Soʻnggi oʻn yil davomida boshqaruv usullarining eskirishi oqibatida Buxoro viloyati iqtisodiyotida hududni ijtimoiy-iqtisodiy rivojlantirish va aholi hayot darajasini oshirish uchun mineral-xom ashyo va mehnat resurslarini, tadbirkorlik qobiliyati, aholining yuqori bilim darajasi va mehnat malakasini, tabiiy-iqlim sharoitlari hamda noyob tarixiy merosni oʻz ichiga olgan mavjud boy resurs salohiyatidan toʻliq foydalanish imkonini bermaydigan barqaror nomutanosibliklar yuzaga keldi.

2018-2019-yillarda mamlakatda amalga oshirilayotgan ijtimoiy-iqtisodiy tub oʻzgarishlar doirasida Buxoro viloyatida qiymati 1,5 trillion soʻmlik investitsiyalar oʻzlashtirilishi hisobidan 235 ta yangi korxona ishga tushirildi. Yiliga 8 milliard kub metr gazni qayta ishlash quvvatiga ega boʻlgan Qandim gazni qayta ishlash zavodi qurilishi yakunlandi, “Obod qishloq” va “Obod mahalla” dasturlari doirasida 22 ta qishloq va 4 ta mahallani obodonlashtirish orqali 90 ming nafardan ziyod aholining uy-joy sharoiti yaxshilandi, 65 ta tibbiyot muassasasi, 80 ta umumtaʼlim maktabi, 106 ta maktabgacha taʼlim muassasasi, uzunligi 1 806,3 kilometr ichimlik suv quvurlari va 727 kilometr avtomobil yoʻllari qurildi hamda rekonstruksiya qilindi.

Shu bilan birga, mamlakat aholisi umumiy sonining 6 foizini Buxoro viloyati aholisi tashkil etishiga qaramasdan, hududning respublika sanoat ishlab chiqarishidagi ulushi atigi 3,7 foizni tashkil qiladi. Yalpi hududiy mahsulotning atigi besh qismi sanoat ishlab chiqarishi sohasida shakllanadi, undagi xorijiy investitsiyalar ulushi esa 8 foizni tashkil etadi.

Mamlakat umumiy eksport hajmida hududiy eksport ulushi bor-yoʻgʻi 2,2 foizni tashkil qiladi. Respublika boʻyicha eksport hajmi aholi jon boshiga 433 AQSh dollarini tashkil etsada, viloyatda bu koʻrsatkich 86 dollarga teng. Viloyat infratuzilmani, birinchi navbatda, aholini toza ichimlik suv bilan taʼminlashni yaxshilash, kanalizatsiya, elektr energiyasi tarmoqlari va avtomobil yoʻllarini rivojlantirishga keskin ehtiyoj sezmoqda.

7,3 ming gektardan ortiq yer qishloq xoʻjaligida foydalanishdan chiqarilgan, sugʻoriladigan yerlarning 83 foizidan faqat ikki turdagi mahsulot — fermer xoʻjaliklari uchun zarur darajadagi hosildorlik va rentabellikni taʼminlay olmaydigan paxta va gʻalla yetishtirish uchun foydalanilmoqda.

Ijtimoiy-iqtisodiy rivojlantirish, boshqaruv, resurs va investitsiya salohiyatini hududning ustuvor sohalariga yoʻnaltirishni nazarda tutuvchi rivojlanishning yangi strategiyasini ishlab chiqish kabi hudud oldida turgan vazifalarni hal etish maqsadida Vazirlar Mahkamasi qaror qiladi:

