Hoʻl meva-sabzavotlar va boshqa qishloq xoʻjaligi mahsulotlarining nobud boʻlishini kamaytirish, “Oʻzmevasabzavotuzumsanoat” uyushmasi tizimida ixtisoslashtirilgan yuk tashishlarni tashkil etish maqsadida Vazirlar Mahkamasi qaror qiladi:

1. “Oʻzmevasabzavotuzumsanoat” uyushmasi va “Oʻzavtotrans” korporatsiyasi korxonalarining 1-ilovaga* muvofiq “Oʻzmevasabzavotuzumsanoat” uyushmasi tarkibida “Oʻzagrotrans” aksionerlik-transport kompaniyasini tuzish toʻgʻrisidagi takliflariga rozilik berilsin.

2. Quyidagilar maʼlumot uchun qabul qilinsin:

avtotransport korxonalari tomonidan “Oʻzmevasabzavotuzumsanoat” uyushmasi bilan birgalikda “Oʻzagrotrans” aksionerlik-transport kompaniyasining taʼsis hujjatlari ishlab chiqilgan va taʼsis yigʻilishi oʻtkazilgan:

“Oʻzagrotrans” aksionerlik-transport kompaniyasi yuridik shaxs hisoblanadi va ochiq turdagi aksionerlik jamiyati shaklida tashkil etiladi;

kompaniya tarkibiga kiruvchi barcha transport korxonalari yuridik shaxs maqomini saqlab qoladilar;

kompaniya tarkibiga ixtiyoriylik asosida, mulkchilik shakllaridan qatʼi nazar, yuridik va jismoniy shaxslar, shu jumladan, xorijiy yuridik va jismoniy shaxslar kirishlari mumkin;

kompaniyaning ustav fondi unga kiruvchi korxonalarning pay badallari, shuningdek, boshqa yuridik va jismoniy shaxslar oʻrtasida aksiyalarni sotish hisobiga tashkil topadi.

3. Oʻzbekiston Respublikasi Davlat mulki qoʻmitasi:

“Oʻzmevasabzavotuzumsanoat” uyushmasiga aksiyalarning davlat ulushlarini, shuningdek, kompaniya tarkibiga kirgan avtotransport korxonalarining erkin sotish uchun moʻljallangan aksiyalarining bir qismini boshqarish huquqini bersin, bu huquqni keyinchalik “Oʻzagrotrans” aksionerlik-transport kompaniyasiga berishni nazarda tutsin. “Oʻzmevasabzavotuzumsanoat” uyushmasi “Oʻzagrotrans” aksionerlik-transport kompaniyasi bilan aksiyalarning koʻrsatib oʻtilgan paketlarini boshqarish yuzasidan tegishli shartnoma tuzsin;

“Oʻzagrotrans” aksionerlik-transport kompaniyasiga boshqarish uchun oʻziga berilgan ulushlardan aksiyalarning 35 foizgachasini sotib olishiga ruxsat etsin. “Oʻzagrotrans” aksionerlik-transport kompaniyasi tarkibiga kiruvchi avtokorxonalarning 1996-yil mobaynida sotib olinmagan aksiyalar ulushi Oʻzbekiston Respublikasining fond bozorida sotilishi kerak;

“Oʻzmevasabzavotuzumsanoat” uyushmasi bilan birgalikda 4-ishlab chiqarish-tijorat korxonasini, 6-ishlab chiqarish-tijorat korxonasini, 8-ishlab chiqarish-tijorat korxonasini va “Toshkent” ishlab chiqarish-tijorat firmasi korxonalarini, aksiyalar paketini quyidagicha taqsimlagan holda, ochiq turdagi aksionerlik jamiyatlariga aylantirsin:

25% — davlat ulushi

26% — mehnat jamoasi ulushi

49% — erkin sotish uchun;

“Oʻzavtotrans” korporatsiyasi bilan birgalikda “Oʻzagrotrans” aksonerlik-transport kompaniyasiga beriladigan mol-mulkni “Peshku” aksionerlik jamiyati va Xatirchi yuk tashish avtokolonnasi boʻyicha taqsimlasin va ushbu korxonalarning ustav fondlariga tegishli oʻzgartirishlar kiritsin.

