Jamiyat hayotining barcha sohalarida olib borilayotgan islohotlarning samarali amalga oshirilishi, birinchi navbatda, davlat hokimiyatining barcha boʻgʻinlarida ijro intizomining zarur darajada tashkil etilishiga bogʻliq.

Oʻzbekiston Respublikasi Prezidentining 2017-yil 9-avgustdagi “Ijro intizomi idoralararo yagona elektron tizimini joriy etish chora-tadbirlari toʻgʻrisida”gi F-5017-son farmoyishiga muvofiq vazirliklar, idoralar, mahalliy ijro hokimiyati organlari va boshqa tashkilotlarning “Ijro.gov.uz” ijro intizomi idoralararo yagona elektron tizimiga (keyingi oʻrinlarda — “Ijro.gov.uz” tizimi) ulanishi taʼminlandi.

Hozirgi vaqtda Oʻzbekiston Respublikasi Vazirlar Mahkamasi va Hisob palatasi tomonidan “Ijro.gov.uz” tizimi orqali Oʻzbekiston Respublikasi Prezidentining 2800 dan ortiq qarorlari va topshiriqlarining toʻliq va oʻz vaqtida bajarilishi yuzasidan test rejimida tizimli nazorat olib borilmoqda.

Shu bilan birga, yaratilgan sharoitlarga qaramasdan, ayrim vazirliklar, idoralar, mahalliy ijro hokimiyati organlari va boshqa tashkilotlar tomonidan ijro intizomi nazoratini sifatli va samarali tashkil qilish, shuningdek, oʻz vaqtida amalga oshirilishini taʼminlash boʻyicha koʻrilayotgan chora-tadbirlar hanuzgacha talab darajasida yoʻlga qoʻyilmayapti.

Oʻzbekiston Respublikasi Prezidentining qarorlari va topshiriqlariga rioya etish masalalarida masʼuliyatsizlik va rasmiyatchilik holatlari uchramoqda, jamoatchilik nazoratini tashkil etish uchun zarur sharoitlar yaratish borasidagi choralar samarasizligicha qolmoqda, ish yuritishning ichki jarayonlarini avtomatlashtirish boʻyicha taʼsirchan choralar koʻrilmayapti, shuningdek, ijro intizomiga konservativ-buyruqbozlik bilan yondashilishiga yoʻl qoʻyilmoqda.

Ijro intizomini mustahkamlash, Oʻzbekiston Respublikasi Prezidenti qarorlari va topshiriqlarining ijrosi ustidan nazorat tizimini takomillashtirish, shuningdek, ularning bajarilishi ustidan jamoatchilik nazoratini amalga oshirish uchun zarur shart-sharoitlarni yaratish maqsadida:

1. Belgilansinki:

Oʻzbekiston Respublikasi Hisob palatasi Oʻzbekiston Respublikasi Prezidentining qarorlari va topshiriqlarining toʻliq va oʻz vaqtida ijro etilishi yuzasidan nazorat olib boruvchi, shuningdek, “Ijro.gov.uz” tizimi boʻyicha ishlarni muvofiqlashtiruvchi masʼul davlat organi hisoblanadi;

Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi “Ijro.gov.uz” tizimini doimiy asosda texnik qoʻllab-quvvatlash va takomillashtirishni taʼminlovchi ishchi organ hisoblanadi;

Oʻzbekiston Respublikasi Prezidenti Administratsiyasi tuzilmalari maxfiylik belgisi ostidagi Oʻzbekiston Respublikasi Prezidentining qarorlari va topshiriqlari maʼlumotlar bazasini yuritish va ularning bajarilishi ustidan nazoratni amalga oshirish uchun masʼul;

Oʻzbekiston matbuot va axborot agentligining Ommaviy kommunikatsiyalar sohasidagi monitoring markazi ommaviy axborot vositalarida vazirliklar, idoralar, mahalliy ijro hokimiyati organlari va boshqa tashkilotlar tomonidan Oʻzbekiston Respublikasi Prezidentining qarorlari va topshiriqlarining ijro etilishi haqidagi jamoatchilik fikrini baholab borish hamda Oʻzbekiston Respublikasi Prezidentining Islohotlarni huquqiy taʼminlash va huquqni muhofaza qilish faoliyatini muvofiqlashtirish masalalari boʻyicha maslahatchisi boʻlinmalari, Oʻzbekiston Respublikasi Hisob palatasi va Bosh prokuraturasiga axborot kiritib borish uchun masʼuldir.

