“Qimmatli qogʻozlar bozorining faoliyat koʻrsatish mexanizmi toʻgʻrisida” va “Aksionerlik jamiyatlari va aksionerlarning huquqlarini himoya qilish toʻgʻrisida” Oʻzbekiston Respublikasi qonunlari qabul qilinishi munosabati bilan Vazirlar Mahkamasi qaror qiladi:

1. Oʻzbekiston Respublikasining quyidagi qarorlariga oʻzgartirishlar va qoʻshimchalar kiritilsin:

a) Vazirlar Mahkamasining 1994-yil 19-apreldagi 215-son (Oʻzbekiston Respublikasi QT, 1994-y., 4-son, 23-modda) qarori bilan tasdiqlangan Korxonalar (tashkilotlar)ga faoliyatning ayrim turlari bilan shugʻullanish huquqini beradigan maxsus ruxsatnomalar (litsenziyalar) berish tartibi toʻgʻrisida nizomning 2-bandi jadvalining oʻttiz uchinchi xatboshidagi “Moliya vazirligi” soʻzlari “Vazirlar Mahkamasi” soʻzlari bilan almashtirilsin;

b) Vazirlar Mahkamasining 1994-yil 8-iyundagi 285-son qarori bilan tasdiqlangan “Oʻzbekiston Respublikasi hududida qimmatli qogʻozlar bilan bitishuvlar tuzish va ularni roʻyxatdan oʻtkazish tartibi toʻgʻrisida nizom”dagi (2-ilova):

3 va 4-bandlar chiqarib tashlansin;

14-band “xususiylashtirilgan korxonalarning aksiyalarini sotib olish uchun xususiylashtirish investitsiya fondlariga berilgan davlat zayomi mablagʻlari bundan mustasno” soʻzlari bilan toʻldirilsin;

v) Vazirlar Mahkamasining “Oʻzbekiston Respublikasi Davlat mulki qoʻmitasi huzuridagi Qimmatli qogʻozlar bozori faoliyatini muvofiqlashtirish va nazorat qilish markazining faoliyatini tashkil etish masalalari toʻgʻrisida” 1996-yil 30-martdagi 126-son (Oʻzbekiston Respublikasi QT, 1996-y., 3-son, 11-modda) qarorining 3-bandidagi uchinchi xatboshi “mehnatga haq toʻlash” soʻzlaridan soʻng “va tibbiy xizmat koʻrsatish” soʻzlari bilan toʻldirilsin — davomi matn boʻyicha;

Vazirlar Mahkamasining 1996-yil 30-martdagi 126-son qarori bilan tasdiqlangan “Oʻzbekiston Respublikasi Davlat mulki qoʻmitasi huzuridagi Qimmatli qogʻozlar bozori faoliyatini muvofiqlashtirish va nazorat qilish markazi toʻgʻrisida nizom”dagi (3-ilova):

7-bandning oʻn ikkinchi xatboshi quyidagi tahrirda bayon qilinsin:

“zarur hollarda qonunchilikka muvofiq tegishli qaror qabul qilingunga qadar depozitariydagi, vakolat beruvchilardagi va kompaniyalarni boshqaruvchilardagi qimmatli qogʻozlar bozori qatnashchilarining schyotlari boʻyicha operatsiyalarni, qonunchilik buzilgan holda tuzilgan qimmatli qogʻozlar muomalasi bilan bogʻliq oldi-sotdi, vakolatli boshqaruvga berish, saqlashga oid bitishuvlar va boshqa bitishuvlarning amalda boʻlishini bir yoʻla toʻxtatgan holda qimmatli qogʻozlar bozori qatnashchilarini koʻrib chiqishlari va bajarishlari uchun majburiy boʻlgan yozma koʻrsatmalarni kiritish”;

oʻn toʻrtinchi xatboshidan soʻng quyidagi mazmundagi xatboshilar bilan toʻldirilsin:

“aksionerlarning investitsiyalarini himoya qilish maqsadida investitsiya institutlari va qimmatli qogʻozlar bozori qatnashchilarining rioya qilishlari majburiy boʻlgan iqtisodiy normativlarni belgilash;

emitentlar, investitsiya institutlari va qimmatli qogʻozlar bozori qatnashchilari tomonidan qimmatli qogʻozlar toʻgʻrisidagi Oʻzbekiston Respublikasi qonunchiligi buzilgan hollarda qimmatli qogʻozlar bozori haqidagi qonunchilikka muvofiq iqtisodiy sanksiyalar qoʻllash”.

2. Quyidagilar oʻz kuchini yoʻqotgan deb hisoblansin:

Vazirlar Mahkamasining 1992-yil 23-sentabrdagi 443-son qaroriga 7-ilova;

Vazirlar Mahkamasining 1994-yil 29-avgustdagi 439-son (Oʻzbekiston Respublikasi QT, 1994-y., 8-son, 42-modda) qarori.