Oʻzbekiston Respublikasi Prezidentining “Elektron tijoratni jadal rivojlantirish chora-tadbirlari toʻgʻrisida” 2018-yil 14-maydagi PQ-3724 -son qaroriga muvofiq Vazirlar Mahkamasi qaror qiladi:

1. Oʻzbekiston Respublikasi Hukumatining ilovaga muvofiq ayrim qarorlariga oʻzgartirish va qoʻshimchalar kiritilsin.

2. Vazirlik va idoralar oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

3. Mazkur qarorning bajarilishini nazorat qilish Oʻzbekiston Respublikasi Axborot texnologiyalari va kommunikatsiyalarini rivojlantirish vaziri A.I. Axmedxadjayev zimmasiga va Oʻzbekiston Respublikasi Vazirlar Mahkamasi Elektron hukumat, telekommunikatsiya infratuzilmasini rivojlantirish va axborot xavfsizligini taʼminlash masalalari axborot-tahlil departamentiga yuklansin.

1. Vazirlar Mahkamasining 2003-yil 30-sentabrdagi 416-son qarori (Oʻzbekiston Respublikasi QT, 2003-y., 9-son, 92-modda) bilan tasdiqlangan Tashqi savdo operatsiyalari ustidan monitoring olib borish tartibi toʻgʻrisidagi nizom 12¹-bandining ikkinchi xatboshi quyidagi tahrirda bayon etilsin:

“Bunda, 3000 (uch ming) AQSh dollargacha boʻlgan tovarlar elektron tijorat orqali TSOYAEATga kiritmasdan va yuk bojxona delaratsiyasini rasmiylashtirmasdan, pochta xizmatlarini koʻrsatish qoidalariga muvofiq realizatsiya qilinishi mumkin”.

2. Vazirlar Mahkamasining “Plastik kartochkalar asosida hisob-kitob qilish tizimini yanada rivojlantirish chora-tadbirlari toʻgʻrisida” 2004-yil 24-sentabrdagi 445-son qarorining (Oʻzbekiston Respublikasi QT, 2004-y., 9-son, 94-modda) 4-bandi quyidagi tahrirda bayon etilsin:

“4. Belgilab qoʻyilsinki, plastik kartochkalardan foydalanib tovarlarni sotishda va xizmatlar koʻrsatishda xoʻjalik yurituvchi subyektlar tomonidan beriladigan terminal cheklari, shuningdek, qonun hujjatlariga muvofiq elektron tijorat ishtirokchilari tomonidan xizmatlar koʻrsatish jarayonida axborot tizimlari tomonidan shakllantiriladigan, bitimlardagi tomonlarni identifikatsiyalash imkonini beruvchi elektron cheklar, kvitansiyalar, xabarlar va boshqa usullar kvitansiyalar, talonlar, chiptalarga hamda tovarlar va xizmatlarga haq toʻlanganligini tasdiqlovchi ularga tenglashtirilgan boshqa hujjatlarga tenglashtiriladi”.

3. Vazirlar Mahkamasining 2006-yil 14-iyuldagi 138-son qarori (Oʻzbekiston Respublikasi QT, 2006-y., 7-son, 51-modda) bilan tasdiqlangan Avtomobil transportida yoʻlovchilarni hamda yuklarni shaharda, shahar atrofida, shaharlararo va xalqaro yoʻnalishlar boʻyicha tashish faoliyatini litsenziyalash toʻgʻrisidagi nizom 2-bandining uchinchi xatboshi quyidagi tahrirda bayon etilsin:

“Aholining hayoti va sogʻligʻini xavf ostiga qoʻygan tabiiy ofatlar, epidemiyalar, yirik avariyalar oqibatlarini tugatish hamda Hukumatning qarorlari boʻyicha avariya-qutqarish va tiklash ishlari amalga oshirilishi va muruvvat yuklari yetkazib berilishi talab etilishi bilan bogʻliq tashishlarni amalga oshirishga, elektron tijorat orqali realizatsiya qilingan tovarlarni sotuvchiga va yetkazib beruvchiga shaxsiy mulk, ijara va boshqa foydalanish huquqiga asosan tegishli boʻlgan avtomobil transportida Oʻzbekiston hududi boʻylab yetkazib berishga, qonunchilikda belgilangan holatlar bundan mustasno, shuningdek “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 9-moddasida nazarda tutilgan korxonalar va muassasalarga litsenziya olish talab etilmaydi”.