2. “Ijro.gov.uz” ijro intizomi idoralararo yagona elektron tizimining ishlash tartibi toʻgʻrisidagi nizom ilovaga muvofiq tasdiqlansin.

Oʻzbekiston Respublikasi Prezidenti Administratsiyasi, Vazirlar Mahkamasi, Hisob palatasi, vazirliklar, idoralar, mahalliy ijro hokimiyati organlari va boshqa tashkilotlar ushbu nizomga muvofiq “Ijro.gov.uz” tizimida doimiy ishlashning tashkil qilinishini taʼminlasinlar.

3. Belgilansinki:

2019-yil 1-yanvardan boshlab respublika va hududlar darajasidagi majlis va yigʻilishlarni oʻtkazish, Oʻzbekiston Respublikasi Prezidenti tomonidan oʻtkaziladigan yigʻilishlar bundan mustasno, faqatgina “Ijro.gov.uz” tizimidagi majlislar va yigʻilishlar maxsus markazlashgan maʼlumotlar bazasiga oʻtkazilayotgan tadbirning maqsadi, natijalari, ishtirokchilar tarkibi va davomiyligi koʻrsatilgan qaydlar kiritilganidan soʻng amalga oshiriladi;

Oʻzbekiston Respublikasi Hisob palatasi Oʻzbekiston Respublikasi Prezidenti qarorlari va topshiriqlarining toʻliq va oʻz vaqtida bajarilishini nazorat qilish borasida Oʻzbekiston Respublikasi Prezidenti Administratsiyasi tuzilmalari va Oʻzbekiston Respublikasi Bosh prokuraturasi bilan yaqindan hamkorlik qiladi;

Oʻzbekiston Respublikasi Prezidenti qarorlari va topshiriqlarida belgilangan ijro muddatlari faqatgina Oʻzbekiston Respublikasi Prezidenti ruxsati bilan Oʻzbekiston Respublikasi Hisob palatasi bilan kelishilgandan soʻng uzaytiriladi.

Oʻzbekiston Respublikasi Vazirlar Mahkamasi Bosh prokuratura bilan birgalikda majlislar va yigʻilishlarning “Ijro.gov.uz” tizimidagi markazlashgan maʼlumotlar bazasida qayd etilmagan holda oʻtkazilishiga yoʻl qoʻymaslik yuzasidan tizimli nazoratni amalga oshiradi.

4. Oʻzbekiston Respublikasi Vazirlar Mahkamasi, Hisob palatasi va Bosh prokuraturasiga:

vazirliklar, idoralar, mahalliy ijro hokimiyati organlari va boshqa tashkilotlar tomonidan Oʻzbekiston Respublikasi Prezidentining qarorlari va topshiriqlarining aniq amaliy natijalarga erishilishi taʼminlanmasdan turib, yuzaki bajarilishiga yoʻl qoʻymaslik;

vazirliklar, idoralar, mahalliy ijro hokimiyati organlari va boshqa tashkilotlar tomonidan Oʻzbekiston Respublikasi Prezidentining qarorlari va topshiriqlarining ijro holati toʻgʻrisida maʼlumotlarning “Ijro.gov.uz” tizimi orqali oʻz vaqtida taqdim etilishi ustidan qatʼiy nazorat oʻrnatish;

Oʻzbekiston Respublikasi Prezidentining qarorlari va topshiriqlari ijro holatini vazirliklar, idoralar, mahalliy ijro hokimiyati organlari va boshqa tashkilotlar rahbarlari ishtirokida har oyda muhokama qilinishini taʼminlash va Oʻzbekiston Respublikasi Prezidenti Administratsiyasiga axborot kiritib borish;

byurokratik toʻsiqlar va muammolarni hal etish muddatlarining choʻzilishi holatlarini bartaraf etish orqali vazirliklar, idoralar, mahalliy ijro hokimiyati organlari va boshqa tashkilotlarga Oʻzbekiston Respublikasi Prezidentining qarorlari va topshiriqlari ijro etilishida doimiy ravishda koʻmaklashib borish vazifalari yuklansin.

