Respublikada yuridik taʼlim darajasini oshirish, xalq xoʻjaligini, davlat hokimiyati va boshqaruv organlarini, huquqni muhofaza qilish organlarini huquqiy davlatni shakllantirishda faol ishtirok etishga, fuqarolarning huquqlarini va jamiyat manfaatlarini himoya qilishni taʼminlashga qodir boʻlgan yuqori malakali mutaxassislar-huquqshunoslar bilan taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Adliya vazirligi respublikaning yurist kadrlarga boʻlgan ehtiyojini oʻrganib, 1992/93-oʻquv yillarida oʻquv yurtlariga qabul qilish rejasi boʻyicha Vazirlar Mahkamasiga takliflar kiritsin.

2. Oʻzbekiston Respublikasi Adliya vazirligi va Oliy va oʻrta maxsus taʼlim vazirligining Toshkent yuridik texnikumini Toshkent yuridik kolledjiga aylantirish va uni Oʻzbekiston Respublikasi Adliya vazirligi ixtiyoriga berish toʻgʻrisidagi taklifi qabul qilinsin.

Adliya vazirligi Oʻzbekiston Respublikasi Oliy va oʻrta maxsus taʼlim vazirligi bilan birgalikda kolledj toʻgʻrisidagi Nizomni, uning tuzilishini, yagona rejasini ishlab chiqsin va tasdiqlasin, mutaxassisliklar roʻyxatini aniqlasin hamda belgilangan tartibda uning oʻquv-moddiy bazasini rivojlantirishni nazarda tutsin.

3. Oʻzbekiston Respublikasi Xalq taʼlimi vazirligi 1992-yildan boshlab:

respublikadagi ayrim mavjud maktab-internatlarda oʻrganilayotgan ixtisoslashuv bilan bir qatorda taʼlimning yuridik ixtisosini kiritsin;

oʻrta umumiy taʼlim maktablarining yuqori sinflarida oʻquvchilarning Sovet huquqi asoslari bilan bir qatorda xorijiy davlatlarning konstitutsiyalari va boshqalarni oʻrganishini nazarda tutuvchi “huquqshunoslik” fakultativ oʻquv fanini kiritsin.

Oʻzbekiston Respublikasi Adliya vazirligi tegishli oʻquv rejalari va dasturlarini ishlab chiqishda, darslik va oʻquv qoʻllanmalari tayyorlashda Oʻzbekiston Respublikasi Xalq taʼlimi vazirligiga yordam koʻrsatsin.

4. Oʻzbekiston Respublikasi Adliya vazirligi, Oliy va oʻrta maxsus taʼlim vazirligi, Ichki ishlar vazirligi respublika yuristlar uyushmasi bilan birgalikda va chet el ilgʻor tajribasini hisobga olgan holda:

a) oliy va oʻrta yuridik oʻquv yurtlari, yuridik fakultetlar, dorilfununlarning boʻlinmalari oʻquv rejalari va dasturlarini qayta ishlab chiqsinlar, bunda, xususan, hozirgi zamon sharoitida huquqshunos mutaxassislarni shakllantirishda asos boʻluvchi fanlar roʻyxatini qayta koʻrib chiqsinlar va mana shu asosda ularning umuminsoniy va axloqiy-etik tayyorgarliklarini tubdan qayta qurishni taʼminlasinlar. Talabalarning falsafa, sotsiologiya, siyosatshunoslik, ruhiyatshunoslikning muhim muammolarini, chet tillarni, davlat va huquq nazariyasi va tarixini, siyosiy huquqshunoslikni va hozirgi zamon huquq tizimlarini, davlat, maʼmuriy, fuqarolik huquqlarini, xalqaro huquq va uning asosiy sohalarini, tashqi iqtisodiy faoliyatning huquqiy asoslarini, bozor munosabatlarini huquqiy jihatdan tartibga solishni, menedjment va marketingni, huquqiy axborot va kibernetikani, huquqning huquqshunos mutaxassislar tayyorlashning hozirgi zamon jahon darajasini belgilovchi va zamonaviy huquqiy tafakkurni shakllantirishning asosida turuvchi moliya, soliq, ekologiya va boshqa jadal rivojlanayotgan sohalarini oʻrganishlariga eʼtibor kuchaytirilsin;

b) oliy va oʻrta yuridik oʻquv yurtlari talabalari, oʻquvchilarining oʻquv va ishlab chiqarish tajribasi, yosh mutaxassislarning diplom yoqlagandan keyin stajirovkadan oʻtishlari tartibi va mazmunini nazarda tutsinlar.

5. Yurist kadrlarga boʻlgan ehtiyojni yanada yaxshiroq aniqlash va ularning bilim va tajribalaridan unumliroq foydalanish, bozorga oʻtish sharoitida yuridik taʼlimni rivojlantirish masalalarini ilmiy asosda hal etish, yuridik kadrlar tayyorlashni rejalashtirishda davlat boshqaruvi mahalliy organlari va yuridik oʻquv yurtlarining huquqlarini kengaytirish maqsadida:

a) Oʻzbekiston Respublikasi Adliya vazirligi manfaatdor vazirliklar va idoralar bilan birgalikda 1992-yilda respublika davlat boshqaruv organlarida, huquqni muhofaza qilish organlarida va xalq xoʻjaligidagi oliy va oʻrta yuridik maʼlumotga ega boʻlishni talab etadigan, shuningdek, vazifasi mutaxassislik maʼlumoti bilan birga yuridik tayyorgarlikka ham ega boʻlishni taqozo etadigan lavozimlar roʻyxatini ishlab chiqsin va tasdiqlash uchun Vazirlar Mahkamasiga kiritsin;

