O‘zbekiston Respublikasi Prezidentining “Maktabgacha ta’lim tizimini boshqarishni takomillashtirish chora-tadbirlari to‘g‘risida” 2018-yil 30-sentabrdagi PQ-3955-son qarorini ijro etish yuzasidan Vazirlar Mahkamasi qaror qiladi:

1. O‘zbekiston Respublikasi Prezidentining “Maktabgacha ta’lim tizimini boshqarishni takomillashtirish chora-tadbirlari to‘g‘risida” 2018-yil 30-sentabrdagi PQ-3955-son qaroriga muvofiq:

a) O‘zbekiston Respublikasi Maktabgacha ta’lim vazirligi huzurida davlat unitar korxonasi shaklida Ixtisoslashtirilgan loyiha-izlanish instituti (keyingi o‘rinlarda Institut deb ataladi) tashkil etilganligi hamda u maktabgacha ta’lim tizimi buyurtmachilari bilan tuzilgan shartnomalarga muvofiq investitsiya loyihalari bo‘yicha, shu jumladan, davlat-xususiy sheriklik loyihalari bo‘yicha loyihaoldi va loyiha hujjatlarini ishlab chiqishda bosh loyiha tashkiloti etib belgilanganligi;

b) O‘zbekiston Respublikasi Maktabgacha ta’lim vazirligi huzurida davlat unitar korxonasi shaklida Infratuzilmani rivojlantirish injiniring kompaniyasi (keyingi o‘rinlarda Injiniring kompaniyasi deb ataladi) tashkil etilganligi va unga maktabgacha ta’lim tizimi obyektlarini qurish, kapital ta’mirlash, rekonstruksiya qilish va jihozlash bo‘yicha buyurtmachi funksiyalari yuklanganligi hamda kompaniya xizmatlari bilan bog‘liq xarajatlarni davlat maktabgacha ta’lim muassasalarini qurish, kapital ta’mirlash va rekonstruksiya qilish qiymatiga kiritish belgilanganligi ma’lumot uchun qabul qilinsin.

2. Quyidagilar:

a) quyidagilar:

investitsiya loyihalari bo‘yicha loyihaoldi va loyiha hujjatlarini ishlab chiqish, xorijiy loyiha tashkilotlari tomonidan ishlab chiqilgan loyihaoldi va loyiha hujjatlarini O‘zbekiston Respublikasining texnik jihatdan tartibga solish sohasidagi normativ hujjatlariga moslashtirish;

loyihalarning loyiha (ishchi) hujjatlarini mustaqil ishlab chiqish yo‘nalishini rivojlantirish, shuningdek, xorijiy loyiha tashkilotlari tomonidan ishlab chiqilgan loyiha (ishchi) hujjatlarini moslashtirish;

loyihalashtirish jarayonlariga xorijiy loyiha va injiniring tashkilotlarini jalb etgan holda ilg‘or xorijiy tajribaga asoslangan loyiha ishlarini tashkil etishning zamonaviy usullarini joriy etish;

ishlab chiqarilayotgan mahsulotning yuqori unumdorligi va sifatiga, energiya va resurslarni tejashga qo‘yiladigan zamonaviy talablarga, shuningdek, ekologik talablarga javob beradigan ilg‘or texnologiyalar va asbob-uskunalar jahon bozorini chuqur tahlil qilish, respublikaga istiqbolsiz, ma’naviy va fizik eskirgan uskuna va texnologiyalar olib kirilishini istisno qilish;

loyiha va loyihaoldi ishchi hujjatlarini ishlab chiqish va tasdiqlashda iqtisodiyotning bazaviy tarmoqlari ilmiy-texnik va ekspert kengashlari bilan yaqin hamkorlik qilish Institutning;

b) quyidagilar:

O‘zbekiston Respublikasi Maktabgacha ta’lim vazirligi tizimiga kiradigan maktabgacha ta’lim tashkilotlarini qurish, kapital ta’mirlash, rekonstruksiya qilish, inventar bilan va texnik jihozlash bo‘yicha buyurtmachi funksiyalarini bajarish;

qurilish-pudrat tashkilotlarini aniqlash va qurilish-montaj ishlari bajarilishini ta’minlash;

maktabgacha ta’lim tashkilotlari va infrastruktura obyektlarini belgilangan muddatlarda foydalanishga topshirish prognozining bajarilishini ta’minlash;

loyiha yechimlarining samaradorligini ta’minlash, arxitektura va shaharsozlik sohasidagi talablarga rioya qilish;

kapital qo‘yilmalarni o‘zlashtirish samaradorligini oshirish, loyihalash davri muddatini qisqartirish Injiniring kompaniyasining asosiy vazifalari etib belgilansin.

3. Quyidagilar:

a) quyidagilar:

loyihalar buyurtmachilarining loyihaoldi va loyiha hujjatlarini ishlab chiqishga, loyiha-izlanish ishlarini amalga oshirishga, loyihalar amalga oshirilishini texnik qo‘llab-quvvatlashga shartnoma asosida ajratiladigan mablag‘lari;

xalqaro va xorijiy moliya institutlari, hukumat va nohukumat tashkilotlarning grantlari va texnik ko‘maklashish mablag‘lari;

jismoniy va yuridik shaxslarning, shu jumladan, O‘zbekiston Respublikasi norezidentlarining xayriya ehsonlari;

qonun hujjatlarida taqiqlanmagan boshqa manbalar Institutni;

b) quyidagilar:

maktabgacha ta’lim tashkilotlarini, maktabgacha ta’lim tizimining ma’muriy binolarini va boshqa obyektlarini qurish, rekonstruksiya qilish va kapital ta’mirlash qiymatidan ajratmalar;

xalqaro va xorijiy moliya institutlari, hukumat va nohukumat tashkilotlarning grantlari va texnik ko‘maklashish mablag‘lari;

jismoniy va yuridik shaxslarning, shu jumladan, O‘zbekiston Respublikasi norezidentlarining xayriya ehsonlari;

qonun hujjatlarida taqiqlanmagan boshqa manbalar Injiniring kompaniyasini moliyalashtirish manbalari etib belgilansin.

4. O‘zbekiston Respublikasi Maktabgacha ta’lim vazirligi:

Institut va Injiniring kompaniyaning tuzilmalari va ustavlarini bir oy muddatda belgilangan tartibda tasdiqlasin va ular davlat ro‘yxatidan o‘tkazilishini ta’minlasin;

manfaatdor vazirliklar va idoralar bilan birgalikda ular qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.

5. Mazkur qarorning bajarilishini nazorat qilish O‘zbekiston Respublikasi Bosh vazirining ijtimoiy rivojlantirish masalalari bo‘yicha o‘rinbosari A.A. Abduhakimov va O‘zbekiston Respublikasi maktabgacha ta’lim vaziri A.V. Shin zimmasiga yuklansin.