4. Vazirlar Mahkamasining 2012-yil 19-dekabrdagi 356-son qarori (Oʻzbekiston Respublikasi QT, 2012-y., 12-son, 87-modda) bilan tasdiqlangan Axborot-kommunikatsiya texnologiyalarini rivojlantirish jamgʻarmasi toʻgʻrisidagi nizom 5-bandining “b” kichik bandida:

a) quyidagi mazmundagi yigirmanchi xatboshi qoʻshilsin:

“elektron tijorat sohasida davlat miqyosidagi ijtimoiy ahamiyatga ega loyihalarni ishlab chiqish, amalga oshirish va qoʻllab-quvvatlash”;

b) yigirmanchi — yigirma uchinchi xatboshlar tegishli ravishda yigirma birinchi — yigirma toʻrtinchi xatboshilar deb hisoblansin.

5. Vazirlar Mahkamasining “Oʻzbekiston Respublikasi axborot texnologiyalari va kommunikatsiyalarini rivojlantirish vazirligi huzuridagi “Elektron hukumat” tizimini rivojlantirish markazi hamda Axborot xavfsizligini taʼminlash markazi faoliyatini tashkil etish chora-tadbirlari toʻgʻrisida” 2013-yil 16-sentabrdagi 250-son qarorining (Oʻzbekiston Respublikasi QT, 2013-y., 9-son, 66-modda) 2-bandi quyidagi tahrirda bayon etilsin:

“2. Quyidagilar Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi huzuridagi “Elektron hukumat” tizimini rivojlantirish markazining asosiy vazifalari etib belgilansin:

“Elektron hukumat” tizimini yanada rivojlantirish va takomillashtirishning strategik yoʻnalishlarini, shu jumladan jahon tendensiyalarini hamda xorijiy mamlakatlar tajribasini tahlil va tadqiq qilish asosida ishlab chiqish;

elektron hukumatni rivojlantirish va davlat xizmatlarining sifatini oshirish uchun marketing va innovatsion tadqiqotlarni oʻtkazish;

raqamli iqtisodiyotni tartibga solish sohasidagi vakolatlarni rivojlantirish boʻyicha uslubiy asos, shuningdek, elektron tijorat sohasidagi tadbirkorlikni yanada rivojlantirish uchun qulay shart-sharoitlar yaratish;

davlat boshqaruvida raqamli platformalar va elektron boshqaruv texnologiyalarini ishlab chiqish va joriy etish, shuningdek, innovatsion raqamli texnologiyalarni sinov tariqasida ishga tushirish va Oʻzbekiston Respublikasi sharoitida ularni keng joriy etish boʻyicha tavsiyalar tayyorlash;

mavjud jarayonlarni oʻrganish va tahlil qilish, shuningdek funksional va operatsion jarayonlarni optimallashtirish boʻyicha takliflarni ishlab chiqish;

“Aqlli shahar” texnologiyalarini joriy etish va rivojlantirish uchun ilgʻor yutuqlar va ijobiy xorijiy tajribalarni doimiy oʻrganish va tahlil qilish, hozirgi holatni tahlil qilish, Oʻzbekiston Respublikasida “Aqlli shahar” texnologiyalarini istiqbollarini prognozlash va joriy etish, salohiyatini baholash;

“Elektron hukumat” tizimini samarali amalga oshirish uchun huquqiy va meʼyoriy bazani takomillashtirish boʻyicha maqsadli tahlil oʻtkazish va takliflar tayyorlash;

maʼlumotlarni doimiy yigʻish va tahlil qilish, shuningdek, Oʻzbekiston Respublikasida AKT loyihalarini joriy qilish holatini monitoring qilish;

axborot texnologiyalari va kommunikatsiyalarini rivojlantirish sohasidagi loyihalarni amalga oshirishning maqsadli indikatorlari va koʻrsatkichlarni belgilash;

Elektron tijorat subyektlari milliy reyestrini shakllantirish, yuritish va yanada takomillashtirish”.

6. Vazirlar Mahkamasining “Oʻzbekiston Respublikasida tashqi savdo operatsiyalari monitoringini takomillashtirishga doir qoʻshimcha chora-tadbirlar toʻgʻrisida” 2014-yil 21-iyuldagi 199-son qarorining (Oʻzbekiston Respublikasi QT, 2014-y., 7-son, 74-modda) 3¹-bandida:

a) birinchi xatboshiga “shuningdek, elektron tijorat orqali amalga oshiriladigan uch ming AQSh dollarigacha boʻlgan tovarlar (ishlar, xizmatlar) eksporti” soʻzlari qoʻshilsin;

b) quyidagi mazmundagi toʻrtinchi xatboshi qoʻshilsin:

“Bojxona yuk deklaratsiyasi roʻyxatidan oʻtkazish talabi elektron tijorat orqali amalga oshiriladigan uch ming AQSh dollarigacha boʻlgan tovarlar (ishlar, xizmatlar)ni eksport qilishga tatbiq etilmaydi”;

v) toʻrtinchi xatboshi beshinchi xatboshi deb hisoblansin.