b) Oʻzbekiston Respublikasi Adliya vazirligi 1992-yilda davlat boshqaruv organlari, huquqni muhofaza qilish organlari, xalq xoʻjaligidagi huquqiy xizmatlarning kelajakda va joriy yilda yuristlarga boʻlgan ehtiyojlarini aniqlashning normativ-uslubiy asoslarini ishlab chiqsin va tasdiqlasin;

v) Oʻzbekiston Respublikasi Davlat statistika qoʻmitasi respublika statistika ishlari (davlat buyurtmasi) rejasida Adliya vazirligi bilan birgalikda yuridik kadrlarga boʻlgan talabni ilmiy asosda rejalashtirish va ulardan oqilona foydalanish uchun respublikadagi oliy va oʻrta yuridik maʼlumotli mutaxassislarning soni va harakati, ularning ixtisoslashtirilishi, faoliyat sohalari boʻyicha taqsimlanishi, ijtimoiy-demografik va boshqa maʼlumotlar toʻgʻrisida toʻla axborot berishga imkon beruvchi statistik hisobotni nazarda tutsin.

6. Yuridik oʻquv yurtlarini ilmiy-pedagogik kadrlar bilan taʼminlashning vujudga kelgan tizimini tubdan qayta qurishni amalga oshirish zarur deb topilsin.

Shu maqsadda Oʻzbekiston Respublikasi Adliya vazirligi Oliy va oʻrta maxsus taʼlim vazirligi bilan birgalikda:

oliy yuridik oʻquv yurtlarini ilmiy-pedagogik kadrlar bilan mustahkamlab, ular sonini normativlar bilan belgilangan miqdorga muvofiq keltirish uchun kechiktirib boʻlmaydigan choralar koʻrsin;

yuristlar tayyorlovchi, eng avvalo, xalq xoʻjaligi uchun yuristlar tayyorlovchi, oliy oʻquv yurtlariga professor-oʻqituvchilar tarkibining belgilangan normativlardan tashqari sonini shartnomalar boʻyicha mutaxassislar tayyorlash qiymatiga tegishli xarajatlarni qoʻshib aniqlash huquqini bersin;

oʻqituvchilarni koʻproq shartnoma asosida, shu jumladan, chet ellardan ham valyutasiz almashtirish boʻyicha, ham yuristlar tayyorlash uchun, korxona, muassasa va tashkilotlardan tushadigan valyutalar hisobiga taklif etsin;

xorijdagi yuridik oʻquv yurtlariga, oʻzaro manfaatli asosda yosh oʻqituvchilarni va aspirantlarni, shuningdek, internaturada taʼlim olayotgan shaxslarni va pedagoglik faoliyatiga moyilligi boʻlgan yaxshiroq tayyorgarlik koʻrgan yuqori kurs talabalarini shogirdlikka (stajirovkaga) joʻnatish tajribasini joriy qilsin.

7. Oʻzbekiston Respublikasi Adliya vazirligi va Fanlar akademiyasi aspirantura va doktoranturada davlat, fuqarolik va moliya huquqi, tabiat muhofazasi, siyosiy huquqshunoslik, huquqiy axborot, xalqaro xususiy huquq, bozor munosabatlarini, tashqi iqtisodiy faoliyatni huquqiy jihatdan tartibga solish sohasidagi, shuningdek, huquqshunoslik fanining boshqa muhim yoʻnalishlari boʻyicha ilmiy-pedagogik kadrlarni nisbatan ilgariroq tayyorlashni taʼminlasinlar.

8. Oʻzbekiston Respublikasi Fanlar akademiyasi va Adliya vazirligi:

yuridik oliy oʻquv yurtlarining Oʻzbekiston Respublikasi Fanlar akademiyasining Falsafa va huquq instituti bilan aloqalarini kuchaytirish choralarini koʻrsin, shu jumladan, vaqtinchalik ilmiy jamoalar tuzib, unga ilmiy, pedagogik va tajribali xodimlarni, aspirantlar va talabalarni jalb etib, oʻquv jarayonida olingan natijalardan tezkorlik bilan foydalanishni taʼminlasinlar;

yuridik fanini rivojlantirish uchun muhim tadqiqotlarga ajratiladigan mablagʻlarni koʻpaytirish toʻgʻrisidagi masalani koʻrib chiqsinlar va hal qilsinlar, ilmiy ishlar rejalarini huquqshunoslikning muhim muammolarini tizimli tadqiq qilishda yuridik fanning orqada qolayotganini bartaraf etish zarurligidan kelib chiqib, qayta koʻrib chiqsinlar.

9. Oʻzbekiston Respublikasi Adliya vazirligi yuridik taʼlimni takomillashtirishni moliyaviy va moddiy jihatdan taʼminlash maqsadida 1992-yilning oxirigacha quyidagilarni nazarda tutuvchi takliflarni ishlab chiqsin va Vazirlar Mahkamasiga koʻrib chiqish uchun kiritsin:

yuridik oʻquv yurtlarini kriminalistika, hisoblash va boshqa xil texnika turlari, oʻqitishning texnik vositalari bilan qurollantirish;

yuridik fanlar boʻyicha darsliklar va oʻquv qoʻllanmalari, kodekslar, qonunchilik aktlari toʻplamlari, qonunchilik boʻyicha sharhlar va boshqa normativ maʼlumotnoma adabiyotlari chop etishni koʻpaytirish, “Oʻzbekiston” nashriyoti mavzularida “Davlat va huquq” boʻlimini ajratib koʻrsatish;

“yuridik adabiyotlar” doʻkonini ochish.