Avtotransport korxonalari aksiyalarining koʻrsatib oʻtilgan paketlarini boshqarish va sotib olish sxemasi 2-ilovaga* muvofiq tasdiqlansin.

4. Quyidagilar “Oʻzagrotrans” aksionerlik-transport kompaniyasining asosiy vazifalari va faoliyat yoʻnalishlari etib belgilansin:

qishloq xoʻjaligi korxonalari, dehqon (fermer) xoʻjaliklari bilan hoʻl meva-sabzavotlar va boshqa qishloq xoʻjaligi mahsulotlarini tashish yuzasidan qisqa muddatli va uzoq muddatli kontraktlar tuzish;

transport xizmatlari bozorlarini va ularning rivojlanish istiqbollarini kompleks oʻrganish;

respublika aholisi va xalq xoʻjaligining avtotransportda samarali yuk tashishlarga boʻlgan ehtiyojlarini qondirish;

xorijiy investitsiyalarni jalb etishga koʻmaklashuvchi oʻzaro foydali tashqi iqtisodiy aloqalarni yoʻlga qoʻyish va rivojlantirish hamda respublika tashqarisida avtotransportda yuk tashishlarni amalga oshirish.

5. Qoʻyilgan vazifalarni bajarish uchun “Oʻzagrotrans” aksionerlik-transport kompaniyasi Xorazm avtomobil ishlab chiqarish birlashmasi tomonidan ishlab chiqarilgan “Mersedes-Bens” avtopoyezdlari bilan 3-ilovaga* muvofiq taʼminlansin va uning ixtisoslashtirilgan harakatdagi sostav bilan har yili toʻldirib borilishi nazarda tutilsin.

“Oʻzagrotrans” aksionerlik-transport kompaniyasi 3-ilovaga muvofiq korxonalar bilan ajratiladigan avtopoyezdlarning qiymatini toʻlash yuzasidan kompaniyaning Oʻzbekiston Respublikasi Moliya vazirligi va Xorazm AIB bilan koʻrsatib oʻtilgan avtopoyezdlar uchun hisob-kitoblarini oʻz vaqtida amalga oshirishni taʼminlaydigan miqdorlarda shartnomalar tuzsin.

6. “Oʻzagrotrans” aksionerlik-transport kompaniyasi va unga kiruvchi avtokorxonalar qoʻshilgan qiymat, yer, mol-mulk, transport soliqlaridan, bojxona poshlinalari va tadbirlari boʻyicha toʻlovlardan, shuningdek, Respublika yoʻl jamgʻarmasiga yigʻimlardan 5 yil muddatga ozod qilinsin.

“Oʻzagrotrans” aksionerlik-transport kompaniyasi tarkibiga kiruvchi avtokorxonalar soliqlar va toʻlovlar boʻyicha imtiyozlar munosabati bilan boʻshaydigan mablagʻlarning kamida 50 foizini yuk tashishlar boʻyicha koʻrsatiladigan xizmatlar qiymatini pasaytirishga yoʻnaltirsinlar.

7. “Oʻzdavneftmahsulot” davlat-aksionerlik birlashmasi:

“Oʻzavtotrans” korporatsiyasi va “Oʻzmevasabzavotuzumsanoat” uyushmasi bilan birgalikda tashkil etilayotgan “Oʻzagrotrans” kompaniyasining yonilgʻi-moylash materiallariga boʻlgan ehtiyojini aniqlasin;

“Oʻzagrotrans” aksionerlik-transport kompaniyasini yonilgʻi-moylash materiallariga tegishli limitlar bilan taʼminlasin, bunda ularning qayta taqsimlanishini, shuningdek, kompaniyaning “Mersedes-Bens” avtopoyezdlari bilan qoʻshimcha ravishda taʼminlanishini hisobga olsin.

8. Oʻzbekiston Respublikasi Adliya vazirligi “Oʻzagrotrans” aksionerlik-transport kompaniyasining taʼsis hujjatlarini belgilangan tartibda roʻyxatdan oʻtkazsin.

9. Oʻzbekiston Respublikasi Tashqi iqtisodiy aloqalar vazirligi “Oʻzagrotrans” aksionerlik-transport kompaniyasining xalqaro yuk tashishlarni amalga oshirishi uchun litsenziyani belgilangan tartibda rasmiylashtirsin.

10. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov zimmasiga yuklansin.