Oʻrta maxsus, kasb-hunar taʼlimi muassasalarida kadrlar tayyorlash darajasi va sifatini yanada oshirish hamda akademik litseylar va kasb-hunar kollejlarini davlat taʼlim standartlari va Kadrlar tayyorlash milliy dasturi talablariga javob beradigan yuqori malakali pedagog va muhandis-pedagog kadrlar bilan taʼminlash maqsadida Vazirlar Mahkamasi qaror qiladi:

1. Quyidagilar 2001—2010-yillarda akademik litseylar va kasb-hunar kollejlari oʻqituvchilarini tayyorlash, qayta tayyorlash va ularning malakasini oshirish tizimini rivojlantirishning asosiy yoʻnalishlari etib belgilansin:

akademik litseylar va kasb-hunar kollejlari pedagog kadrlari, shuningdek ularni oʻqitishda ishtirok etuvchi oliy taʼlim muassasalari professor-oʻqituvchilar tarkibi kasbiy saviyasining uzluksiz ravishda oʻsishi va malakasi oshirib borilishini taʼminlash;

oʻqitish jarayoniga zamonaviy xorijiy metodikalardan foydalanish hamda oʻrta maxsus, kasb-hunar taʼlimi tizimi pedagoglarini tayyorlash, qayta tayyorlash va malakasini oshirishni amalga oshiruvchi oliy taʼlim muassasalari professor-oʻqituvchilar tarkibining rivojlangan mamlakatlarning yetakchi oʻquv markazlarida tajriba orttirishi amaliyotini kengaytirish orqali ilgʻor xalqaro pedagogik tajribalarni joriy etish;

zamonaviy texnologiyalarga asoslangan korxonalarning ishlab chiqarish salohiyatidan foydalangan holda ularning bazaviy oliy taʼlim muassasalari bilan kooperatsiyalashuvini va hamkorligini chuqurlashtirish yoʻli bilan muhandis-pedagog kadrlar tayyorlash;

akademik litseylar va kasb-hunar kollejlari rahbarlari va oʻqituvchilarining muntazam ravishda, kamida uch yilda bir marta attestatsiyadan oʻtkazilishini tashkil etish. Rahbar va oʻqituvchilarning boʻsh lavozimlarini tanlov asosida toʻldirish;

zamonaviy axborot texnologiyalari va Internet xalqaro axborot tarmogʻi imkoniyatlaridan keng foydalangan holda pedagog kadrlarni masofadan turib oʻqitish metodini joriy etish.

2. Quyidagilar:

2010-yilgacha boʻlgan davrda oʻrta maxsus, kasb-hunar taʼlimi tizimi pedagog va muhandis-pedagog kadrlarini tayyorlash, qayta tayyorlash va ularning malakasini oshirish dasturi 1-ilovaga muvofiq;

oʻrta maxsus, kasb-hunar taʼlimi tizimi pedagog va muhandis-pedagog kadrlarini qayta tayyorlash va ularning malakasini oshirishga ixtisoslashtirilgan oliy taʼlim muassasalarining roʻyxati 2-ilovaga muvofiq tasdiqlansin.

3. Davlat test markazi Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi bilan birgalikda 2001/2002 oʻquv yilidan boshlab oʻrta maxsus, kasb-hunar taʼlimi tizimida kadrlar tayyorlash sifati monitoringini olib borsin va davlat taʼlim standartlari talablariga muvofiq baholasin.