5. Oʻzbekiston Respublikasi Hisob palatasi:

Oʻzbekiston Respublikasi Prezidenti Administratsiyasi va Vazirlar Mahkamasiga Oʻzbekiston Respublikasi Prezidentining qarorlari va topshiriqlarini toʻliq va oʻz vaqtida bajarmagan, shuningdek, “Ijro.gov.uz” tizimi orqali ijro holati toʻgʻrisida maʼlumotlarni toʻliq boʻlmagan holda, notoʻgʻri va kechiktirib taqdim etgan, buyruqbozlikka va masalalarni hal etishda muddat buzilishiga yoʻl qoʻygan vazirliklar, idoralar, mahalliy ijro hokimiyati organlari va boshqa tashkilotlar rahbarlarini javobgarlikka tortish toʻgʻrisida takliflar kiritib borsin;

vazirliklar, idoralar, mahalliy ijro hokimiyati organlari va boshqa tashkilotlarga “Ijro.gov.uz” tizimi orqali Oʻzbekiston Respublikasi Prezidentining qarorlari va topshiriqlarining ijrosi holati toʻgʻrisida maʼlumotlarni toʻliq boʻlmagan holda, notoʻgʻri va kechiktirib taqdim etgan xodimlarga nisbatan intizomiy choralar koʻrish toʻgʻrisida taqdimnomalar kiritib borsin.

Belgilansinki, vazirliklar, idoralar, mahalliy ijro hokimiyati organlari va boshqa tashkilotlar tomonidan Oʻzbekiston Respublikasi Hisob palatasining taqdimnomalari va talablari bajarilmagan taqdirda tegishli materiallar javobgarlik choralarini koʻrish uchun Oʻzbekiston Respublikasi Prezidenti Administratsiyasi va Oʻzbekiston Respublikasi Bosh prokuraturasiga taqdim etiladi.

6. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi Oʻzbekiston Respublikasi Hisob palatasi bilan birgalikda 2019-yil 1-yanvarga qadar Yagona interaktiv davlat xizmatlari portali faoliyati doirasida Oʻzbekiston Respublikasi Prezidentining qarorlari ijrosi yuzasidan aholi, senatorlar, deputatlar, tadbirkorlik subyektlari va nodavlat notijorat tashkilotlari tomonidan jamoatchilik nazorati mexanizmining amalga oshirilishini taʼminlovchi “Jamoatfikri.uz” portalining tashkil etilishi va yoʻlga qoʻyilishini taʼminlasin.

7. “Ijro.gov.uz” tizimi va “Jamoatfikri.uz” portalini tashkil etish, texnik qoʻllab-quvvatlash va takomillashtirish chora-tadbirlarini moliyalashtirish Axborot-kommunikatsiya texnologiyalarini rivojlantirish jamgʻarmasi va qonun hujjatlarida taqiqlanmagan boshqa manbalar hisobidan amalga oshirilishi belgilansin.

8. Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi:

ikki hafta muddatda Oʻzbekiston Respublikasi Prezidenti Administratsiyasi tuzilmalari va Oʻzbekiston Respublikasi Bosh prokuraturasini “Ijro.gov.uz” tizimiga monitoring rejimida ulanishini taʼminlasin;

ikki oy muddatda har bir davlat organi va tashkilotlarida, ularning hududiy boʻlinmalarida majlislar va yigʻilishlarni jismoniy shaxslar ishtirokisiz masofadan oʻtkazish imkonini beruvchi zamonaviy axborot-kommunikatsiya texnologiyalarini qoʻllash boʻyicha takliflar kiritsin;

2018-yil 1-dekabrga qadar davlat organlari va tashkilotlarida mavjud elektron hujjatlar almashinuvi tizimlarining xatlovdan oʻtkazilishini taʼminlasin;

2019-yil 1-yanvarga qadar “Ijro.gov.uz” tizimida respublika va hududlar darajasida oʻtkaziladigan majlis va yigʻilishlar markazlashgan maʼlumotlar bazasini yaratsin va yoʻlga qoʻysin;

2019-yil 1-iyulga qadar elektron hujjatlar almashinuvi tizimlarini “Ijro.gov.uz” tizimiga integratsiya qilish maqsadida yagona talablar, shuningdek, ushbu tizimning davlat boshqaruvi organlari va tashkilotlarning elektron hujjat almashinuvi tizimlari bilan muvofiqlashtirish boʻyicha integratsiyaviy shlyuz ishlab chiqilishini taʼminlasin.

