Oʻzbekiston Respublikasi Prezidentining 2017-yil 29-noyabrdagi PF-5264-son “Oʻzbekiston Respublikasi Innovatsion rivojlanish vazirligini tashkil etish toʻgʻrisida”gi Farmoni hamda 2017-yil 30-noyabrdagi PQ-3416-son “Oʻzbekiston Respublikasi Innovatsion rivojlanish vazirligi faoliyatini tashkil etish toʻgʻrisida”gi qaroriga muvofiq buyuraman:

1. Ilmiy laboratoriyalarni yaratish va qoʻshimcha jihozlash boʻyicha tanlovlarni oʻtkazish, shuningdek zarur sarflash materiallari va butlovchi qismlar bilan taʼminlash tartibi toʻgʻrisidagi nizom ilovaga muvofiq tasdiqlansin.

2. Fan va texnologiyalar boʻyicha davlat komissiyasining qarori 2017-yil 20-sentabrdagi 2-son qarori bilan tasdiqlangan Davlat ilmiy-texnika dasturlarini bajarishda ishtirok etuvchi ilmiy-tadqiqot va oliy taʼlim muassasalarini ilmiy, texnologik va laboratoriya asbob-uskunalari bilan jihozlash (qoʻshimcha jihozlash) va ilmiy laboratoriyalarni zarur sarflanuvchi materiallar va butlovchi qismlar bilan uzluksiz taʼminlash tartibi toʻgʻrisidagi nizom (roʻyxat raqami 2947, 2017-yil 15-noyabr) (Oʻzbekiston Respublikasi qonun hujjatlari toʻplami, 2017-y., 46-son, 1140-modda) oʻz kuchini yoʻqotgan deb hisoblansin.

3. Mazkur buyruq rasmiy eʼlon qilingan kundan eʼtiboran kuchga kiradi.

Mazkur Nizom Oʻzbekiston Respublikasi Prezidentining 2017-yil 29-noyabrdagi PF-5264-son “Oʻzbekiston Respublikasi Innovatsion rivojlanish vazirligini tashkil etish toʻgʻrisida”gi Farmoni hamda 2017-yil 30-noyabrdagi PQ-3416-son “Oʻzbekiston Respublikasi Innovatsion rivojlanish vazirligi faoliyatini tashkil etish toʻgʻrisida”gi qaroriga asosan ilmiy laboratoriyalarni yaratish va qoʻshimcha jihozlash boʻyicha tanlovlarni oʻtkazish, shuningdek zarur sarflash materiallari va butlovchi qismlar bilan taʼminlash tartibini belgilaydi.

1. Ilmiy laboratoriyalarni yaratish va qoʻshimcha jihozlash boʻyicha tanlovlarni oʻtkazish, shuningdek zarur sarflash materiallari va butlovchi qismlar bilan taʼminlash bilan bogʻliq xarajatlar Innovatsion rivojlanish va novatorlik gʻoyalarini qoʻllab-quvvatlash jamgʻarmasining (bundan buyon matnda Jamgʻarma deb yuritiladi) mablagʻlari hisobidan amalga oshiriladi.

2. Ilmiy laboratoriyalarni yaratish va qoʻshimcha jihozlash boʻyicha tanlovlarni oʻtkazish, shuningdek zarur sarflash materiallari va butlovchi qismlar bilan taʼminlash boʻyicha loyihalarni (bundan buyon buyurtmalar deb yuritiladi) moliyalashtirish tegishli moliya yili uchun Jamgʻarmaning Kuzatuv kengashi tomonidan tasdiqlanadigan daromadlar va xarajatlarning prognoz parametrlarida koʻzda tutiladi.

3. Oʻzbekiston Respublikasi Innovatsion rivojlanish vazirligi (bundan buyon matnda Vazirlik deb yuritiladi) tomonidan davlat ilmiy-texnika dasturlarini bajarishda ishtirok etuvchi ilmiy-tadqiqot va oliy taʼlim muassasalari (bundan buyon matnda ilmiy-tadqiqot va oliy taʼlim muassasalari deb yuritiladi) oʻrtasida buyurtmalar boʻyicha tanlov oʻtkaziladi.