7. Vazirlar Mahkamasining 2015-yil 20-iyuldagi 197-son qarori (Oʻzbekiston Respublikasi QT, 2015-y., 7-son, 61-modda) bilan tasdiqlangan Eksport-import operatsiyalarini amalga oshirishda davlat bojxona xizmati organlariga taqdim etiladigan hujjatlar roʻyxati I boʻlimining 2-bandi quyidagi tahrirda bayon etilsin:

“2. Bojxona yuk deklaratsiyasi, qonun hujjatlarida belgilangan tartibda yoʻlovchi bojxona deklaratsiyasini toʻldirish yoʻli bilan tovarlarni deklaratsiyalash va elektron tijorat orqali uch ming AQSh dollarigacha boʻlgan tovarlar (ishlar, xizmatlar) realizatsiya qilish hollari bundan mustasno”.

8. Vazirlar Mahkamasining ““Elektron tijorat toʻgʻrisida” Oʻzbekiston Respublikasi Qonuniga oʻzgartish va qoʻshimchalar kiritish haqida” 2015-yil 22-maydagi OʻRQ-385-son Oʻzbekiston Respublikasi qonunini amalga oshirish chora-tadbirlari toʻgʻrisida” 2015-yil 8-sentabrdagi 259-son qarori (Oʻzbekiston Respublikasi QT, 2015-y., 9-son, 78-modda) 3-bandining ikkinchi xatboshi quyidagi tahrirda bayon etilsin:

“Bunda 3000 (uch ming) AQSh dollargacha boʻlgan tovarlar elektron tijorat orqali Tashqi savdo operatsiyalarining yagona elektron axborot tizimiga kiritmasdan va yuk bojxona delaratsiyasini rasmiylashtirmasdan, pochta xizmatlarini koʻrsatish qoidalariga muvofiq realizatsiya qilinishi mumkin”.

9. Vazirlar Mahkamasining “Elektron tijoratda bitimlarni amalga oshirish tartibini yanada takomillashtirish chora-tadbirlari toʻgʻrisida” 2016-yil 2-iyundagi 185-son qarorida (Oʻzbekiston Respublikasi QHT, 2016-y., 23-son, 266-modda):

a) 2-bandning uchinchi xatboshisi quyidagi tahrirda bayon etilsin:

“elektron tijorat orqali realizatsiya qilingan tovarlarni sotuvchiga va yetkazib beruvchiga shaxsiy mulk, ijara va boshqa foydalanish huquqiga asosan tegishli boʻlgan avtomobil transportida Oʻzbekiston hududi boʻylab yetkazib berishda shahar, shahar atrofi, shaharlararo va xalqaro avtomobilda yoʻlovchilar va yuk tashishlarni amalga oshirish uchun litsenziya olish talab qilinmaydi, qonunchilikda belgilangan holatlar bundan mustasno”;

b) 1-ilovaning 48-bandida:

quyidagi mazmundagi uchinchi va toʻrtinchi xatboshilar qoʻshilsin:

“virtual terminallar (E-POS) orqali xaridorga naqd pulni qabul qilganligi toʻgʻrisida elektron chek yoki boshqa tasdiqlovchi hujjatni majburiy yuborgan hamda inkassatsiya qoidalariga qatʼiy rioya qilgan holda pul mablagʻlarini xizmat koʻrsatuvchi bankka topshirish sharti bilan;

toʻlov terminallaridan foydalangan holda tadbirkorlik subyektlarining korporativ bank kartalari, shuningdek, elektron toʻlov tizimlari orqali”;

uchinchi va toʻrtinchi xatboshilar tegishli ravishda beshinchi va oltinchi xatboshilar deb hisoblansin;

v) 2-ilovaning 7-pozitsiyasi chiqarib tashlansin.

10. Vazirlar Mahkamasining 2017-yil 6-apreldagi 185-son qarori (Oʻzbekiston Respublikasi QT, 2017-y., 4-son, 40-modda) bilan tasdiqlangan Dori vositalarini va tibbiy buyumlarni chakana realizatsiya qilish tartibi toʻgʻrisidagi nizomga quyidagi mazmundagi 4¹-band qoʻshilsin:

“4¹. Elektron tijorat orqali dori vositalari va tibbiyot buyumlarini realizatsiya qilish, faqat saqlash va yetkazib berishda ularning xavfsizligini taʼminlash tartibi va talablariga qatʼiy rioya qilgan hamda qonun hujjatlari talablarini inobatga olgan holda amalga oshirishga ruxsat etiladi”.