Oʻzbekiston Respublikasi Vazirlar Mahkamasining “1999—2005-yillarda Oʻzbekiston Respublikasining atrof muhitni muhofaza qilish ishlari dasturi toʻgʻrisida” 1999-yil 20-oktabrdagi 469-son qarorini bajarish yuzasidan, shuningdek tarkibida simob moddasi boʻlgan mahsulotlardan soʻzsiz foydalanilishini taʼminlash va atrof muhitni simob bilan ifloslanishdan himoya qilish maqsadida Vazirlar Mahkamasi qaror qiladi:

1. Vazirliklar, idoralar, idoraviy boʻysunishidan va mulkchilik shakllaridan qatʼi nazar, korxonalar, tashkilotlar, muassasalarga ishlatib boʻlingan va brak qilingan tarkibida simob moddasi boʻlgan lampalar, priborlar, yarim tayyor mahsulotlar va ishlab chiqarish chiqindilarini tarkibida simob moddasi boʻlgan mahsulotlarni foydali ravishda ishlatish yoki zararsizlantirish (demerkurlashtirish) uchun Oʻzbekiston Respublikasi Davlat tabiatni muhofaza qilish qoʻmitasining tegishli ruxsatnomalariga ega boʻlgan korxonalar va tashkilotlarga topshirish majburiyati yuklansin.

2. Vazirliklar, idoralar, idoraviy boʻysunishidan va mulkchilik shakllaridan qatʼi nazar, korxonalar, tashkilotlar, muassasalar tomonidan tarkibida simob moddasi boʻlgan mahsulotlarni Oʻzbekiston Respublikasi Davlat tabiatni muhofaza qilish qoʻmitasining tegishli ruxsatnomasisiz foydali ravishda ishlatish yoki zararsizlantirish qatʼiy taqiqlansin.

3. Belgilansinki, tarkibida simob moddasi boʻlgan mahsulotlarni foydali ravishda ishlatish yoki zararsizlantirish bilan bogʻliq ishlarga vazirliklar, idoralar, idoraviy boʻysunishidan va mulkchilik shakllaridan qatʼi nazar, korxonalar, tashkilotlar, muassasalar tomonidan oʻz mablagʻlari hisobidan haq toʻlanadi.

4. Oʻzbekiston Respublikasi Davlat tabiatni muhofaza qilish qoʻmitasi, Sogʻliqni saqlash vazirligi ikki oy muddatda yuridik va jismoniy shaxslarning tarkibida simob moddasi boʻlgan mahsulotlardan foydalanishiga doir zarur meʼyoriy hujjatlarni ishlab chiqsinlar va belgilangan tartibda tasdiqlasinlar.

5. Oʻzbekiston Respublikasi Davlat tabiatni muhofaza qilish qoʻmitasi, Sogʻliqni saqlash vazirligi va Kommunal xizmat koʻrsatish vazirligi:

yuridik shaxslar tomonidan, qonun hujjatlarida belgilangan tartibda ruxsatnoma olinmasdan, tarkibida simob moddasi boʻlgan mahsulotlar mustaqil foydali ravishda ishlatilishi yoki zararsizlantirilishiga yoʻl qoʻyilmasligi;

vazirliklar, idoralar, idoraviy boʻysunishidan va mulkchilik shakllaridan qatʼi nazar, korxonalar, tashkilotlar, muassasalar tomonidan tarkibida simob moddasi boʻlgan mahsulotlarni saqlash va ulardan foydalanish qoidalariga rioya qilinishi;

hokimiyat hududiy organlari va fuqarolarning mahalliy oʻzini oʻzi boshqarish organlari bilan birgalikda aholi tomonidan tarkibida simob moddasi boʻlgan mahsulotlarni topshirish qoidalariga rioya qilinishi ustidan nazoratni kuchaytirsinlar.

6. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, “Mahalla” respublika jamgʻarmasi aholidan tarkibida simob moddasi boʻlgan mahsulotlarni toʻplashni tashkil etishda Oʻzbekiston Respublikasi Davlat tabiatni muhofaza qilish qoʻmitasi organlariga va Kommunal xizmat koʻrsatish vazirligining hududiy boʻlinmalariga har tomonlama yordam koʻrsatishni taʼminlasinlar.

7. Oʻzbekiston Respublikasi Vazirlar Mahkamasining 1992-yil 24-oktabrdagi 395-f-son farmoyishi oʻz kuchini yoʻqotgan deb hisoblansin.

8. Mazkur qarorning bajarilishini nazorat qilish Bosh vazir oʻrinbosari T. Xoltoyev zimmasiga yuklansin.