Oʻzbekiston Respublikasi Prezidentining “Yoshlar — kelajagimiz” Davlat dasturi toʻgʻrisida” 2018-yil 27-iyundagi PF-5466-son Farmoniga muvofiq, shuningdek, yoshlarni biznes bilan shugʻullanishga faol jalb qilish hamda ularning tadbirkorlik faoliyatini har tomonlama qoʻllab-quvvatlash maqsadida Vazirlar Mahkamasi qaror qiladi:

1. Quyidagilar:

“Yoshlar — kelajagimiz” Davlat dasturi doirasida davlat-xususiy sheriklik shartlarida “Yosh tadbirkorlar” kovorking markazlari va “Yoshlar mehnat guzari” komplekslarini qurish hamda faoliyatini tashkil etish tartibi toʻgʻrisidagi nizom 1-ilovaga;

“Yoshlar — kelajagimiz” Davlat dasturi doirasida amalga oshiriladigan tadbirkorlik loyihalarida Oʻzbekiston yoshlar ittifoqi huzuridagi “Yoshlar — kelajagimiz” jamgʻarmasining ishtirok etishi tartibi toʻgʻrisidagi nizom 2-ilovaga muvofiq tasdiqlansin.

2. Vazirlar Mahkamasining “Oʻzbekiston yoshlar ittifoqi huzuridagi “Yoshlar — kelajagimiz” jamgʻarmasi faoliyatini tashkil etish chora-tadbirlari toʻgʻrisida” 2018-yil 16-avgustdagi 669-son qaroriga 3-ilovaga muvofiq oʻzgartirishlar kiritilsin.

3. Vazirliklar va idoralar oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — moliya vaziri J.A. Qoʻchqorov zimmasiga hamda Vazirlar Mahkamasining Madaniyat, sanʼat va yoshlar siyosati masalalari axborot-tahlil departamentiga yuklansin.

1. Mazkur Nizom “Yoshlar — kelajagimiz” Davlat dasturi (keyingi oʻrinlarda Davlat dasturi deb ataladi) doirasida davlat-xususiy sheriklik shartlarida “Yosh tadbirkorlar” kovorking markazlari va “Yoshlar mehnat guzari” komplekslarini qurish hamda faoliyatini tashkil etish tartibini belgilaydi.

2. Ushbu Nizomda quyidagi asosiy tushunchalardan foydalaniladi:

davlat sherigi — tuman (shahar) hokimliklari;

davlat-xususiy sheriklik — xususiy investitsiyalarni jalb qilish, resurslarni birlashtirish maqsadida davlat sherigi va xususiy sherikning aniq muddatga “Yosh tadbirkorlar” kovorking markazlari va “Yoshlar mehnat guzari” komplekslarini qurish hamda faoliyatini tashkil etishdagi oʻzaro samarali hamkorligi;

davlat-xususiy sheriklik loyihasi — “Yosh tadbirkorlar” kovorking markazlari va (yoki) “Yoshlar mehnat guzari” komplekslarini qurish hamda faoliyatini tashkil etish boʻyicha investitsiyaviy, innovatsion, infratuzilmaviy va boshqa tadbirlar majmui;

davlat-xususiy sheriklik toʻgʻrisida bitim (keyingi oʻrinlarda bitim deb ataladi) — davlat sherigi va xususiy sherikning huquqlari, majburiyatlari va javobgarligini, shuningdek, davlat-xususiy sheriklik loyihasini ijro etishning boshqa shartlarini belgilab beradigan davlat sherigi va xususiy sherik oʻrtasida tuzilgan yozma shartnoma;

tadbirkorlik subyektlari — Davlat dasturi doirasida tadbirkorlik va daromad keltiradigan mehnat faoliyati bilan shugʻullanish istagida boʻlgan yoshlar tadbirkorligi subyektlari (18 yoshga toʻlgan va 30 yoshdan oshmagan yoshlar), 50 foiz va undan koʻproq muassislari yoshlardan iborat boʻlgan tadbirkorlik subyektlari, shuningdek, yaratiladigan ish oʻrinlarining 70 foizidan kam boʻlmagan qismini 5 yil davomida yoshlarni ish bilan taʼminlash uchun taqdim etish majburiyatini oʻz zimmasiga oladigan tadbirkorlik subyektlari, jumladan, xorijiy investorlar;

xususiy sherik — davlat-xususiy sheriklik toʻgʻrisida bitim tuzgan yoki bitim tuzish istagini bildirgan tadbirkorlik subyektlari;

“Yosh tadbirkorlar” kovorking markazlari (keyingi oʻrinlarda kovorking markazlari deb ataladi) — yoshlar tadbirkorligi subyektlariga imtiyozli shartlarda binolar, ofis texnikasi va sarflash materiallarini ijaraga berish, ularni Internet jahon axborot tarmogʻi bilan taʼminlash, shuningdek, yoshlarning biznes tashabbuslari, startaplari, gʻoyalari va loyihalarini amalga oshirishga boshqacha koʻmak berish, jumladan, biznes rejalar ishlab chiqish, maslahat, yuridik, buxgalteriya va boshqa xizmat turlarini koʻrsatish, forumlar, mahorat darslari va seminarlar tashkil etishga moʻljallangan majmua;

“Yoshlar mehnat guzari” komplekslari (keyingi oʻrinlarda mehnat guzarlari deb ataladi) — chakana savdo va maishiy xizmatlar koʻrsatish faoliyatini tashkil etish uchun tadbirkorlik subyektlariga imtiyozli shartlarda ijaraga joy ajratish orqali yoshlarni ish bilan taʼminlashga moʻljallangan majmua.

3. Davlat sherigi va xususiy sherikning kovorking markazi va (yoki) mehnat guzarini oʻzaro manfaatdorlikda tashkil etish boʻyicha takliflari davlat-xususiy sheriklik toʻgʻrisida bitim tuzish uchun asos hisoblanadi. Mazkur bitim namunasi Davlat-xususiy sheriklikni rivojlantirish agentligi bilan kelishiladi.

4. Ushbu Nizom tasdiqlangunga qadar kovorking markazlari va mehnat guzarlari tashkil etish maqsadida boʻsh turgan yer uchastkalarini va boʻsh turgan davlat mulki obyektlarini bepul asosda olgan tadbirkorlik subyektlari bilan davlat-xususiy sheriklik toʻgʻrisida bitim tuzish ushbu Nizomga muvofiq amalga oshiriladi.

5. Oʻzbekiston yoshlar ittifoqi huzuridagi “Yoshlar — kelajagimiz” jamgʻarmasi (keyingi oʻrinlarda Jamgʻarma deb ataladi) oʻz muassisligida tashkil etilgan tadbirkorlik subyekti tomonidan kovorking markazlari va mehnat guzarlarini qurish uchun Jamgʻarma mablagʻlari bilan toʻliq moliyalashtirgan holda ishtirok etishga haqli.

6. Kovorking markazlari va mehnat guzarlarini qurishga yoʻnaltiriladigan mablagʻlar xususiy sherikning soliq solinadigan bazasidan chegirib tashlanadi.

7. “Yoshlar — kelajagimiz” Davlat dasturi doirasida davlat-xususiy sheriklik shartlarida “Yosh tadbirkorlar” kovorking markazlari va “Yoshlar mehnat guzari” komplekslarini qurish hamda faoliyatini tashkil etish ushbu Nizomga 1-ilovaga muvofiq sxema boʻyicha amalga oshiriladi.

8. Davlat-xususiy sheriklik shartlari asosida kovorking markazlari yoki mehnat guzarlarini qurish (joylashtirish) istagini bildirgan xususiy sherik tuman (shahar) hokimligiga ariza bilan murojaat qiladi.