4. Buyurtmalar boʻyicha tanlov toʻgʻrisidagi eʼlon tanlov boshlanishidan 2 oy avval ommaviy axborot vositalari, internet nashrlar hamda Vazirlikning rasmiy veb-saytida eʼlon qilinadi.

Tanlovni oʻtkazish haqidagi eʼlonda quyidagi maʼlumotlar boʻlishi zarur:

tanlovni oʻtkazish muddatlari;

tanlov ishtirokchilariga qoʻyiladigan talablar;

zarur hujjatlar roʻyxati;

bogʻlanish uchun telefonlar va elektron manzillar.

5. Jamgʻarmaning Kuzatuv kengashi ilmiy-tadqiqot va oliy taʼlim muassasalarining asoslantirilgan takliflari boʻyicha tanlov oʻtkazmasdan turib qaror chiqarish huquqiga ega.

6. Ilmiy tadqiqot va oliy taʼlim muassasalari buyurtmalariga ular bevosita boʻysunuvchi vazirlik va idoralarning rasmiy xati asosida quyidagi hujjatlar ilova qilinadi:

mazkur Nizom ilovasiga muvofiq shaklda talab etilayotgan laboratoriya jihozlari, zarur sarflash materiallari va (yoki) butlovchi qismlar roʻyxati, miqdori, taklif etilayotgan xarid narxi, ishlab chiqaruvchi yoki yetkazib beruvchi davlatning nomi, buyurtmaning ilmiy yoki iqtisodiy samaradorligi;

buyurtmadagi har bir laboratoriya jihozi, sarflash materiallari va/yoki butlovchi qismlarning toʻliq spetsifikatsiyasi;

ishlab chiqaruvchi yoki rasmiy yetkazib beruvchi vakillarning dastlabki tijorat takliflari.

7. Ilmiy-tadqiqot va oliy taʼlim muassasalari buyurtmani taqdimot shaklida himoya qiladilar. Buyurtma taqdimoti elektron shakldagi materiallar bilan boyitilishi hamda buyurtmaning dolzarbligi, maqsad va vazifalari yoritib berilishi lozim.

8. Vazirlik tomonidan umumlashtirilgan buyurtmalarni oʻrganish va asosli xulosalar olish maqsadida innovatsion rivojlanish vazirining buyrugʻi asosida har yili yangi tarkibda ekspert guruhi tuziladi.

9. Ekspert guruhi oʻz yoʻnalishi boʻyicha kamida 5 yil mehnat stajiga ega boʻlgan yuqori malakali (turli vazirlik, idoralar, ilmiy-tadqiqot va oliy taʼlim muassasalari) kamida 7 nafar mutaxassislardan iborat tarkibda tuziladi. Ekspert guruhi tarkibining soni toq boʻlishi lozim.

Ekspert guruhi rahbari, zarur hollarda tor ixtisoslashuvdagi qoʻshimcha mutaxassislarni (shu jumladan, ishlab chiqarish korxona va tashkilotlari, xalqaro tashkilotlar, chet el kompaniyalari va mutaxassislarini) ekspertiza ishiga jalb qilishi mumkin.

10. Ekspert guruhi 1 oylik muddatda kiritilgan buyurtmalarni toʻliq va har tomonlama koʻrib chiqib, yakuniy xulosani Vazirlikka taqdim etadi.

11. Ekspert guruhi tomonidan yakuniy xulosa tayyorlashda quyidagilarga eʼtibor qaratiladi:

mazkur Nizomning 6-bandida koʻrsatilgan hujjatlarning toʻliq taqdim etilganligiga;

ilmiy-tadqiqot va/yoki oliy taʼlim muassasasini prinsipial jihatdan yangi, zamonaviy va yuqori texnologik uskunalar bilan jihozlanishiga;

buyurtmaning tegishli tarmoq yoki soha ehtiyojlari va talablariga mosligiga;

taqdimotda buyurtmaning dolzarbligi, maqsad va vazifalari toʻliq yoritilganligiga.