1. Quyidagilar 2019 — 2023-yillarda Buxoro viloyatini ijtimoiy-iqtisodiy rivojlantirishning asosiy ustuvor yoʻnalishlari etib belgilansin:

a) sanoat salohiyatini quyidagilar hisobidan rivojlantirish va 2023-yilda uning oʻsishini 3 baravarga oshirish:

qoʻshilgan qiymatlarning oʻzaro bogʻliq zanjirini yaratish orqali barcha turdagi qishloq xoʻjaligi, qurilish va turli mineral xom ashyoni chuqur qayta ishlash, xususan, zamonaviy texnologiyalar, shu jumladan xorijiy sheriklarning mablagʻlari va texnologiyalaridan foydalangan holda tayyor mahsulot ishlab chiqarish;

qoʻshilgan qiymatlar zanjirini rivojlantirishning innovatsion, texnologik va logistik samaradorligini taʼminlaydigan hududiy, tarmoq va tarmoqlararo resurs-sanoat klasterlarini tashkil qilish;

viloyatning barcha paxtachilik kompleksini yuqori sifatli paxta xom ashyosi yetishtirishdan eksportbop tayyor toʻqimachilik mahsulotlari ishlab chiqarishgacha boʻlgan butun jarayonning texnologik bogʻliqligini taʼminlaydigan ishlab chiqarishni tashkil etishning klaster shakliga bosqichma-bosqich oʻtkazish;

qishloq xoʻjaligi xom ashyosini, jumladan, qorakoʻl teri, moʻyna, charm, goʻsht va sut, baliq mahsulotlari, meva-sabzavot xom ashyosi va texnik ekinlarni chuqur qayta ishlash boʻyicha yoʻqotilgan ishlab chiqarishlarni qayta tiklash, yangilarini tashkil qilish va faoliyat koʻrsatayotgan ishlab chiqarishni kengaytirish;

kichik sanoat zonalari korxonalarini har bir tuman va shaharda, shuningdek, “Gʻijduvon” erkin iqtisodiy zonasida (keyingi oʻrinlarda EIZ deb ataladi) tashkil etilayotgan kichik sanoat zonalarida hududiy joylashtirish orqali samarali rivojlantirishni taʼminlash;

neft va gaz sohasida yirik loyihalarni amalga oshirish, shu jumladan qish mavsumida aholini tabiiy gaz bilan barqaror taʼminlash va uni eksportga yetkazib berish, shuningdek, MTO texnologiyasi asosida gaz xom ashyosini chuqur qayta ishlash hamda yakuniy mahsulotlar — polistirol, polietilentereftalat, sintetik kauchuklar, spandeks, poliuretan, akrilonital-butadiyen-stirol va boshqa polimer mahsulotlar ishlab chiqarish uchun “Gazli” yer osti gazni saqlash omborini kengaytirish;

b) agrar sektorni quyidagilar hisobidan jadallashtirish va diversifikatsiya qilish, har bir gektardan olinadigan mahsulotni ayni vaqtdagi 1,2 ming AQSh dollaridan 6 ming AQSh dollarigacha koʻpaytirish:

yiliga 2-3-marta hosil olish, paxtachilik va gʻallachilikda hosildorlikni kamida 1,3 baravarga, meva-sabzavotchilikda 1,5 — 2 baravarga, chorvachilikda mahsuldorlikni 1,2-1,3 baravarga oshirishni va ishlab chiqariladigan mahsulotlarning yuqori sifatini hamda narxlari raqobatbardoshligini taʼminlaydigan qishloq xoʻjaligi ishlab chiqarishini yuritishning ilgʻor usullarini joriy qilish;

faoliyat koʻrsatayotgan tarmoqlarni rivojlantirish, limonlar, yongʻoqning turli navlarini yetishtirish, ipakchilik va baliqchilik, moʻynali hayvonlarni koʻpaytirish kabi yangi tarmoqlar hamda kichik tarmoqlarni tashkil qilgan holda qishloq xoʻjaligini diversifikatsiya qilish;

avval foydalanishdan chiqarilgan 7,3 ming gektar yerni qishloq xoʻjaligi oborotiga bosqichma-bosqich kiritish va 17,3 ming gektar yangi yerlarni oʻzlashtirish, shuningdek, 50 ming gektar yerda tuproqni qayta ishlash va sugʻorish, qishloq xoʻjaligi ekinlarini optimal joylashtirishning zamonaviy usullarini joriy etish;