Arizaga quyidagilar ilova qilinadi:

a) yuridik shaxslar uchun — davlat roʻyxatidan oʻtkazilganligi toʻgʻrisidagi guvohnoma, jismoniy shaxslar uchun — pasport nusxasi;

b) kovorking markazi yoki mehnat guzarini qurish (joylashtirish) uchun rejalashtirilayotgan yer uchastkasi yoki davlat mulki boʻlgan boʻsh turgan obyekt toʻgʻrisidagi maʼlumotlar;

v) yer uchastkasiga (binoga) boʻlgan huquq davlat roʻyxatidan oʻtkazilganligi haqidagi guvohnoma (agar kovorking markazi yoki mehnat guzari xususiy sherikning mulki negizida tashkil qilish bilan bogʻliq boʻlsa);

g) zaruratga koʻra, kovorking markazi yoki mehnat guzarini qurish uchun eskiz loyihaviy taklif hujjatlari.

9. Davlat-xususiy sheriklik loyihasini amalga oshirish boʻyicha tuman (shahar) hokimliklariga tushgan arizalar ikki ish kunida quyidagilarga asosan koʻrib chiqiladi:

taqdim etilgan hujjatlarning ushbu Nizomning 8-bandida nazarda tutilgan talablarga muvofiqligi;

taklif etilayotgan davlat-xususiy sheriklik loyihasi hisob-kitoblarining asoslanganligi hamda iqtisodiy samaradorligi;

davlat-xususiy sheriklik loyihasini amalga oshirishda xususiy sherikning moliyaviy holati, xususan oʻz mablagʻlari va (yoki) u tomonidan jalb etilgan kreditlar va boshqa manbalar hisobiga amalga oshirilishining taʼminlanishi;

kovorking markazlari tuman (shahar) markazida, mehnat guzarlari esa ishsiz yoshlar soni koʻp boʻlgan aholi punktlarida tashkil etilishi.

10. Ariza ushbu Nizomning 8-bandi talablari buzilgan holda berilgan boʻlsa yoki uni koʻrib chiqish vaqtida 9-band talablariga javob bermagan taqdirda, hujjatlar ariza beruvchiga bir ish kuni mobaynida qaytariladi.

Taqdim etilgan arizada talablar buzilganligi haqidagi bildirishnoma yozma shaklda, shu jumladan, elektron axborot tizimi orqali xususiy sherikka yetkaziladi (joʻnatiladi). Bildirishnomada qanday talablar buzilganligi, qonun hujjatlarining aniq normalari va xususiy sherik koʻrsatilgan talablar buzilishini bartaraf etib, hujjatlarni tuman (shahar) hokimligiga takroran koʻrib chiqish uchun taqdim etishi mumkin boʻlgan muddat koʻrsatiladi.

Xususiy sherik talablar buzilishini bartaraf etishga va hujjatlarni takroran koʻrib chiqish uchun taqdim etishga haqli boʻlgan muddat yozma yoki elektron bildirishnoma olingan kundan boshlab uch ish kunidan kam boʻlishi mumkin emas.

Kamchiliklar bartaraf etilib takror taqdim etilgan ariza qabul qilingan kundan boshlab ushbu Nizomning 9-bandida belgilangan tartibda qayta koʻrib chiqiladi.

11. Kovorking markazlari va mehnat guzarlarini qurish uchun aholi punktlari tarkibiga kiradigan yer uchastkalari ajratiladi.

12. Tuman (shahar) hokimligi kovorking markazi yoki mehnat guzari qurilishi uchun yer uchastkasini ajratish boʻyicha materiallarni ikki ish kuni mobaynida Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasining (keyingi oʻrinlarda — “Davyergeodezkadastr” qoʻmitasi deb ataladi) hududiy organlariga yuboradi.

13. “Davyergeodezkadastr” qoʻmitasining hududiy organlari oʻn besh kun mobaynida yer uchastkasini ajratishga doir materiallarni tayyorlaydi va qonun hujjatlariga muvofiq vakolatli organlar (tashkilotlar) bilan kelishadi hamda ushbu materiallarni tuman (shahar) hokimligiga yuboradi.

14. Tuman (shahar) hokimligi yer uchastkasini ajratishga doir materiallar tushgan kundan boshlab uch ish kuni mobaynida:

kovorking markazi yoki mehnat guzarini qurish maqsadida yer uchastkasini xususiy sherikka doimiy foydalanish uchun ajratish toʻgʻrisida qaror qabul qiladi;

yer uchastkasini ajratish toʻgʻrisidagi qarorni “Davyergeodezkadastr” qoʻmitasining tuman (shahar) yer tuzish va koʻchmas mulk kadastri davlat korxonasi filialiga yuboradi hamda xususiy sherikni xabardor qiladi.

15. “Davyergeodezkadastr” qoʻmitasining tuman (shahar) yer tuzish va koʻchmas mulk kadastri davlat korxonasi filiali tuman (shahar) hokimining yer uchastkasi ajratish toʻgʻrisidagi qarori olingan kundan boshlab ikki ish kunida taqdim etilgan materiallar asosida yer uchastkasiga boʻlgan huquqni davlat roʻyxatidan oʻtkazadi, shuningdek, xususiy sherikka yer uchastkasiga boʻlgan huquq davlat roʻyxatidan oʻtkazilganligi toʻgʻrisida guvohnoma beradi.

16. Yer uchastkasini ajratishga doir materiallarni tayyorlash va kelishish bilan bogʻliq xarajatlar xususiy sherik bilan bitim tuzilgandan keyin u tomonidan qoplanadi.

17. Xususiy sherikka ajratilgan yer uchastkasi negizida barpo etilgan bino va inshootlar mulk huquqi asosida rasmiylashtiriladi.

18. Kovorking markazlari va mehnat guzarlarini qurish uchun davlat mulki boʻlgan boʻsh turgan obyektlar (keyingi oʻrinlarda obyekt deb ataladi) beriladi.

19. Tuman (shahar) hokimligi ikki ish kuni mobaynida kovorking markazi yoki mehnat guzari qurilishi uchun obyektni xususiy sherikka “nol” xarid qiymati boʻyicha berishni tashkil etish maqsadida Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasining (keyingi oʻrinlarda Davlat raqobat qoʻmitasi deb ataladi) hududiy boʻlinmasiga tegishli materiallarni yuboradi.

20. Davlat raqobat qoʻmitasining hududiy boʻlinmasi tegishli materiallarni olgan vaqtdan boshlab uch ish kuni mobaynida obyektni balansda saqlovchiga (keyingi oʻrinlarda balansda saqlovchi deb ataladi) mulkni Buxgalteriya hisobi milliy standartlariga muvofiq inventarizatsiyadan oʻtkazish toʻgʻrisidagi yozma talabni yuboradi.

21. Balansda saqlovchi oʻn ish kunidan ortiq boʻlmagan muddatda obyekt boʻyicha inventarizatsiya oʻtkazadi va Davlat raqobat qoʻmitasining hududiy boʻlinmasiga:

inventarizatsiya komissiyasini tashkil etish toʻgʻrisidagi buyruqning koʻchirma nusxasini;

inventarizatsiya komissiyasi majlislarining bayonnomalarini;

inventarizatsiya komissiyasi aʼzolari va rahbari tomonidan imzolangan obyektni inventarizatsiya qilish hujjatlarini;

kadastr hujjatlari, shu jumladan, kadastr xaritasi (rejasi) va huquqni oʻrnatuvchi boshqa hujjatlarni (agar mavjud boʻlsa);

yer uchastkasiga, erosti boyliklariga va boshqa tabiiy resurslarga boʻlgan huquqni tasdiqlovchi hujjatlarni;

balansda saqlovchining jamiyat roʻyxatdan oʻtkazilgan joy boʻyicha soliq organi tomonidan tasdiqlangan balansini;

Davlat raqobat qoʻmitasi tomonidan tasdiqlangan shakl boʻyicha obyektning pasportini, fotosuratlarni (kamida toʻrtta) ilova qilgan holda taqdim etadi.