4. Oʻzbekiston Respublikasi Oliy va oʻrta maxsus taʼlim vazirligi:

manfaatdor vazirliklar va idoralar bilan birgalikda pedagog kadrlarni qayta tayyorlash va ularning malakasini oshirishga davlat talablarini bir oy muddatda ishlab chiqsin va tasdiqlasin;

2001—2010-yillarda oʻrta maxsus, kasb-hunar taʼlimi tizimini rivojlantirishning asosiy yoʻnalishlarini hisobga olgan holda, akademik litseylar va kasb-hunar kollejlari rahbar va pedagog kadrlarini qayta tayyorlash hamda ular malakasini oshirishning oʻquv rejalari va dasturlarini ikki oy muddatda qayta koʻrib chiqsin va tasdiqlasin;

har yili oʻrta maxsus, kasb-hunar taʼlimi tizimida kadrlar tayyorlash kasbiy darajasi monitoringi natijalariga koʻra akademik litseylar va kasb-hunar kollejlari pedagog kadrlarini qayta tayyorlash va ular malakasini oshirishning miqdoriy koʻrsatkichlarini va tartibini aniqlasin;

Oʻzbekiston Respublikasi Mehnat va aholini ijtimoiy muhofaza qilish vazirligi bilan birgalikda akademik litseylar va kasb-hunar kollejlari rahbar, pedagog va muhandis-pedagog kadrlariga qoʻyiladigan malaka talablari toʻgʻrisidagi Nizomni bir oy muddatda ishlab chiqsin va tasdiqlasin;

“Ustoz” jamgʻarmasi bilan birgalikda 2001—2010-yillarda akademik litseylar va kasb-hunar kollejlari oʻqituvchilarini tayyorlash, qayta tayyorlash va ularning malakasini oshirish tizimini rivojlantirishning asosiy yoʻnalishlarini roʻyobga chiqarishning aniq chora-tadbirlarini ishlab chiqsin va amalga oshirsin;

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda akademik litseylar va kasb-hunar kollejlarining mintaqalardagi yoshlar va jamiyatning maʼnaviy hamda aqliy rivojlanishiga koʻmaklashuvchi maʼrifat, madaniyat, ommaviy kompyuter savodxonligi markazlari sifatidagi rolini, akademik litseylar va kasb-hunar kollejlari oʻqituvchilarining ijtimoiy maqomi va jamiyatdagi obroʻ-eʼtiborini oshirish boʻyicha aniq chora-tadbirlarni ishlab chiqsin va amalga oshirsin.

5. Oʻzbekiston Respublikasi Oliy va oʻrta maxsus taʼlim vazirligi Oʻrta maxsus, kasb-hunar taʼlimi markazining akademik litseylar va kasb-hunar kollejlari direktorlarini Oʻzbekiston Respublikasi Vazirlar Mahkamasining nomenklaturasiga kiritish toʻgʻrisidagi taklifiga rozilik berilsin.

Bosh vazir oʻrinbosari — Oʻzbekiston Respublikasi Vazirlar Mahkamasining Ijtimoiy kompleksi rahbari (H.S.Karomatov) Oʻzbekiston Respublikasi Prezidentining Tashkiliy-kadrlar ishlari boʻyicha Davlat maslahatchisi xizmati bilan birgalikda akademik litseylar va kasb-hunar kollejlarining tanlovdan oʻtgan direktorlarini tayinlash tartibini 15 kun muddatda ishlab chiqsin va tasdiqlasin.

6. Oʻrta maxsus, kasb-hunar taʼlimi markazi, Davlat test markazi Mehnat va aholini ijtimoiy muhofaza qilish vazirligi bilan birgalikda:

Oʻrta maxsus, kasb-hunar taʼlimi tizimi rahbarlar tarkibini, pedagog va muhandis-pedagog kadrlarini attestatsiyadan oʻtkazish toʻgʻrisidagi Nizomni;

Oʻrta maxsus, kasb-hunar taʼlimi tizimida rahbar va oʻqituvchilarning boʻsh lavozimlarini egallash uchun ularni tanlov asosida tanlab olish toʻgʻrisidagi Nizomni ikki oy muddatda ishlab chiqsinlar, tasdiqlasinlar va belgilangan tartibda Oʻzbekiston Respublikasi Adliya vazirligida roʻyxatdan oʻtkazsinlar.