davlat tomonidan qoʻllab-quvvatlashning hamda Oʻzbekiston fermer, dehqon xoʻjaliklari va tomorqa yer egalari kengashi tomonidan koʻmaklashishning yangi mexanizmlarini joriy qilish orqali fuqarolarning shaxsiy yordamchi xoʻjaliklari yerlaridan samarali foydalanish;

v) ishlab chiqarish infratuzilmasini, jumladan, xizmat koʻrsatadigan korxonalar tashkil etilguniga qadar shakllantiriladigan suv taʼminoti, kanalizatsiya, elektr energiya taʼminoti va avtomobil yoʻllari tizimlarini quyidagilar hisobidan jadal rivojlantirish:

kichik sanoat zonalarida, “Gʻijduvon” EIZ va “Buxoro agro” erkin iqtisodiy zonasida (keyingi oʻrinlarda “Buxoro agro” EIZ deb ataladi), infratuzilmani tashkil etish xarajatlarni kamaytiradigan sanoat va industrial-agrar ishlab chiqarishlarni joylashtirish;

Oʻzbekiston Respublikasi Davlat budjeti va xizmat koʻrsatuvchi tashkilotlarning mablagʻlari bilan bir qatorda xalqaro moliya institutlari (keyingi oʻrinlarda XMI deb ataladi) va xorijiy hukumat moliya tashkilotlarining (keyingi oʻrinlarda XHMT deb ataladi) arzon uzoq muddatli imtiyozli kredit resurslarini jalb qilish, davlat-xususiy sheriklikni keng rivojlantirish;

g) turizmdan viloyat iqtisodiyotini rivojlantirishning muhim omili sifatida foydalanish, hududni quyidagilar hisobidan respublika turistik markaziga aylantirish:

xalqaro darajadagi mehmonxonalarni jadal rivojlantirish 2023-yilda yiliga 1 million turistlarning hududga qulay tashrif buyurishini, ularning sonini 3 — 3,5 baravarga oshirish, bir nafar turistdan olinadigan oʻrtacha foydani hozirgi 200 AQSh dollaridan 400 AQSh dollargacha koʻpaytirish, Buxoro shahri iqtisodiyotida turizm ulushini 50 foizga yetkazishni taʼminlaydigan zarur shart-sharoitlar yaratish;

xorijiy aviakompaniyalarga janubi-sharqiy Osiyo shaharlaridan toʻgʻridan-toʻgʻri parvozlarni amalga oshirishga ruxsatnomalar berish, respublikaning yirik shaharlari oʻrtasida avtomobil va temir yoʻl qatnovlarini yoʻlga qoʻyish hamda koʻpaytirish orqali Buxoro xalqaro aeroportining transport logistikasini jadal rivojlantirish;

chuqur oʻylangan ziyorat turizmi va viloyatdagi 7 ta muqaddas qadamjolarni bogʻlovchi logistik transport yoʻnalishlarini rivojlantirish;

yuqori sifatli umumiy ovqatlanish tizimini, jumladan, “halol” standarti boʻyicha joriy qilish;

d) Buxoro viloyatida quyidagilar hisobidan urbanizatsiya jarayonini jadallashtirish:

2019 — 2030-yillarda Kogon shahri, Gʻijduvon, Peshku, Qorakoʻl tumanlarini va viloyat ahamiyatidagi shahar boʻlgan Gazli shaharchasini bosqichma-bosqich rivojlantirish, jumladan:

Kogon shahrini — Kogon (Kogon shahri va Kogon tumani) hududida yuqori texnologiyali va eksportga yoʻnaltirilgan ishlab chiqarishlar, innovatsion startap-gʻoyalarni amalga oshirish, xorijiy investitsiyalarni faol jalb etishni ragʻbatlantirish va tadbirkorlik faoliyati uchun qulay shart-sharoitlarni yaratish orqali;

Gʻijduvon tumanini — “Gʻijduvon” EIZ hududlarini kengaytirish, ziyorat turizmi hamda savdo-tadbirkorlik faoliyatini rivojlantirish orqali;