22. Inventarizatsiya balansda saqlovchi tomonidan oraliq balans tuzilgan sanada oʻtkaziladi, bunda balansning har bir qatori tegishli inventar roʻyxatlari bilan tasdiqlangan boʻlishi kerak.

23. Inventarizatsiya hujjatlari Vazirlar Mahkamasining 2014-yil 6-oktabrdagi 279-son qarori bilan tasdiqlangan Davlat mulki obyektlarini xaridor tomonidan investitsiyaviy va ijtimoiy majburiyatlar qabul qilinishi sharti bilan “nol” xarid qiymati boʻyicha sotish tartibi toʻgʻrisidagi nizomda belgilangan tartib asosida tuziladi, inventarizatsiya komissiyasi raisi va aʼzolari tomonidan imzolanadi.

24. Balansda saqlovchi va xususiy sherik oʻrtasida inventarizatsiya hujjati tuzilgach, ikki ish kuni mobaynida obyektni topshirish-qabul qilish hujjati uning balansi qiymati koʻrsatilgan holda imzolanadi.

25. Obyektni topshirish-qabul qilish hujjati imzolangach va xususiy sherik tomonidan davlat boji toʻlanganligini tasdiqlovchi hujjat taqdim etilgach besh ish kuni mobaynida Davlat raqobat qoʻmitasining hududiy boʻlinmasi xususiy sherikka “tasarruf etish huquqisiz” belgisi bilan egalik qilish huquqi uchun davlat orderini beradi.

26. Bitimning amal qilish muddati tugagandan soʻng xususiy sherik oʻz majburiyatlarini va bitim shartlarini bajargan taqdirda, davlat sherigi tomonidan taqdim etilgan maʼlumot boʻyicha Davlat raqobat qoʻmitasining hududiy boʻlinmasi xususiy sherik tomonidan egalik qilish huquqi uchun davlat orderining asl nusxasi taqdim etilgan kundan boshlab besh ish kunidan oshmaydigan muddatda qabul qiluvchi komissiyaning hujjati, shuningdek, audit xulosasi asosida “tasarruf etish huquqi bilan” belgisini qoʻyadi.

27. Xususiy sherik oʻz majburiyatlarini va bitim shartlarini bajargan taqdirda obyekt xususiy sherikka mulk huquqi asosida rasmiylashtiriladi.

28. Bitim qonun hujjatlari va ushbu Nizom talablariga rioya qilingan holda tuziladi.

29. Bitimda u amalga oshirilishi shakliga qarab quyidagilar nazarda tutilgan boʻlishi kerak:

xususiy investitsiyalar obyekti va hajmi;

bitimning amal qilish muddati va shartlari;

kovorking markazlari yoki mehnat guzarlari foydalanishga topshiriladigan va ishga tushiriladigan muddatlar;

bitim tomonlarining huquqlari va majburiyatlari;

qurilish loyiha-smeta hujjatlarini tayyorlash, pudrat ishlari uchun shartnomalar tuzish muddatlari, qurilishni moliyalashtirish manbalari, amalga oshirish jadvallari, qurilishning borishi ustidan texnik nazorat qilish tartibi;

davlat-xususiy sheriklik loyihasi bajarilishi ustidan monitoring olib borish tartibi va u qay darajada bajarilganligiga berilgan baho;

davlat-xususiy sheriklik loyihasini amalga oshirish jarayonida koʻrsatiladigan xizmatlar sifatiga qoʻyiladigan talablar;

xususiy sherik tomonidan oʻz majburiyatlarini bajarish jarayoni toʻgʻrisida hisobotlar taqdim etish tartibi va muddatlari;

davlat sherigi va xususiy sherik oʻrtasida bitim tuzish bilan bogʻliq xavf-xatarlarni taqsimlash tartibi va shartlari;

davlat sherigi tomonidan xususiy sherikka davlat-xususiy sheriklik loyihasini amalga oshirish uchun beriladigan obyektga egalik qilish va undan foydalanish tartibi;

kovorking markazlari yoki mehnat guzarlaridan foydalanish, unga texnik xizmat koʻrsatish, uni loyihalashtirish, qurish, qayta qurish, taʼmirlash, modernizatsiyalash tartibi;

bitimning amal qilish muddati tugagandan keyin bitimni ijro etish jarayonida yaratilgan obyektga va boshqa mulkka doir huquqlarni taqsimlash tartibi;

bitim shartlariga rioya qilinmaganligi uchun tomonlarning javobgarligi;

bitimga oʻzgartirish va qoʻshimchalar kiritish tartibi;

bitimni bekor qilish tartibi, shuningdek, bitimni muddatidan oldin bekor qilish natijasida yetkazilgan zararlarning oʻrnini toʻldirish yoki qoplash tartibi;

xususiy sherik tomonidan majburiyatlar bajarilmasligi yoki tegishlicha bajarilmasligi uchun sanksiyalar;

bitimni amalga oshirishda yuzaga keladigan nizolarni hal qilish tartibi.

Bitimda qonun hujjatlariga zid boʻlmagan boshqa shartlar ham belgilanishi mumkin.

30. Bitimni imzolashga tayyorlash uchun davlat sherigi xususiy sherikka bitim loyihasi matnini taqdim etadi.

31. Agar zarurat boʻlsa, davlat sherigi va xususiy sherik oʻrtasida bitim qoidalarini kelishib olish maqsadida muzokaralar oʻtkaziladi.

32. Bitim davlat sherigi va xususiy sherik oʻrtasida ikki nusxada, tomonlarning har biri uchun bittadan nusxada imzolanadi.

33. Tuzilgan bitimlarning yagona reyestri tuman (shahar) hokimliklari tomonidan yuritiladi.

34. Bitim oʻttiz yilgacha boʻlgan muddatga imzolanadi. Bitim, agar unda boshqacha tartib belgilangan boʻlmasa, tomonlar imzolagan vaqtdan boshlab kuchga kiradi va bitim muddati tugashigacha yoki bekor qilinishigacha amal qiladi.

35. Bitimga quyidagi hollarda oʻzgartirish va qoʻshimchalar kiritilishi mumkin:

tomonlarning oʻzaro roziligi bilan;

davlat sherigining talabi boʻyicha — davlat sherigi va xususiy sherikning shartnoma asosidagi munosabatlariga doir kovorking markazlari va (yoki) mehnat guzarlarini qurishni (joylashtirishni) tartibga solish toʻgʻrisidagi qonun hujjatlari oʻzgarishi munosabati bilan;

sudning hal qiluv qarori boʻyicha.

36. Bitim quyidagi hollarda bekor qilinadi:

tomonlarning oʻzaro roziligi bilan;

xususiy sherik bankrot boʻlsa yoki tugatilsa;

davlat sherigining talabi boʻyicha — xususiy sherik oʻz majburiyatlarini bajarmagan taqdirda;

xususiy sherikning talabi boʻyicha — davlat sherigi oʻz majburiyatlarini bajarmagan taqdirda.

Ushbu bandning toʻrtinchi va beshinchi xatboshilarida nazarda tutilgan hollarda sud orqali bekor qilinadi.

37. Bitimning amal qilishi uning muddati tugaganidan keyin toʻxtatiladi.

Bitimning amal qilish muddati tugashi tomonlarni uni buzganlik uchun javobgarlikdan ozod qilmaydi.

38. Davlat sherigi:

xususiy sherikdan bitim shartlarini bajarish jarayoni toʻgʻrisida bitimda belgilangan muddatlarda hisobot olishga;

bitim shartlarini bajarish jarayoni ustidan monitoring olib borish va davlat-xususiy sheriklik loyihalari amalga oshirilishini baholashga;

qonun hujjatlariga va bitim shartlariga rioya etilishi ustidan monitoring olib borish doirasida aniqlangan qonunbuzarliklar bartaraf etilishini talab qilishga;

xususiy sherik aybi bilan yuzaga kelgan obyekt boʻyicha zararlar qoplanishini talab qilishga;

bitim shartlari xususiy sherik tomonidan buzilgan taqdirda, bitimning sud tartibida bekor qilinishini talab qilishga;

davlat-xususiy sheriklik loyihasining amalga oshirilishini moliyalashtirishda ishtirok etishga haqli.