9. 2019-yil 1-yanvardan boshlab:

davlat organlari va tashkilotlarida qonunlar, Oʻzbekiston Respublikasi Prezidenti va Vazirlar Mahkamasi qarorlarini maxsus jurnal va hisob varaqalarida roʻyxatga olish tartibi;

qonunlar, Oʻzbekiston Respublikasi Prezidenti hujjatlari va Vazirlar Mahkamasi qarorlari boʻyicha hisob kartotekalarining qogʻoz shaklida rasmiylashtirilishi va yuritilishi bekor qilinsin.

10. Oʻzbekiston Respublikasi Vazirlar Mahkamasi 2019-yil 1-yanvarga qadar Oʻzbekiston Respublikasi Vazirlar Mahkamasi qarorlari va topshiriqlari boʻyicha ijro intizomini nazorat qilish jarayonini, keyinchalik “Ijro.gov.uz” tizimi bilan integratsiya qilgan holda, zamonaviy axborot-kommunikatsiya texnologiyalari joriy etilishini taʼminlasin.

11. Belgilansinki, adliya organlari mahalliy ijro hokimiyati organlariga normativ-huquqiy hujjatlar loyihalarini Oʻzbekiston Respublikasi Vazirlar Mahkamasi tomonidan belgilangan tartibda tayyorlanishi va kelishilishida amaliy yordam koʻrsatadilar.

12. Quyidagilarga:

Oʻzbekiston Respublikasi Bosh vaziri (Aripov), uning oʻrinbosarlari (Ramatov, Qoʻchqorov, Xolmurodov, Sultonov, Otajonov, Abduhakimov, Mirzayev, Norboyeva), shuningdek, Vazirlar Mahkamasi apparati boshqaruvchisiga (Abduqodirov) — Oʻzbekiston Respublikasi Prezidenti qarorlari va topshiriqlarining masʼul vazirliklar, idoralar, mahalliy ijro hokimiyati organlari va boshqa tashkilotlar tomonidan toʻliq va oʻz vaqtida bajarilishi yuzasidan ishlarning tashkil qilinishi uchun;

Oʻzbekiston Respublikasi Prezidenti Administratsiyasi rahbariga (Nizomiddinov), Oʻzbekiston Respublikasi Prezidenti maslahatchilariga — Oʻzbekiston Respublikasi Prezidenti Administratsiyasida ijro intizomini taʼminlash, Oʻzbekiston Respublikasi Prezidentining qarorlari va topshiriqlarining amalga oshirilishida koʻmaklashish uchun;

Oʻzbekiston Respublikasi Bosh prokuroriga (Murodov) — vazirliklar, idoralar, mahalliy ijro hokimiyati organlari va boshqa tashkilotlar tomonidan Oʻzbekiston Respublikasi Prezidentining qarorlari va topshiriqlari samarali ijro etilishi yuzasidan tegishli prokuror nazorati taʼminlanishi, shuningdek, ularni toʻliq boʻlmagan holda va kechiktirib bajargan shaxslarga nisbatan javobgarlik choralari koʻrilishi uchun;

Oʻzbekiston Respublikasi Hisob palatasi raisiga (Ikromov) — vazirliklar, idoralar, mahalliy ijro hokimiyati organlari va boshqa tashkilotlarda ijro intizomini tegishli darajada taʼminlash, shuningdek, Oʻzbekiston Respublikasi Prezidenti qarorlari va topshiriqlarining soʻzsiz, toʻliq va oʻz vaqtida ijro etilishi uchun;

Oʻzbekiston Respublikasi axborot texnologiyalari va kommunikatsiyalarini rivojlantirish vaziriga (Sodiqov) — “Ijro.gov.uz” tizimi va “Jamoatfikri.uz” portalining takomillashtirilishi, uzluksiz ishlashi va axborot xavfsizligini taʼminlash boʻyicha doimiy asosda choralar koʻrib borilishi uchun;

Oʻzbekiston Respublikasi adliya vaziriga (Davletov) — normativ-huquqiy hujjatlar loyihalarida topshiriqlar ijrosining aniq muddatlari belgilanishi, shuningdek, ularning aniq va ravshan bayon qilinishi yuzasidan nazoratni taʼminlash uchun;

vazirliklar, idoralar, mahalliy ijro hokimiyati organlari va boshqa tashkilotlar rahbarlariga — Oʻzbekiston Respublikasi Prezidenti qarorlari va topshiriqlarining toʻliq va oʻz vaqtida ijro etilishi, shuningdek, ularning ijro holati toʻgʻrisidagi maʼlumotlar “Ijro.gov.uz” tizimi orqali toʻliq, toʻgʻri va oʻz vaqtida taqdim qilinishi uchun shaxsiy javobgarlik yuklansin.

