Oʻzbekiston Respublikasi Hukumati va Buyuk Lyuksemburg Gersogligi Hukumati,

Oʻzbekiston Respublikasi va Buyuk Lyuksemburg Gersogligi oʻrtasida 1997-yil 2-iyulda Lyuksemburg shahrida imzolangan ikkiyoqlama soliq solinishining oldini olish hamda daromad va sarmoya soliqlarini toʻlashdan bosh tortishni bartaraf qilish toʻgʻrisida Konvensiyaga (bundan keyingi oʻrinlarda Konvensiya deb yuritiladi) oʻzgartirishlar kiritish istagida,

quyidagilar toʻgʻrisida kelishib oldilar:

Konvensiya Muqaddimasi chiqarib tashlansin va quyidagilarga almashtirilsin:

“Oʻzbekiston Respublikasi Hukumati va Buyuk Lyuksemburg Gersogligi Hukumati,

oʻzaro iqtisodiy aloqalarni yanada rivojlantirish va soliq masalalarida hamkorlikni kengaytirish istagida,

soliqlarni toʻlashdan qochish va bosh tortish yoʻli bilan soliqqa tortilmaslik hamda soliq solinishini kamaytirish imkoniyatini (jumladan, uchinchi mamlakatlar rezidentlarining bilvosita manfaatlari uchun mazkur Konvensiya tomonidan taqdim etiladigan imtiyozlar berilishiga yoʻl ochadigan imkoniyatlarni) yaratmaslik uchun Oʻzbekiston Respublikasi va Buyuk Lyuksemburg Gersogligi oʻrtasida daromad va foyda soliqlariga nisbatan ikki yoqlama soliq solishni bartaraf qilish toʻgʻrisida Konvensiya tuzish maqsadida, quyidagilar toʻgʻrisida kelishib oldilar:”.

Konvensiyaning 25-moddasi 1-bandi (OʻZARO KELIShUV TARTIBLARI) chiqarib tashlansin va quyidagilarga almashtirilsin:

“1.Agar biror-bir shaxs Ahdlashuvchi Davlatlardan birining yoki har ikkalasining xatti-harakatlari uni mazkur Konvensiya qoidalariga muvofiq boʻlmagan tarzda soliqqa tortilishiga olib kelmoqda yoki olib keladi deb hisoblasa, u mazkur Davlatlarning ichki qonunchiligida koʻzda tutilgan huquqiy himoya vositalaridan qatʼi nazar, oʻz ishini Ahdlashuvchi Davlatlardan istalgan birining vakolatli organiga taqdim etishi mumkin. Ish Konvensiya qoidalariga muvofiq boʻlmagan tarzda soliqqa tortilishga olib kelgan harakat haqida birinchi marta xabar olingan paytdan boshlab uch yil davomida taqdim etilishi mumkin”.

Konvensiyaning 26-moddasi (AXBOROT ALMAShISh) chiqarib tashlansin va quyidagilarga almashtirilsin:

1. Ahdlashuvchi Davlatlarning vakolatli organlari mazkur Konvensiya qoidalarini amalga oshirish yoki Ahdlashuvchi Davlatlar yoki ularning mahalliy hokimiyat organlari foydasiga soliq solinishi bilan bogʻliq mazkur Konvensiyaga zid boʻlmagan tarzda undiriladigan har qanday tur va tavsifdagi soliqlarga oid milliy qonunchilikni tatbiq etish yoki uni qoʻllashga aloqador axborotni almashadilar. Axborot almashinuvi 1 va 2-moddalar bilan cheklanmaydi.