Peshku tumanini — qurilish materiallari ishlab chiqarish uchun mavjud mineral-xom ashyo resurslarini chuqur qayta ishlash, shuningdek, grafitni chuqur qayta ishlash boʻyicha sanoat-qurilish klasterini tashkil etish orqali;

Qorakoʻl tumanini — taʼlim va turizmni rivojlantirish, goʻsht, sut, charm-poyabzal mahsulotlari ishlab chiqarish boʻyicha xom ashyoni qayta ishlaydigan chorvachilik klasterini tashkil etish orqali;

Gazli shaharchasini — tabiiy gazni saqlash va chuqur qayta ishlash sohasidagi loyihalarni amalga oshirish orqali;

e) viloyat aholisining bilimi va kasbiy salohiyatini talab etilgan kadrlarni tayyorlash uchun rivojlanishning barcha sohalari hamda tarmoqlarida amalga oshirilayotgan dasturlar bilan bogʻliq boʻlgan maktabgacha, maktab, oʻrta maxsus, kasb-hunar va oliy taʼlim tizimida, kadrlarni qayta tayyorlash va malakasini oshirish tizimida xalqaro miqyosdagi raqobatbardosh darajagacha oshirish.

2. Viloyatni ijtimoiy-iqtisodiy rivojlantirishning ustuvor yoʻnalishlarini belgilash doirasida quyidagilar:

2019 — 2023-yillarda Buxoro viloyatini, shuningdek, uning tumanlari va shaharlarini ijtimoiy-iqtisodiy rivojlantirishning maqsadli parametrlari 1, 1a, 1b, 1s, 1d va 1d-ilovalarga* muvofiq;

2019 — 2023-yillarda Buxoro viloyati iqtisodiy rivojlantirishning asosiy parametrlari 2-ilovaga* muvofiq;

2019 — 2023-yillarda Buxoro viloyatida amalga oshiriladigan investitsiya loyihalarining roʻyxati 3-ilovaga* muvofiq;

2019 — 2023-yillarda keyinchalik Buxoro viloyatida amalga oshirish uchun ishlab chiqiladigan istiqbolli investitsiya loyihalarining roʻyxati 3a-ilovaga* muvofiq;

2019-2020-yillarda Buxoro viloyatida toʻgʻridan-toʻgʻri xorijiy investitsiyalarni jalb qilgan holda amalga oshiriladigan investitsiya loyihalarining roʻyxati 4-ilovaga* muvofiq;

investorlarga “nol” xarid qiymatida sotiladigan, shuningdek, davlat organlariga keyinchalik samarali foydalanish uchun beriladigan Buxoro viloyatidagi boʻsh turgan davlat mulki obyektlarining roʻyxati 5-ilovaga* muvofiq;

2020 — 2022-yillarda Buxoro viloyatida amalga oshiriladigan ijtimoiy soha loyihalarining roʻyxati 6-ilovaga* muvofiq;

2019 — 2023-yillarda Buxoro viloyatida, jumladan, XMI va XHMT qarz mablagʻlari hisobidan amalga oshiriladigan infratuzilma loyihalarining roʻyxati 7-ilovaga* muvofiq;

2019 — 2023-yillarda Buxoro viloyatida turizmni yanada rivojlantirish boʻyicha kompleks chora-tadbirlar dasturi 8-ilovaga* muvofiq;

Oʻzbekiston Respublikasining xorijiy davlatlardagi elchixonalari tomonidan Buxoro viloyatini ijtimoiy-iqtisodiy rivojlantirish boʻyicha koʻmaklashish ishlari 9-ilovaga* muvofiq;

2019 — 2023-yillarda Buxoro viloyati shahar va tumanlarining eksport salohiyatini rivojlantirish prognozlari 10-ilovaga* muvofiq tasdiqlansin.