7. Oʻzbekiston Respublikasi Moliya vazirligi:

har yili davlat budjetini shakllantirishda Oliy va oʻrta maxsus taʼlim vazirligiga hamda Oʻrta maxsus, kasb-hunar taʼlimi markaziga akademik litseylar va kasb-hunar kollejlarining rahbar, pedagog va muhandis-pedagog kadrlarini tayyorlash, qayta tayyorlash, malakasini oshirish va attestatsiyadan oʻtkazish uchun zarur mablagʻlar ajratishni nazarda tutsin;

Oʻzbekiston Respublikasi Tashqi iqtisodiy aloqalar, investitsiyalar va savdo vazirligi, Tashqi ishlar vazirligi hamda Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi bilan birgalikda oʻquv asbob-anjomlari xarid qilish uchun jalb etilayotgan grantlar va xorijiy kreditlar mablagʻlaridan, shuningdek, oʻqituvchilarni rivojlangan mamlakatlarning yetakchi oʻquv markazlarida qayta tayyorlash va malakasini oshirish uchun ham foydalanishni nazarda tutsin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari H.S. Karomatov zimmasiga yuklansin.

Oʻrta maxsus, kasb-hunar taʼlimi tizimini shakllantirish va rivojlantirish akademik litseylar va kasb-hunar kollejlarini maxsus tayyorlangan yuqori malakali pedagog kadrlar bilan taʼminlashni, ular faoliyatining raqobat muhitini shakllantirishni nazarda tutadi.

Kadrlar tayyorlash milliy dasturini amalga oshirishning boshlangʻich bosqichida oliy maʼlumotli pedagog kadrlar tayyorlash hamda oʻqituvchilarni qayta tayyorlash va ularning malakasini oshirish muassasalari tarmogʻining ikki bosqichli tizimi tashkil etildi.

Mazkur dastur Kadrlar tayyorlash milliy dasturini amalga oshirishning sifat jihatidan yangi bosqichi vazifalaridan kelib chiqib islohotlar jarayonini chuqurlashtirishni nazarda tutadi, oʻrta maxsus, kasb-hunar taʼlimi muassasalarining rahbar hamda muhandis-pedagog kadrlarini tayyorlash, qayta tayyorlash va ularning malakasini oshirish tizimini oʻzgartirish va takomillashtirish yoʻli bilan respublika iqtisodiyoti tarmoqlari uchun kadrlarni oʻqitish va ularni tayyorlash sifatini oshirishga koʻmaklashadi.

Dasturning maqsadi – pedagog va muhandis-pedagog kadrlar tayyorlash, qayta tayyorlash va ularning malakasini muntazam oshirish yoʻli bilan akademik litseylar va kasb-hunar kollejlarini davlat taʼlim standartlari talablariga javob beruvchi yuqori malakali pedagoglar va muhandis-pedagog kadrlar bilan taʼminlash.

Asosiy vazifa – pedagog va muhandis-pedagog kadrlarni tayyorlash, qayta tayyorlash va ularning malakasini oshirish tizimining tuzilmasi va mazmunini takomillashtirish.

1. Oʻrta maxsus, kasb-hunar taʼlimi tizimi talablarini hisobga oluvchi, pedagog kadrlar tayyorlash, qayta tayyorlash va ularning malakasini oshirishning moslashuvchan taʼlim dasturlarini ishlab chiqish.

2. Pedagog va muhandis-pedagog kadrlarni tayyorlash, qayta tayyorlash va ularning malakasini oshirishga ixtisoslashtirilgan oliy taʼlim muassasalarining moddiy-texnika bazasini mustahkamlash.

3. Oliy taʼlim muassasalari, institutlar, fakultetlar hamda pedagog va muhandis-pedagog kadrlarni qayta tayyorlash va ularning malakasini oshirish markazlarining professor-oʻqituvchilar tarkibining kasb darajasini oshirish, xorijiy tillarni oʻrganishni kengaytirish.