2. Ahdlashuvchi Davlat tomonidan mazkur moddaning 1-bandiga muvofiq olingan har qanday axborot ushbu Davlatning milliy qonunchiligiga muvofiq olingan axborot singari maxfiy hisoblanadi hamda faqat mazkur moddaning 1-bandida qayd etilgan soliqlarni baholash yoki undirish, majburiy undirish yoki sud taʼqibi yoki ushbu soliqlarga nisbatan daʼvolar boʻyicha qarorlar qabul qilish yoxud yuqoridagilarni nazorat qilish bilan shugʻullanuvchi shaxslar yoki organlargagina (jumladan, sudlar va maʼmuriy organlar) oshkor etilishi mumkin. Bunday shaxslar yoki organlar axborotlardan faqat koʻrsatilgan maqsadlardagina foydalanadilar. Ular bunday axborotni ochiq sud majlisida yoki sud qarorlarida oshkor etishlari mumkin. Yuqoridagilardan qatʼi nazar, Ahdlashuvchi Davlat tomonidan olingan axborot boshqa maqsadlarda foydalanilishi mumkin, basharti bunday axborot har ikkala Davlatning qonunchiligiga muvofiq boshqa maqsadlarda foydalanishga ruxsat etilgan boʻlsa hamda axborotni taqdim etuvchi Davlat vakolatli organining bunday foydalanishga roziligi mavjud boʻlsa.

3. Hech qanday holatda mazkur moddaning 1 va 2-bandlari qoidalari Ahdlashuvchi Davlatlarga quyidagi majburiyatlarni yuklaydigan tarzda talqin qilinmasligi lozim:

a) u yoki bu Ahdlashuvchi Davlatning qonunchiligi va maʼmuriy amaliyotiga zid boʻlgan maʼmuriy choralarni qoʻllash;

b) u yoki bu Ahdlashuvchi Davlatning qonunchiligiga yoki maʼmuriy amaliyotiga muvofiq olinishi mumkin boʻlmagan axborotni taqdim qilish;

c) har qanday savdo, tadbirkorlik, sanoat, tijorat yoki kasb sirini yoxud savdo jarayonini oshkor qiluvchi yoxud oshkor etilishi jamoat tartibiga (ordre public) xilof boʻlgan axborotni taqdim qilish.

4. Agar axborot Ahdlashuvchi Davlat tomonidan ushbu modda qoidalariga muvofiq soʻralgan boʻlsa, boshqa Ahdlashuvchi Davlat oʻz soliq maqsadlari uchun bunday axborotga ehtiyoj mavjud boʻlmasa ham soʻralayotgan axborotni yigʻish boʻyicha oʻzining imkoniyatlaridan foydalanishi lozim. Avvalgi jumlada nazarda tutilgan majburiyat 3-band qoidalariga muvofiq cheklanishi mumkin, biroq hech qanday holatda, bunday cheklovlar faqatgina ichki manfaatlar mavjud emasligi sababli axborot taqdim etishni rad qilish uchun Ahdlashuvchi Davlatga ijozat beradigan tarzda talqin qilinmasligi lozim.

5. 3-band qoidalari hech qanday holatda bunday axborot faqatgina bank, boshqa moliya tashkiloti, nominal saqlovchi yoxud agent yoki ishonchli boshqaruvchi sifatida ishtirok etayotgan shaxsning ixtiyorida ekanligi yoki bunday axborot biror bir shaxsning mulkiy huquqlariga taalluqli ekanligi sababli Ahdlashuvchi Davlatga axborot taqdim qilishni rad etishga ruxsat sifatida talqin qilinishi mumkin emas.”.

Quyidagi 26A-modda (SOLIQLARNI UNDIRIShDA KOʻMAKLAShISh) Konvensiyaga 26-moddadan keyin qoʻshilsin:

1. Ahdlashuvchi Davlatlar oʻzlariga tegishli soliq daʼvolarini undirishda bir-birlariga yordam koʻrsatadilar. Bunday yordam Konvensiyaning 1 -moddasi qoidalari bilan cheklanmaydi. Ahdlashuvchi Davlatlarning vakolatli organlari mazkur moddani qoʻllash tartibini oʻzaro kelishuv yoʻli bilan belgilaydilar.

2. Mazkur moddada qoʻllanilgan “soliq daʼvosi” atamasi Konvensiyada nazarda tutilgan barcha soliqlar boʻyicha toʻlanishi kerak boʻlgan har qanday summani, shuningdek shunday summa bilan bogʻliq foizlar, maʼmuriy jarimalar, yigʻish yoki undirishga ketgan xarajatlarni anglatadi.