Davlat sherigi qonun hujjatlariga muvofiq boshqa huquqlarga ham ega boʻlishi mumkin.

39. Davlat sherigi:

xususiy sherikka kovorking markazi yoki mehnat guzarini qurish uchun yer uchastkasini bepul asosda yoki davlat mulki boʻlgan boʻsh turgan obyektni “nol” xarid qiymatida belgilangan muddatlarda, tartibda va shartlarda taqdim etishi;

kovorking markazlari va mehnat guzarlarini muhandislik kommunikatsiyalariga, jumladan, elektr, gaz va suv taʼminoti tarmoqlariga ulash va ulashni tuman (shahar)lar mahalliy budjetlarining qoʻshimcha manbalari hisobidan taʼminlashi;

xususiy sherikning mulki negizida tashkil etilgan kovorking markazlari va mehnat guzarlarining mavjud imtiyozlardan foydalanishini taʼminlashi;

xususiy sherikga soliq imtiyozlari va qonun hujjatlarida nazarda tutilgan boshqa preferensiyalar taqdim etilishida koʻmaklashishi;

kovorking markazlari va mehnat guzarlarini qurish (joylashtirish) uchun qurilish qiymatining 30 foizigacha boʻlgan qismini Jamgʻarma mablagʻlari hisobiga moliyalashtirishda koʻmaklashishi;

xususiy sherikning xoʻjalik faoliyatini olib borishiga aralashmasligi shart.

Davlat sherigi zimmasida ushbu Nizomda va qonun hujjatlarida nazarda tutilgan boshqa majburiyatlar ham boʻlishi mumkin.

40. Xususiy sherik:

davlat-xususiy sheriklik loyihasini taqdim qilish toʻgʻrisidagi taklifni koʻrib chiqish uchun davlat sherigiga taqdim etishga;

kovorking markazlari va mehnat guzarlarini qurish (joylashtirish) uchun zamonaviy qurilish mahsulotlarini xarid qilish uchun imtiyozli kreditlar olish hamda zarur hollarda belgilangan tartibda qurilish qiymatining 30 foizigacha boʻlgan qismini Jamgʻarma mablagʻlari hisobiga moliyalashtirish uchun murojaat qilishga;

foyda olish va uni erkin tasarruf etishga;

bitim amal qiladigan muddatga yer uchastkasini bepul asosda yoki davlat mulki boʻlgan boʻsh turgan obyektni “nol” xarid qiymatida olish hamda ulardan foydalanishga;

bitim shartlari davlat sherigi tomonidan buzilgan taqdirda, uni sud tartibida bekor qilishni talab qilishga haqli.

Xususiy sherik qonun hujjatlariga muvofiq boshqa huquqlarga ham ega boʻlishi mumkin.

41. Xususiy sherik:

a) kovorking markazlari va mehnat guzarlari qurilishini moliyalashtirish hamda Oʻzbekiston Respublikasi Qurilish vazirligi tomonidan ishlab chiqilgan namunaviy loyihalar va talablarga muvofiq kelishilgan muddatlarda qurilishi va foydalanishga topshirilishini taʼminlashi;

b) Jamgʻarmaning tuman (shahar) filiallarini joylashtirish uchun kovorking markazlaridan bepul foydalanish huquqi asosida, biroq band etilgan umumiy maydonga nisbati hisoblangan kommunal toʻlovlarni toʻlash sharti bilan xonalar taqdim etishi;

v) kovorking markazlari va mehnat guzarlarini saqlab turish xarajatlarini oʻz mablagʻlari hisobiga qoplashi;

g) bitim amal qiladigan butun muddat davomida obyekt faoliyatining ixtisosligini saqlashi;

d) kovorking markazlari va mehnat guzarlariga ish oʻrinlari umumiy sonining kamida 70 foizi miqdorida band boʻlmagan yoshlarni ishga qabul qilish sharti bilan mustaqil ravishda tadbirkorlik faoliyatini tashkil etishi;

e) kovorking markazlarida:

yoshlar tadbirkorligi subyektlariga, tadbirkorlarga imtiyozli shartlarda ofis xonalari va texnika, sarflash materiallarini ijaraga berishi, ularni Internet jahon axborot tarmogʻi bilan taʼminlashi;

yoshlarning biznes tashabbuslari, startaplari, gʻoyalari va loyihalarini amalga oshirishga boshqacha tarzda koʻmaklashishi, jumladan, biznes rejalar ishlab chiqish, maslahat, yuridik, buxgalteriya xizmatlari va boshqa xizmat turlarini koʻrsatishi;

tadbirkorlik faoliyatiga oid boʻlgan forumlar, mahorat darslari va seminarlar tashkil etishi;

j) mehnat guzarlarida:

tadbirkorlik subyektlariga chakana savdo va maishiy xizmatlar koʻrsatish faoliyatini tashkil etish uchun imtiyozli shartlarda ijaraga joy ajratishi;

band boʻlmagan ishsiz yoshlarni foydali mehnat faoliyatiga oʻrgatishi hamda ularning bandligini taʼminlashga koʻmaklashishi shart.

Xususiy sherik zimmasida ushbu Nizomda va qonun hujjatlarida nazarda tutilgan boshqa majburiyatlar ham boʻlishi mumkin.

42. Bitim amal qiladigan muddat tugamay turib xususiy sherik mulki boʻlgan obyektning u tomonidan musodara qilinishiga yoʻl qoʻyilmaydi, xususiy sherik Oʻzbekiston Respublikasi qonun hujjatlariga muvofiq almashtirilishi mustasno.

43. “Yoshlar — kelajagimiz” Davlat dasturi doirasida davlat-xususiy sheriklik shartlarida “Yosh tadbirkorlar” kovorking markazlari va “Yoshlar mehnat guzari” komplekslarini qurishda qurilish qiymatining 30 foizigacha boʻlgan qismini “Yoshlar — kelajagimiz” jamgʻarmasi mablagʻlari hisobiga moliyalashtirish uchun davlat-xususiy sheriklik loyihalarini koʻrib chiqish ushbu Nizomga 2-ilovaga muvofiq sxema boʻyicha amalga oshiriladi.

44. Davlat-xususiy sheriklik loyihasini amalga oshirish istagini bildirgan xususiy sherik kovorking markazi yoki mehnat guzari qurilishi qiymatining 30 foizgacha boʻlgan qismini Jamgʻarma mablagʻlari hisobidan moliyalashtirishni soʻrab har oyning 5-kuniga qadar Jamgʻarmaning tuman (shahar) filialiga (keyingi oʻrinlarda Jamgʻarma filiali deb ataladi) ushbu Nizomning 8-bandiga muvofiq taqdim etilgan arizaga qoʻshimcha ravishda quyidagi hujjatlarni ilova qiladi:

davlat-xususiy sheriklik loyihasini amalga oshirish uchun Jamgʻarma mablagʻlariga boʻlgan ehtiyoj va moliyalashtirish miqdori asoslangan tushuntirish xati;

davlat-xususiy sheriklik loyihasini amalga oshirishda xususiy sherikning moliyaviy holati, xususan, oʻz mablagʻlari va (yoki) u tomonidan jalb etilgan kreditlar va boshqa manbalar hisobiga amalga oshirilishini tasdiqlovchi maʼlumot;

qurilishning loyiha-smeta hujjatlari;

kovorking markazi yoki mehnat guzarini qurish maqsadida yer uchastkasini xususiy sherikka taqdim etish toʻgʻrisida tuman (shahar) hokimligining qaroridan koʻchirma (agar yer uchastkasi ajratilgan boʻlsa);

kovorking markazi yoki mehnat guzarini joylashtirish maqsadida davlat mulki boʻlgan boʻsh turgan obyekt xususiy sherikka taqdim etilganligini tasdiqlovchi hujjatdan koʻchirma (agar davlat mulki boʻlgan boʻsh turgan obyekt ajratilgan boʻlsa);

yer uchastkasiga yoki binoga boʻlgan huquq davlat roʻyxatidan oʻtkazilganligi haqidagi guvohnoma;

davlat-xususiy sheriklik toʻgʻrisida tuzilgan bitimdan nusxa.

