Qishloqning bozor infrastrukturasini rivojlantirish, meva-sabzavot mahsulotlarini tayyorlash va sotishning ulgurji tizimini shakllantirish, shuningdek shaxsiy tomorqalar egalarini, fermer (dehqon) xoʻjaliklarini va qishloq xoʻjaligi mahsulotlarining boshqa yetishtiruvchilarini va qishloq xoʻjaligi mahsulotlarining boshqa yetishtiruvchilarini har tomonlama qoʻllab-quvvatlash maqsadida Vazirlar Mahkamasi qaror qiladi:

1. Oʻzbekiston Respublikasi Davlat mulki qoʻmitasi, Oʻzbekbirlashuv va “Tayyorlovsavdo” hududiy savdo xarid uyushmalarining Oʻzbekbirlashuv tarkibida Meva-sabzavot mahsulotlarini ulgurji xarid qilish, sotish respublika aksionerlik kompaniyasi (“Oʻzulgurjimevasabzovot”)ni tashkil etish toʻgʻrisidagi taklifi qabul qilinsin.

2. “Oʻzulgurjimevasabzovot” respublika aksionerlik kompaniyasiga quyidagi asosiy vazifalarni bajarish yuklansin:

respublika aholisi va qayta ishlash korxonalarining meva-sabzavot mahsulotlariga boʻlgan ehtiyojlarini muntazam ravishda oʻrganib borish;

meva-sabzavot mahsulotlarini tayyorlash, sarxillash, idishlarga joylash va respublikaning qayta ishlash korxonalariga yetkazib berish, shuningdek, ularni aholiga sotish;

ulgurji idoralar bilan meva-sabzavot mahsulotlarini yetishtiruvchilar oʻrtasida fyuchers shartnoma (kontrakt)lari tuzish amaliyotini joriy etish;

xorijiy firmalar bilan tashqi iqtisodiy faoliyatni amalga oshirish, meva-sabzavot mahsulotlarini eksportga yetkazib berish.

3. “Oʻzulgurjimevasabzavot” kompaniyasining tashkiliy tuzilmasiga hamda uning tarkibiga kiradigan korxona va tashkilotlar roʻyxatiga 1 va 2-ilovalarga* muvofiq rozilik berilsin.

Belgilansinki, tuman (shahar)lar ulgurji tayyorlov — sotish boʻyicha ulgurji tuzilmalar shahobchalarida asosiy boʻgʻin hisoblanadilar.

Oʻzbekbirlashuv, “Oʻzulgurjimevasabzovot” kompaniyasi “Oʻzmevasabzavotuzumsanoat” uyushmasi meva-sabzavot mahsulotlarini tayyorlash va sotish ulgurji idoralarning moddiy-texnika bazasini mustahkamlash va yanada rivojlantirish maqsadida kompaniya tarkibiga kirgan korxona va tashkilotlarni zaruriy ravishda birlashtirishni, tugatishni yoki qayta tashkil etishni bir oy muddatida amalga oshirsinlar.

4. Oʻzbekbirlashuv, Oʻzbekiston Respublikasi Davlat mulki qoʻmitasi Qoraqalpogʻiston Respublikasi Vazirlar Kengashi va viloyatlar hokimliklari bilan birgalikda “Ulgurjimevasabzavot” meva-sabzavot mahsulotlarini xarid qilish va sotish respublika (Qoraqalpogʻiston Respublikasi) hamda viloyatlar aksionerlik birlashmalarini tashkil etishni belgilagan tartibda amalga oshirsinlar.

Belgilab qoʻyilsinki, hududiy aksionerlik birlashmalari:

tuman (shahar)larning mulkchilikning turli shakllaridagi ulgurji tayyorlov sotish korxonalarining aksiyalashtirish prinsiplari boʻyicha ixtiyoriy tartibda birlashtiradilar;

oʻz faoliyatini hududiy aksionerlik birlashmasining uning qatnashchilari umumiy majlisda tasdiqlaydigan Ustaviga muvofiq amalga oshiradilar;

oʻz faoliyati toʻgʻrisida tegishli ravishda Qoraqalpogʻiston Respublikasi Vazirlar Kengashiga va viloyatlar hokimliklariga hisob beradilar hamda “Oʻzulgurjimevasabzovot” respublika kompaniyasi tarkibiga uning taʼsischilari huquqlari bilan kiradilar.

5. Belgilansinki, “Oʻzulgurjimevasabzavot” kompaniyasining ustav jamgʻarmasi quyidagilar hisobiga topadi:

hududiy aksionerlik birlashmalarining ulush badallari — ustav jamgʻarmasining 30 foizi;

kompaniya aksiyalarini xorijiy investorlarga sotish — ustav jamgʻarmasining 30 foizi

kompaniya aksiyalarini meva-sabzavot mahsulotlarini yetishtiruvchilarga sotish — ustav jamgʻarmasining 30 foizi

aksiyalarni sotish — ustav jamgʻarmasining 10 foizi

6. “Oʻzulgurjimevasabzavot” kompaniyasi ijro etuvchi apparati tuzilmasiga 3 va 3a-ilovalarga muvofiq hamda uning xodimlari cheklangan sonining 41 kishidan iborat boʻlishiga rozilik berilsin.