13. Oʻzbekiston Respublikasi Hisob palatasi Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi bilan birgalikda ikki oy muddatda qonun hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida takliflar kiritsin.

Vazirlik va idoralar oʻzlari qabul qilgan normativ-huquqiy hujjatlarni mazkur qarorga muvofiqlashtirsin.

14. Mazkur qarorning ijrosini nazorat qilish Oʻzbekiston Respublikasi Bosh vaziri A.N. Aripov, Oʻzbekiston Respublikasi Prezidenti Administratsiyasi rahbari Z.Sh. Nizomiddinov, Oʻzbekiston Respublikasi Bosh prokurori O.B. Murodov, Oʻzbekiston Respublikasi Hisob palatasi raisi M.M. Ikromov va Oʻzbekiston Respublikasi Prezidenti maslahatchisining birinchi oʻrinbosari B.M. Mavlonov zimmasiga yuklansin.

1. Ushbu Nizom “Ijro.gov.uz” ijro intizomi idoralararo yagona elektron tizimi (bundan keyin — “Ijro.gov.uz” tizimi)ning ishlash tartibini belgilaydi.

“Ijro.gov.uz” tizimi Oʻzbekiston Respublikasi Prezidentining farmonlari, qarorlari va farmoyishlarida hamda Oʻzbekiston Respublikasi Prezidentining raisligi ostida oʻtkazilgan kengashlar bayonnomalarida belgilangan topshiriqlar (bundan keyin — Oʻzbekiston Respublikasi Prezidentining hujjatlari va topshiriqlari) bajarilishining nazoratini taʼminlovchi axborot tizimi hisoblanadi.

2. Ushbu Nizomda quyidagi asosiy tushunchalardan foydalaniladi:

vakolatli davlat organi — Oʻzbekiston Respublikasi Prezidentining hujjatlari va topshiriqlarining, Oʻzbekiston Respublikasi Prezidentining maxfiylik grifi boʻlgan hujjatlar va topshiriqlar bundan mustasno, sifatli va oʻz vaqtida bajarilishining nazoratini taʼminlovchi, shuningdek, “Ijro.gov.uz” tizimi ishlashining koordinatori sifatida ish koʻradigan Oʻzbekiston Respublikasining Hisob palatasi;

operator — “Ijro.gov.uz” tizimini vazirliklar, idoralar, mahalliy davlat hokimiyati organlari va boshqa tashkilotlarning faoliyatiga joriy qilish uchun javobgar boʻlgan, shuningdek, uning uzluksiz ishlashi va axborot xavfsizligini taʼminlovchi Oʻzbekiston Respublikasi axborot texnologiyalari va kommunikatsiyalarini rivojlantirish vazirligi qoshidagi “UNICON.UZ” davlat unitar korxonasi;

“Ijro.gov.uz” tizimi ishtirokchilari — “Ijro.gov.uz” tizimida harakatlanayotgan Oʻzbekiston Respublikasi Prezidenti Administratsiyasining boʻlinmalari, Oʻzbekiston Respublikasi Hisob palatasi, Oʻzbekiston Respublikasi Vazirlar Mahkamasi, vazirliklar, idoralar, mahalliy davlat hokimiyati organlari va boshqa tashkilotlar;

“Ijro.gov.uz” tizimi foydalanuvchilari — “Ijro.gov.uz” tizimini qoʻllagan holda oʻz lavozim majburiyatlari doirasida harakatlanayotgan “Ijro.gov.uz” tizimi ishtirokchilarining rahbarlari yoki vakolatli xodimlari.

