Qishloq xoʻjaligi ekinlarini himoya qilish boʻyicha xizmatlar sifatini yaxshilash hamda qishloq xoʻjaligi ekinlari zararkunandalari, kasalliklari va begona oʻtlarga qarshi kurashish boʻyicha xizmatlar koʻrsatish tariflarini shakllantirilishini tartibga solish maqsadida Vazirlar Mahkamasi qaror qiladi:

1. Qishloq xoʻjaligi ekinlari zararkunandalari, kasalliklari va begona oʻtlarning tarqalish maydonlarini aniqlash tartibi toʻgʻrisida nizom ilovaga muvofiq tasdiqlansin.

2. Oʻzbekiston Respublikasi Qishloq xoʻjaligi vazirligi, “Oʻzagrokimyohimoya” aksiyadorlik jamiyati:

manfaatdor vazirlik va idoralar bilan birgalikda bir oy muddatda qishloq xoʻjaligi ekinlari zararkunandalari, kasalliklari va begona oʻtlarga qarshi kurashish boʻyicha xizmatlar koʻrsatish tariflarini shakllantirish metodologiyasini nazarda tutuvchi tavsiya ishlab chiqib, belgilangan tartibda tasdiqlasin;

mazkur tavsiyani amaliyotda foydalanish uchun joylarga yetkazilishini taʼminlasin.

3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Z.T. Mirzayev va Oʻzbekiston Respublikasi qishloq xoʻjaligi vaziri B.T. Yusupov zimmasiga yuklansin.

1. Mazkur Nizom qishloq xoʻjaligi ekinlari zararkunandalari, kasalliklari va begona oʻtlar tarqaladigan maydonlarni aniqlash tartibini belgilaydi.

2. Qishloq xoʻjaligi ekinlari zararkunandalari, kasalliklari va begona oʻtlarning tarqalish maydonlarini aniqlash oʻsimliklarni himoya qilish tadbirlarini rejalashtirish, zarur kimyoviy, biologik himoya vositalarga boʻlgan talabni aniqlash va tadbirlarni amalga oshirish muddatlarini belgilash maqsadida amalga oshiriladi.

3. Qishloq xoʻjaligi ekinlari zararkunandalari, kasalliklari va begona oʻtlari tarqaladigan maydonlarni aniqlash hududlarning fitosanitariya monitoringi asosida oʻsimliklarni samarali muhofaza qilishni bashorat qilish orqali amalga oshiriladi.

4. Oʻsimliklarni himoya qilishni bashorat qilish quyidagi bashorat turlari va usullari orqali amalga oshiriladi:

uzoq muddatli bashoratlar;

qisqa muddatli bashoratlar;

fenologik kuzatuv.

5. Uzoq muddatli bashorat besh yildan kam boʻlmagan muddat natijalari asosida tuziladi. Bunday bashoratlar ilmiy-tadqiqot muassasalari tayyorlagan tavsiyalar asosida joylardagi oʻsimliklarni himoya qilish mutaxassislari tomonidan yigʻilib, tegishli axborotning maksimal miqdori asosida tuziladi.

6. Qisqa muddatli bashorat bir necha kundan bir oy muddat ichida tarqaladigan zararli organizmlar uchun ishlab chiqiladi.

Qisqa muddatli bashorat fitosanitar holatni aniqlash, qoʻshimcha chora-tadbirlarni amalga oshirish yoki muayyan ekologik vaziyat uchun keraksiz boʻlgan tadbirlarni oʻzgartirish maqsadida amalga oshiriladi.

7. Zararkunandalar va ekinlarning rivojlanishi boʻyicha fenologik kuzatuv davomida muayyan ekologik sharoitlarda ularning oʻzgarish ehtimoli darajasi yoki maʼlum fazalarini boshlanishini belgilash maqsadida amalga oshiriladi.

Fenologik kuzatuvlar muayyan ekologik sharoitlarda alohida turlarning mumkin boʻlgan zararini aniqlash uchun va unga qarshi kurashni optimal muddatini belgilashga asos boʻlib xizmat qiladi.

8. Qishloq xoʻjaligi ekinlari zararkunandalari, kasalliklari va begona oʻtlarning tarqalish maydonlarini aniqlash ilovadagi sxema asosida amalga oshiriladi.

9. Hududiy “Agrokimyohimoya” aksiyadorlik jamiyatining tuman filiallari mutaxassislari tomonidan oʻsimliklarni himoya qilishni bashorat qilish tadbirlari har yili noyabr oyining 10-sanasigacha zararli organizmlarning qishlovdagi zaxirasini aniqlash maqsadida tuproq namunalari, dala atroflaridagi oʻsimlik qoldiqlari, daraxt poʻstloqlari va novdalarida kuzatuv ishlari olib borish orqali amalga oshiriladi.

10. Bashorat ishlarini amalga oshirishda tuman hududlarida hamda fermer xoʻjaliklarida oʻtgan yilda zararli organizmlar tarqalgan maydonlar tahlil qilinadi.

