Oʻzbekiston Respublikasi Konstitutsiyaviy sudi Rais B. Mustafoyev, sudyalar B. Mirboboyev, U. Bozorov, G. Pirjanov va S. Hakimovadan iborat tarkibda, Oʻzbekiston Respublikasi Konstitutsiyasining 82-moddasi va “Oʻzbekiston Respublikasining Konstitutsiyaviy sudi toʻgʻrisida”gi Qonunning 10-moddasiga amal qilgan holda Oʻzbekiston Respublikasining Maʼmuriy javobgarlik toʻgʻrisidagi kodeksi 128-moddasi toʻrtinchi qismining oʻzbek va rus tili matnlaridagi nomuvofiqlikni bartaraf etish toʻgʻrisidagi taklifni Oliy Majlisga taqdim etish haqidagi ishni ochiq sud majlisida koʻrib chiqdi.

Ishni koʻrishga Oʻzbekiston Respublikasi Konstitutsiyaviy sudi sudyalari S. Hakimova, U. Bozorov va G. Pirjanovning Oʻzbekiston Respublikasining Maʼmuriy javobgarlik toʻgʻrisidagi kodeksi 128-moddasi toʻrtinchi qismining oʻzbek va rus tilidagi matnlarini bir-biriga muvofiqlashtirish zarurligi xususida “Oʻzbekiston Respublikasining Konstitutsiyaviy sudi toʻgʻrisida”gi Qonunning 19-moddasiga muvofiq koʻrsatgan tashabbusi asos boʻldi.

Maʼruzachi-sudya S. Hakimovaning axborotini, Konstitutsiyaviy sud Raisi B. Mustafoyev, sudyalar B. Mirboboyev, U. Bozorov, G. Pirjanovning fikrlarini eshitib, Oʻzbekiston Respublikasi Konstitutsiyaviy sudi quyidagilarni aniqladi:

Oʻzbekiston Respublikasining Maʼmuriy javobgarlik toʻgʻrisidagi Kodeksi 128-moddasi toʻrtinchi qismining oʻzbek tilidagi matnida bir yil mobaynida ushbu moddaning birinchi qismida nazarda tutilgan huquqbuzarliklardan toʻrttasini va undan koʻprogʻini sodir etish — eng kam ish haqining uch baravari miqdorida jarima solishga yoki transport vositasini boshqarish huquqidan olti oygacha muddatga mahrum etishga sabab boʻlishi belgilangan.

128-modda toʻrtinchi qismining rus tilidagi matnida esa bir yil mobaynida ushbu moddaning birinchi qismida nazarda tutilgan huquqbuzarliklardan toʻrttasini va undan koʻprogʻini sodir etish — eng kam ish haqining uch baravari miqdorida jarima solishga yoki transport vositasini boshqarish huquqidan olti oy muddatga mahrum etishga sabab boʻladi, deyilgan.

Oʻzbekiston Respublikasining Maʼmuriy javobgarlik toʻgʻrisidagi kodeksi 128-moddasi toʻrtinchi qismining jazo choralari bir xil huquqbuzarlik uchun oʻrnatilgan boʻlib, oʻzbek va rus tilidagi matnlari bir-biriga nomuvofiq boʻlib qolgan.

Yuqorida bayon qilinganlarga asoslanib va “Oʻzbekiston Respublikasining Konstitutsiyaviy sudi toʻgʻrisida”gi Qonunning 25 va 26-moddalariga amal qilgan holda, Konstitutsiyaviy sud qaror qildi:

Oʻzbekiston Respublikasining Maʼmuriy javobgarlik toʻgʻrisidagi kodeksi 128-moddasi toʻrtinchi qismining oʻzbek va rus tili matnlaridagi nomuvofiqlikni bartaraf etish toʻgʻrisidagi taklif qonunchilik tashabbusi tartibida Oʻzbekiston Respublikasi Oliy Majlisiga taqdim etilsin.