3. “Ijro.gov.uz” tizimining asosiy vazifalari:

Oʻzbekiston Respublikasi Prezidentining hujjatlari va topshiriqlarida koʻzda tutilgan topshiriqlarni oʻz vaqtida, sifatli, samarali hamda natijadorlik bilan ijro etilishini taʼminlash;

“Ijro.gov.uz” tizimiga ulangan ishtirokchilar uchun yagona axborot makonini yaratish (Oʻzbekiston Respublikasi Prezidentining 2017-yil 9-avgustdagi F-5017-son farmoyishi bilan tasdiqlangan “Ijro.gov.uz” ijro intizomi idoralararo yagona elektron tizimiga ulanadigan vazirliklar, idoralar, mahalliy davlat hokimiyati organlari va boshqa tashkilotlarning roʻyxatiga muvofiq);

vazirliklar, idoralar, mahalliy davlat hokimiyati organlari va boshqa tashkilotlar rahbarlarining Oʻzbekiston Respublikasi Prezidentining hujjatlari va topshiriqlarida belgilangan vazifalar va topshiriqlarning oʻz vaqtida va sifatli ijro etilishi uchun shaxsiy javobgarligini kuchaytirish;

axborot-kommunikatsiya texnologiyalari vositalarini qoʻllash, shuningdek, ish yuritish ichki jarayonlarini avtomatlashtirish orqali vazirliklar, idoralar, mahalliy davlat hokimiyati organlari va boshqa tashkilotlar faoliyatining samaradorligi va natijadorligini oshirish;

“Ijro.gov.uz” tizimi ishtirokchilari oʻrtasida muntazam idoralararo elektron hamkorligini taʼminlash.

4. “Ijro.gov.uz” tizimi orqali Oʻzbekiston Respublikasi Prezidentining hujjatlari va topshiriqlarida belgilangan vazifalar ijrosini nazorat qilish idoralararo elektron hamkorlik ushbu Nizomning ilovasiga muvofiq amalga oshiriladi.

5. Oʻzbekiston Respublikasi Prezidenti Administratsiyasining kanselyariyasi tomonidan tegishli hujjat qabul qilingan kundan boshlab bir ish kunidan kechiktirmay “Ijro.gov.uz” tizimi orqali Oʻzbekiston Respublikasi Prezidenti hujjatlari va topshiriqlarining elektron nusxalarini tarqatish, shu jumladan vakolatli davlat organiga yuborish, shuningdek, Oʻzbekiston Respublikasi Prezidentining tegishli topshirigʻini shakllantirish amalga oshiriladi. Shoshilinch topshiriqlar “Ijro.gov.uz” tizimi orqali darhol joʻnatilishi kerak.

6. Oʻzbekiston Respublikasi Prezidentining hujjatlari va topshiriqlarining elektron nusxalari olingan kundan boshlab — bir ish kuni davomida vakolatli davlat organi tomonidan masʼul ijrochilari va bajarish muddatlari koʻrsatilgan holda “Ijro.gov.uz” tizimiga nazorat topshiriqlari kiritiladi.

7. Oʻzbekiston Respublikasi Vazirlar Mahkamasi (Oʻzbekiston Respublikasi Prezidenti hujjatlari va topshiriqlari ijro nazoratini taʼminlash boʻyicha biriktirilgan masʼul tarkibiy boʻlinmalari) tomonidan “Ijro.gov.uz” tizimi orqali kelib tushgan nazorat bandlari belgilangan tartibda qabul qilinadi va bir ish kunidan kechiktirmay Vazirlar Mahkamasi Apparatidagi masʼul bajaruvchilarga yuboriladi.

8. “Ijro.gov.uz” tizimiga kiritilgan nazorat topshiriqlari “Ijro.gov.uz” tizimi ishtirokchilarining rahbarlarida, shuningdek, ijro intizomi uchun masʼul boʻlgan shaxslarda aks etadi.

9. Vakolatli davlat organi tomonidan Oʻzbekiston Respublikasi Prezidenti hujjatlari va topshiriqlari ijrosining muntazam nazorati va tahlili taʼminlanadi.

10. Oʻzbekiston Respublikasi Prezidenti hujjatlari va topshiriqlarining sifatli va oʻz vaqtida ijro etilishini nazorat qilish maqsadida vakolatli davlat organiga “Ijro.gov.uz” tizimi orqali ijro natijalari bilan tanishib chiqishga ruxsat beriladi.

11. “Ijro.gov.uz” tizimi ishtirokchilari — masʼul bajaruvchilar tegishli nazorat topshiriqlarining bajarish muddatlari yaqinlashgani toʻgʻrisida “Ijro.gov.uz” tizimi orqali muntazam xabardor qilinadilar.