12. Ekspert guruhi majlisini oʻtkazish uchun kvorum uning tarkibining 70 foizini tashkil etishi kerak. Ekspert guruhining barcha majlislari va qabul qilingan qarorlari bayonnomalar bilan rasmiylashtiriladi. Koʻrilayotgan masala boʻyicha qaror ekspert guruhi aʼzolari umumiy sonining oddiy koʻpchilik ovozi bilan qabul qilinadi.

13. Ekspert guruhining yakuniy xulosalariga muvofiq tanlab olingan buyurtmalarni amalga oshirish (sotib olish) xarajatlari tegishli moliya yilida Jamgʻarmaning ushbu maqsadlar uchun rejalashtirilishi kutilayotgan mablagʻlari doirasida boʻlishi zarur.

14. Vazirlik ekspert guruhining yakuniy xulosalarini umumlashtirib, koʻrib chiqish va tasdiqlash uchun Jamgʻarmaning Kuzatuv kengashiga kiritadi. Buyurtmalar roʻyxati Jamgʻarma Kuzatuv kengashi tomonidan tasdiqlanganidan soʻng Jamgʻarma tomonidan moliyalashtiriladi.

15. Kuzatuv kengashi tomonidan tasdiqlangan buyurtmalarning birlamchi hujjatlari hamda ekspert guruhining yakuniy xulosasi nusxasi Vazirlik tomonidan (asliga toʻgʻriligini tasdiqlovchi muhr bilan) Jamgʻarmaga kiritiladi.

16. Ilmiy laboratoriyalarni yaratish va qoʻshimcha jihozlash, shuningdek zarur sarflash materiallari va butlovchi qismlar bilan taʼminlash boʻyicha xaridlarni tashkil etish uchun Jamgʻarmaning ijro etuvchi direksiyasi, Vazirlik va buyurtmani bergan ilmiy-tadqiqot muassasasi yoki oliy taʼlim muassasasi oʻrtasida uch tomonlama shartnoma tuziladi.

17. Vazirlik xorijiy yetkazib beruvchilar va ishlab chiqaruvchilarni qonun hujjatlarida belgilangan tartibda tanlash asosida ular bilan tovar yetkazib berishga (shu jumladan zarurat boʻlganda, tovarni ilmiy-tadqiqot yoki oliy taʼlim muassasasiga yetkazib berish, ishga tushirish-sozlash va boshqa tegishli ishlarni amalga oshirishga) shartnomalarni tuzadi.

18. Jamgʻarma Vazirlik tomonidan moliyalashtirishni ochish uchun berilgan soʻrovnomaga asosan shartnomada belgilangan valyutadagi summalarni tegishli hisob raqamga qonun hujjatlarida belgilangan tartibda oʻtkazib beradi.

19. Vazirlikdan tovarni qabul qilib olish buyurtmani bergan tegishli ilmiy-tadqiqot yoki oliy taʼlim muassasasi tomonidan bepul asosda amalga oshiriladi. Bunda tovar yetkazib berilganligini tasdiqlovchi hujjatlarning nusxalari Jamgʻarmaning Ijro etuvchi direksiyasiga Vazirlik tomonidan taqdim etiladi.

20. Tegishli ilmiy-tadqiqot yoki oliy taʼlim muassasasi uchun sotib olingan ilmiy asbob-uskunalar, sarflanuvchi materiallar va butlovchi qismlar mazkur ilmiy-tadqiqot yoki oliy taʼlim muassasalarning buxgalteriya balansiga olinadi.

21. Buyurtmalar bilan bogʻliq xarajatlar Jamgʻarmaning Kuzatuv kengashi tomonidan tegishli moliya yili uchun tasdiqlangan daromadlari va xarajatlari prognoz parametrlari doirasida moliyalashtiriladi.

22. Mazkur Nizom talablari buzilishida aybdor boʻlgan shaxslar qonun hujjatlarida belgilangan tartibda javobgar boʻladilar.

23. Mazkur Nizom Oʻzbekiston Respublikasi Moliya vazirligi, Oliy va oʻrta maxsus taʼlim vazirligi, Fanlar akademiyasi hamda Innovatsion rivojlanish va novatorlik gʻoyalarini qoʻllab-quvvatlash jamgʻarmasi bilan kelishilgan.