash va texnika bilan qayta jihozlash loyihalarini keng reklama qilish faoliyatini avj oldirish tavsiya etilsin.

6. 1996-yilning II yarim yilligida va 1997-yilda “Oʻzgoʻshtsutsanoat” uyushmasi tizimida chorvachilik mahsulotlari etishtirishning asosiy parametrlari 7-ilovaga* muvofiq maʼqullansin.

7. “Oʻzgoʻshtsutsanoat” uyushmasining chorvachilik xoʻjaliklarini qayta ishlovchi korxonalarini davlat tomonidan qoʻllab-quvvatlash maqsadida:

“Oʻzgoʻshtsutsanoat” uyushmasining chorvachilik xoʻjaliklari, chorva ozuqasi etishtirishni koʻpaytirish vazifalarini bajarish uchun don va boshqa dehqonchilik mahsulotlarini xoʻjaliklar ihtiyorida qoldirib, ularni davlatga sotishdan ozod qilinsin;

uyushmaning chorvachilik xoʻjaliklari yonilgʻi-moylash materiallari, mineral oʻgʻitlar, urugʻliklar va sugʻorish suvlari bilan taʼminlash sharoitlari boʻyicha paxtachilik va gʻallachilik xoʻjaliklariga tenglashtirilsin;

belgilansinki, uyushmaga shrot va sheluxa sotish preyskurant narxlar boʻyicha amalga oshiriladi. Uyushmaga chorvachilik xoʻjaliklariga, aholiga va boshqa isteʼmolchilarga shrot va sheluxani ular tomonidan uyushmaning qayta ishlovchi korxonalariga tirik mol va sut sotish hajmlariga mutanosib ravishda erkin narxlar boʻyicha sotish huquqi berilsin. Belgilansinki, shrot va sheluxani xarid qilishning preyskurant narxi bilan sotishning erkin narxi oʻrtasida paydo boʻladigan mablagʻlar farqi “Oʻzgoʻshtsutsanoat” uyushmasining aylanma mablagʻlarini toʻldirishga yoʻnaltiriladi.

Tijorat banklariga:

“Oʻzgoʻshtsutsanoat” uyushmasining zarar koʻrib ishlovchi va past rentabelli korxonalari va xoʻjaliklaridan kreditlardan foydalanganlik uchun qoʻshilgan 57,4 mln. soʻm miqdoridagi foizlarni hisobdan chiqarish va bank ssudalari boʻyicha 111,7 mln. soʻm miqdoridagi muddati oʻtkazib yuborilgan va ilgari toʻlov muddati kechiktirilgan qarzlarni toʻlashni, ularga foizlar qoʻshmasdan, 8-ilovaga* muvofiq 2000-yilgacha kechiktirish;

kontraktatsiya shartnomalariga muvofiq “Oʻzgoʻshtsutsanoat” uyushmasi korxonalariga chorva mollari va sut topshirayotgan chorvachilik, parrandachilik, dehqon (fermer) xoʻjaliklari va boshqa xoʻjaliklarga imtiyozli kreditlar berish tavsiya etilsin.

10. Moliya vazirligi “Oʻzgoʻshtsutsanoat” uyushmasi bilan birgalikda bir oy muddatda sut zavodlari tomonidan bolalar ovqati ishlab chiqarishga doir xarajatlarning bir qismi uchun pul yordami berish imkoniyati toʻgʻrisidagi taklifni koʻrib chiqsin va Vazirlar Mahkamasiga kiritsin.

11. Qoraqalpogʻiston Respublikasi Vazirlar Kengashi va viloyatlar hokimliklari chorvachilik xoʻjaliklariga ajratilgan yerlardan belgilanmagan maqsadda foydalanishga, yerlarning paxta va boshqa qishloq xoʻjaligi ekinlari uchun ajratilishiga yoʻl qoʻymasinlar.

12. Vazirlar Mahkamasining “Oʻzbekiston goʻsht va sut sanoati (“Oʻzgoʻshtsutsanoat”) davlat-aksionerlik uyushmasini boshqarishni takomillashtirish va uning faoliyatini barqarorlashtirish chora-tadbirlari toʻgʻrisida” 1996-yil 18-yanvardagi 30-son qarorining 1, 3, 4, 7 va 10-bandlari oʻz kuchini yoʻqotgan deb hisoblansin,

13. Mazkur qarorning bajarilishini nazorat qilish Bosh vazirning oʻrinbosarlari M.Z. Usmonov va V.A. Chjen zimmasiga yuklansin.