12. Oʻzbekiston Respublikasi Prezidenti hujjatlari va topshiriqlarining nazorat bandlari ijro etilgani natijalariga asosan masʼul ijrochilar tomonidan “Ijro.gov.uz” tizimida belgilangan muddatlarda hisobotga (nazorat topshirigʻiga beriladigan javobga) tegishli axborot (isbotlovchi hujjatlar) PDF formatida ilova qilinadi.

13. Nazorat bandlarini bajarish natijalari toʻgʻrisidagi hisobotda Oʻzbekiston Respublikasi Prezidentining hujjatlari va topshiriqlarida koʻzda tutilgan maqsad va vazifalarga erishishning aniq yoʻnalishlari koʻrsatib beriladi.

14. Oʻzbekiston Respublikasi Vazirlar Mahkamasidagi tegishli masʼul ijrochilar tomonidan nazorat bandlarini bajarish natijalarini kelishib olish bir ish kunidan kechiktirmagan holda quyidagi tartibda amalga oshiriladi:

nazorat bandlari qoniqarsiz bajarilganida ijro natijalari qayta ishlash uchun masʼul ijrochiga yuboriladi;

nazoratga olingan Oʻzbekiston Respublikasi Prezidenti hujjatlari va topshiriqlarining nazorat bandlari qoniqarli darajada bajarilganida “Ijro.gov.uz” tizimiga tasdiq maʼlumoti kiritiladi.

15. Oʻzbekiston Respublikasi Prezidenti hujjatlari va topshiriqlarining nazorat bandlarini bajarish natijalari toʻgʻrisidagi hisobotlarni koʻrib chiqish vakolatli organ tomonidan uch ish kunidan kechiktirmay quyidagi tartibda amalga oshiriladi:

Oʻzbekiston Respublikasi Prezidentining hujjatlari va topshiriqlarida koʻzda tutilgan nazorat bandlari masʼul ijrochilar tomonidan toʻliq va sifatli bajarilganida vakolatli davlat organi tomonidan ushbu topshiriqlar “Ijro.gov.uz” tizimida nazoratdan olinadi;

Nazorat bandlarini bajarish natijalari qoniqarsiz deb topilganida vakolatli organ tomonidan ushbu nazorat bandini qayta ishlash uchun tegishli masʼul bajaruvchiga “Ijro.gov.uz” tizimi orqali boshqatdan yuboriladi.

16. Vakolatli davlat organi tomonidan Oʻzbekiston Respublikasi Prezidentining hujjatlari va topshiriqlarida belgilangan nazorat bandlarini ijro natijalari toʻgʻrisidagi axborotlar Oʻzbekiston Respublikasi Prezidentiga muntazam taqdim etiladi.

17. Foydalanuvchilarning “Ijro.gov.uz” tizimidan foydalanishlarini tashkil qilish operator tomonidan amalga oshiriladi.

18. “Ijro.gov.uz” tizimining ishlashini texnik qoʻllab-quvvatlashni taʼminlash maqsadida operator quyidagilarni amalga oshiradi:

“Ijro.gov.uz” tizimi foydalanuvchilarni roʻyxatga olish, ulash va oʻqitish;

“Ijro.gov.uz” tizimini modernizatsiyalash va “Ijro.gov.uz” tizimining yangi versiyalarini ishga tushirish;

“Ijro.gov.uz” tizimining foydalanuvchilariga Call-markaz orqali “Ijro.gov.uz” tizimini ekspluatatsiya qilish boʻyicha, shu jumladan “Ijro.gov.uz” tizimida foydalanuvchilarning xato yoki notoʻgʻri ishlashlarining oldini olish boʻyicha maslahatlar berish;

“Ijro.gov.uz” ishining funksional va foydalanish xarakteristikalarini yaxshilash maqsadida tizimning ishlashini tahlil qilish.

19. “Ijro.gov.uz” tizimiga yangi foydalanuvchilarni ulash uchun operatorning pochta manziliga belgilangan shakldagi toʻldirilgan arizalar yuboriladi. Arizalarning shakllarini “Ijro.gov.uz” tizimidan olish mumkin.

20. Operator arizani olgan kundan boshlab uch ish kuni davomida “Ijro.gov.uz” tizimining foydalanuvchisi bilan shartnoma tuzishi lozim.

