O‘zbekiston Respublikasi Prezidentining “Diniy-ma’rifiy soha faoliyatini tubdan takomillashtirish chora-tadbirlari to‘g‘risida” 2018-yil 16-apreldagi PF-5416-son Farmoni ijrosini ta’minlash, islom dini va hadis ilmi rivojiga beqiyos hissa qo‘shgan buyuk vatandoshlarimizning boy merosini chuqur o‘rganish, ular tomonidan asos solingan hadis ilmi maktablari faoliyatini qayta tiklash va rivojlantirish hamda islom dini asoslari va hadis ilmini mukammal o‘zlashtirgan oliy ma’lumotli yetuk mutaxassislarni tayyorlash maqsadida Vazirlar Mahkamasi qaror qiladi:

1. O‘zbekiston Respublikasi Prezidentining “Diniy-ma’rifiy soha faoliyatini tubdan takomillashtirish chora-tadbirlari to‘g‘risida” 2018-yil 16-apreldagi PF-5416-son Farmoni bilan oliy diniy-ma’rifiy ta’lim muassasasi shaklidagi Hadis ilmi maktabi (keyingi o‘rinlarda Maktab deb ataladi) tashkil etilganligi ma’lumot uchun qabul qilinsin.

2. Belgilab qo‘yilsinki:

Maktab O‘zbekiston musulmonlari idorasi muassisligidagi oliy diniy ta’lim beruvchi nodavlat ta’lim muassasasi hisoblanadi;

Maktab bitiruvchilariga beriladigan davlat namunasidagi diplom O‘zbekiston Respublikasida oliy diniy ta’lim sohasidagi tegishli mutaxassisliklar bo‘yicha bakalavr darajasini beruvchi oliy ma’lumot to‘g‘risidagi hujjat deb e’tirof etiladi.

3. Quyidagilar Maktabning asosiy vazifalari etib belgilangani inobatga olinsin:

Qur’oni karim va hadislarning asl mohiyatini, hadis ilmining ilmiy-nazariy asoslarini chuqur o‘rgangan, hadis ilmi rivojiga beqiyos hissa qo‘shgan ulug‘ vatandoshlarimizning ulkan ilmiy merosini puxta o‘zlashtirgan, hadisshunoslik sohasida ilmiy izlanishlar olib borish ko‘nikmasiga ega mutaxassislarni tayyorlash;

hadisshunoslik maktabi shakllanishi va rivojlanishi, uning ilmiy-ma’naviy asoslarini har tomonlama chuqur o‘rganish, tadqiq etish va uning natijalari asosida hadislardagi ezgu umuminsoniy g‘oyalarni xalqimizga, ayniqsa, yosh avlodga yetkazish.

4. Quyidagilar:

Maktabda o‘qish muddati besh yil ekanligi, u kunduzgi ta’lim shaklida olib borilishi;

Maktabda “Hadisshunoslik” ta’lim yo‘nalishi bo‘yicha bakalavr darajasidagi kadrlar tayyorlash yo‘lga qo‘yilishi;

Maktabga 2018/2019 o‘quv yili uchun qabul kvotasi jami 10 ta o‘rin etib va keyingi yillar uchun qabul kvotasini shakllantirish ushbu sohadagi talab hamda ehtiyojdan kelib chiqqan holda Maktab muassisi tomonidan belgilanishi;

Maktabga arab tilini puxta o‘zlashtirgan, hadislarni yod olishga salohiyati bo‘lgan o‘rta maxsus diniy ta’lim muassasalarining iqtidorli bitiruvchilari saralab olinishi;

Maktab bitiruvchisi ta’limni o‘z ixtisosligiga ko‘ra O‘zbekiston xalqaro islomshunoslik akademiyasi magistraturasida davom ettirishi, tayanch doktorantura va doktorantura bosqichlarida tahsil olishi inobatga olinsin.