3. Quyidagilar:

a) Oʻzbekiston Respublikasi Iqtisodiyot va sanoat vazirligi, Investitsiyalar va tashqi savdo vazirligi, Moliya vazirligi, Oʻzbekiston Respublikasi Savdo-sanoat palatasi va Buxoro viloyati hokimligining:

qurilish materiallari ishlab chiqarishga ixtisoslashtirilgan sanoat zonasi — Peshku tumanida qurilish sanoati klasterini va chorvachilik mahsulotlarini sanoat usulida qayta ishlashga ixtisoslashtirilgan sanoat zonasi — Qoraqoʻl tumanida chorvachilik klasterini;

Buxoro viloyatida foydalanilmayotgan ishlab chiqarish maydonlari va davlat mulki obyektlari negizida 11-ilovaga* muvofiq roʻyxat boʻyicha kichik sanoat zonalarini (keyingi oʻrinlarda KSZ deb ataladi) tashkil etish toʻgʻrisidagi takliflariga rozilik berilsin.

Oʻzbekiston Respublikasi Uy-joy kommunal xizmat koʻrsatish vazirligi, Energetika vazirligi, Oʻzbekiston Respublikasi Transport vazirligi huzuridagi Avtomobil yoʻllari qoʻmitasi va Buxoro viloyati hokimligi tashkil etiladigan KSZlar hududidagi, shuningdek, ularning ishtirokchilari ishlab chiqarish maydonlariga tashqi yoʻl-transport hamda muhandislik-kommunikatsiya infratuzilmalari kafolatli oʻtkazilishini taʼminlasin.

5. Oʻzbekiston Respublikasi Qurilish vazirligi vakolatli organlar bilan birgalikda Buxoro shahrining bosh rejasini 2019-yil oxirigacha va Kogon shahri, Gʻijduvon, Qorakoʻl, Peshku tumanlari markazlari hamda Gazli shaharchasining bosh rejalarini 2020-yil oxirigacha Buxoro viloyatida urbanizatsiya strategiyasi bilan bogʻlagan holda tasdiqlash uchun kiritsin.

6. Osiyo infratuzilma investitsiyalari banki Buxoro viloyatining suv taʼminoti va kanalizatsiya tizimini rivojlantirish hamda modernizatsiya qilish, avtomobil yoʻllarini rekonstruksiya qilish va taʼmirlash uchun qarz mablagʻlarini jalb etish toʻgʻrisida kelishuvlarga erishilgani maʼlumot uchun qabul qilinsin.

7. Oʻzbekiston Respublikasi Uy-joy kommunal xizmat koʻrsatish vazirligi va Oʻzbekiston Respublikasi Transport vazirligi huzuridagi Avtomobil yoʻllari qoʻmitasi:

2019-yil 31-dekabrgacha boʻlgan muddatda mazkur qarorga 7-ilovada* nazarda tutilgan investitsiya loyihalarning texnik-iqtisodiy asoslarini (keyingi oʻrinlarda TIA deb ataladi) ishlab chiqilishi va tasdiqlanishini;

Oʻzbekiston Respublikasi Investitsiyalar va tashqi savdo vazirligi bilan birgalikda mazkur qaror bilan tasdiqlangan loyihalarni amalga oshirish doirasida XMI va XHMTning zarur moliyaviy mablagʻlari jalb qilinishini taʼminlasin.

Oʻzbekiston Respublikasi Investitsiyalar va tashqi savdo vazirligi Uy-joy kommunal xizmat koʻrsatish vazirligi va Oʻzbekiston Respublikasi Transport vazirligi huzuridagi Avtomobil yoʻllari qoʻmitasi bilan birgalikda mazkur qarorga 7-ilovada* nazarda tutilgan infratuzilma investitsiya loyihalarining texnik-iqtisodiy asoslarini ishlab chiqish boʻyicha guruhlarni bir oy muddatda tashkil qilsin.