45. Jamgʻarma filiali hujjatlar toʻplami toʻliq taqdim etilgan kundan boshlab har oyning 10-kunigacha ularning ushbu Nizomning 8, 9 va 44-bandlarida nazarda tutilgan talablarga muvofiqligi yuzasidan koʻrib chiqadi.

46. Ushbu Nizomning 8, 9 va 44-bandlari talablari buzilgan holda taqdim etilgan hujjatlar koʻrib chiqilmasdan har oyning 12-kunigacha xususiy sherikka qaytariladi.

Taqdim etilgan arizada talablar buzilganligi haqidagi bildirishnoma yozma shaklda, shu jumladan, elektron axborot tizimi orqali xususiy sherikka yetkaziladi (joʻnatiladi). Bildirishnomada qanday talablar buzilganligi, qonun hujjatlarining aniq normalari va xususiy sherik koʻrsatilgan talablar buzilishini bartaraf etib, hujjatlarni Jamgʻarma filialiga takror koʻrib chiqish uchun taqdim etishi mumkin boʻlgan muddat koʻrsatiladi.

Xususiy sherik talablar buzilishini bartaraf etishga va hujjatlarni takror koʻrib chiqish uchun taqdim etishga haqli boʻlgan muddat yozma yoki elektron bildirishnoma olingan kundan boshlab oʻn besh ish kunidan kam boʻlishi mumkin emas.

Kamchiliklar bartaraf etilib takror taqdim etilgan ariza belgilangan tartibda qayta koʻrib chiqiladi.

47. Xususiy sherik tomonidan taqdim etilgan hujjatlar Jamgʻarma filiali tomonidan har oyning 12-kuniga qadar Jamgʻarmaga beriladi, ularga hujjatlar toʻplamining, shu jumladan, davlat-xususiy sheriklik loyihasi hujjatlarining ushbu Nizomning 8, 9 va 44-bandlari talablariga muvofiqligi yuzasidan Jamgʻarma filiali rahbari imzolagan tegishli xulosa ilova qilinadi.

48. Jamgʻarma taklif etilayotgan davlat-xususiy sheriklik loyihasini har oyning 18-kuniga qadar quyidagi asosda koʻrib chiqadi:

taklif etilayotgan davlat-xususiy sheriklik loyihasining faoliyati sohasi Jamgʻarmaning asosiy vazifalariga va ushbu Nizom talablariga muvofiqligi;

xususiy sherikning yetarlicha moliyaviy quvvatga egaligi;

tashkil etiladigan korxonaning shtatdagi xodimlarini jalb etilgan xodimlar umumiy sonining 70 foizidan kam boʻlmagan qismini yoshlar bilan toʻldirishi.

Jamgʻarma davlat-xususiy sheriklik loyihasini Jamgʻarma mablagʻlari bilan ishtirok etishning qonun hujjatlariga zid boʻlmagan boshqa talablari asosida ham koʻrib chiqishi mumkin.

49. Jamgʻarma davlat-xususiy sheriklik loyihalarini koʻrib chiqish natijalari boʻyicha quyidagi mazmundagi qarorlardan birini qabul qiladi:

a) Jamgʻarma mablagʻlari bilan ishtirok etish yuzasidan taklif etilayotgan davlat-xususiy sheriklik loyihasini Jamgʻarmaning Kuzatuv kengashiga (keyingi oʻrinlarda Kuzatuv kengashi deb ataladi) koʻrib chiqish uchun kiritish toʻgʻrisida;

b) aniq va asoslantirilgan taklif hamda eʼtirozlarni koʻrsatgan holda taqdim etilgan hujjatlarni qayta koʻrib chiqish zarurligi toʻgʻrisida;

v) davlat-xususiy sheriklik loyihasini amalga oshirishda Jamgʻarma mablagʻlari bilan ishtirok etishning maqsadga muvofiq emasligi toʻgʻrisida.

50. Ushbu Nizomning 49-bandi “b” kichik bandiga muvofiq davlat-xususiy sheriklik loyihalari Jamgʻarmaga qayta koʻrib chiqish uchun takroran kiritiladi.

51. Taklif etilayotgan davlat-xususiy sheriklik loyihasini ushbu Nizomning 49-bandi “v” kichik bandiga muvofiq Kuzatuv kengashiga kiritish rad etilgan taqdirda, Jamgʻarma filiali orqali xususiy sherikka ariza asoslantirilgan holda rad etilganligi toʻgʻrisida har oyning 20-kuniga qadar yozma shaklda maʼlum qiladi.

52. Jamgʻarma tomonidan maʼqullangan istiqbolli davlat-xususiy sheriklik loyihalari har oyning 20-kuniga qadar Kuzatuv kengashiga koʻrib chiqish uchun belgilangan tartibda kiritiladi.

53. Kuzatuv kengashi har oyning 25-kuniga qadar davlat-xususiy sheriklik loyihalarini budjet parametrlari doirasida koʻrib chiqadi va quyidagi mazmundagi qarorlardan birini qabul qiladi:

a) davlat-xususiy sheriklik loyihasini amalga oshirish uchun Jamgʻarma mablagʻlari bilan ishtirok etish toʻgʻrisida (qarorda ajratiladigan mablagʻ miqdori koʻrsatilishi hamda uning miqdori kovorking markazi yoki mehnat guzari qurilishi qiymatining 30 foizidan koʻp boʻlmasligi lozim);

b) davlat-xususiy sheriklik loyihasini amalga oshirishda Jamgʻarma mablagʻlari bilan ishtirok etishni rad etish toʻgʻrisida.

54. Taklif etilayotgan davlat-xususiy sheriklik loyihasi ushbu Nizomning 53-bandi “b” kichik bandiga muvofiq rad etilgan taqdirda, Jamgʻarma filiali orqali xususiy sherikka ariza asoslantirilgan holda rad etilganligi toʻgʻrisida har oyning 28-kunidan kech boʻlmagan muddatda yozma shaklda maʼlum qilinadi.

55. Kuzatuv kengashining davlat-xususiy sheriklik loyihasi boʻyicha ijobiy qarori Kuzatuv kengashi majlisining bayonnomasi bilan rasmiylashtiriladi hamda Jamgʻarma filiali va xususiy sherik oʻrtasida “Masʼuliyati cheklangan hamda qoʻshimcha masʼuliyatli jamiyatlar toʻgʻrisida”gi Oʻzbekiston Respublikasi Qonuniga muvofiq masʼuliyati cheklangan jamiyat yoki qoʻshimcha masʼuliyatli jamiyat (keyingi oʻrinlarda jamiyat deb ataladi) taʼsis shartnomasini tuzish uchun asos hisoblanadi.

56. Davlat-xususiy sheriklik loyihasi boʻyicha ijobiy qaror qabul qilingan Kuzatuv kengashi majlisining bayonnomasida quyidagilar qayd etilishi lozim:

Jamgʻarma tomonidan ajratiladigan mablagʻ miqdori, ustav fondidagi (ustav kapitalidagi) foiz ulushi, usullari va muddatlari;

taʼsis shartnomasini imzolash muddati;

qonun hujjatlariga muvofiq boshqa alohida shartlar.

