Vazirlar Mahkamasi qaror qiladi:

1. Oʻzbekiston Respublikasi Madaniyat vazirligi huzuridagi Millatlararo madaniyat markazi Respublika baynalmilal madaniyat markaziga aylantirilsin. SSSR Xalqlari doʻstligi muzeyi tugatilib, uning bazasida Respublika baynalmilal madaniyat markazining tarkibiy boʻlinmasi sifatida Oʻzbekiston Xalqlari doʻstligi uyi barpo etilsin.

2. Respublika baynalmilal madaniyat markazi va uning apparati tuzilmasi toʻgʻrisidagi ilova qilinayotgan Nizom tasdiqlansin.

3. Respublika baynalmilal madaniyat markazi xodimlarining lavozim maoshlari SSSR Ministrlar Sovetining “Davlat boshqaruv organlari apparati xodimlari mehnatiga haq toʻlashni takomillashtirish haqida” 1989-yil 29-sentabrdagi 803-son qarori yuzasidan Oʻzbekiston SSR Ministrlar Sovetining 1989-yil 28-noyabrdagi 355-son qaroriga muvofiq belgilansin.

4. Oʻzbekiston Respublikasi Madaniyat vazirligi bir oy muddat ichida Respublika baynalmilal madaniyat markaziga quyidagilarni oʻtkazsin:

millatlararo madaniyat markazi va SSSR Xalqlari doʻstligi muzeyi xodimlarini saqlash xarajatlari moddalari boʻyicha budjetdan ajratiladigan mablagʻlar;

SSSR Xalqlari doʻstligi muzeyining binosi, inventari, asbob-uskunalarini oʻz balansidan Respublika baynalmilal madaniyat markazi balansiga.

SSSR Xalqlari doʻstligi muzeyidagi muzey fondi, hamma eksponatlar va balansdagi hamda Respublika baynalmilal madaniyat markaziga oʻtkazilmagan boshqa moddiy boyliklar belgilangan tartibda respublika tasarrufidagi boshqa muzeylarga oʻtkazilsin.

5. Oʻzbekiston Respublikasi Moliya vazirligi Respublika baynalmilal madaniyat markaziga bir yarim smenali rejim bilan ishlaydigan bitta yengil avtomobilni saqlashga limit ajratsin.

1. Respublika baynalmilal madaniyat markazi (bundan keyin Markaz deb ataladi) mustaqil muassasa boʻlib, madaniy markazlarning faoliyatiga rahbarlik qiladi hamda Oʻzbekistonda yashovchi milliy guruhlarning madaniy ehtiyojlarini oʻrganish va qondirishda davlat organlari va jamoat tashkilotlariga koʻmaklashadi. Markazning amaliy ishi Oʻzbekiston Respublikasi Prezidenti Apparatining millatlararo munosabatlar boʻlimi tomonidan yoʻnaltirib boriladi.

2. Markazning maqsadi Oʻzbekiston Respublikasida yashovchi milliy guruhlarning xilma-xil milliy, madaniy-maʼnaviy va til borasidagi ehtiyojlarini aniqlash, oʻrganish, ularning urf-odatlari, anʼanalari, marosimlarini rivojlantirishga koʻmaklashishdan iboratdir.

3. Markaz oʻz faoliyatida Oʻzbekiston Respublikasining qonunlariga, Oʻzbekiston Respublikasi Oliy Kengashining qarorlariga, Oʻzbekiston Respublikasi Prezidentining va Oʻzbekiston Respublikasi Prezidenti huzuridagi Vazirlar Mahkamasining farmonlari va farmoyishlariga, mazkur Nizomga va boshqa meʼyoriy hujjatlariga amal qiladi.

4. Respublika baynalmilal madaniyat markazi yuridik shaxs boʻlib, oʻz nomi yozilgan gerbli muhrga va Oʻzbekiston Respublikasi Davlat bankida oʻzining hisob-kitob schyotiga ega boʻladi.

5. Markaz tarkibiga SSSR Xalqlari doʻstligi muzeyi bazasida barpo etiladigan Oʻzbekiston Xalqlari doʻstligi uyi kiradi. Uning vazifalari respublikada yashovchi xalqlar doʻstligini, milliy tuygʻular, madaniy anʼanalarni chuqur hurmat qilish asosida bir-birini tushunish va bir-biriga ishonchni targʻib qilishdan, millatlararo munosabatlarni uygʻunlashtirishga koʻmaklashishdan iboratdir. Ularni amalga oshirish uchun Oʻzbekiston Xalqlari doʻstligi uyida milliy tillarni oʻrgatish boʻyicha ilmiy-metodik kabinet, baynalmilal Doʻstlik klublari, kutubxona hamda SSSR xalqlari tillaridagi adabiyotlar, ittifoqdosh respublikalarning davriy nashrlari fondi boʻlgan oʻqish zali, kinolektoriyli kinozal, lektoriylari boʻlgan muzikali mehmonxona, SSSR xalqlari sanʼati asarlarini, xalq ijodiyotini namoyish qiladigan koʻrgazma zali boʻladi.

