Qashqadaryo viloyatida tog‘, tog‘ yonbag‘irlari va cho‘l hududlaridagi samarasiz foydalanilayotgan yer maydonlaridan unumli foydalanish, yaylovzorlar, pista, bodom plantatsiyalarini barpo etish va o‘rmonzorlarni ko‘paytirish maqsadida Vazirlar Mahkamasi qaror qiladi:

1. O‘zbekiston Respublikasi O‘rmon xo‘jaligi davlat qo‘mitasi va Qashqadaryo viloyati hokimligining Qashqadaryo viloyati Chiroqchi tumanida O‘zbekiston Respublikasi O‘rmon xo‘jaligi davlat qo‘mitasi tizimida davlat muassasasi shaklidagi Qumdaryo davlat o‘rmon xo‘jaligini tashkil etish to‘g‘risidagi taklifiga rozilik berilsin.

2. Quyidagilar Qumdaryo davlat o‘rmon xo‘jaligining asosiy vazifalari va faoliyati yo‘nalishlari etib belgilansin:

o‘rmonzorlar barpo etish, o‘rmon fondini har tomonlama kengaytirish va muhofaza qilish, o‘rmon boyliklaridan oqilona foydalanishga qaratilgan tadbirlarni amalga oshirish;

ajratilgan yer maydonlarida pista, bodom va dorivor o‘simliklar plantatsiyalarini barpo etish hamda ko‘chatxonalar tashkil etish;

o‘rmonlarni tiklash, ihota o‘rmonzorlarini ko‘paytirish chora-tadbirlarini ishlab chiqish va amalga oshirish, tog‘ yonbag‘irlari hamda cho‘l hududlarida eroziyaga qarshi daraxtzorlar barpo etish;

o‘rmonlarni yong‘indan, zararkunanda va kasalliklardan, noqonuniy daraxt kesishdan va o‘rmon to‘g‘risidagi qonunchilik hujjatlarining boshqacha tarzda buzilishidan muhofaza va nazorat qilish.

3. Qashqadaryo viloyati hokimligi O‘zbekiston Respublikasi O‘rmon xo‘jaligi davlat qo‘mitasi va Yer resurslari, geodeziya, kartografiya va davlat kadastri davlat qo‘mitasi bilan birgalikda bir oy muddatda:

Qashqadaryo davlat o‘rmon xo‘jaligining Chiroqchi tumani, Yettitom qo‘rg‘oni, 1-uy manzilida joylashgan binosi operativ boshqarish huquqi bilan Qumdaryo davlat o‘rmon xo‘jaligiga ajratib berilishini;

tabiiy o‘rmonzorlar maydonlari, dorivor o‘simliklar zaxirasi mavjud maydonlar va tuman hokimliklari zaxirasidagi yer maydonlari pista va bodom plantatsiyalarini barpo qilish hamda dorivor o‘simliklar yetishtirish uchun doimiy foydalanish huquqi bilan o‘rmon xo‘jaliklariga ajratib berilishini;

Chiroqchi tumani hududidagi yer maydonlari xatlovdan o‘tkazilib, tabiiy o‘rmonzorlar va samarasiz foydalanilayotgan yer maydonlaridan 28525 gektar maydon doimiy foydalanish huquqi bilan yangi tashkil etilayotgan Qumdaryo davlat o‘rmon xo‘jaligiga belgilangan tartibda ajratib berilishini ta’minlasin.

4. O‘zbekiston Respublikasi O‘rmon xo‘jaligi davlat qo‘mitasi:

bir oy muddatda yangi tashkil etilayotgan Qumdaryo davlat o‘rmon xo‘jaligining ustavi va shtat jadvali tasdiqlanishini ta’minlasin;

ikki oy muddatda pistachilik sohasini yanada rivojlantirish, pistaning mamlakatimiz tuproq-iqlim sharoitlariga mos serhosil va yuqori sifatli navlarini ko‘paytirish hamda kelajakda yangi istiqbolli navlarini yaratish maqsadida Qashqadaryo viloyati Qamashi tumanidagi Qamashi davlat o‘rmon xo‘jaligi tarkibida yuridik shaxs maqomiga ega bo‘lmagan Pistachilikni rivojlantirish ilmiy-tajriba xo‘jaligi faoliyatini tashkil etsin.

5. Belgilab qo‘yilsinki, Qumdaryo davlat o‘rmon xo‘jaligi faoliyatini moliyalashtirish 2019-yilda O‘rmon xo‘jaligi davlat qo‘mitasining O‘rmon xo‘jaligini rivojlantirish jamg‘armasi mablag‘lari hisobiga, keyingi yildan O‘zbekiston Respublikasi Davlat budjeti mablag‘lari, O‘rmon xo‘jaligi davlat qo‘mitasining O‘rmon xo‘jaligini rivojlantirish jamg‘armasi mablag‘lari, budjetdan tashqari va qonunchilik hujjatlarida taqiqlanmagan boshqa manbalar hisobiga moliyalashtiriladi.

6. Qashqadaryo viloyati davlat o‘rmon xo‘jaliklari yer maydonlarida 2019-2020-yillarda pista, achchiq bodom, yong‘oq va chakanda plantatsiyalarini barpo etish hajmlari ilovaga muvofiq tasdiqlansin.

7. O‘zbekiston Respublikasi O‘rmon xo‘jaligi qo‘mitasi, Toshkent davlat agrar universiteti, O‘rmon xo‘jaligi ilmiy-tadqiqot instituti, akademik M. Mirzayev nomidagi bog‘dorchilik, uzumchilik va vinochilik ilmiy-tadqiqot instituti:

ikki hafta muddatda hududlarning tuproq-iqlim sharoitlaridan kelib chiqib pista, achchiq bodom, yong‘oq va chakanda yetishtirishga ixtisoslashgan plantatsiyalarni tashkil etish bo‘yicha tavsiyalar ishlab chiqilishini;

2019-yil 1-aprelga qadar Qashqadaryo viloyatidagi o‘rmon xo‘jaliklari mutaxassislari ishtirokida pista, achchiq bodom, yong‘oq va chakanda yetishtirish yuzasidan o‘quv seminarlari o‘tkazilishini ta’minlasinlar.

8. O‘zbekiston Respublikasi O‘rmon xo‘jaligi davlat qo‘mitasi viloyatda mavjud tabiiy holda o‘suvchi dorivor o‘simliklar zaxirasini o‘rganishga va yo‘qolib ketish arafasida turgan o‘simliklar zaxirasini muhofaza qilishga, monitoringini olib borishga hamda ularning tabiiy ko‘payish shart-sharoitlarining ilmiy asoslarini tadqiq etishga yo‘naltirilgan davlat ilmiy-texnika dasturi doirasida bajariladigan ilmiy loyihalarni ikki oy muddatda Innovatsion rivojlanish vazirligiga taqdim etilishini ta’minlasin.

9. Mazkur qarorning bajarilishini nazorat qilish O‘zbekiston Respublikasi Bosh vazirining agrar va oziq-ovqat sohalarini rivojlantirish masalalari bo‘yicha maslahatchisi A.D. Vaxabov, O‘rmon xo‘jaligi davlat qo‘mitasi raisi N.J. Bakirov va Qashqadaryo viloyati hokimi Z.Sh. Ro‘ziyev zimmasiga yuklansin.