4. Tayyorlash, qayta tayyorlash va malaka oshirishga kasb-hunar taʼlimining ishlab chiqarish bilan integratsiyalashgan (dual) tizimini joriy etish.

5. Pedagog va muhandis-pedagog kadrlarning kasb darajasini oshirish jarayoniga ilgʻor zamonaviy pedagogik texnologiyalarni joriy etish.

6. Pedagog va muhandis-pedagog kadrlar oldindan tayyorlanishi, qayta tayyorlanishi va ularning malakasi oshirilishini taʼminlaydigan quyidagi koʻrsatkichlarni har yili aniqlash:

pedagog va muhandis-pedagog kadrlarga boʻlgan mutlaq va qoʻshimcha ehtiyojning prognoz koʻrsatkichlari;

akademik litseylar va kasb-hunar kollejlarining pedagog va muhandis-pedagog kadrlarga boʻlgan ehtiyojini qoplash manbalari;

pedagog va muhandis-pedagog kadrlarni tayyorlash, qayta tayyorlash va ularning malakasini oshirish koʻrsatkichlari;

pedagog va muhandis-pedagog kadrlarni tayyorlash, qayta tayyorlash va ularning malakasini oshirish tizimini mablagʻ bilan taʼminlash manbalari.

Yangi pedagog va muhandis-pedagog kadrlar tayyorlash oliy taʼlimning davlat taʼlim standartlariga muvofiq, oʻquv rejalari hamda bakalavriat va magistratura dasturlari boʻyicha amalga oshiriladi.

Pedagogik va muhandis-pedagogik yoʻnalishdagi bakalavrlar tayyorlash umumiy taʼlim maktablarining 11-sinflari, akademik litseylar va kasb-hunar kollejlari bitiruvchilari orasidan, pedagogika mutaxassislari magistrlari esa – pedagogik yoʻnalishdagi bakalavriat bazasida amalga oshiriladi.

Umumtaʼlim fanlari oʻqituvchilarini tayyorlash oʻrta maxsus, kasb-hunar taʼlim muassasalarining ehtiyojiga muvofiq respublikaning bazaviy va yetakchi universitetlarida va pedagogika institutlarida amalga oshiriladi.

Kasb-hunar kollejlarining tarmoq yoʻnalishlari boʻyicha maxsus fanlar oʻqituvchilari va muhandis-pedagog kadrlar tayyorlash oliy taʼlim muassasalarining ixtisoslashtirilgan kafedralari va fakultetlarida amalga oshiriladi.

Umumiy rahbarlik, pedagog va muhandis-pedagog kadrlar tayyorlash tizimini takomillashtirish yoʻllari va usullarini belgilash, ular bazasida pedagog kadrlarni tayyorlash, qayta tayyorlash va ularning malakasini oshirish amalga oshiriladigan ixtisoslashtirilgan oliy taʼlim muassasalari roʻyxati, shuningdek ular faoliyatini muvofiqlashtirish, idoraviy qarashliligidan qatʼi nazar, Oʻzbekiston Respublikasi Oliy va oʻrta maxsus taʼlim vazirligiga yuklanadi.

Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi akademik litseylar va kasb-hunar kollejlari uchun pedagog va muhandis-pedagog kadrlar tayyorlash boʻyicha buyurtmachi vazifasini bajaradi, akademik litseylar va kasb-hunar kollejlarining pedagog va muhandis-pedagog kadrlarga boʻlgan ehtiyojini, ularni tayyorlashning miqdoriy va sifat koʻrsatkichlarini belgilaydi.

Pedagogik faoliyat uchun zarur boʻlgan bilimlar, oʻquv va malaka hajmi Oʻrta maxsus, kasb-hunar taʼlimi markazi tomonidan ishlab chiqiladigan, Oʻzbekiston Respublikasi Oliy va oʻrta maxsus taʼlim vazirligi, Mehnat va aholini ijtimoiy muhofaza qilish vazirligi bilan birgalikda tasdiqlanadigan malaka talablari bilan belgilanadi.