5. O‘zbekiston musulmonlari idorasiga:

bir oy muddatda O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mita bilan birgalikda belgilangan tartibda Maktabning tuzilmasi va ustavini tasdiqlash va davlat ro‘yxatidan o‘tkazish;

Maktab faoliyatini samarali yo‘lga qo‘yish maqsadida ilmiy-pedagog kadrlar tarkibini respublika oliy ta’lim va ilmiy-tadqiqot muassasalarida hamda O‘zbekiston musulmonlari idorasi tizimida faoliyat ko‘rsatayotgan mutaxassislardan shakllantirish, shu jumladan, Maktabga xorijiy ta’lim (ilmiy) muassasalarida malakasini oshirib kelgan, yuqori saviyali professor-o‘qituvchilar va ilmiy xodimlar, sohaning salohiyatli, yetuk mutaxassislarini jalb etish choralarini ko‘rish;

O‘zbekiston Respublikasi Din ishlari bo‘yicha qo‘mitasi Tashqi ishlar vazirligi bilan birgalikda Maktab bilan xorijiy mamlakatlarning nufuzli ilmiy va ta’lim muassasalari o‘rtasida hamkorlik aloqalarini o‘rnatish, xorijlik professor-o‘qituvchilarni Maktabga jalb qilish;

Maktab professor-o‘qituvchilarini malaka oshirish, tajriba almashish va o‘qitish uchun chet mamlakatlarga yuborish choralarini ko‘rish;

Maktab bitiruvchilari O‘zbekiston xalqaro islom akademiyasi magistraturasi va doktoranturasida ilmiy ishlarini davom ettirishi uchun ularni puxta va mukammal o‘quv rejalari hamda o‘quv dasturlari asosida tayyorlash tavsiya etilsin.

6. Maktab faoliyatini moliyalashtirish quyidagi manbalar hisobidanamalga oshirilishi inobatga olinsin:

Imom Buxoriy yodgorlik majmui va muassis tomonidan ajratiladigan mablag‘lar;

jismoniy va yuridik shaxslarning homiylik xayriyalari;

xalqaro moliya institutlari, xorijiy va donor tashkilotlarning grantlari;

qonunchilikda taqiqlanmagan boshqa manbalar.

7. O‘zbekiston xalqaro islom akademiyasi O‘zbekiston Respublikasi Oliy va o‘rta maxsus ta’lim vazirligi bilan birgalikda Maktabning o‘quv rejasi va o‘quv dasturlarini puxta ishlab chiqish, uning axborot-resurs markazini diniy va dunyoviy fanlar bo‘yicha zarur darsliklar va o‘quv qo‘llanmalar, badiiy adabiyotlar, davriy nashrlar bilan ta’minlashda ko‘maklashsin.

8. O‘zbekiston Respublikasi Tashqi ishlar vazirligi Din ishlari qo‘mitasining buyurtmasiga asosan Maktabdagi ta’lim jarayonida ishtirok etuvchi xorijiy o‘qituvchilar va ekspertlarga kirish vizalarini konsullik va boshqa yig‘imlarsiz rasmiylashtirilishini ta’minlasin.

9. O‘zbekiston Respublikasi Ichki ishlar vazirligi Din ishlari qo‘mitasining buyurtmasiga asosan Maktabdagi ta’lim jarayonida ishtirok etuvchi xorijiy o‘qituvchilar va ekspertlarga davlat boji undirilmagan holda ko‘p martalik vizalar berilishini va ularning muddati uzaytirilishini, shuningdek, ularning O‘zbekiston Respublikasida vaqtinchalik yashash joyida vaqtincha turgan joyi bo‘yicha ro‘yxatga olinishini va muddatining uzaytirilishini ta’minlasin.

10. Maktab Samarqand viloyati, Payariq tumani, Xoja Ismoil shaharchasida joylashgan O‘zbekiston Respublikasi Vazirlar Mahkamasi huzuridagi Imom Buxoriy xalqaro ilmiy-tadqiqot markazi binosida tekin foydalanish huquqi asosida joylashtirilsin.

11. O‘zbekiston milliy teleradiokompaniyasi, O‘zbekiston Milliy axborot agentligi, “Ziyo” media markaziga Maktab bilan hamkorlikda Imom Buxoriy, Imom Termiziy, Imom Dorimiy va yurtimizdan yetishib chiqqan boshqa buyuk ulamolarning saboqlari rukni ostida teleko‘rsatuvlar hamda radioeshittirishlar tayyorlash va maqolalar chop etish tavsiya etilsin.

12. O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mita manfaatdor vazirliklar va idoralar bilan birgalikda o‘zlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

13. Mazkur qarorning bajarilishini nazorat qilish O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mita raisi J.K. Akramov zimmasiga hamda Vazirlar Mahkamasining Madaniyat, san’at va yoshlar siyosati masalalari axborot-tahlil departamentiga yuklansin.