6. Markazning asosiy vazifalari quyidagilardan iborat:

milliy va baynalmilal markazlarga amaliy va metodik yordam koʻrsatish hamda ularning faoliyatini muvofiqlashtirib va nazorat qilib borish;

milliy anʼanalar, urf-odatlar va marosimlarni qayta tiklash va rivojlantirishga, respublika hududida yashovchi xalqlar va milliy guruhlarning madaniyati va maʼnaviy qadriyatlarini har tomonlama rivojlantirishga koʻmaklashish;

ittifoqdosh respublikalar va xorijiy mamlakatlarning milliy va baynalmilal madaniy markazlari bilan aloqalar va hamkorlikni oʻrnatish va rivojlantirish;

Oʻzbekiston Respublikasida yashovchi millatlar va elatlarning baynalmilal jipslashuviga, millatlararo munosabatlarning uygʻunlashuviga koʻmaklashish.

7. Oʻzbekiston Respublikasi Prezidenti Apparati millatlararo munosabatlar boʻlimining tavsiyasiga binoan Markazga Oʻzbekiston Respublikasi Prezidenti huzuridagi Vazirlar Mahkamasi tomonidan tayinlanadigan direktor rahbarlik qiladi.

Markaz direktori:

Markazning hamma ishlariga rahbarlik qiladi, ommaviy, madaniy-maʼrifiy ishlar, oʻtkazilayotgan tadbirlar sifati, ularning gʻoyaviy mazmuni va badiiy saviyasi uchun javob beradi;

Markazning joriy va istiqbol ish rejalarini tuzadi hamda ularning bajarilishini tashkil etadi;

tasdiqlangan smetaga muvofiq moliya va xoʻjalik faoliyatini amalga oshiradi, pul mablagʻlarini boshqaradi;

davlat va jamoat tashkilotlarida Markaz nomidan vakillik qiladi, bitimlar va shartnomalar tuzadi;

binodan texnikaviy foydalanish, yongʻinga qarshi va soqchilik tizimi muntazam ishlashini taʼminlash uchun javob beradi;

Markaz faoliyati bilan bogʻliq boʻlgan eng muhim masalalarni yuqori organlarning koʻrib chiqishi uchun taqdim etadi.

8. Respublika baynalmilal madaniyat markazi huzurida jamoatchilik kengashi ishlaydi, uning tarkibiga milliy madaniyat markazlarining, jamoat va ijodiy tashkilotlarning vakillari kiradi.

Markaz direktori ayni vaqtda kengash raisi hisoblanadi.

9. Markazning jamoatchilik kengashi:

Oʻzbekistonda yashovchi turli milliy guruhlarning milliy-madaniy talab va ehtiyojlarining koʻproq qondirilishiga koʻmaklashadi, baynalmilal va milliy madaniy markazlarning siyosiylashuvi va tijorati bundan mustasno;

Markaz faoliyatiga ziyolilar, ishchilar, xizmatchilar va yoshlarni jalb etadi;

Markaz faoliyatining turli yoʻnalishlari boʻyicha shoʻbalar, komissiyalar, guruhlar tuzadi;

aholi turli guruhlarining madaniy ehtiyojlarini va oʻtkaziladigan tadbirlarning samaradorligini oʻrganadi;

baynalmilal tarbiya, havaskorlik ijodiyotini rivojlantirish, aholining hordiq chiqarishini tashkil etish, Markaz ishini takomillashtirishga doir tadbirlarni tayyorlash va oʻtkazishda qatnashadi;

Markazning ish rejasini, vaqtinchalik koʻrgazmalar dasturini, teatrlashtirilgan tomoshalarning, ommaviy mavzuli tadbirlarning ssenariylarini tasdiqlaydi;

Markaz direktori, boshqa xodimlarning, milliy va baynalmilal markazlar rahbarlarining yillik va moliyaviy hisobotlarini eshitadi;

Markazning boshqa muassasalar va jamoat tashkilotlari bilan olib boradigan ishlarini muvofiqlashtiradi;

Markazning moddiy-texnika bazasini mustahkamlashga koʻmaklashadi.

Jamoatchilik kengashining qarorlari va tavsiyalari direktorning buyrugʻi bilan amalga oshiriladi.

10. Respublika baynalmilal madaniyat markazi davlat budjeti hisobidan mablagʻ bilan taʼminlanadi. Markaz, shuningdek, turli xil pulli tadbirlar oʻtkazish hisobiga tushadigan maxsus mablagʻlarga ega boʻlishi mumkin. Bu mablagʻlar Oʻzbekiston Respublikasi qonunchiligi bilan belgilangan tartibga muvofiq sarflanadi.

11. Markaz xodimlarining soni Oʻzbekiston Respublikasi Prezidenti huzuridagi Vazirlar Mahkamasi tomonidan tasdiqlanadi.

12. Markaz maqomini oʻzgartirish va uni tugatish Oʻzbekiston Respublikasi Prezidenti huzuridagi Vazirlar Mahkamasi qarori bilan belgilangan tartibda amalga oshiriladi.

Rahbariyat

Oʻzbekiston xalqlari Doʻstlik uyi

Milliy madaniyat markazlari bilan ishlash boʻlimi

Yoshlar va bolalar bilan ishlash boʻlimi

Ekspozitsiya-koʻrgazmalar boʻlimi

Texnika boʻlimi