Oliy taʼlim muassasalarining taʼlim berish jarayoniga noyob isteʼdodli va mahoratli mutaxassislarni keng jalb qilish maqsadida Vazirlar Mahkamasi qaror qiladi:

1. Oʻzbekiston Respublikasi Hukumatining ayrim qarorlariga ilovaga muvofiq oʻzgartirish va qoʻshimchalar kiritilsin.

2. Oʻzbekiston Badiiy akademiyasi manfaatdor vazirliklar va idoralar bilan birgalikda ular qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

3. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari A.A. Abduxakimov zimmasiga yuklansin

1. Vazirlar Mahkamasining 2006-yil 10-fevraldagi 20-son qarori bilan tasdiqlangan Oliy taʼlim muassasalariga pedagog xodimlarni tanlov asosida ishga qabul qilish tartibi toʻgʻrisidagi nizomda:

quyidagi mazmundagi 8¹-band qoʻshilsin:

“8¹.Professor, dotsent, katta oʻqituvchi, oʻqituvchi (assistent), oʻqituvchi-stajyor lavozimini egallash uchun tanlovda tasviriy va amaliy sanʼat sohasida oliy maʼlumotga ega boʻlmagan, biroq oʻzining noyob isteʼdodi va mahorati bilan tanilib, xalq eʼtirofiga sazovor boʻlgan “Oʻzbekiston Respublikasi sanʼat arbobi”, “Oʻzbekiston Respublikasi xalq rassomi”, “Oʻzbekiston Respublikasi xalq ustasi” faxriy unvonlariga ega boʻlgan shaxslar hamda Oʻzbekiston Badiiy akademiyasi akademiklari istisno tariqasida qatnashishlari mumkin”.

2. Vazirlar Mahkamasining 2006-yil 16-fevraldagi 25-son qarori (Oʻzbekiston Respublikasi QT, 2006-y., 2-son, 10-modda) bilan tasdiqlangan Pedagog kadrlarni qayta tayyorlash va ularning malakasini oshirishga qoʻyiladigan davlat talablarining 8.5-bandiga quyidagi mazmundagi yigirma beshinchi xatboshi qoʻshilsin:

“Tasviriy va amaliy sanʼat sohasida oliy maʼlumotga ega boʻlmagan, biroq oʻzining noyob isteʼdodi va mahorati bilan tanilib, xalq eʼtirofiga sazovor boʻlgan “Oʻzbekiston Respublikasi sanʼat arbobi”, “Oʻzbekiston Respublikasi xalq rassomi”, “Oʻzbekiston Respublikasi xalq ustasi” faxriy unvonlariga ega boʻlgan shaxslar hamda Oʻzbekiston Badiiy akademiyasi akademiklariga ushbu bandning uchinchi — yigirma toʻrtinchi xatboshlarida belgilangan talablar tatbiq etilmaydi”;

yigirma beshinchi xatboshi yigirma oltinchi xatboshi deb hisoblansin.