8. Belgilansinki, loyihalar TIA va ishchi hujjatlarini ishlab chiqish uchun mablagʻlar:

XMI va XHMT mablagʻlari ishtirokida amalga oshiriladigan umumiy foydalanishdagi avtomobil yoʻllarini qurish, rekonstruksiya qilish va taʼmirlash boʻyicha Oʻzbekiston Respublikasining 2019 va 2020 — 2022-yillarga moʻljallangan investitsiya dasturlari doirasida umumiy foydalanishdagi avtomobil yoʻllarini qurish, rekonstruksiya qilish hamda taʼmirlash uchun nazarda tutilgan kapital qoʻyilmalar limitlari doirasida ajratiladi;

xoʻjaliklararo qishloq avtomobil yoʻllari, shaharlar, shahar posyolkalari, qishloqlar va ovullar koʻchalarini qurish, rekonstruksiya qilish hamda taʼmirlash boʻyicha Buxoro viloyatining mahalliy budjeti mablagʻlari hisobidan ajratiladi;

XMI va XHMT mablagʻlari ishtirokida amalga oshiriladigan suv taʼminoti va kanalizatsiya tizimlarini rivojlantirish hamda modernizatsiya qilish boʻyicha Oʻzbekiston Respublikasining 2019 va 2020 — 2022-yillarga moʻljallangan investitsiya dasturlari doirasida Oʻzbekiston Respublikasi Moliya vazirligi huzuridagi Suv taʼminoti va kanalizatsiya tizimlarini rivojlantirish jamgʻarmasi mablagʻlari hisobidan nazarda tutilgan kapital qoʻyilmalar limitlari doirasida ajratiladi.

9. Oʻzbekiston Respublikasi Transport vazirligi huzuridagi Avtomobil yoʻllari qoʻmitasi va Buxoro viloyati hokimligi quriladigan, rekonstruksiya qilinadigan hamda taʼmirlanadigan umumiy foydalanishdagi avtombil yoʻllari, xoʻjaliklararo qishloq avtomobil yoʻllari, shaharlar, shahar posyolkalari, qishloqlar va ovullar koʻchalarining uchastkalarini bir oy muddatda belgilangan tartibda aniqlasin.

Ushbu bandning birinchi xatboshiga muvofiq quriladigan, rekonstruksiya qilinadigan hamda taʼmirlanadigan uchastkalar roʻyxatiga haqiqiy holati foydalanish shartlariga mos keladigan, shuningdek, qayd etilgan maqsadlarga ajratilgan mablagʻlar hisobga olingan holda Oʻzbekiston Respublikasi Prezidenti va Oʻzbekiston Respublikasi Hukumatining avval tasdiqlangan qarorlariga binoan barpo etilayotgan va qurilishi tugallangan avtombil yoʻllarini kiritish qatʼiyan man etiladi.

10. Oʻzbekiston Respublikasi Suv xoʻjaligi vazirligi Investitsiyalar va tashqi savdo vazirligi, Uy-joy kommunal xizmat koʻrsatish vazirligi, Iqtisodiyot va sanoat vazirligi bilan birgalikda viloyatning shahar hamda tumanlarida sanoat, qishloq xoʻjaligi va turizmni kompleks rivojlantirishni taʼminlaydigan 2020 — 2024-yillarda Buxoro viloyatida muhandislik va suv infratuzilmasini jadal rivojlantirish dasturi loyihasini 2019-yilning 1-dekabrgacha boʻlgan muddatda Vazirlar Mahkamasiga kiritsin.

11. Buxoro viloyati hokimligi, Davlat aktivlarini boshqarish agentligi, Oʻzbekiston Respublikasi Investitsiyalar va tashqi savdo vazirligi, Iqtisodiyot va sanoat vazirligi manfaatdor vazirliklar, idoralar va tarmoq xoʻjalik birlashmalari bilan birgalikda 12-ilovada* koʻrsatilgan davlatga hamda xoʻjalik birlashmalariga tegishli boʻlgan boʻsh turgan va foydalanilmayotgan obyektlar, shuningdek, yer maydonlari xoʻjalik faoliyatiga jalb qilinishini taʼminlasin.