Pedagog va muhandis-pedagog kadrlar tayyorlash tizimini takomillashtirish Oʻzbekiston Respublikasi Oliy va oʻrta maxsus taʼlim vazirligi tomonidan quyidagilar vositasida amalga oshiriladi:

oʻrta maxsus, kasb-hunar taʼlimi davlat taʼlim standartlarini hisobga olgan holda oliy taʼlimning davlat taʼlim standartlari asosida oʻquv rejalari va dasturlarini yangilash;

pedagog va muhandis-pedagog kadrlar tayyorlashning ilmiy-metodologik asosini rivojlantirish va takomillashtirish;

oʻrta maxsus taʼlim muassasalarining oʻquv bazasidan va ishlab chiqarish korxonalarining ilgʻor moddiy-texnika bazasidan foydalanish yoʻli bilan pedagog va muhandis-pedagog kadrlar tayyorlashning ishlab chiqarish bilan integratsiyalashgan (dual) tizimini joriy etish;

zamonaviy axborot texnologiyalari va Internet tarmogʻi imkoniyatlaridan foydalangan holda oʻqitishning interaktiv metodlarini joriy etish;

pedagog va muhandis-pedagog kadrlarni tayyorlash, qayta tayyorlash va ularning malakasini oshirishga ixtisoslashtirilgan oliy taʼlim muassasalari professor-oʻqituvchilar tarkibini bosqichma-bosqich attestatsiyadan oʻtkazish.

Pedagog kadrlarni qayta tayyorlash – oʻrta maxsus, kasb-hunar taʼlimining davlat taʼlim standartlariga va zamonaviy talablar asosida ishlab chiqilgan oʻquv dasturlariga muvofiq pedagog kadrlarning kasb bilimlari, oʻquv va malakasini oldindan yangilash.

Qayta tayyorlash oʻrta maxsus, kasb-hunar taʼlimining davlat taʼlim standartlarini, yangi pedagogik texnologiyalarni oʻrganishni, zamonaviy texnikani va ishlab chiqarish texnologiyalari rivojlanishi sohasidagi bilimlarni chuqurlashtirishni, xorijiy tillarni oʻrganishni taqozo etadi.

Umumtaʼlim maktablaridan, kasb-hunar texnika bilim yurtlari va oʻrta maxsus oʻquv yurtlaridan boʻshab qoladigan pedagog va muhandis-pedagog kadrlar qayta tayyorlash bilan qamrab olinadi. Qayta tayyorlash muddatlari pedagoglarning kasb malakasi darajasiga qarab buyurtmachi tomonidan belgilanadi.

Kadrlar malakasini oshirish — oʻrta maxsus, kasb-hunar taʼlimining davlat taʼlim standartlariga muvofiq kadrlarning kasb bilimlari, oʻquv va malakasini chuqurlashtirish va takomillashtirish, yuksak pedagogik mahoratni shakllantirishga koʻmaklashuvchi fanlar boʻyicha zamonaviy bilimlar berish.

Oʻrta maxsus, kasb-hunar taʼlim muassasalarining pedagog va muhandis-pedagog kadrlari malakasini oshirish davriyligi ushbu muassasalar ehtiyojiga qarab belgilanadi. Tinglovchilarni oʻqitish muddatlari davlat talablariga muvofiq va ularning kasb tayyorgarligi darajasi hisobga olingan holda belgilanadi.

Pedagog kadrlarni qayta tayyorlash va ularning malakasini oshirish Oʻrta maxsus, kasb-hunar taʼlimi markazining buyurtmasi boʻyicha institutlarda, oliy taʼlim muassasalarining fakultetlarida va ixtisoslashtirilgan markazlarida amalga oshiriladi.

