Respublika moliya va bank tizimini isloh qilishni davom ettirish, tijorat banklarini xususiylashtirish, raqobatni rivojlantirish va bank sektoriga xorijiy investitsiyalarni jalb qilish uchun qulay muhit yaratish maqsadida, shuningdek Vazirlar Mahkamasining “Xalqaro tiklanish va taraqqiyot banki ishtirokida Moliyaviy sektorni institutsional rivojlantirish loyihasini amalga oshirish chora-tadbirlari toʻgʻrisida” 1999-yil 19-iyuldagi 348-son qaroriga qoʻshimcha ravishda Vazirlar Mahkamasi qaror qiladi:

1. Quyidagilar:

Oʻzbekiston Respublikasi bilan Xalqaro tiklanish va taraqqiyot banki oʻrtasida imzolangan qarz bitimi (Moliyaviy sektorni institutsional rivojlantirish loyihasi) shartlariga muvofiq bir qancha tijorat banklarini xususiylashtirish va qayta tarkibini oʻzgartirish komponentini amalga oshirish nazarda tutilganligi;

banklarni xususiylashtirish va tarkibini oʻzgartirish komponentini amalga oshirishda “Asaka” banki, “Oʻzsanoatqurilishbank”, “Paxta-bank” va Tashqi iqtisodiy faoliyat milliy banki hamda oʻz ustav sarmoyalarida davlat ulushi boʻlgan boshqa tijorat banklari qatnashayotganligi maʼlumot uchun qabul qilinsin.

2. Oʻzbekiston Respublikasi Moliya vazirligi va Markaziy bankining Moliya vazirligi huzurida yuridik shaxs huquqiga ega boʻlgan Oʻzbekiston Respublikasi banklarini xususiylashtirish byurosini (keyinchalik “Byuro” deb ataladi) tashkil etish toʻgʻrisidagi taklifiga rozilik berilsin.

3. Belgilansinki, Banklarni xususiylashtirish byurosi Oʻzbekiston Respublikasi Moliya vazirligiga hisobot beradi, unga joriy rahbarlik qilish Moliya vazirligi tomonidan tayinlanadigan direktor tomonidan amalga oshiriladi;

Byuroning ustav fondi 35 mln soʻmni tashkil etadi, u davlat budjeti mablagʻlari hisobiga, shuningdek kompyuter va tashkiliy texnika sifatidagi mulkiy ulush qoʻshish yoʻli bilan Moliya vazirligi tomonidan shakllantiriladi;

Byuro xodimlarining cheklangan soni (yordamchi va xizmat koʻrsatuvchi xodimlardan tashqari) 6 nafarni tashkil etadi va u 1-ilovaga muvofiq tuzilmaga ega boʻladi;

Byuroning joriy faoliyatini mablagʻ bilan taʼminlash ustav fondi va qarz mablagʻlari hisobiga amalga oshiriladi, xodimlar mehnatiga koʻrsatib oʻtilgan manbalardan milliy valyutada haq toʻlanadi.

4. Quyidagilar Byuroning asosiy vazifalari etib belgilansin:

iqtisodiyotdagi tarkibiy islohotlar ustuvorliklarini hisobga olgan holda tijorat banklarini xususiylashtirish strategiyasini ishlab chiqish va amalga oshirish;

banklarni yakka tartibda xususiylashtirish tadbirlarini ishlab chiqish va ularning amalga oshirilishini nazorat qilish;

strategik investorlarni jalb qilgan holda banklarni xususiylashtirish masalalari boʻyicha Hukumat qarorlari amalga oshirilishini nazorat qilish va uning monitoringini olib borish;

loyihani amalga oshirish uchun xalqaro maslahatchilarni, xorijiy tashkilotlar va moliyaviy institutlarni jalb etish;

xalqaro maslahatchilar, xorijiy tashkilotlar va moliyaviy institutlar, shuningdek qarz berish shartlariga muvofiq xorijiy investorlar jalb etilishi uchun texnik topshiriqlarni tayyorlash va tenderlar tashkil etish;