12. Buxoro viloyati hokimligiga:

a) vakolatli davlat organlari bilan birgalikda KSZlarni tashkil etishning barcha tashkiliy tartibotlarini ikki oylik muddatda yakuniga yetkazsin;

KSZ va EIZlarning ishlab chiqarish maydonlaridan foydalanishning samaradorligini oshirish choralarini koʻrsin;

b) Oʻzbekiston Respublikasi Qishloq xoʻjaligi vazirligi, Suv xoʻjaligi vazirligi va Innovatsion rivojlanish vazirligi bilan birgalikda boshqa yoʻnalishlar qatorida quyidagilar nazarda tutilgan 2019 — 2023-yillarda Buxoro viloyatida innovatsiyalarni joriy etish, agrar sektorni jadallashtirish va diversifikatsiya qilish dasturi loyihasini ikki oy muddatda Vazirlar Mahkamasiga kiritsin:

tuproqni lazer yordamida rejalashtirishga toʻliq oʻtish, 50 ming gektardan kam boʻlmagan maydonda tomchilatib sugʻorish tizimini joriy etish;

hosildorligi yuqori boʻlgan sifatli urugʻliklar, nihollar va koʻchatlarni joriy etish, qishloq xoʻjaligi oʻsimliklari zararkunandalari hamda hayvonlar kasalliklariga qarshi samarali kurashish;

7,3 ming gektar yerni qishloq xoʻjaligida foydalanishga qaytarish, shuningdek, yangi 17,3 ming gektar yerni oʻzlashtirish hamda qaytarilayotgan va yangi oʻzlashtirilayotgan yerlarni istiqbolli qishloq xoʻjaligi mahsulotlari ishlab chiqaruvchilariga tanlov asosida ijaraga ajratish, gektaridan kamida 4 — 7 ming AQSh dollari ekvivalentida daromad olish majburiyati bilan joylashtiriladigan qishloq xoʻjaligi ekinlarini mustaqil belgilash huquqini, shuningdek, eksport mahsulotlari ishlab chiqaruvchilariga ustuvor huquqlar berish;

v) Oʻzbekiston Respublikasi Qishloq xoʻjaligi vazirligi, “Oʻztoʻqimachiliksanoat” uyushmasi, Iqtisodiyot va sanoat vazirligi hamda Moliya vazirligi bilan birgalikda Buxoro viloyatining barcha hududlarida paxta-toʻqimachilik ishlab chiqarishlarni tashkil etishning klaster shaklini bosqichma-bosqich joriy qilish va paxta-toʻqimachilik sektorida ishlab-chiqarish zanjirini rivojlantirishning maqsadli koʻrsatkichlari toʻgʻrisidagi takliflarni uch oy muddatda Vazirlar Mahkamasiga kiritsin;

g) Oʻzbekiston fermer, dehqon xoʻjaliklari va tomorqa yer egalari kengashi va boshqa vakolatli vazirliklar hamda idoralar bilan birgalikda shaxsiy yordamchi xoʻjaliklar yerlaridan samarali foydalanishni davlat tomonidan qoʻllab-quvvatlash boʻyicha Qorovulbozor tumanida joriy qilingan tajribani 2019-2020-yillarda viloyatning barcha tumanlarida joriy etsin;

d) avtomobil yoʻllarini qurish, rekonstruksiya qilish va taʼmirlash uchun yer uchastkalarini oʻz vaqtida ajratish boʻyicha barcha zarur tadbirlar belgilangan tartibda amalga oshirilishini taʼminlasin.

13. Oʻzbekiston Respublikasi Xalq taʼlimi vazirligining Birlashgan Arab Amirliklarining ilgʻor tajribalari asosida 2020-2021-yillarda Buxoro shahrida Prezident maktabini tashkil qilish toʻgʻrisidagi takliflariga rozilik berilsin.

Oʻzbekiston Respublikasi Xalq taʼlimi vazirligi Buxoro viloyati hokimligi va Oʻzbekiston Respublikasi Moliya vazirligi bilan birgalikda Prezident maktabi 2020/2021 oʻquv yilidan boshlab faoliyat koʻrsatishni boshlashi uchun barcha zarur tashkiliy-moliyaviy tadbirlarni amalga oshirsin.