Qayta tayyorgarlikdan oʻtgan kadrlarning bilim darajasi buyurtmachi tomonidan qoʻyiladigan malaka talablariga muvofiq boʻlishi kerak.

Akademik litseylar va kasb-hunar kollejlarining pedagog va muhandis-pedagog kadrlari malakasini oshirish shakllaridan biri – rivojlangan xorijiy mamlakatlarning taʼlim va trening markazlarida tajriba orttirishni rivojlantirish davom ettiriladi. Bunda “Ustoz” jamgʻarmasi va ushbu maqsadlar uchun jalb etiladigan xorijiy grantlar va kreditlar hisobiga tajriba orttirishni tashkil etishga asosiy eʼtibor beriladi.

Xorijiy mamlakatlarning trening markazlari barpo etish va ular faoliyatini tashkil etish tajribasi asosida kasb-hunar kollejlarida taʼlimning innovatsiya usullarini oʻrganish boʻyicha tayanch markazlari tashkil etiladi.

Umumtaʼlim fanlari oʻqituvchilarini qayta tayyorlash va ularning malakasini oshirish oʻrta maxsus, kasb-hunar taʼlim muassasalarining ehtiyojiga muvofiq yetakchi va bazaviy universitetlarda, maxsus fanlar va muhandis-pedagog kadrlarni qayta tayyorlash va ularning malakasini oshirish esa – oliy taʼlim muassasalarining ixtisoslashtirilgan kafedralari, fakultetlari va markazlarida amalga oshiriladi.

Elektron pochta va Internet tarmogʻi qoʻllanilgan holda pedagog kadrlarni masofadan turib qayta tayyorlash va ular malakasini oshirish keng rivojlanadi.

Umumiy rahbarlik qilish, pedagog va muhandis-pedagog kadrlarni qayta tayyorlash va ularning malakasini oshirish tizimini takomillashtirish yoʻllari va usullarini belgilash, ular bazasida kafedralar, fakultetlar va ixtisoslashtirilgan malaka oshirish markazlari tashkil etiladigan oliy taʼlim muassasalari roʻyxati, shuningdek ular faoliyatini muvofiqlashtirish Oʻzbekiston Respublikasi Oliy va oʻrta maxsus taʼlim vazirligiga yuklanadi.

Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi buyurtmachi vazifasini bajaradi hamda akademik litseylar va kasb-hunar kollejlarining pedagog va muhandis-pedagog kadrlarini qayta tayyorlash va ularning malakasini oshirishning miqdoriy va sifat koʻrsatkichlarini belgilaydi.

Akademik litseylar va kasb-hunar kollejlarining pedagog va muhandis-pedagog kadrlarini qayta tayyorlash va ularning malakasini oshirish boʻyicha oʻquv rejalari va dasturlar oliy taʼlim muassasalari tomonidan ishlab chiqiladi hamda Oʻrta maxsus, kasb-hunar taʼlimi markazi bilan kelishiladi.

Pedagog va muhandis-pedagog kadrlarni qayta tayyorlash tizimini takomillashtirish Oliy va oʻrta maxsus taʼlim vazirligi tomonidan quyidagilar vositasida amalga oshiriladi:

malaka oshirish va kadrlarni qayta tayyorlash tizimining ilmiy-metodologik asosini kuchaytirish va davlat talablarini doimiy ravishda yangilab borish;

akademik litseylar va kasb-hunar kollejlarida dars berishning zamonaviy usullari va shakllariga oʻqitishga qaratilgan variantli oʻquv rejalari va tabaqalashtirilgan oʻquv dasturlarini ishlab chiqish va sinovdan oʻtkazish;

institutlar, kafedralar, fakultetlar va malaka oshirish markazlarining professor-oʻqituvchilar tarkibini attestatsiyadan oʻtkazish;