11. Hududiy “Agrokimyohimoya” aksiyadorlik jamiyatining tuman filiallari mutaxassislari tomonidan qishloq xoʻjaligi ekinlari zararkunandalari, kasalliklari va begona oʻtlarning tarqalish maydonlari boʻyicha tahliliy maʼlumotlar jamlanib, tumanlar Qishloq xoʻjaligi boʻlimlari, tumanlar Fermer, dehqon xoʻjaliklari va tomorqa yer egalari kengashlari bilan kelishilgan holda Qoraqalpogʻiston Respublikasi va viloyatlar hududiy “Agrokimyohimoya” aksiyadorlik jamiyatlariga taqdim etiladi.

12. Qishloq xoʻjaligi ekinlari zararkunandalari, kasalliklari va begona oʻtlarning tarqalish bashorati toʻgʻrisidagi maʼlumotlar Qoraqalpogʻiston Respublikasi va viloyatlar hududiy “Agrokimyohimoya” aksiyadorlik jamiyatlari tomonidan har yili noyabr oyining 20-sanasigacha tumanlar kesimida jamlanib, Qoraqalpogʻiston Respublikasi Qishloq xoʻjaligi vazirligi va viloyatlar Qishloq xoʻjaligi boshqarmalari, Qoraqalpogʻiston Respublikasi va viloyatlar Fermer, dehqon xoʻjaliklari va tomorqa yer egalari kengashlari bilan kelishilgan holda “Oʻzagrokimyohimoya” aksiyadorlik jamiyatiga taqdim etiladi.

13. “Oʻzagrokimyohimoya” aksiyadorlik jamiyati, “Oʻsimliklarni himoya qilish ilmiy-tadqiqot instituti” masʼuliyati cheklangan jamiyati, Qishloq xoʻjaligi vazirligi mutaxassislari bilan birgalikda har yili dekabr oyining 31-sanasigacha Qoraqalpogʻiston Respublikasi va viloyatlardan qishloq xoʻjaligi ekinlari zararkunandalari, kasalliklari va begona oʻtlarning tarqalish bashorati toʻgʻrisidagi maʼlumotlar olinib, umumalashtiriladi.

14. Qishloq xoʻjaligi ekinlari zararkunandalari, kasalliklari va begona oʻtlarning tarqalish bashorati toʻgʻrisidagi maʼlumotlar koʻp yillik agrometeorologik va zararli organizmlarning tarqalishi toʻgʻrisidagi maʼlumotlar asosida tahlil qilinadi.

15. Oʻsimliklarni himoya qilish sohasi boʻyicha mutaxassislar va olimlarning tahlillari natijasi asosida qishloq xoʻjaligi ekinlari zararkunandalari, kasalliklari va begona oʻtlarning tarqalish xavfini kuzatish va bartaraf etish boʻyicha tavsiyanomalar ishlab chiqiladi.

16. “Oʻzagrokimyohimoya” aksiyadorlik jamiyati, “Oʻsimliklarni himoya qilish ilmiy-tadqiqot instituti” masʼuliyati cheklangan jamiyati tomonidan har yili yanvar oyining 15-sanasigacha qishloq xoʻjaligi ekinlari zararkunandalari, kasalliklari va begona oʻtlarning tarqalish xavfini kuzatish va bartaraf etish boʻyicha tavsiyanomalar Qishloq xoʻjaligi vazirligi, Oʻzbekiston fermer, dehqon xoʻjaliklari va tomorqa yer egalari kengashiga hamda hududiy “Agrokimyohimoya” aksiyadorlik jamiyatlariga amaliyotda foydalanish uchun yuboriladi.

Shuningdek, qishloq xoʻjaligi ekinlari zararkunandalari, kasalliklari va begona oʻtlarning tarqalish xavfini kuzatish va bartaraf etish boʻyicha tavsiyanomalar Qishloq xoʻjaligi vazirligi, Oʻzbekiston fermer, dehqon xoʻjaliklari va tomorqa yer egalari kengashi, “Oʻzagrokimyohimoya” aksiyadorlik jamiyati oʻzlarining rasmiy veb-saytlarida eʼlon qiladi.

17. Qishloq xoʻjaligi vazirligi, Oʻzbekiston fermer, dehqon xoʻjaliklari va tomorqa yer egalari kengashi, “Oʻzagrokimyohimoya” aksiyadorlik jamiyati bilan birgalikda Qishloq xoʻjaligi ekinlari zararkunandalari, kasalliklari va begona oʻtlarning tarqalishning oldini olish boʻyicha har yili kompleks chora-tadbirlar rejasini ishlab chiqib, amalga oshiradi.

18. Ushbu Nizomda tartibga solinmagan masalalar, shuningdek uni qoʻllashda yuzaga keladigan kelishmovchiliklar qonun hujjatlarida belgilangan tartibda hal etiladi.

19. Mazkur Nizom talablari buzilishida aybdor boʻlgan shaxslar qonun hujjatlarida belgilangan tartibda javob beradilar.