Oʻzbekiston Respublikasi Qishloq xoʻjaligi vazirligi va Misr Arab Respublikasi Qishloq xoʻjaligi va yerlarni oʻzlashtirish vazirligi, keyingi oʻrinlarda “Tomonlar” deb ataluvchilar,

kelgusida ikki mamlakat oʻrtasida mavjud boʻlgan doʻstona aloqalarni mustahkamlash istagini bildirib,

qishloq xoʻjaligi sohasidagi iqtisodiy, ilmiy va texnikaviy aloqalarni oʻzaro manfaatdorlik va tenglik asosida rivojlantirishni istab,

texnologiyalar va tajribalar almashinuvini rivojlantirish uchun qishloq xoʻjaligida hamkorlikdagi harakatlarni olib borish zarurligini eʼtirof etib,

quyidagilar toʻgʻrisida anglashuvga erishdilar:

Tomonlar oʻz davlatlarining qonunlariga muvofiq qishloq xoʻjaligi sohasida iqtisodiy, ilmiy, tadqiqot va texnikaviy hamkorlikni amalga oshirishga koʻmaklashadilar.

Tomonlar qishloq xoʻjaligining quyidagi sohalarida oʻzaro manfaatli hamkorlikni rivojlantirish uchun saʼy-harakatlarni amalga oshiradilar:

chorvachilikni, shu jumladan, nasl koʻpaytirish, oziqlantirish fiziologiyasini rivojlantirish;

qishloq xoʻjaligi ishlab chiqarishini mexanizatsiyalash va avtomatlashtirish, jumladan, yangi texnologiyalar va asbob-uskunalarni loyihalashtirish va sinovdan oʻtkazish;

zamonaviy texnika vositalari va tadqiqot natijalarini koʻllash orqali qar ikki mamlakatda chorvachilik resurslarining unumdorligi va reproduktiv samaradorligini oshirish.

Tomonlar oʻrtasida hamkorlik quyidagi yoʻnalishlar orqali amalga oshiriladi:

olimlar va mutaxassislar bilan almashinuv, dala ekinlarini yetishtirish, kengaytirish, urugʻchilik va turli xil sinovlarni oʻtkazish masalalari boʻyicha uchrashuvlarni tashkil etish;

davlat sirini tashkil etmaydigan tajriba, ilmiy-tadqiqot va texnikaviy maʼlumotlar, shuningdek, yangi texnologiyalar va jihozlar namunalari bilan almashinuv;

qishloq xoʻjaligi sohasida qoʻshma iqtisodiy, ilmiy-tadqiqot na texnikaviy tadbirlarni tashkil qilish (konferensiyalar, simpoziumlar, seminarlar, yarmarkalar, koʻrgazmalar va hokazo);

epidemik kasalliklarga qarshi chorva mollarini himoya qilish uchun virusli va bakteriologik veterinariya vaksinalarini, zardobga qarshi, shuningdek, bakterial diagnostika mahsulotlarini ishlab chiqarish va keng tatbiq qilish sohasida ikki mamlakat ilmiy-tadqiqot institutlari va tashkilotlari oʻrtasida qoʻshma tadqiqotlar olib borish;

Tomonlar oʻrtasida kelishilgan hamkorlikning boshqa shakllari.

Mazkur Memorandumni samarali amalga oshirish maqsadida Tomonlar rahbarlar va mutaxassislar darajasida hamkorlikning ustuvor yoʻnalishlarini belgilash, qoʻshma loyihalar/dasturlarni muvofiqlashtirish va oʻzaro manfaat uygʻotadigan masalalar boʻyicha maslahatlashish uchun muntazam ravishda uchrashuvlar oʻtkazadilar.

Hamkorlik quyidagi moliyaviy shartlarda amalga oshiriladi:

1. Har bir Tomon tegishli qoʻshma loyihaning ishchi dasturiga binoan belgilangan ishlarning oʻziga tegishli qismini toʻliq moliyalashtiradi.

2. Qoʻshma ilmiy loyihalar uchun olimlar va mutaxassislar almashinuvi begʻarazlik asosida amalga oshiriladi, xususan, xalqaro sayohat va sogʻliq sugʻurtasi xarajatlari yuboruvchi Tomon tarafidan qoplanadi, turarjoy, oziq-ovqat va ichki transport xarajatlari esa qabul qiluvchi Tomon tarafidan qoplanadi.

Mazkur Memorandum qoidalarini talqin qilish va qoʻllash yuzasidan vujudga keladigan kelishmovchiliklar Tomonlar oʻrtasida muzokaralar va maslahatlashuvlar orqali hal qilinadi.

Tomonlarning oʻzaro yozma roziligi asosida mazkur Memorandum qoidalariga uning ajralmas qismi hisoblanadigan alohida bayonnomalar orqali oʻzgartirish va qoʻshimchalar kiritilishi mumkin.

Tomonlar oʻrtasida almashiladigan barcha maʼlumotlar qatʼiy ravishda maxfiy hisoblanadi va boshqa Tomonning oldindan yozma roziligisiz uchinchi tomonga oshkor etilishi mumkin emas. Shuningdek, ulardan mazkur Memorandumda nazarda tutilmagan maqsadlarda ham foydalanilmaydi.

Mazkur Memorandum besh yil muddatga tuziladi va imzolangan sanadan boshlab kuchga kiradi. Mazkur Memorandum Tomonlardan birining dastlabki muddat tugashidan kamida 6 (olti) oy avval yoki har qanday keyingi (besh yillik) muddat tugashidan avval mazkur Memorandumning amal qilishini tugatish haqidagi oʻz niyati toʻgʻrisida yozma xabarnomasi olinmaguniga qadar Tomonlarning yozma roziligi bilan xuddi shunday muddatlarga uzaytiriladi.

Toshkent shahrida, 2018-yil 5-sentabrda ikki asl nusxada, har biri oʻzbek, arab va ingliz tillarida tuzildi, bunda barcha matnlar teng autentikdir. Mazkur Memorandum qoidalarini talqin qilishda kelishmovchiliklar yuzaga kelgan taqdirda, ingliz tilidagi matn ustuvor hisoblanadi.