“Oʻzulgurjimevasabzovot” kompaniyasi bosh direktori lavozimiga koʻra Oʻzbekbirlashuv boshqaruvi raisining oʻrinbosari hisoblanadi va Oʻzbekiston Respublikasi Vazirlar Mahkamasi tomonidan tasdiqlanadi.

“Oʻzulgurjimevasabzavot” kompaniyasiga bosh direktorning ikki nafar oʻrinbosari boʻlishi tavsiya etilsin.

7. “Oʻzulgurjimevasabzovot” respublika kompaniyasi:

ikki hafta muddatda hududiy aksionerlik birlashmalarining hamda tuman (shahar)lar ulgurji tayyorlov-sotish korxonalarining namunaviy ustavlarini ishlab chiqsin;

ushbu qarordan kelib chiqadigan oʻz faoliyatini Ustavini bir oy muddatda ishlab chiqsin va tasdiqlansin.

8. “Oʻzulgurjimevasabzavot” kompaniyasi:

meva-sabzavot mahsulotlarini doimiy topshiruvchilarga mineral oʻgʻitlar, urugʻliklar, idishbop materiallar va asbob-uskunalarni muqobil yetkazib berishni amalga oshirsin;

qishloq xoʻjaligi mahsulotlarini doimiy topshiruvchilarga Oʻzbekbirlashuv ijtimoiy infrastrukturasidan (sanatoriy-davolash muassasalari, bolalarni sogʻlomlashtirish lagyerlari va shu kabilardan) foydalanishda imtiyozli huquq bersin.

9. “Biznes fond”, “Madad” agentligi “Oʻzulgurjimevasabzavot” kompaniyasining tayyorlov sotish tashkilotlariga moddiy-texnikaviy bazani va infrastrukturani rivojlantirish, shuningdek, ularning fyuchers kontraktlari uchun kredit resurslari ajratsinlar.

10. Oʻzbekbirlashuv, “Oʻzulgurjimevasabzavot” kompaniyasi, “Oʻzmevasabzavotuzumsanoat” uyushmasi, Qishloq va suv xoʻjaligi vazirligi, davlat mulki qoʻmitasi, “Oʻzistiqbolstat” davlat qoʻmitasi, Oʻzbekiston tovar ishlab chiqaruvchilar va tadbirkorlar palatasi 1997-1998-yillarda mavjud sovuqxonalar, omborlar, meva-sabzavot bazalari va boshqa ishlab chiqarish quvvatlaridan, infrastruktura obyektlaridan eng toʻliq foydalangan holda Toshkent shahrida va boshqa yirik shaharlarda meva-sabzavot mahsulotlari ulgurji bozori shahobchalari tashkil etish yuzasidan Vazirlar Mahkamasiga bir oy muddatda takliflar kiritsinlar.

Oʻzbekiston Respublikasi Tashqi iqtisodiy faoliyat milliy banki Oʻzbekbirlashuv, Moliya vazirligi, Markaziy bank, Tashqi iqtisodiy aloqalar vazirligi va “Oʻzistiqbolstat” davlat qoʻmitasi bilan birgalikda meva-sabzavot mahsulotlari ulgurji bozorlari infrastrukturasini tashkil etish uchun, Yevropa tiklanish va taraqqiyot banki (ETTB) kichik va oʻrta biznesni rivojlantirishga ajratilgan kreditlar doirasida kredit resurslari berish toʻgʻrisidagi masalani YETTB bilan ishlab chiqsin.

11. Belgilab qoʻyilsinki, meva-sabzavot mahsulotlarini eksport qilish yuzasidan barter kontraktlari tuzish, istisno tariqasida, Vazirlar Mahkamasining “Barter asosida eksport-import operatsiyalarini qisqartirish chora-tadbirlari toʻgʻrisida” 1996-yil 13-avgustdagi 280-son qaroriga muvofiq amalga oshiriladi.

12. Oʻzbekiston Respublikasi Moliya vazirligi, Markaziy banki va tijorat banklari sobiq “Oʻztayyorlovsavdo” uyushmasining “Oʻzulgurjimevasabzavot” uyushmasining kompaniyasi tarkibiga kiruvchi korxonalari va tashkilotlarining toʻlov muddati oʻtib ketgan va ilgari ssudalarini hamda ular boʻyicha foizlarni toʻlash muddatini 2000-yilgacha kechiktirsinlar.

14. Oʻzbekiston Respublikasi Moliya vazirligi Oʻzbekbirlashuv bilan birgalikda “Oʻzulgurjimevasabzavot” kompaniyasiga aylanma mablagʻlar berishini 20 kun muddatda koʻrib chiqsin va takliflar kiritsin.

15. “Oʻzmevasabzavotuzumsanoat” uyushmasining “Oʻzagrotrans” kompaniyasi “Oʻzulgurjimevasabzavot” kompaniyasining korxona va tashkilotlarga transport xizmati koʻrsatishni shartnoma asosida amalga oshirsin.

16. “Oʻzulgurjimevasabzavot” kompaniyasining ijro etuvchi apparati Amir Temur koʻchasi 60a-uydagi binoga joylashtirilsin.

17. Vazirlar Mahkamasining 1996-yil 26-noyabrdagi 420-son qarori 4-ilovasiga eslatma oʻz kuchini yoʻqotgan deb hisoblansin.

18. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari M.Z. Usmonov zimmasiga yuklansin.