57. Kuzatuv kengashi majlisi bayonnomasining nusxasi uni Kuzatuv kengashi tasdiqlagan kundan boshlab uch ish kuni mobaynida Jamgʻarma tomonidan uning filiali orqali xususiy sherikka yuboriladi.

58. Jamgʻarma filiali:

jamgʻarma mablagʻlarini moliyalashtirish davriga qadar boʻlgan muddatda davlat-xususiy sheriklik toʻgʻrisida bitim bekor qilinganda, shuningdek, xususiy sherik tomonidan Jamgʻarma mablagʻlari bilan ishtirok etishni rad etib yozma ravishda murojaat qilinganda taʼsis shartnomasini imzolamaydi va bu haqda Jamgʻarmaga axborot kiritadi;

jamgʻarma mablagʻlari bilan ishtirok etiladigan davlat-xususiy sheriklik loyihalarni amalga oshirish uchun qonun hujjatlariga muvofiq Kuzatuv kengashi majlisining bayonnomasida belgilangan muddatda xususiy sherik bilan taʼsis shartnomasi tuzadi va jamiyat ustavini tasdiqlaydi.

59. Jamiyat yuridik shaxs sifatida belgilangan tartibda davlat roʻyxatidan oʻtkaziladi.

Agar taʼsis shartnomasida boshqacha tartib nazarda tutilmagan boʻlsa, jamiyatni yuridik shaxs sifatida davlat roʻyxatidan oʻtkazish uchun zarur boʻlgan hujjatlarni tayyorlash xususiy sherik tomonidan amalga oshiriladi.

60. Jamiyat yuridik shaxs sifatida davlat roʻyxatidan oʻtkazilgandan keyin xususiy sherik tomonidan Jamgʻarma filialiga quyidagi hujjatlar taqdim etiladi:

yuridik shaxs davlat roʻyxatidan oʻtkazilganligi toʻgʻrisidagi guvohnoma;

jamiyat ustavining davlat roʻyxatidan oʻtkazilgan nusxasi.

Davlat-xususiy sheriklik loyihasidan kelib chiqib Jamgʻarmaning filiali xususiy sherikdan qoʻshimcha maʼlumot va (yoki) hujjatlar soʻrab olishi mumkin.

61. Jamiyat yuridik shaxs sifatida davlat roʻyxatidan oʻtkazilganidan soʻng Jamgʻarma oʻzining filiali soʻroviga asosan taʼsis shartnomasida belgilangan muddatlarda Jamgʻarmaning filiali orqali xususiy sherikka belgilangan tartibda mablagʻlarni ajratadi.

Jamgʻarma mablagʻlari qiymati ikki milliard soʻmdan yuqori boʻlgan davlat-xususiy sheriklik loyihasi Oʻzbekiston Respublikasi Prezidenti huzuridagi Loyiha boshqaruvi milliy agentligining ijobiy xulosasi olingandan soʻng moliyalashtiriladi.

62. Jamiyat ustav fondiga (ustav kapitaliga) Jamgʻarma ulushi pul (milliy valyuta) yoki mol-mulk tarzida kiritilishi mumkin.

63. Kovorking markazlari va mehnat guzarlari qurilishi uchun ajratilgan Jamgʻarma mablagʻlari jamiyatning taʼsis shartnomasida belgilangan muddatlarda jamiyatning ustav jamgʻarmasiga (ustav kapitaliga) kapitallashtiriladi.

64. Kovorking markazlari va mehnat guzarlari qurilishi uchun Jamgʻarma mablagʻlari ajratilgan jamiyatni tashkil etish va boshqarish bilan bogʻliq munosabatlar “Masʼuliyati cheklangan hamda qoʻshimcha masʼuliyatli jamiyatlar toʻgʻrisida”gi Oʻzbekiston Respublikasi Qonuni va boshqa qonun hujjatlariga muvofiq amalga oshiriladi.

65. Ushbu Nizom talablari buzilishida aybdor shaxslar qonun hujjatlarida belgilangan tartibda javob beradilar.

1. Ushbu Nizom “Yoshlar — kelajagimiz” Davlat dasturi (keyingi oʻrinlarda Davlat dasturi deb ataladi) doirasida amalga oshiriladigan tadbirkorlik loyihalarida Oʻzbekiston yoshlar ittifoqi huzuridagi “Yoshlar — kelajagimiz” jamgʻarmasining (keyingi oʻrinlarda Jamgʻarma deb ataladi) ishtirok etishi tartibini belgilaydi.

2. Jamgʻarma Davlat dasturi doirasida amalga oshiriladigan tadbirkorlik loyihalarida ushbu loyihalar qiymatining 50 foizidan koʻp boʻlmagan miqdorda mablagʻlar ajratish, keyinchalik Jamgʻarma ulushini 5 yil mobaynida realizatsiya qilish yoʻli bilan ishtirok etadi.

3. Ushbu Nizomda quyidagi asosiy tushunchalardan foydalaniladi:

loyiha tashabbuskorlari — Davlat dasturi doirasida tadbirkorlik va daromad keltiradigan mehnat faoliyati bilan shugʻullanish istagida boʻlgan yoshlar tadbirkorligi subyektlari (18 yoshga toʻlgan va 30 yoshdan oshmagan yoshlar), 50 foiz va undan koʻproq muassislari yoshlardan iborat boʻlgan tadbirkorlik subyektlari, shuningdek, yaratiladigan ish oʻrinlarining 70 foizidan kam boʻlmagan qismini 5 yil mobaynida yoshlarni ish bilan taʼminlash uchun taqdim etish majburiyatini oʻz zimmasiga oladigan tadbirkorlik subyektlari, jumladan, xorijiy investorlar;

tadbirkorlik loyihasi (keyingi oʻrinlarda loyiha deb ataladi) — tadbirkorlik subyekti tomonidan Davlat dasturi doirasida tegishli tuman (shahar)da amalga oshiriladigan tadbirkorlik loyihasi.

4. “Yoshlar — kelajagimiz” Davlat dasturi doirasida amalga oshiriladigan tadbirkorlik loyihalarida ishtirok etish ushbu Nizomga ilovaga muvofiq sxema boʻyicha amalga oshiriladi.

5. Jamgʻarma mablagʻlari (ulushi) quyidagi maqsadlarga ajratilmaydi:

tadbirkorlik subyektining oldin olingan kreditlari yoki boshqa har qanday qarzlarini qaytarishga;

spirtli ichimliklar va tamaki mahsulotlari, shuningdek, chilim va elektron sigaretalar ishlab chiqarishga;

umumiy ovqatlanish tashkilotlarining aylanma mablagʻlarini shakllantirishga;

ishlab chiqarish maqsadlari uchun ishlatilmaydigan shaxsiy mulkni sotib olishga;

maʼmuriy xarajatlarni toʻlashga, jumladan, xizmat avtomobillari taʼminotiga;

tirajli, bir lahzali va raqamli lotereyalarni tashkil etishga, shuningdek, ushbu maqsadlar uchun uskunalar xarid qilishga;

Davlat dasturi doirasida tadbirkorlik subyektlariga kreditlarni qaytarish majburiyatlari boʻyicha taʼminot sifatida Jamgʻarma kafilligi berilgan loyihalarga;

Davlat dasturi doirasida davlat-xususiy sheriklik shartlarida “Yosh tadbirkorlar” kovorking markazlari va “Yoshlar mehnat guzari” komplekslarini qurish uchun jamgʻarma mablagʻlari hisobiga moliyalashtirilgan loyihalarga.