3. Basharti Ahdlashuvchi Davlatlardan biriga taalluqli soliq daʼvosi ushbu Davlatning qonunchiligiga muvofiq undirilishi mumkin boʻlsa va ushbu Davlatning qonunchiligiga koʻra ayni shu paytda undirilishiga toʻsqinlik qila olmaydigan shaxs tomonidan toʻlanishi lozim boʻlsa, bu holda ushbu Davlatning vakolatli organlari soʻrovnomasiga binoan bunday daʼvo majburiyati ikkinchi Ahdlashuvchi Davlatning vakolatli organlari tomonidan undiruv uchun qabul qilinadi. Bunday soliq daʼvosi ikkinchi Davlat tomonidan, ayni mazkur Davlatga taalluqli soliq. daʼvosi kabi, uning oʻz soliqlarini undirishi uchun qoʻllanadigan oʻzining qonunchiligi qoidalariga muvofiq undirib olinadi.

4. Agar Ahdlashuvchi davlatlarning biriga taalluqli soliq daʼvosi uni undirish uchun ushbu Davlat qonunchiligiga muvofiq undirishni taʼminlash choralarini koʻrishni taqozo qiladigan majburiyat hisoblansa, bunday soliq daʼvosi ushbu Davlat vakolatli organlarining soʻrovnomasi bilan ikkinchi Ahdlashuvchi Davlat vakolatli organlari tomonidan taʼminot choralarini koʻrish maqsadida qabul qilinishi lozim. Mazkur ikkinchi Davlat bunday soliq daʼvolariga nisbatan, hattoki ushbu soliq daʼvosi, bunday choralarni qoʻllash paytida birinchi koʻrsatilgan Davlatda soliq talabini ijro etishning imkoni boʻlmasa yoki uni ijrosiga toʻsqinlik qilishga haqli shaxs tarafidan toʻlanishi lozim boʻlgan holatda ikkinchi Davlatga taalluqli boʻlganidek, oʻz qonunchiligi qoidalariga muvofiq daʼvoni taʼminlash choralarini koʻrishi lozim.

5. 3 va 4-bandlarning qoidalaridan qatʼi nazar, Ahdlashuvchi Davlatlardan birining qonunchiligiga muvofiq, soliq daʼvolariga nisbatan shunday daʼvoning xususiyatiga koʻra qoʻllanishi mumkin boʻlgan vaqt cheklovlari taqdim etilgan va ustuvorlik ushbu Davlat tomonidan 3 va 4-bandlarda nazarda tutilgan maqsadlar uchun qabul qilinayotgan soliq daʼvosiga nisbatan qoʻllanilmaydi. Shuningdek, Ahdlashuvchi Davlatlarning biri tomonidan 3 yoki 4-bandlarda nazarda tutilgan maqsadlar uchun qabul qilinayotgan soliq daʼvosiga nisbatan ushbu Davlatda boshqa Ahdlashuvchi Davlatning qonunchiligiga muvofiq ustuvorlikka ega emas.

6. Ahdlashuvchi davlatlarning biriga taalluqli soliq daʼvosining mavjudligi, haqiqiyligi yoki miqdorini aniqlash boʻyicha tartibotlar ikkinchi Ahdlashuvchi Davlatning sud yoxud maʼmuriy organlari muhokamasiga olib chiqilmaydi.

7. Ahdlashuvchi davlatlardan biri 3 yoki 4-bandlarga muvofiq soʻrovnoma yuborganidan soʻng ikkinchi Ahdlashuvchi Davlat tegishli soliq daʼvosi summasini undirib birinchi Ahdlashuvchi Davlatga oʻtkazguniga qadar boʻlgan hollarda, soliq daʼvosi:

a) soʻrovnoma 3-bandga muvofiq yuborilganda — birinchi aytilgan Davlatga taalluqli, ushbu Davlatning qonunchiligiga muvofiq undirilishi hamda shu paytda ushbu Davlatning qonunchiligiga koʻra uning undirilishiga toʻsqinlik qila olmaydigan shaxs tomonidan toʻlab berilishi lozim soliq daʼvosi hisoblanmay qolsa yoki;