xususiylashtirilayotgan banklarning moliyaviy ahvoli tekshirilishini tashkil etish va uni amalga oshirish;

yirik banklarning aksiyalarini keyinchalik chet elda joylashtirish uchun investitsiya ehtiyojlarini oʻrganib chiqish va xususiylashtirilayotgan banklarni yanada rivojlantirish strategiyasini ishlab chiqish;

xususiylashtirilayotgan banklar samarali ravishda taqdimotdan oʻtkazilishini tashkil etish va uni amalga oshirish;

moliyaviy sektorni isloh qilishga jalb etilgan mamlakatimizning va xorijiy tashkilotlar va moliyaviy institutlar oʻrtasida ishlarni muvofiqlashtirishni va hamkorlikni taʼminlash.

5. Oʻzbekiston Respublikasi Moliya vazirligi Byuroni joylashtirish uchun joy ajratsin.

6. Banklarning davlatga tegishli aksiyalari paketlarini potensial investorlarga sotish boʻyicha 2-ilovaga* muvofiq tarkibda davlat tender komissiyasi tuzilsin.

Belgilansinki, Davlat tender komissiyasi aʼzolari boshqa ishga oʻtganlari taqdirda ularning lavozimiga yangidan tayinlangan shaxslar komissiya tarkibiga kiritiladi.

7. Quyidagilar Davlat tender komissiyasining asosiy vazifalari etib belgilansin:

davlatga tegishli aksiyalar paketlarini sotish oldidan tayyorlash va ularni potensial investorlarga sotish masalalari boʻyicha vakolatli davlat organlari va xususiylashtirilayotgan banklarning, shuningdek, jalb qilingan ekspert kompaniyalar hamda vositachilarning birgalikdagi faoliyatini tashkil etish;

davlatga tegishli aksiyalar paketlarini sotish oldidan tayyorlash va ularni sotish uchun texnik, moliyaviy va boshqa maslahatchilar va ekspertlarni jalb qilish shartlarini belgilash;

davlatga tegishli aksiyalar paketlarini sotib olish uchun daʼvogarlarning foydaliroq takliflarini ekspertiza qilish va tanlash;

baholashning oshkoraligi, halolligi va talablarning yagonaligi asosida tender qatnashchilari uchun teng raqobat sharoitlarini yaratish.

8. Komissiya Oʻzbekiston Respublikasi Moliya vazirligi, Davlat mulki qoʻmitasi va Markaziy banki bilan birgalikda bir oy muddatda Banklarning davlatga tegishli aksiyalari paketlarini potensial investorlarga sotish boʻyicha davlat tender komissiyasi toʻgʻrisidagi Nizomni Vazirlar Mahkamasiga tasdiqlash uchun kiritsin.

9. Oʻzbekiston Respublikasi Ichki ishlar vazirligi Moliya vazirligi va Byuroning buyurtmanomalariga koʻra loyihani amalga oshirishda qatnashuvchi xorijiy maslahatchilarga, ularni davlat poshlinalari toʻlashdan ozod qilgan holda koʻp martalik vizalarni belgilangan tartibda berish va ularning muddatlarini uzaytirishni, shuningdek, vaqtinchalik roʻyxatdan oʻtkazish va vaqtinchalik roʻyxatdan oʻtkazish muddatlarini uzaytirishni taʼminlasin.

10. Oʻzbekiston Respublikasi Tashqi ishlar vazirligi Moliya vazirligi va Byuroning buyurtmanomalariga koʻra loyihani amalga oshirishda ishtirok etadigan xorijiy mutaxassislarga kelish vizalarini belgilangan tartibda rasmiylashtirishni taʼminlasin.

11. Mazkur qarorning bajarilishini nazorat qilish Bosh vazir oʻrinbosari R.S.Azimov va Markaziy bank raisi F.M.Mullajonov zimmasiga yuklansin.