6. Loyiha tashabbuskori loyiha amalga oshiriladigan hududdagi Jamgʻarmaning tuman (shahar) filialiga (keyingi oʻrinlarda Jamgʻarma filiali deb ataladi) loyihani amalga oshirishda Jamgʻarma mablagʻlari (ulushi) bilan ishtirok etishni soʻrab ariza bilan birga quyidagi hujjatlarni taqdim etadi:

biznes-reja;

tegishli davlat soliq inspeksiyasiga oxirgi hisobot davri uchun buxgalteriya balansi (1-son shakl), 90 kundan ortiq muddatdagi qarzlarga doir solishtirish dalolatnomalari, moliyaviy natijalar toʻgʻrisida hisobot (2-son shakl), yangi tashkil etilgan yuridik shaxslar bundan mustasno;

jamiyat muassislarining (ishtirokchilarining) tarkibi va jamiyatning taʼsis shartnomasidan koʻchirma, jismoniy shaxslar bundan mustasno;

taklif etilayotgan loyihani amalga oshirish uchun zarur boʻlgan infratuzilma va muhandislik inshootlarining mavjudligini tasdiqlovchi hujjat.

7. Jamgʻarma filiali taqdim etilgan hujjatlarni ushbu Nizomning 5 va 6-bandlarida nazarda tutilgan talablarga muvofiqlik yuzasidan har oyning 10-kuniga qadar koʻrib chiqadi.

Loyiha yoʻnalishidan kelib chiqib loyiha tashabbuskoridan loyiha boʻyicha qoʻshimcha maʼlumot va (yoki) hujjatlar soʻrab olinishi mumkin. Bu holda soʻrab olingan qoʻshimcha maʼlumot va (yoki) hujjatlar hujjat taqdim etilgan oyning 10-kunidan kechikmay Jamgʻarma filiali tomonidan koʻrib chiqilishi lozim.

8. Ariza ushbu Nizomning 5 va 6-bandlari talablari buzilgan holda berilgan boʻlsa, hujjatlar ariza beruvchiga har oyning 12-kuniga qadar qaytariladi.

Taqdim etilgan arizada talablar buzilganligi haqidagi bildirishnoma yozma shaklda, shu jumladan, elektron axborot tizimi orqali xususiy sherikka yetkaziladi (joʻnatiladi). Bildirishnomada qanday talablar buzilganligi, qonun hujjatlarining aniq normalari va xususiy sherik koʻrsatilgan talablar buzilishini bartaraf etib, hujjatlarni Jamgʻarma filialiga takroran koʻrib chiqish uchun taqdim etishi mumkin boʻlgan muddat koʻrsatiladi.

Loyiha tashabbuskori talablar buzilishini bartaraf etishga va hujjatlarni takroran koʻrib chiqish uchun taqdim etishga haqli boʻlgan muddat yozma yoki elektron bildirishnoma olingan kundan boshlab oʻn besh ish kunidan kam boʻlishi mumkin emas.

Kamchiliklar bartaraf etilib takror taqdim etilgan ariza qabul qilingan kundan boshlab ushbu Nizomning 7-bandida belgilangan tartibda qayta koʻrib chiqiladi.

9. Loyiha tashabbuskori tomonidan taqdim etilgan hujjatlar Jamgʻarma filiali tomonidan har oyning 12-kuniga qadar Jamgʻarmaga beriladi, ularga hujjatlar toʻplami, shu jumladan, loyiha hujjatlarining ushbu Nizomning 5 va 6-bandlari talablariga muvofiqligi yuzasidan Jamgʻarma filiali rahbari imzolagan tegishli xulosa ilova qilinadi.

10. Jamgʻarma taklif etilayotgan loyihani har oyning 18-kuniga qadar quyidagilarga asosan koʻrib chiqadi hamda uni Jamgʻarmaning Kuzatuv kengashiga (keyingi oʻrinlarda Kuzatuv kengashi deb ataladi) kiritish yoki rad etish toʻgʻrisida qaror qabul qiladi:

taklif etilayotgan loyihaning faoliyat sohasi Jamgʻarmaning asosiy vazifalariga muvofiqligi;

loyihada mahalliy xomashyo resurslaridan foydalanilishi;

loyihada yuqori texnologiyali uskunalar va texnologiyalarni qoʻllagan holda yangi zamonaviy ishlab chiqarish tashkil etilishi;

loyihaning talab katta boʻlgan import oʻrnini bosadigan va eksportga moʻljallangan raqobatbardoshli mahsulotlar ishlab chiqarishga qaratilganligi;

loyihaning ekologiya va atrof-muhitni muhofaza qilish talablariga muvofiqligi;

loyiha tashabbuskorining moliyaviy quvvatga egaligi;

loyihaning umumiy iqtisodiy samaradorligi va uni amalga oshirishning maqsadga muvofiqligi (ishlab chiqarish quvvatlarining maqbul joylashtirilishi, tashkil etiladigan ish oʻrinlari, zarur xomashyo, materiallar va infratuzilmaning mavjudligi va hokazolar);

loyihani amalga oshirish orqali ishlab chiqarilgan (yetishtirilgan) tayyor mahsulotni ichki va tashqi bozorlarda sotish imkoniyati va istiqbollari;

tashkil etiladigan korxonada ishchilar (xodimlar) umumiy sonining 70 foizidan kam boʻlmagan qismini 5 yil mobaynida yoshlar bilan toʻldirish majburiyati olinishi.

Jamgʻarma loyihani Jamgʻarma mablagʻlari bilan ishtirok etishning qonun hujjatlariga zid boʻlmagan boshqa talablari asosida ham koʻrib chiqishi mumkin.

11. Jamgʻarma loyihani koʻrib chiqish natijalari boʻyicha quyidagi mazmundagi qarorlardan birini qabul qiladi:

a) Jamgʻarma mablagʻlari bilan ishtirok etish yuzasidan taklif etilayotgan loyihani Kuzatuv kengashiga koʻrib chiqish uchun kiritish toʻgʻrisida;

b) aniq va asoslangan mulohazalar hamda kamchiliklarni koʻrsatgan holda taqdim etilgan hujjatlarni qayta ishlash zarurligi toʻgʻrisida;

v) loyihani amalga oshirishda Jamgʻarma mablagʻlari bilan ishtirok etishning maqsadga muvofiq emasligi toʻgʻrisida.

12. Ushbu Nizomning 11-bandi “b” kichik bandiga muvofiq qayta ishlangan loyiha Jamgʻarmaga koʻrib chiqish uchun takroran kiritiladi.

13. Taklif etilayotgan loyihani ushbu Nizomning 11-bandi “v” kichik bandiga muvofiq Kuzatuv kengashiga kiritish rad etilgan taqdirda, Jamgʻarma filiali orqali loyiha tashabbuskoriga ariza asoslantirilgan holda rad etilganligi toʻgʻrisida har oyning 20-kuniga qadar yozma shaklda maʼlum qilinadi.

14. Jamgʻarma tomonidan maʼqullangan istiqbolli loyiha har oyning 20-kuniga qadar Kuzatuv kengashiga koʻrib chiqish uchun belgilangan tartibda kiritiladi.

15. Kuzatuv kengashi har oyning 25-kuniga qadar loyihani budjet parametrlari doirasida koʻrib chiqadi va quyidagi mazmundagi qarorlardan birini qabul qiladi:

a) Jamgʻarma mablagʻlari bilan ishtirok etish toʻgʻrisida;

b) Jamgʻarma mablagʻlari bilan ishtirok etishni rad etish toʻgʻrisida.

16. Taklif etilayotgan loyiha ushbu Nizomning 15-bandi “b” kichik bandiga muvofiq rad etilgan taqdirda, Jamgʻarma filiali orqali loyiha tashabbuskoriga ariza asoslantirilgan holda rad etilganligi toʻgʻrisida har oyning 28-kunidan kech boʻlmagan muddatda yozma shaklda maʼlum qilinadi.

17. Kuzatuv kengashining loyiha boʻyicha ijobiy qarori Kuzatuv kengashi majlisining bayonnomasi bilan rasmiylashtiriladi hamda Jamgʻarma filiali va loyiha tashabbuskori oʻrtasida “Masʼuliyati cheklangan hamda qoʻshimcha masʼuliyatli jamiyatlar toʻgʻrisida”gi Oʻzbekiston Respublikasi Qonuniga muvofiq masʼuliyati cheklangan jamiyat yoki qoʻshimcha masʼuliyatli jamiyat (keyingi oʻrinlarda jamiyat deb ataladi) taʼsis shartnomasini tuzish uchun asos hisoblanadi.

