Tadbirkorlikni rivojlantirishni tartibga solish va qoʻllab-quvvatlash chora-tadbirlari tizimini yanada takomillashtirish maqsadida Vazirlar Mahkamasi qaror qiladi:

1. Oʻzbekiston Respublikasi Hukumatining ilovaga muvofiq ayrim qarorlariga oʻzgartirish va qoʻshimchalar kiritilsin.

2. Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi manfaatdor vazirliklar va idoralar bilan birgalikda ular qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

3. Mazkur qarorning bajarilishini nazorat qilish Oʻzbekiston Respublikasi Bosh vazirining agrar va oziq-ovqat sohalarini rivojlantirish masalalari boʻyicha maslahatchisi A.D. Vaxabov hamda Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi raisi A.X. Abdullayev zimmasiga yuklansin.

1. Vazirlar Mahkamasining 2017-yil 27-fevraldagi 106-son qarori (Oʻzbekiston Respublikasi QT, 2017-yil, 2-son, 20-modda) bilan tasdiqlangan Koʻchmas mulkning oldi-sotdi, ayirboshlash va hadya qilish bitimlarini idoralararo elektron hamkorlikni qoʻllagan holda notarial tasdiqlash tartibi toʻgʻrisidagi nizomning 12-bandida:

toʻrtinchi xatboshi quyidagi tahrirda bayon etilsin:

“koʻchmas mulkning kadastr pasporti”;

yettinchi xatboshi quyidagi tahrirda bayon etilsin:

“agar koʻchmas mulkning qurilishi tugallanmagan boʻlsa — yer uchastkasiga hamda qurilishi tugallanmagan obyektga boʻlgan huquqni davlat roʻyxatidan oʻtkazish toʻgʻrisida koʻchmas mulk obyektlariga boʻlgan huquqlarning davlat reyestridan koʻchirma”;

quyidagi mazmundagi oʻn uchinchi xatboshi qoʻshilsin:

“Yuridik shaxslarning koʻchmas mulk bilan bogʻliq bitimlarni notarial tasdiqlash taraflarning oʻz xohishiga koʻra amalga oshiriladi hamda majburiy tusga ega emas”.

3. Vazirlar Mahkamasining 2018-yil 29-dekabrdagi 1060-son qarori (Oʻzbekiston Respublikasi QT, 2018-y., 12-son, 318-modda) bilan tasdiqlangan Koʻchmas mulk obyektlariga boʻlgan huquqlarni davlat roʻyxatidan oʻtkazish tartibi toʻgʻrisidagi nizomda:

a) 5-bandda:

toʻqqizinchi xatboshidagi “jamlanmasi” soʻzidan oldin “elektron” soʻzi qoʻshilsin;

oʻn birinchi xatboshidagi “oʻz ichiga olgan” soʻzidan keyin “elektron” soʻzi qoʻshilsin;

b) 6-bandga quyidagi mazmundagi uchinchi xatboshi qoʻshilsin:

“Koʻchmas mulk obyektlariga boʻlgan huquqlarni davlat roʻyxatidan oʻtkazish uchun qonun hujjatlarida belgilanadigan miqdorda yigʻim undiriladi”;

v) quyidagi mazmundagi 7¹-band qoʻshilsin:

“7¹. 2019-yil 1-sentabrdan boshlab Toshkent shahrida joylashgan koʻchmas mulkka, 2020-yil 1-yanvardan boshlab esa Qoraqalpogʻiston Respublikasi va viloyatlarda joylashgan koʻchmas mulkka nisbatan notarial harakatlar asosida vujudga keladigan mulk huquqi va boshqa ashyoviy huquqlar haqidagi maʼlumotlar Reyestrga faqat davlat notarial idorasi orqali taqdim etilgan talabnomaga asosan elektron shakldagi kadastr pasportini tayyorlash yakunlari boʻyicha notariuslar tomonidan axborot-kommunikatsiya texnologiyalaridan foydalangan holda (koʻchmas mulk bilan bitim tasdiqlanishidan avval) huquq egasini oʻzgartirish shaklida kiritiladi va bir vaqtning oʻzida Reyestrdan koʻchirma beriladi;

2020-yilning 1-yanvaridan boshlab qurilgan uy-joyga mulk huquqini hamda qonun asosidagi ipotekani davlat roʻyxatidan oʻtkazish uchun uy-joyni foydalanishga qabul qilib olish dalolatnomasi va boshqa zarur hujjatlar tijorat banklari tomonidan Qoraqalpogʻiston Respublikasi, viloyatlar hamda Toshkent shahar yer tuzish va koʻchmas mulk kadastri davlat korxonasining tegishli tuman (shahar) filiallariga axborot-kommunikatsiya texnologiyalaridan foydalangan holda yuboriladi;