21. “Ijro.gov.uz” tizimiga ulanish toʻgʻrisidagi shartnoma tuzilgandan va operatorning bankdagi hisob raqamiga toʻlov kelib tushgandan soʻng operator uch ish kuni davomida:

himoyalangan apparat qurilmalarida ulanayotgan yangi foydalanuvchining elektron raqamli imzosining yopiq kalitini va ochiq kalitining sertifikatini generatsiyalashni;

“Ijro.gov.uz” tizimining yangi foydalanuvchisiga yoki ishtirokchisining ishonchli vakiliga elektron raqamli imzoning yopiq kaliti va ochiq kalitining sertifikati boʻlgan himoyalangan apparat qurilmasi berilishini taʼminlashi shart.

22. “Ijro.gov.uz” tizimining ishtirokchisi toʻgʻrisidagi maʼlumotlarning boshqarilishini operator taʼminlaydi.

23. “Ijro.gov.uz” tizimining foydalanuvchilari toʻgʻrisidagi maʼlumotlarni boshqarish (maʼlumotlarni kiritish, oʻzgartirish, yangilash, oʻchirish) “Ijro.gov.uz” tizimining ishtirokchisi — tashkilot kadrlar boʻlinmasining xodimi tomonidan amalga oshiriladi.

24. “Ijro.gov.uz” tizimining foydalanuvchisi toʻgʻrisida maʼlumotlar kiritilgandan keyin unga elektron raqamli imzoning yozilgan yopiq kaliti va ochiq kalitining sertifikatiga ega himoyalangan apparat qurilmasi beriladi.

25. “Ijro.gov.uz” tizimiga kirish uchun “Ijro.gov.uz” tizimining foydalanuvchisi tomonidan himoyalangan apparat qurilmasidan foydalaniladi.

26. Xodim (“Ijro.gov.uz” tizimining foydalanuvchisi) bilan mehnat shartnomasi bekor qilinganda himoyalangan apparat qurilmasi “Ijro.gov.uz” tizimining ishtirokchisi — tashkilotning kadrlar boʻlinmasiga topshirilishi kerak.

27. “Ijro.gov.uz” tizimining ishtirokchisi — tashkilotning kadrlar boʻlinmasiga topshirilgan himoyalangan apparat qurilmasi, kadrlar boʻlinmasi tomonidan himoyalangan apparat qurilmasining egasini almashtirish uchun operatorga soʻrov yuborilgandan soʻng, “Ijro.gov.uz” tizimining yangi foydalanuvchisiga berilishi mumkin.

28. “Ijro.gov.uz” tizimining foydalanuvchilari Oʻzbekiston Respublikasi Prezidentining hujjatlari va topshiriqlaridan kelib chiqadigan vazifalarni bajarishning borishi toʻgʻrisidagi axborotni oʻz vaqtida, toʻliq va sifatli taqdim etilishi, shuningdek, “Ijro.gov.uz” tizimida ishlaganda axborot xavfsizligini taʼminlash uchun javobgar hisoblanadilar.

29. “Ijro.gov.uz” tizimi ishtirokchilarining rahbarlari koʻtarilgan masalalarni va yuzaga kelgan muammolarni hal qilishga, shuningdek, oldindan qoʻyilgan maqsadlarga erishishni soʻzsiz taʼminlashga qaratilgan vazifalarni bajarish natijalarini oʻz vaqtida va sifatli taqdim etilishi uchun shaxsan javobgar hisoblanadilar.

30. Operator “Ijro.gov.uz” tizimining uzluksiz ishlashi va axborot xavfsizligi uchun javobgar hisoblanadi.

31. Zarur boʻlganda, Oʻzbekiston Respublikasi Prezidentining hujjatlari va topshiriqlari ijrosining nazoratini tashkil qilish joylarga chiqqan holda amalga oshirilishi mumkin.

32. Vazirlar Mahkamasi tarkibiga kirmaydigan davlat organlarida va tashkilotlarda Oʻzbekiston Respublikasi Prezidenti hujjatlari va topshiriqlarining ijrosini va nazoratini tashkil qilish ham ushbu Nizomda koʻzda tutilgan tartibda amalga oshiriladi.

33. Ushbu Nizom talablarini buzganlikda aybdor boʻlgan shaxslar qonun hujjatlariga muvofiq javobgar boʻladilar.