14. Belgilansinki, muhandislik-kommunikatsiya infratuzilmasidan 2 km radiusda tadbirkorlik faoliyati uchun yer uchastkalari ajratilganda, infratuzilma tarmoqlarini qurish va oʻtkazish bilan bogʻliq xarajatlar quyidagi mablagʻlar hisobidan qoplanadi:

EIZ uchun — Oʻzbekiston Respublikasi Davlat budjeti (suv va kanalizatsiya uchun) va mahalliy budjet mablagʻlari teng ulushlarda (50:50);

KSZ uchun — tegishli tuman (shahar) budjeti mablagʻlari.

2 kilometrgacha masofadagi muhandislik tarmoqlarini qurish va oʻtkazish bilan bogʻliq xarajatlar, EIZdan tashqari, loyiha tashabbuskori — tadbirkorlik subyektlari mablagʻlari hisobidan qoplanadi.

15. Buxoro viloyati hokimligi bilan birgalikda quyidagilarning masʼul ekanligi belgilab qoʻyilsin:

Oʻzbekiston Respublikasi Iqtisodiyot va sanoat vazirligi — jadal ijtimoiy, ishlab chiqarish, yoʻl va muhandislik-kommunikatsiya infratuzilmani tashkil etish loyihalarining samarali hamda oʻz vaqtida amalga oshirilishi uchun;

Oʻzbekiston Respublikasi Energetika vazirligi — MTO loyihalarining oʻz vaqtida amalga oshirilishi va nazarda tutilgan muddatlarda “Gazli” yer osti gazni saqlash omborining quvvati oshirilishi uchun;

Oʻzbekiston Respublikasi Transport vazirligi — yoʻl-kommunikatsiya infratuzilmasini tashkil qilish loyihalarining nazarda tutilgan muddatlarda samarali hamda oʻz vaqtida amalga oshirilishi uchun;

Oʻzbekiston Respublikasi Investitsiyalar va tashqi savdo vazirligi — Kogon hududida “Gʻijduvon” EIZ quvvatlarini 2023-yilgacha toʻliq ish bilan taʼminlash maqsadida yuqori texnologiyali va eksportga yoʻnaltirilgan ishlab chiqarishga xorijiy investitsiyalarni jalb qilish orqali uning faoliyati samarali etilishi uchun;

Oʻzbekiston Respublikasi Qishloq xoʻjaligi vazirligi — “Buxoro agro” EIZ hududida 3,0 ming gektar yer oʻz vaqtida oʻzlashtirilishi va ularda 2023-yilgacha issiqxona xoʻjaliklari hamda intensiv bogʻlar optimal joylashtirilishi, Buxoro viloyatida meva-sabzavot eksporti 280 mln AQSh dollarigacha yetkazilishi uchun;

“Oʻztoʻqimachiliksanoat” uyushmasi — 2020-yildan boshlab paxta tolasini va 2023-yildan boshlab ip-kalavani qayta ishlashni toʻliq oʻzlashtirish maqsadida loyihalarning oʻz vaqtida amalga oshirilishi hamda Buxoro viloyatida toʻqimachilik mahsulotlari eksporti 260 mln AQSh dollarigacha yetkazilishi uchun;

“Oʻzsanoatqurilishmateriallari” uyushmasi — Peshku tumanida qurilish materiallari ishlab chiqarish boʻyicha xom ashyo resurslari oʻzlashtirilishi va qurilish sanoati klasteri faoliyatining samarali tashkil etilishi uchun;

“Oʻzcharmsanoat” uyushmasi va “Oʻzbekoziqovqatxolding” xolding kompaniyasi — charm-poyabzal va goʻsht-sut mahsulotlari ishlab chiqarishning tugallangan jarayonlari (chorvachilik klasterlari) tashkil etilishi uchun;

Oʻzbekiston Respublikasi Turizmni rivojlantirish davlat qoʻmitasi — 2023-yilda xorijiy turistlar oqimini 1 million kishiga yetkazilishiga erishish va har bir turistdan olinadigan daromadni 400 AQSh dollarigacha yetkazish boʻyicha zarur choralar koʻrilishi uchun.

16. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — transport vaziri A.J. Ramatov, Bosh vazir oʻrinbosari E.M. Ganiyev hamda Buxoro viloyati hokimi Oʻ.I. Barnoyev zimmasiga yuklansin.