2020-yil 1-yanvardan boshlab koʻchmas mulk obyektini “E-IJRO AUKSIO№” yagona elektron savdo maydonchasida auksion orqali sotish (davlat aktivlari qismida) va rieltorlik xizmatlari koʻrsatish natijasida vujudga keladigan unga boʻlgan huquqlarni davlat roʻyxatidan oʻtkazish uchun zarur boʻlgan maʼlumotlar tegishlicha Davlat aktivlarini boshqarish agentligi va rieltorlik tashkilotlari tomonidan davlat roʻyxatidan oʻtkazishni amalga oshiruvchi organlarga axborot-kommunikatsiya texnologiyalaridan foydalangan holda yuboriladi;

Reyestrdan koʻchirma Davlat aktivlarini boshqarish agentligi, rieltorlik tashkilotlari va tijorat banklari tomonidan mulkdorning xohishiga koʻra elektron va (yoki) qogʻoz shaklida koʻchmas mulk obyektlariga boʻlgan huquqlar va qonun asosidagi ipoteka davlat roʻyxatidan oʻtkazilganidan keyin ushbu bandda nazarda tutilgan muddatlarda beriladi.

Mulk huquqi va boshqa ashyoviy huquqlarni tashkilotlarning maʼlumotlari asosida davlat roʻyxatidan oʻtkazish uchun koʻchmas mulk obyektlariga boʻlgan huquqlarni davlat roʻyxatidan oʻtkazish haqida ariza talab etilmaydi.”;

g) 8-bandda:

birinchi xatboshidagi “7-bandida” soʻzlari “7 va 7¹-bandlarida” soʻzlari bilan almashtirilsin;

ikkinchi xatboshidagi “7-bandida” soʻzlari “7 va 7¹-bandlarida” soʻzlari bilan almashtirilsin;

d) 9-bandga quyidagi tahrirdagi uchinchi xatboshi qoʻshilsin:

“Koʻchmas mulk obyektini texnik xatlovdan oʻtkazish davlat roʻyxatidan oʻtkazuvchi organ tomonidan jismoniy yoki yuridik shaxslarning buyurtmasi asosida amalga oshiriladi. Buyurtmalar Internet tarmogʻi yoki Davlat xizmatlari markazlari (keyingi oʻrinlarda Markaz deb ataladi) orqali qabul qilinadi”;

e) 11-bandda:

birinchi xatboshi quyidagi tahrirda bayon etilsin:

“Koʻchmas mulk obyekti mulkdorlari yoxud ushbu obyekt boʻyicha ashyoviy huquqlar egalari boʻlgan yuridik va jismoniy shaxslar yoki ularning vakolatli vakillari koʻchmas mulk obyektiga boʻlgan mulk huquqi yoki boshqa ashyoviy huquqlar vujudga kelgan, boshqa shaxsga oʻtgan, cheklangan yoki bekor boʻlgan yoki koʻchmas mulk obyektining huquqiy holati oʻzgargan kundan boshlab, bir oy muddatda Nizomning 21, 22, 23, 30, 31, 38, 39, 40, 41, 42, 43-bandlarida koʻrsatilgan huquqni belgilovchi hujjatlarni ilova qilgan holda koʻchmas mulk obyektlariga boʻlgan huquqlarni davlat roʻyxatidan oʻtkazish haqida ariza bilan koʻchmas mulk joylashgan joydan qatʼiy nazar, Davlat xizmatlari markazlariga yoki Interaktiv davlat xizmatlari yagona portali orqali, garov xati rasmiylashtirilganda va ipoteka shartnomasi roʻyxatdan oʻtkazilganda esa — koʻchmas mulk obyektiga boʻlgan huquqlarni davlat roʻyxatidan oʻtkazuvchi organga murojaat qilishlari shart”;

ikkinchi xatboshi quyidagi mazmundagi jumla bilan toʻldirilsin:

“Ariza bilan birga koʻchmas mulk obyektiga boʻlgan huquqni davlat roʻyxatidan oʻtkazganlik uchun yigʻim toʻlanganligi haqida hujjat taqdim etiladi”;

yo) 12-bandga quyidagi mazmundagi ikkinchi xatboshi qoʻshilsin:

“Mazkur Nizomning 7¹-bandida koʻrsatilgan Davlat aktivlarini boshqarish agentligi, rieltorlik tashkilotlari va tijorat banklari (keyingi oʻrinlarda tashkilotlar deb ataladi) koʻchmas mulk obyektiga boʻlgan huquqlarni davlat roʻyxatidan oʻtkazish uchun zarur maʼlumotlarni axborot-kommunikatsiya texnologiyalaridan foydalangan holda koʻchmas mulk obyektiga boʻlgan huquqlarni davlat roʻyxatidan oʻtkazuvchi organga yuboradi”;

j) 13-bandga quyidagi mazmundagi yettinchi xatboshi qoʻshilsin:

“koʻchmas mulk obyekti bilan bogʻliq bitim notarial tartibda tasdiqlanmasdan taqdim etilganda, mulkdor va xaridorning shaxsini aniqlashtirish uchun qoʻshimcha maʼlumotlarni talab qilish huquqiga ega”;

z) 14-bandda:

ikkinchi xatboshidagi “Markazga” soʻzidan keyin “yoki tegishli tashkilotga” soʻzlari qoʻshilsin;

uchinchi xatboshidagi “Markaz” soʻzidan keyin “yoki tegishli tashkilot” soʻzlari qoʻshilsin;

oltinchi xatboshidagi “Markazni” soʻzidan keyin “yoki tegishli tashkilotni” soʻzlari qoʻshilsin;

i) 16-banddagi “Markazga” soʻzidan keyin “yoki tegishli tashkilotga” soʻzlari qoʻshilsin;

y) 18-bandga quyidagi mazmundagi toʻrtinchi xatboshi qoʻshilsin:

“Tashkilot koʻchmas mulk obyektiga boʻlgan huquqning davlat roʻyxatidan oʻtkazilganligi haqida xabarnomani olgandan soʻng yuridik va jismoniy shaxslarga koʻchirmani mulkdorning xohishiga koʻra elektron va (yoki) qogʻoz shaklida beradi;

k) 35-bandda:

ikkinchi xatboshidagi “noturarjoy” soʻzi chiqarib tashlansin;

oltinchi xatboshidagi “uchastkalarida” soʻzidan keyin, “, shuningdek oʻzboshimchalik bilan egallangan yer uchastkasida” soʻzlari qoʻshilsin;

l) 39-bandda:

toʻrtinchi xatboshidagi “2019-yil 1-yanvargacha tuzilgan” soʻzlari chiqarib tashlansin;

oltinchi xatboshidagi “notarial tartibda tasdiqlangan” soʻzi chiqarib tashlansin;

oʻn ikkinchi xatboshidagi “notarial tartibda tasdiqlangan” soʻzi chiqarib tashlansin;

oʻn uchinchi xatboshidagi “notarial tartibda tasdiqlangan” soʻzi chiqarib tashlansin;

m) 55-bandga quyidagi mazmundagi uchinchi xatboshi qoʻshilsin:

“2020-yil 1-yanvardan boshlab, qarz oluvchining qurilgan uy-joyga mulk huquqini hamda qonun asosidagi ipotekani davlat roʻyxatidan oʻtkazuvchi organlarda davlat roʻyxatidan oʻtkazishni taʼminlash, shuningdek, uy-joyga boʻlgan roʻyxatdan oʻtkazilgan mulk huquqi haqidagi hujjatning va kredit shartnomasining nusxalarini qonun asosidagi ipoteka davlat roʻyxatidan oʻtkazilganligi haqida shtamp bosilgan holda bankka taqdim etish majburiyati bekor qilinadi”;

n) 3-ilovada:

“Tadbirlar” ustunidagi “1-bosqich” pozitsiyasi quyidagi tahrirda bayon etilsin:

“1. Davlat xizmatlari markaziga yoki Interaktiv davlat xizmatlari yagona portaliga koʻchmas mulk obyektiga boʻlgan huquqlarni davlat roʻyxatidan oʻtkazish uchun huquqni belgilovchi hujjatlarni ilova qilgan holda buyurtmanoma beradi.

2. Koʻchmas mulk bilan bogʻliq bitimlarni tasdiqlashda, koʻchmas mulkning bir qismiga boʻlgan huquqlar yuzaga kelishi, cheklanishi (saqlash) va bekor qilinishi hollaridan tashqari — davlat notarial idoralariga, koʻchmas mulk obyektlari (davlat aktivlari qismida) “E-IJRO AUKSIO№” yagona elektron savdo maydonchasida auksion orqali sotilganda — Davlat aktivlarini boshqarish agentligiga, noturar koʻchmas mulk obyektlari bilan bitimlarda — rieltorlik tashkilotlariga, qurilishi tugallangan uy-joyni rasmiylashtirishda — tijorat banklariga (keyingi oʻrinlarda tashkilotlar deb ataladi) murojaat qiladi.

3. Roʻyxatga olish uchun yigʻim toʻlaydi”;

“2-bosqich”, “4-bosqich”, “6-bosqich” va “8-bosqich” pozitsiyalari “Masʼul shaxslar” ustunidagi “Davlat xizmatlari markazi” soʻzlaridan keyin “tashkilot” soʻzi qoʻshilsin.

“3-bosqich”, “5-bosqich” va “7-bosqich” pozitsiyalari “Tadbirlar” ustunidagi “Davlat xizmatlari markazi” soʻzlaridan keyin “yoki tegishli tashkilot” soʻzi qoʻshilsin.