O‘zbekiston Respublikasi Milliy gvardiyasi kontrakt bo‘yicha harbiy xizmatchi va maxsus unvonga ega xodimlarining jamoat tartibini saqlash va qo‘riqlanadigan shaxslarning xavfsizligini ta’minlashdagi faoliyatining tezkorligi va samaradorligini oshirish, shuningdek, ularni ijtimoiy qo‘llab-quvvatlashni kengaytirish hamda Milliy gvardiyaning kontrakt bo‘yicha harbiy xizmatchilari va maxsus unvonga ega xodimlariga mamlakatda ishlab chiqarilgan yengil avtotransport vositalari sotib olish uchun imtiyozli kreditlar berilishini tashkil etishga ko‘maklashish maqsadida Vazirlar Mahkamasi qaror qiladi:

1. O‘zbekiston Respublikasi Milliy gvardiyasi (keyingi o‘rinlarda Milliy gvardiya deb ataladi), “O‘zavtosanoat” AJ va O‘zbekiston Respublikasi Tashqi iqtisodiy faoliyat milliy bankining Milliy gvardiyaning jangovar va ma’naviy-ma’rifiy tayyorgarlikda o‘rnak ko‘rsatgan kontrakt bo‘yicha harbiy xizmatchi (keyingi o‘rinlarda harbiy xizmatchi deb ataladi) va maxsus unvonga ega xodimlariga (keyingi o‘rinlarda xodimlar deb ataladi) mamlakatda ishlab chiqarilgan yengil avtotransport vositalarini (keyingi o‘rinlarda avtotransport vositalari deb ataladi) sotib olish uchun imtiyozli kreditlar berish to‘g‘risidagi takliflariga rozilik berilsin.

2. O‘zbekiston Respublikasi Tashqi iqtisodiy faoliyat milliy bankining Milliy gvardiya tomonidan beriladigan taqdimnomalarga muvofiq Milliy gvardiya harbiy xizmatchilari va xodimlariga yiliga 300 tagacha avtotransport vositalarini sotib olish uchun quyidagi shartlarda imtiyozli kreditlar ajratish to‘g‘risidagi taklifi ma’qullansin:

kredit muddati — 5 yilgacha;

dastlabki badal — sotib olinadigan avtotransport vositasi qiymatining kamida 20 foizi miqdorida;

kredit bo‘yicha foiz stavkasi — 2019-yil 31-dekabrga qadar O‘zbekiston Respublikasi Markaziy bankining kredit berish sanasida amalda bo‘lgan qayta moliyalashtirish stavkasi plyus 2 (ikki) foiz miqdorida. 2020-yil 1-yanvardan boshlab kreditlar tijorat banklari tomonidan bozor tamoyillari asosida mustaqil belgilanadigan stavkalarda beriladi;

kredit bo‘yicha ta’minot — kredit bo‘yicha sotib olinadigan avtotransport vositasini garovga qo‘yish.

Kreditning boshqa shartlari mazkur bankning kredit siyosati va amaldagi qonunchilikka asosan amalga oshiriladi.

3. “O‘zavtosanoat” AJga Milliy gvardiyaning taqdimnomalari bo‘yicha Milliy gvardiyaning avtotransport vositalarini sotib olishni xohlovchi harbiy xizmatchilari va xodimlariga banklarning kreditlari hisobiga ushbu avtotransport vositalarini sotib olishda ko‘maklashish tavsiya etilsin.

4. O‘zbekiston Respublikasi Milliy gvardiyasi:

avtotransport vositalarini sotib olish uchun imtiyozli kredit olishga tavsiya etiladigan harbiy xizmatchi va xodimlarni tanlab olish hamda taqdimnomalar berish mezonlarini ishlab chiqsin;

Milliy gvardiya harbiy xizmatchilari va xodimlari o‘rtasida kreditlarni olish shartlari va tartibi to‘g‘risida keng tushuntirish ishlari olib borilishini tashkil etsin.

5. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari — moliya vaziri D.A. Kuchkarov va Milliy gvardiya qo‘mondoni B.X. Tashmatov zimmasiga yuklansin.