Oʻzbekiston Respublikasi Prezidentining “Oʻzbekiston Respublikasini yanada rivojlantirish boʻyicha Harakatlar strategiyasi toʻgʻrisida” 2017-yil 7-fevraldagi PF-4947-son Farmonini bajarish yuzasidan, shuningdek, mahalliy davlat hokimiyati organlarining vakolatlarini kengaytirish va mustaqilligini oshirish maqsadida Vazirlar Mahkamasi qaror qiladi:

1. Oʻzbekiston Respublikasi Hukumatining ilovaga muvofiq ayrim qarorlariga oʻzgartirishlar kiritilsin.

2. Vazirliklar va idoralar oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsinlar.

3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — Moliya vaziri J.A. Qoʻchqorov zimmasiga yuklansin.

1. Vazirlar Mahkamasining “Budjetdan mablagʻ bilan taʼminlanadigan tashkilotlarda xizmat yengil avtotransportidan foydalanishni tartibga solish toʻgʻrisida” 1999-yil 2-apreldagi 154-son qarorining 9-bandi quyidagi tahrirda bayon qilinsin:

“9. Belgilansinki, belgilangan limit doirasida xizmatda foydalanish uchun transport vositalari:

Oʻzbekiston Respublikasi respublika budjetidan mablagʻ oluvchi tashkilotlar tomonidan — faqat Oʻzbekiston Respublikasi Moliya vazirligi bilan kelishgan holda;

Qoraqalpogʻiston Respublika budjeti, viloyatlar va Toshkent shahar mahalliy budjetlaridan mablagʻ oluvchi tashkilotlar tomonidan — tegishli ravishda faqat Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan kelishgan holda sotib olinadi yoki ijara boʻyicha jalb etiladi.

Budjetdan moliyalashtiriladigan tashkilotlar har yili xarajatlar smetasi va shtat jadvallarini roʻyxatdan oʻtkazishda xizmat avtomobillari soni limitlarini va ularni saqlash xarajatlarini roʻyxatdan oʻtkazishlari shart”.

2. Vazirlar Mahkamasining 1999-yil 3-sentabrdagi 414-son qarori (Oʻzbekiston Respublikasi QT, 1999-yil, 9-son, 51-modda) bilan tasdiqlangan Budjet tashkilotlarining xarajatlarini moliyalashtirish (toʻlash) tartibining 20-bandi oʻz kuchini yoʻqotgan deb hisoblansin.

3. Vazirlar Mahkamasining “Vazirlar Mahkamasining “Budjet tashkilotlarini mablagʻ bilan taʼminlash tartibini takomillashtirish toʻgʻrisida” 1999-yil 3-sentabrdagi 414-son qaroriga oʻzgartirish va qoʻshimchalar kiritish haqida” 2007-yil 19-iyuldagi 148-son qaroriga (Oʻzbekiston Respublikasi QT, 2007-y., 7-son, 41-modda) ilova 6-bandining “p” kichik bandi oʻz kuchini yoʻqotgan deb hisoblansin.

4. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida (Oʻzbekiston Respublikasining “Oʻzbekiston Respublikasining Budjet kodeksini tasdiqlash toʻgʻrisida” 2013-yil 26-dekabrdagi OʻRQ-360-son hamda “Soliq va budjet siyosatining 2016-yilga moʻljallangan asosiy yoʻnalishlari qabul qilinganligi munosabati bilan Oʻzbekiston Respublikasining Soliq kodeksiga oʻzgartish va qoʻshimchalar kiritish toʻgʻrisida” 2015-yil 31-dekabrdagi OʻRQ-398-son qonunlari) 2016-yil 26-apreldagi 122-son qaroriga (Oʻzbekiston Respublikasi QT, 2016-y., 4-son, 28-modda) 1-ilova 26-bandi “e” kichik bandining oʻn toʻqqizinchi xatboshi chiqarib tashlansin.