18. Loyiha boʻyicha ijobiy qaror qabul qilingan Kuzatuv kengashi majlisining bayonnomasida quyidagilar qayd etilishi lozim:

Jamgʻarma tomonidan ajratiladigan mablagʻ miqdori, ustav fondidagi (ustav kapitalidagi) foiz ulushi, usullari va muddatlari;

taʼsis shartnomasini imzolash muddati;

amalga oshiriladigan faoliyat turi yoki turlari;

loyihani amalga oshirish jadvallari;

qonun hujjatlariga muvofiq boshqa alohida shartlar.

19. Kuzatuv kengashi majlisi bayonnomasining nusxasi bayonnomani Kuzatuv kengash tasdiqlagan kundan boshlab 3 ish kuni mobaynida Jamgʻarma tomonidan uning filiali orqali loyiha tashabbuskoriga yuboriladi.

20. Jamgʻarma filiali:

jamgʻarma mablagʻlarini moliyalashtirish davriga qadar boʻlgan muddatda loyiha tashabbuskori tomonidan Jamgʻarma mablagʻlari (ulushi) bilan ishtirok etishni rad etib yozma ravishda murojaat qilinganda, shuningdek, Kuzatuv kengashi majlisi bayonnomasida belgilangan tadbirkorlik faoliyati turi yoki turlari oʻzgartirilganda taʼsis shartnomasini imzolamaydi va bu haqda Jamgʻarmaga axborot kiritadi;

jamgʻarma mablagʻlari (ulushi) bilan ishtirok etiladigan loyihalarni amalga oshirish uchun qonun hujjatlariga muvofiq Kuzatuv kengashi majlisining bayonnomasida belgilangan muddatda loyiha tashabbuskori bilan taʼsis shartnomasini tuzadi va jamiyat ustavini tasdiqlaydi.

21. Jamiyat yuridik shaxs sifatida belgilangan tartibda davlat roʻyxatidan oʻtkaziladi.

Agar taʼsis shartnomasida boshqacha tartib nazarda tutilmagan boʻlsa, jamiyatni yuridik shaxs sifatida davlat roʻyxatidan oʻtkazish uchun zarur boʻlgan hujjatlarni tayyorlash loyiha tashabbuskori tomonidan amalga oshiriladi.

22. Jamiyat yuridik shaxs sifatida davlat roʻyxatidan oʻtkazilgandan keyin loyiha tashabbuskori tomonidan Jamgʻarma filialiga quyidagi hujjatlar taqdim etiladi:

yuridik shaxs davlat roʻyxatidan oʻtkazilganligi toʻgʻrisidagi guvohnoma;

jamiyat ustavining davlat roʻyxatidan oʻtkazilgan nusxasi;

loyiha amalga oshiriladigan yer uchastkalari, binolar va inshootlarga boʻlgan huquqlarni tasdiqlovchi qonun hujjatlarida nazarda tutilgan hujjatlar.

Loyiha yoʻnalishidan kelib chiqib Jamgʻarmaning filiali loyiha tashabbuskoridan loyiha boʻyicha qoʻshimcha maʼlumot va (yoki) hujjatlarni soʻrab olishi mumkin.

23. Jamiyat yuridik shaxs davlat roʻyxatidan oʻtkazilganidan soʻng Jamgʻarma uning filiali soʻroviga asosan taʼsis shartnomasida belgilangan muddatlarda Jamgʻarmaning filiali orqali jamiyat ustav fondiga (ustav kapitaliga) belgilangan Jamgʻarma ulushini ajratadi.

Jamgʻarma ulushi qiymati ikki milliard soʻmdan yuqori boʻlgan loyihalar Oʻzbekiston Respublikasi Prezidenti huzuridagi Loyiha boshqaruvi milliy agentligining ijobiy xulosasi olingandan soʻng ajratiladi.

24. Jamiyat ustav fondiga (ustav kapitaliga) Jamgʻarma ulushi pul (milliy valyuta) yoki mol-mulk tarzida kiritilishi mumkin.

25. Jamgʻarma Davlat dasturi doirasida amalga oshiriladigan loyihalarda ushbu Nizomning 2-bandida belgilangan tartibda ishtirok etadi.

26. Jamgʻarma mablagʻlari hisobidan ishtirok etilgan ulushni realizatsiya qilishda ulush qiymatining birinchi navbatda loyiha tashabbuskori va (yoki) jamiyatning boshqa ishtirokchilari tomonidan sotib olinishiga ustuvorlik beriladi. Loyiha tashabbuskori (yoki) jamiyatning boshqa ishtirokchilari tomonidan Jamgʻarma ulushini sotib olish rad etilgan taqdirda, Jamgʻarma ulushi boshqa tashabbuskor tadbirkorlarga sotilishi mumkin.

27. Jamgʻarma mablagʻlari (ulushi) bilan ishtirok etgan loyihalarda qonun hujjatlarida belgilangan tartibda oʻz ulushlarini sotuvga chiqaradi. Ulushlar ushbu ulushlarning haqiqiy bahosidan kelib chiqib sotiladi.

Ulushlarning haqiqiy bahosi mustaqil baholovchi tashkilot yoki fond birjasida qonun hujjatlarida belgilangan tartibda aniqlanadi.

28. Ushbu Nizom talablari buzilishida aybdor shaxslar qonun hujjatlarida belgilangan tartibda javob beradilar.

1. Vazirlar Mahkamasining “Oʻzbekiston yoshlar ittifoqi huzuridagi “Yoshlar — kelajagimiz” jamgʻarmasi faoliyatini tashkil etish chora-tadbirlari toʻgʻrisida” 2018-yil 16-avgustdagi 669-son qarorida:

a) Oʻzbekiston yoshlar ittifoqi huzuridagi “Yoshlar — kelajagimiz” jamgʻarmasi toʻgʻrisidagi nizomda:

12-bandning uchinchi xatboshiga “shuningdek, Davlat dasturi doirasida tadbirkorlik subyektlarining loyihalarini tezkorlik bilan koʻrib chiqish maqsadida ichki komissiya tuzishi mumkin” soʻzlari qoʻshilsin;

26-band quyidagi tahrirda bayon qilinsin:

“26. Jamgʻarma tomonidan manzilli roʻyxatga muvofiq tijorat bankining murojaati asosida ajratilgan resurs mablagʻlariga, ushbu mablagʻ tegishli tijorat bankiga oʻtkazilgan kundan boshlab foiz hisoblanadi, shuningdek, tadbirkorlik subyektlariga berilgan kredit va mol-mulk lizingi boʻyicha asosiy qarz va hisoblangan foizlarning qaytarilishidan qatʼi nazar, tijorat banki tomonidan Jamgʻarmaga resurs va unga hisoblangan foiz toʻlovlari belgilangan muddatda qaytarilishi shart.”;

b) Oʻzbekiston yoshlar ittifoqi huzuridagi “Yoshlar — kelajagimiz” jamgʻarmasi mablagʻlaridan imtiyozli kreditlar ajratish va lizing xizmatlarini koʻrsatish hamda tijorat banklari kreditlari boʻyicha kafilliklar berish tartibi toʻgʻrisidagi nizomda:

25-bandning oltinchi xatboshi chiqarib tashlansin;

yettinchi — toʻqqizinchi xatboshilar tegishlicha oltinchi — sakkizinchi xatboshilar deb hisoblansin;

26-band quyidagi tahrirda bayon etilsin:

“26. Aylanma mablagʻlarni toʻldirishga imtiyozli kreditlar tadbirkorlik subyektlariga 18 oy muddatgacha ajratiladi”.