b) soʻrovnoma 4-bandga muvofiq yuborilganda — koʻrsatilgan birinchi Davlatga taalluqli, uni undirish uchun ushbu Davlat oʻz qonunchiligiga muvofiq taʼminot choralarini koʻrishi mumkin soliq daʼvosi hisoblanmay qolsa;

bu holda birinchi Davlatning vakolatli organi bu haqda darhol ikkinchi Davlatning vakolatli organini xabardor qiladi va birinchi Davlat ikkinchi Davlatning ixtiyori boʻyicha oʻz soʻrovnomasini toʻxtatadi yoki chaqirtirib oladi.

8. Ushbu moddaning qoidalari hech bir holatda Ahdlashuvchi Davlat zimmasiga quyidagi majburiyatlarning yuklanishi sifatida talqin qilinishi mumkin emas:

a) u yoki bu Ahdlashuvchi Davlatning qonunchiligi va maʼmuriy amaliyotiga zid boʻlgan maʼmuriy choralarni koʻrish;

b) jamoat tartibiga (ordre public) zid boʻlgan choralarni koʻrish;

c) yordam koʻrsatish, basharti boshqa Ahdlashuvchi Davlat mavjud boʻlgan holat boʻyicha oʻz qonunchiligi yoki maʼmuriy amaliyotida mavjud boʻlgan undirish yoki undiruvni taʼminlashga doir barcha oqilona choralarni koʻrmagan boʻlsa;

d) koʻmaklashayotgan Davlat zimmasiga tushayotgan maʼmuriy sarf-xarajatlar undiruv natijasida ikkinchi Ahdlashuvchi Davlat olishi mumkin boʻlgan foydaga nomutanosib boʻlgan holatlarda koʻmaklashish.”.

Kuyidagi 27A-modda (IMTIYOZLAR BERILIShI) Konvensiyaning 27-moddasidan keyin qoʻshilsin:

Ushbu Konvensiyaning boshqa qoidalaridan qatʼi nazar, agar barcha tegishli faktlar va shartlarni hisobga olgan holda, har qanday kelishuv yoki bitimning asosiy maqsadlaridan biri mazkur Konvensiya doirasida imtiyoz olish boʻlib va bevosita yoki bilvosita bunday imtiyozning olinishiga olib kelgan deb xulosa qilishga asos boʻlsa, bunday daromad va foyda predmetiga nisbatan ushbu imtiyozlar taqdim qilinmaydi, basharti bunday shartlarda ushbu imtiyozlarning berilishi mazkur Konvensiya tegishli qoidalarining obyekti va maqsadiga muvofiq deb topilmasa.”.

1. Ahdlashuvchi davlatlarning har biri diplomatik kanallar orqali mazkur Bayonnomaning kuchga kirishi uchun oʻz qonunchiligida belgilangan protseduralarning bajarilgani haqida ikkinchi Davlatni xabardor qiladi.

2. Bayonnoma ushbu moddaning 1-bandida koʻrsatilgan xabarnomalarning soʻnggisi olingan sanadan boshlab kuchga kiradi. Ushbu Bayonnomaning qoidalari u kuchga kirgan yildan keyingi taqvim yilining 1-yanvari yoki undan keyin boshlanadigan soliq davrlariga nisbatan amal qiladi.

3. Ushbu Bayonnoma Konvensiyaning ajralmas qismi hisoblanadi va Konvensiyaning amal qilinishi tugatilgunga qadar oʻz kuchida qoladi.

BUNING TASDIGʻI SIFATIDA tegishli tartibda vakolatga ega boʻlgan quyida imzo chekuvchilar mazkur Bayonnomani imzoladilar.

Lyuksemburg shahrida 2017-yil 18-sentabrda ikki nusxada, har biri oʻzbek, fransuz va ingliz tillarida tuzildi, bunda barcha matnlar bir xil kuchga ega.