malaka oshirish kurslari tinglovchilarining amaliy mashgʻulotlari tayanch oʻrta maxsus, kasb-hunar taʼlim muassasalarida, kasbiy oʻqitish mutaxassislari va maxsus fanlar oʻqituvchilarining amaliy mashgʻulotlari esa – ishlab chiqarishning yangi texnologiyalari qoʻllaniladigan va zamonaviy asbob-uskunalar bilan jihozlangan ilgʻor ishlab chiqarish korxonalarida oʻtkazilishini tashkil etish;

ilgʻor xorijiy tajribadan foydalangan holda kasb-hunar kollejlari huzurida taʼlimning innovatsiya usullarini oʻrganish boʻyicha mintaqaviy tayanch markazlari tashkil etish;

zamonaviy axborot texnologiyalaridan foydalanilgan va Internet tarmogʻi qoʻllanilgan holda qayta tayyorlash va malaka oshirish kurslari tinglovchilarini masofadan turib oʻqitish tizimi va mexanizmini tashkil etish.

Prognoz hisob-kitoblarga koʻra yangi va qayta taʼmirlangan oʻrta maxsus, kasb-hunar taʼlimi muassasalari ishga tushirilishi davomida pedagog va muhandis-pedagog kadrlarga boʻlgan mutlaq ehtiyoj 2010-yilda 167 ming kishidan koʻproqni tashkil etadi (1-jadval*).

2010-yilgacha tashkil etiladigan 178 akademik litseyning pedagog kadrlarga ehtiyoji 8,4 ming kishini tashkil etadi, 1689 kasb-hunar kolleji uchun zarur boʻlgan oʻqituvchilar soni esa 158,8 ming kishigacha oʻsadi (2, 3 va 4-jadvallar)*.

Ehtiyojni qoplash uchun kelgusida 2010-yilgacha oʻrta maxsus, kasb-hunar taʼlimi tizimi uchun pedagog va muhandis-pedagog kadrlar tayyorlash hajmlarini har yili oshirib borish kutiladi. Hisob-kitoblar boʻyicha akademik litseylar va kasb-hunar kollejlarini pedagog kadrlar bilan toʻliq taʼminlash uchun 10 yil ichida 101,2 ming mutaxassis tayyorlanishi kerak, yaʼni oliy taʼlim muassasalarida pedagog va muhandis-pedagog yoʻnalishlari boʻyicha abituriyentlar qabul qilish har yili 9-10 ming kishigacha yetkaziladi (5-jadval)*.

Bundan tashqari, umumtaʼlim maktablari, oʻrta maxsus oʻquv yurtlari va kasb-hunar bilim yurtlaridan boʻshab qoladigan 77 mingdan koʻproq oʻqituvchi akademik litseylar va kasb-hunar kollejlariga jalb etiladi. Oliy taʼlim muassasalari oʻqituvchilarini pedagogik faoliyatga, ayniqsa akademik litseylarga jalb etish davom ettiriladi. Har yili 16 mingdan 56 minggacha oʻqituvchi qayta tayyorlash va malaka oshirish bilan qamrab olinadi (6 va 7-jadvallar)*.

2001—2010-yillarda akademik litseylar va kasb-hunar kollejlarining pedagog va muhandis-pedagog kadrlarga boʻlgan ehtiyojini taʼminlashning hisoblab chiqilgan balansi 8-jadvalda* berilgan.

Xalqaro hamkorlikning ustuvor yoʻnalishlarini amalga oshirish, ilmiy-pedagog kadrlarni va pedagogik tajribani ayirboshlashni kengaytirish maqsadida mazkur Dasturning maqsadlari va asosiy vazifalarini amalga oshirish doirasida Oʻzbekiston Respublikasi Oliy va oʻrta maxsus taʼlim vazirligi hamda Oʻrta maxsus, kasb-hunar taʼlimi markazi tomonidan:

oliy oʻquv yurtlarining rivojlangan mamlakatlarning yetakchi universitetlari bilan xalqaro hamkorligi amaliyoti kuchaytiriladi, Internet tarmogʻi boʻyicha ular bilan elektron aloqa oʻrnatiladi;

yetakchi xorijiy mamlakatlarning ilmiy-pedagogik salohiyatini akademik litseylar va kasb-hunar kollejlari uchun pedagog va muhandis-pedagog kadrlar tayyorlash jarayoniga jalb etish amaliyoti kengaytiriladi;

oliy va oʻrta maxsus, kasb-hunar taʼlimi muassasalarining kafedralari mudirlari va oʻqituvchilarining xorijda tajriba orttirishlari faollashtiriladi, ushbu maqsadlar uchun xalqaro moliyaviy institutlarning grantlari va imtiyozli kreditlari jalb etiladi;

institutlar, fakultetlar va malaka oshirish markazlari professor-oʻqituvchilari tarkibining, akademik litseylar va kasb-hunar kollejlari rahbarlari va pedagogik kadrlarining “Ustoz” jamgʻarmasi orqali xorijda tajriba orttirishlari hajmlari koʻpaytiriladi.

Pedagog va muhandis-pedagog kadrlarni tayyorlash, qayta tayyorlash va ularning malakasini oshirish mazmunini takomillashtirish oliy taʼlim muassasalari, kafedralar, fakultetlar va markazlarning oʻquv va moddiy-texnika bazasini mustahkamlash bilan birgalikda olib boriladi.

Ushbu maqsadlarda Oʻzbekiston Respublikasi Oliy va oʻrta maxsus taʼlim vazirligi tomonidan:

institutlar, kafedralar, fakultetlar va oliy taʼlim muassasalarining malaka oshirish markazlari moddiy-texnika bazasi darajasi va holati oʻrganiladi hamda ularning oʻquv-laboratoriya va maxsus asbob-uskunalar bilan jihozlanishini yaxshilash chora-tadbirlari dasturi tayyorlanadi;

oʻqitish jarayoniga kompyuter texnikasini, audio-video materiallarni joriy etish va Internet tarmogʻiga ulanish chora-tadbirlari koʻriladi;

multimediy oʻqitish dasturlari ishlab chiqiladi;

pedagog kadrlarni tayyorlash, qayta tayyorlash va ularning malakasini oshirishning zamonaviy masofadan turib taʼlim berish tizimini joriy etish chora-tadbirlari koʻriladi;

oliy taʼlim muassasalarini jihozlashga qoʻshimcha grantlar va imtiyozli kreditlar jalb etiladi, shuningdek budjetdan tashqari mablagʻlardan samarali foydalaniladi.

Pedagog va muhandis-pedagoglar tayyorlash, qayta tayyorlash va ularning malakasini oshirish dasturi:

respublika va mahalliy budjetlarning har yilgi parametrlarida ushbu maqsadlar uchun nazarda tutiladigan budjetdan ajratiladigan mablagʻlar;

oliy taʼlim muassasalarining toʻlov-kontrakt asosida oʻqitishdan tushadigan mablagʻlari, shuningdek budjetdan tashqari boshqa daromadlari;

homiylar va taʼlim muassasalarining vasiylari mablagʻlari;

asbob-uskunalar sotib olish, taʼlim jarayonini takomillashtirish, shuningdek oʻqituvchilarni tayyorlash, qayta tayyorlash va ularning malakasini oshirish uchun jalb etiladigan grantlar va xorijiy kreditlar mablagʻlari;

“Ustoz” jamgʻarmasi mablagʻlari;

amaldagi qonun hujjatlari shartlariga zid boʻlmagan boshqa manbalar hisobiga mablagʻ bilan taʼminlanadi.

Izoh: aniq ehtiyojlarga muvofiq Roʻyxatga Oʻzbekiston Respublikasi Oliy va oʻrta maxsus taʼlim vazirligi tomonidan oʻzgartirishlar kiritilishi mumkin.